Isaías 57:16 - Dios Iwene

¹⁶ Jau chömöledö, ba̧kwelöjatebö jojodökwö ölakwabikwawö chö̧jö̧kakwo̧sa, ja̧danö ba̧kwelöjatebö jojodökwö chödameakwökakwo̧sa. Jobekwö ba̧kwelöjatebö chö̧jitjö̧ma, tjo̧'wo luwo̧nö tjime'dawachibena, ja̧danö tjö̧ji̧ ja̧kwawa, ötjöda otidö chiyina ja̧kwawama 'dö̧ibajena.

Isaías 57:16 Referans Kwoze

Hebreos 12:9

Ja̧danö, jemi tupakwö yötawaduwakwö. Böjȩtjö dabe'doma ökwödönö kwabö lȩebobetjö̧ jo̧banö yebabinö omukwatö döwaisachibinobe, ¡Ayö! Chabe'donöma webö̧kö̧sa. Jo̧ba wei̧ cha̧ja̧kwobö jo̧be, chabe'doobetjö̧, jö̧ba̧lö. Ja̧danö chömöledö, döwaisa. Mölejȩbe jo̧ Dabe'doma böjȩtjö dabe'donötjö o̧penönö inesö jo̧ ¿jö̧tö? Jo̧kwaobetjö̧ böjȩtjö dabe'donö yebabinö domukwatobö jo̧betjö̧ mölejȩbe jo̧ Dabe'do Diosnöbi yebabinö domukwatobö jo̧be. Isabenö chömöledö, böjȩtjö dabe'donö yebabinö domukwati̧tjö o̧penönö yebabinö domukwatobö jo̧be mölejȩbe jo̧ Dabe'do Diosnö. Jo̧bama ökwödönö ba̧kwȩlö̧jatebö ja̧kwawa iyo̧obetjö̧ yebabinö domukwatobö jo̧be, Jo̧ba wei̧ma da̧ja̧kwobö jo̧be, jö̧ba̧lö.

Isaías 42:5

Chömöledö, Isabenö Jo̧ Diosda mölȩjȩ otidajo̧, sedatö nöninama, ja̧danö jo̧bada bö̧jȩbi, okobe jwiinö bö̧jȩtjö pokwi̧bi otidinama. Jo̧bada okobe deinö bö̧jȩnö ju̧kwadönö tjo̧'wo emapjo iyo̧ma, bö̧jenö kwebachö ju̧kwadönö ja̧kwawa iyo̧ma Isabenö Jo̧ Diosda. Ja̧danö, jo̧bada baikwö yöawobe omudawö ujuninökwenö:

Génesis 6:3

Ikenama Isabenö Jo̧ma jö̧ba̧lijetö: —Bidö jojodönö ötjö Cho̧'wo̧ Luwo̧ma ba̧kwȩlö̧jatebö itea'da̧lokobe woba jojodödatjobetjö̧. Tjo̧wi̧, babema lekwe tjö̧joböma wetökakobe, sule cientoveinte a̧yo jenanö tjö̧jobö wetocha— jö̧ba̧lijetö Isabenö Jo̧ma.

2 Samuel 24:16

Ja̧danö, weökwe kwabawö lobo̧ angel Jerusalenbe ichibö, jojodö tjö'wöchinö kwabawö loobö ichibenama, Isabenö Jo̧ma lȩlöinö edö, angel kaatakwawobö weinobe, —Tjo̧wita, kwabawö lobö kabatakwawi, —jö̧ba̧lö. Ja̧danö jejenö weenama, Isabenö Jo̧ weökwe angelma jebuseo jojo Arauna eju, trigo sula'wo chabö loawejunö ö̧jinobe.

Diosnö ösödo̧ Job mikwo̧ usula emawina jawa 12:10

Jau chömöledö, Diosda okobe deinö bö̧jȩnö ju̧kwadö tjö̧ji̧ jawa webo̧, jo̧bada okobe deinö jojodönö iyo̧, tjo̧'wo emapjo tjemakobetjö̧, jö̧tö? Ja̧danö öwawinö öwawobe, ötjönö baledi̧ma Diosda weobetjö, baledökwesa, jö̧ba̧lö.

Isaías 27:8

Ökwödönö lȩebinama, baikwö yöta̧la: Döwaisachibo jö̧ba̧lö, ditebotjö labebö jelobe dö̧jobö weinobe, jawo̧ laebobekwötjö ichi̧ jwa̧lȩ'epjo labinö jwa̧lȩ'ewi̧danö, labinö pjuinobedanö ichejekwa, ditebotjö a'dewö loakobetjö̧.

Isaías 30:18

Jo̧kwaijayonö jobekwö baledoböma ösödö̧kö̧ Isabenö Jo̧ma. Jo̧bama o̧'wo 'dibachibö, lekwe teada̧lo̧, ökwödönö dösölö̧jinö pjaatobö ösödobetjö̧. Iteda ujulu i̧sȩbö, ökwödönö lȩlöjinö edobö ösödo̧ chömöledö. Jau chömöledö, Isabenö Jo̧ Diosma, otiwanö ja̧o jö̧a̧li̧danö ja̧bö jo̧, ja̧danö okobe deinö jo̧banö tjo'wo wana̧lö teada̧ladönö isabenö otiwanö pjabato̧, jo̧ba yöawi̧ kwa̧ja̧kwaduwo chömöledö.

Isaías 64:8

Chuluwo̧ Isabenö Jo̧, dabe'doma ökwödaja. Ja̧danö, ökwöma lete'otjö dadö otido̧danö jo̧ja, ja̧danö ökwödöma kwotidaja'o lete'odanö ja̧dösa, okobe deinö ökwödöma ökwöda kwotidinawö̧sa.