Isaías 64:4 - Dios Iwene

⁴ Jau chuluwo̧, ökwödanöbo̧, jo̧banö tjo̧'wo wana̧ladönö pjabato̧ma bakwo̧bi deobe. Damötjö baikwö bajalenö, la'akatjöda a̧ja̧kwajiböködösa, la'akatjöda bakwo̧bi ölakiyunö a̧ja̧kwinokobe, ja̧danö bakwo̧bi öbajalenö edinokobe, ökwöjayo̧ ösödadönö otiwanö pjabato̧nöma.

Isaías 64:4 Referans Kwoze

Santiago 5:7

Jo̧kwaobetjö̧ chö̧ja̧wo̧dö, juna̧ladöma ökwödönö usula kwemawaduwobö wetjijayonö kwo̧'wo̧duwi 'dibachibö ja̧nö kwite'ada̧laduwo Duluwo̧ Jesucristo yemidanö ichenanö kabatö. Wanedö yötawaduwakwö, batjo junawanö wanedöma: Bakwo̧ batjo ujunaja̧ ikena ite'ada̧lobe ujunaja̧ma pokwobö, ju'wi möle otiwanö tjukwakwa̧ma. Ite'ada̧lobe ajayinö ojwiyo o̧bakwa̧ma. Ja̧danö, ite'ada̧lobe jemi ikenabi ojwiyo o̧bakwa̧ma. Jo̧bama ite'ada̧li̧da ite'ada̧lobe. Omukwatokobe, Ayö lekwobe, dakwö chite'ada̧la, Chite'ada̧lökena, jö̧ba̧lö. Jejenömaökö. Jo̧bama te'ada̧löda ite'ada̧lobe, öpödawökönö.

Isaías 25:9

—Ja̧ möle baikwö yötja̧lakwedö Isabenö Jo̧nö: –Bite Isabenö Jo̧ Diosda, dösödökwe Diosma. Jo̧banö o̧'wo wana̧lö, pjaatakwa̧ diteada̧lajabe, -Isabenö ökwödönö pjaatakwo̧, -jö̧ba̧lö, ja̧danö otiwanö pjaatajabe. Dösödökwe Isabenö Jo̧ Diosma jo̧bada, jo̧ba pjaatakwa̧ diteada̧lajabe, jadanö babe ökwödönö pjaatajobetjö̧, do̧'wo ösöwachibanö dösödaduwo, -Diosma otiwanö dö̧ji̧binö pjaatajabe, –jö̧ba̧lö yötja̧lakwedö ja̧ möle.

Génesis 49:18

Dannö yöawaja̧ ikena Jacobma Isabenö Jo̧ Diosnö jwöbijetö: —Isabenö Jo̧ Dios, ökwönöda cho̧'wo wa̧na̧lö, chöpöjöjödötjö chö̧jibanö pjakatakwa̧ te'ada̧lo̧sa— jwöbijetö Isabenö Jo̧ Diosnö ösödö.

Juan 14:3

Jau, kwuju̧kwaduwakwa̧ omudawö chujunobö chi̧'yakobe yemidanö bai ichö, ökwödönö öbibö chitebobe chȩwa̧jobö, ökwödöma ötjö chö̧jobe kwö̧jaduwobö ba̧kwȩlö̧jatebö.

Hebreos 11:16

Tjeachakwawa öpöjödö, jwaikwöda 'ya̧nö böjȩnö tjitebotjö o̧penönö otiwemi omukwatö tjite'ada̧linobe, tjitebo baibakwemi. Mölejȩbe Dioskwö tjö̧ji̧ tjitebo baibakwemima tjo̧'wo̧ ösöwanö ja̧nö omukwatö tjite'ada̧linobe. Jejenö omukwatö tjite'ada̧liökwe Diosma jwiinö o̧'wo̧ ösöwanö ö̧jinobe. Ja̧danö, o̧'wo̧ ösöwi̧ i̧sebö jobadö mölejȩbe tjitebo otidinobe, iteda ö̧jobe tjö̧jobö.

1 Timoteo 3:16

Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.

Mateo 25:34

Ikenama ötjö la'aka luwo̧ma, chöwaisobekwöchobe ju̧kwadönö yötawocha: Ökwödöma kwo̧'wo̧ ösöwanö Chabe'do pjaatawö̧ja. Ina böjȩ otidapji, Dios la'aka luwo̧ ö̧jakwa̧ otidö ujuninobe, ökwödö jobe kwö̧jaduwobö, jo̧kwajabetjö̧ babema ichö tebachaduwi.

Isaías 30:18

Jo̧kwaijayonö jobekwö baledoböma ösödö̧kö̧ Isabenö Jo̧ma. Jo̧bama o̧'wo 'dibachibö, lekwe teada̧lo̧, ökwödönö dösölö̧jinö pjaatobö ösödobetjö̧. Iteda ujulu i̧sȩbö, ökwödönö lȩlöjinö edobö ösödo̧ chömöledö. Jau chömöledö, Isabenö Jo̧ Diosma, otiwanö ja̧o jö̧a̧li̧danö ja̧bö jo̧, ja̧danö okobe deinö jo̧banö tjo'wo wana̧lö teada̧ladönö isabenö otiwanö pjabato̧, jo̧ba yöawi̧ kwa̧ja̧kwaduwo chömöledö.

Romanos 8:19

Jau chömöledö, ju'winö Diosma ökwödönö kabebö i̧sebakobe, Bidöma ötjöda chi̧tji̧mu, jö̧ba̧lö. Jejenö i̧sebenama, jwiinö otiwakobe chömöledö. Ja̧danö, okobe jwiinö Dios otidina jawama, böjȩbi, böjȩ jawabi ösödinö omukwatö te'ada̧lobe ichejekwa, ja̧ möle badekwachobö.

1 Juan 4:10

Chö̧ja̧wo̧dö, Diosma ökwödönö jwiinö ile niebobetjö̧ iteda itji̧nö weinobe ökwödönö dusula dumusidi̧ imidawobö. Jau chö̧ja̧wo̧dö, jejenö Diosma i̧sebinobe inesö ile niekwama. Jejenö Diosma jojodö ile nitjebi̧tjö o̧penönö ile niebi̧ i̧sebinobe. Jau chö̧ja̧wo̧dö, Diosda inesö ile niebi̧ i̧sebo̧ma.

1 Corintios 1:7

Jau chömöledö, okobe jwiinö ja̧bö tjö̧jo jö̧ba̧lö Dios iteda i̧tji̧munö iyi̧ma, Diosma ökwödönö iyinobe, ja'yubebi junibökönö. Jo̧kwajabetjö̧, Duluwo̧ Jesucristo yemidanö ichakwa̧ möle badekwachobö te'ada̧lö kwö̧jaduwonö, okobe jwiinö ja̧ jawa juna̧ladöja.

Lucas 2:25

Ja̧ mölema, bakwo̧ Simeón mikwo̧ma Jerusalénnö ö̧jinobe. Jo̧bama otiwanö ja̧bö ö̧jinobe, ja̧danö jwaikwöda Diosnö ösödö ö̧jinobe. Ja̧danö Dios weakwo̧ jö̧a̧linökwenö ösödinö te'ada̧lö ö̧jinobe, Juluwanö ichowe, juluwanö ökwödö Israel jojodönö dö̧jibinö pjaatowe, jö̧ba̧lö. Dios O̧'wo̧ Luwo̧ma Simeonkwö ö̧jinobe,

1 Tesalonicenses 1:10

Ja̧danö, Dios Itji̧ mölejȩtjö ichakwa̧ te'ada̧lö ju̧kwadötö jö̧ba̧lö yötjawobe. Jau chömöledö, Diosma iteda Itji̧ Jesúsnö woawatjö tjeachajinö ja̧inobe, ja̧danö jo̧ba Jesúsda Dios lȩebakwa̧tjö dö̧jibinö ja̧bo̧ma.

Isaías 40:31

Jo̧kwaijayonö Isabenö Jo̧nö tjo̧'wo wana̧ladöma, Dios pjaatawö̧ yemidanö tjujuluwachibakwedö. Wanedö yötawa, wiyuli möakwö kabekwö köi̧danö, tjujuluwachibanö katjekakwedö, ja̧danö ödö ö'ötjakwawijayonö, tji̧me'dawachibökakwedö, ja̧danö ödö kwetjachijayonö, 'dö̧tjachibökakwedö.

Isaías 66:8

Jobekwö baledi̧ma, dakwö baledobejö? Bakwo̧bi jobekwö juluwanö tjemobema edinaji̧? Edajiböködö jobekwöma, jö̧tö? Ja̧danö, bakwöta möleda, tjitebosaso ba̧jȩkwaso juluwanö batjibenaji̧? Juluwanö babiböködö, lekwe o̧biya ba̧jȩkwachibajadö, ba̧jȩkwaso babibadö, jö̧tö? Jo̧kwaijayonö, Jerusalen jitji̧munö jemenama juluwanöda jemakobe, ina niakwa̧ abönö jemakobe.

Isaías 59:12

Chuluwo̧ Dios, jobekwö usula emawö ja̧dösa ökwödö israel jojodöma, ökwödö sulabenö ja̧di̧ma, kwöba a'otjö ba̧jȩkwobetjö̧. Jau chuluwo̧, kwöba a'o ja̧nö, jwaikwöda sulabenö ja̧bö ju̧kwadösa, ja̧danö sulabenö ja̧di̧ma öwaetjöda öwawinö i̧sȩkwobe, kwöba a'otjö wene dujuna̧li̧ma. Ökwödöma sulabenö ja̧daja̧ waisadösa chuluwo̧,

Daniel 9:5

Chuluwo̧ Dios, ökwöma isabenö otiwanö ja̧köbijayonö, ökwödö Israel jojodöma sulabenö ja̧dajabe. Isabenö jwiinö suli̧ jawa ja̧bö, ökwö weköbi̧ kadatibajabe, ökwö ja̧bö dö̧jobö weköbi̧ma a̧ja̧kwökönö.

Daniel 9:8

Jau chuluwo̧, inesö la'aka duluwedöbi, ju'wedö la'aka duluwedöbi, da'dödöbi okobe deinö kwöba a'otjö dötabakwobö jo̧be, isabenö kwöba a'otjö kwöpöjödi̧ jawa, taba lö̧ji̧ jawa sulabenö ja̧dobetjö̧.

Daniel 9:15

Ökwöma isabenö otiwanö ökwödönö pjabato̧ja chuluwo̧ Dios, ökwöda kwujulunö Egypto nijitjö ladebobö pjakatinobe, ja̧danö jejenö pjabatö okobe deinö kwujulu tjöwaisachibobö kwi̧sebinobe, ja̧ möletjö jamatö baikwö bajalenö okobe deinö kwujulu tjöwaisobe. Ökwöma otiwanö pjabato̧ja chuluwo̧, ja̧danö ökwödöma sulabedösa, suli̧ jawa sulabenö ja̧badösa.