Isaías 63:4 - Dios Iwene

⁴ Jau, tjitebotenia jojodö chömöledö israel jojodönö sulabenö ja̧tji̧ omukwatö, balekwa mikwa lȩtebobö jö̧ta̧lijatö, ja̧danö chömöledö tjö̧jibinö pjatatakwa̧ o̧ba ida̧ökö badekwachajabe.

Isaías 63:4 Referans Kwoze

Isaías 34:8

Jau chömöledö, Edom niji jojodöma isabenö sulabenö ja̧tjinobe Sion mösa'o ju̧kwadönö, ja̧danö jobekwö sulabenö ja̧tji̧ökwe, balekwa mikwa jobadönö lȩebakwo̧ Isabenö Jo̧ma, ja̧danö yöta̧laja̧ jawa baledakwa̧ mölȩ ida̧ökö badedö ujunajabe.

Isaías 61:2

Jau, Isabenö Jo̧ jojodönö ösödö pjaatakwa̧ o̧ba badekwachaja̧ yötawobö weinobe, ja̧danö duluwo̧ Dios dameakwö lȩebakwa̧ möle badekwachaja̧ yötawobö, ja̧danö okobe deinö budekwadönö tjo̧'wo ösöwachibanö pjatatobö weinobe.

Isaías 35:4

Tjomajadenö yebabinö ju̧kwadönö yökawaduwo, —Kwujuluwaduwachibanö, yebabökönö kwö̧jaduwo, chömöledö. Jau chömöledö, kwösödaduwökwe Diosma isabenö pjabatö ichakwo̧, öpöjojodö sulabenö ja̧tjiökwe, balekwa mikwa dameakwö ichakwo̧, lȩebobö. Jau chömöledö, kwöpöjojodöduwitjö kwö̧jibaduwanö, otiwanö ichakwo̧ Diosma, kwujuluwachibaduwo, —jö̧ba̧lö ökwödötjö tjomajadenö yebabinö ju̧kwadönö tjujuluwachibanö yökawaduwo.

Apocalipsis 18:20

Ja̧danö chömöledö, ötjöma mölejȩbe ju̧kwadönö yöta̧lijatö, Kwo̧'wo̧duwi ösöwanö ja̧duwi, jö̧ba̧lö. Ja̧danö, ökwödö Dios ömöledö babibinadönöbi, Jesús webawedönöbi, Dios yöawi̧ yöbawinadönöbi, Kwo̧'wo̧duwi ösöwanö ja̧duwi, jö̧ba̧lö, yöta̧lijatö. Diosma ökwödönö inia tjököbaduwinö ja̧bujunö, balekwa mikwa iyö lȩebajobetjö̧, kwo̧'wo̧duwi ösöwanö ja̧duwi, jö̧ba̧lö yöta̧lijatö jobadönöma.

Apocalipsis 11:13

Katjekwachaja̧ okobema böjȩ niji jwiinö tjö̧bebö li̧leibobe. Yelösöda, tjö̧bebö li̧leibobetjö̧ jobe comunidad o̧di̧juma pjolachakwawobe. Ja̧danö, jobe ju̧kwadöma, siete mil jojodö wotjobe, jejenö niji tjö̧bebö li̧leibobetjö̧. Ja̧danö, jejenö baledobetjö̧ ju'wedöma jwiinö yetjaibobe. Ja̧danö, Diosnöda omukwatö tjösödobe, ¡Ayö! Diosma, mölejȩbe jo̧ma, jwiinö juluwo̧, jö̧ba̧lö.

Lucas 21:22

Jau chömöledö, ja̧ mölema, sulabenö ja̧tjiökwe Dios Jerusalénnö ju̧kwadönö lȩebakwa̧ma badekwachakobe, ja̧danö ja̧ möle okobe jwiinö Dios yöawi̧ wȩyudinadö tjiwȩyudinadanö baledakobe.

Isaías 1:24

Ja̧danö, ökwödö Jerusalennö ju̧kwadöbi, kwuluwedöduwibi jobekwö sulabenö ja̧köbaduwiökwe, isabenö lȩebakwo̧ Diosma. Baikwö yöawobe inesö la'aka luwo̧, Okobe Jwiinö Juluwo̧ Isabenö Jo̧, Israel jojodö tjösödökwe juluwo̧ Diosma: —Ökwödö Jerusalennö ju̧kwadötjö chöpöjojodö ötjökwö ölakwabikwawadönö lȩtebobö chisakwocha, ja̧danö sulabenö ja̧badö chöpöjojodönö balekwa mikwa suli̧ chöwaedocha.

Isaías 1:27

Jau, Jerusalennö ju̧kwadö otiwanö jabö tjö̧jo jö̧tja̧lidanö ja̧bö tjö̧jobetjö̧, tjitebo yemidanö otiwemi baibakwemi, ja̧danö sulabenö tjomukwatina kabatibö balewachö, Dios wei̧ a̧ja̧kwö ja̧döma, isabenö tjö̧jibakwedö.

Isaías 35:9

Tebonö ju̧kwadö labidöma deakobe ja̧matjö, didibadöbi, ju'wedö tebonö ju̧kwadö labidöbi deakobe. Ja̧manö kwetjachakwedöma, Dios tjö̧jibinö pjaatinawö̧da.

Isaías 47:3

Kwa̧dobi 'yobekwö ja̧nö, kwa̧do jwibö kwö̧ji̧ öwawinö tjedobö kwö̧jakwujuja, jwiinö taba lö̧joko bakibanö. Jobekwö wanedö yöta̧la, ökwödö Babilonia jojodönö lȩtebakwa̧ma. Jau, chömöledönö sulabenö ja̧köbaduwi̧tjö̧, balekwa mikwa ökwödönö lȩtebakwo̧sa, ökwödötjö bakwo̧nöbi lȩlöinö edökönö, labinö lȩtebakwo̧sa,

Isaías 52:3

Isabenö kwö̧jibakwa̧ möle badekwachajabe, baikwö yöa̧lobe Isabenö Jo̧ma: Kwitebotjö a'dewö lobö, ju'wedö tjitebobe öbibö tjemobö iyö lotenama, midökönö mikwa jwiinö tjeminokoja, ja̧danö babema balada midökönö, tjujulutjö kwö̧jibanö kwitebobe tjetatakwo̧sa, jö̧ba̧lö yöa̧lobe.

Isaías 13:6

—Ökwödö Babilonia jojodöma yebabinö kwubudekwaduwo, Isabenö Jo̧ lȩebakwa̧ möle yöneawachibobetjö̧. Ja̧danö badedö ujunina möle badekwachenama, Okobe Jwiinö Juluwo̧ Dios söbebö loakwa̧ badekwachakobe.

Isaías 13:9

—Jau, isabenö yötawaduwakwö, Isabenö Jo̧ lȩebakwa̧ mölema yöneawachibobe, ja̧danö badekwachenama, dameakwö, lȩlöjinö edökönö, labinö lȩebakwo̧, tjitebo niji jwiinö söbebö loakobetjö̧, ja̧danö sulabenö ja̧badönö ja̧ niji̧tjö kwabö loakobetjö̧.