Isaías 51:3 - Dios Iwene

³ Ja̧danö baikwö yötawaduwakwö chömöledö, jo̧ba itji̧mu tupadanö jojodö o̧bukwedöda tjö̧jijayonö, tja'döminenö pjatatinadanö yemidanö pjatatocha, Jerusalen jojodönö. Ja̧danö jobekwö pjatatenama, tjitebo nijima jwiinö otiwachibakobe. Jojodö deobe kö̧kö̧emima, inesö otiwayu Eden batjodanö baibanö, o̧bubiya otiwanö bo̧akobe. Ja̧ jojodö deobema, Isabenö Jo̧ itea batjo, jö̧ba̧lö ötjabayudanö baibakobe. Ja̧danö jobe ju̧kwadöma jwiinö tjo̧'wo ösöwachibanö tjö̧jakwedö, ja̧danö ötjönö ösödö lo̧tjakwedö, —Isabenö Jo̧ma otiwanö pjabato̧, —jö̧ba̧lö.

Isaías 51:3 Referans Kwoze

Isaías 49:13

Jobekwö otiwanö baledobetjö̧, mölejȩbi o̧'wo ösöwachibanö jwöeba̧lobö jo̧be, ja̧danö bö̧jȩbi o̧'wo ösöwachibobö jo̧be, ja̧danö mösa'iju lo̧obö jo̧be, Isabenö Jo̧ma iteda ömöledönö pjaatobetjö̧. Jau, Diosma iteda ömöledö israel jojodönö tjo̧'wo ösöwachibanö pjabato̧, ja̧danö iteda ömöledötjö usula emawadönö, lȩlöinö edakwo̧, jö̧ba̧lö laebobe Dios yöa̧li̧ma.

Isaías 52:9

Jerusalen comunidad pjolö loinemibi o̧'wo ösöwachibanö lo̧obö jo̧be, Isabenö Jo̧ma iteda ömöledönö tjo̧'wo ösöwachibanö pjaatajobetjö̧, ja̧danö itebo comunidad Jerusalen tjöpöjojodötjö ji̧binö pjaatajabe.

1 Pedro 1:8

Jau chömöledö, ökwödöma la'akatjöda Jesúsnö edinöködöja, ¿jö̧tö? Jo̧kwaijayonö, la'akatjöda Jesúsnö kwedinaduwököjayonö, jo̧banö ile nibebö ösödadöja, ja̧danö jo̧bama kwedaduwökökwejayonö, jo̧ba yöawi̧ ösödadöja, isabenö jö̧a̧li̧danö ja̧akwo̧ jö̧ba̧lö. Jejenö ösödö, kwo̧'wo̧ luwo̧duwi ösöwachibanö ja̧döja. Chömöledö, isabenö jwiinö kwo̧'wo̧ luwo̧ ösöwachibanö ja̧döja, ja̧danö jejenö kwo̧'wo̧ ösöwachibanö kwö̧jaduwi̧ma böjȩ jojodö tjomukwati̧tjö bajalekwönönö kwo̧'wo̧ ösöwachibanö kwö̧jaduwobe, kwo̧'wo̧ luwo̧ ösöwachibanö kwö̧jaduwi̧ma Diostjöda ichobetjö̧.

Génesis 13:10

Jejenö jö̧a̧liökwe Lotma Jordán ojwe ö'öbö niji ba̧ba̧lawemi eda̧lijetö. Edemi jwiinö otiwanö tiyuwijetö jemi nijima, Sóar niji ichibanö. Otiwanö tiyuwijetö, Edén batjo nijidanö, ja̧danö, Egipto nijidanö. Ja̧ mölema Sodoma niji Gomorra niji Isabenö Jo̧ Dios ina lȩebokobetjö̧ jemima jwiinö otiwijetö.

Isaías 51:12

Adebökwe, baikwö atadö yöba̧lo̧ Isabenö Jo̧ma: Chömöledö, kwo̧'wo tjo̧bekwö kwö̧jaduwelö, ötjödasa kwo̧'woduwi ösöwachibanö pjabato̧ma. Ja̧danö ötjöda ökwödönö pjatatobetjö̧, tajawedö bö̧jȩ jojodönö yekabiduwobö? Jobadöma meje'ye, juluwanö kököbachibö, debi baiba'yedanö ichejekwadö, juluwanö debö 'ya̧dö bö̧jȩ jojodöma, tajawedö jobadönö yekabiduwobeda?

Isaías 44:26

Jobekwö bö̧jȩ jojodö waisadösa jö̧ba̧lö tjomukwati̧ waekwobö webo̧sa, jo̧kwaijayonö ötjöda chömöayedö, ötjöda yötawi̧ yöbawadö yötjawi̧danö badekwachobö webo̧sa. Jau, wetawö̧, —Isabenö yemidanö Jerusalen comunidadnö tjö̧jakwedö, ja̧danö Juda niji comunidadbiyama, yemidanö tjotidakwedö, —jö̧ba̧lö yöbawadö tupakwö baledakwa̧ma, ja̧danö yötjawi̧danö badekwachinö webo̧sa.

Isaías 25:9

—Ja̧ möle baikwö yötja̧lakwedö Isabenö Jo̧nö: –Bite Isabenö Jo̧ Diosda, dösödökwe Diosma. Jo̧banö o̧'wo wana̧lö, pjaatakwa̧ diteada̧lajabe, -Isabenö ökwödönö pjaatakwo̧, -jö̧ba̧lö, ja̧danö otiwanö pjaatajabe. Dösödökwe Isabenö Jo̧ Diosma jo̧bada, jo̧ba pjaatakwa̧ diteada̧lajabe, jadanö babe ökwödönö pjaatajobetjö̧, do̧'wo ösöwachibanö dösödaduwo, -Diosma otiwanö dö̧ji̧binö pjaatajabe, –jö̧ba̧lö yötja̧lakwedö ja̧ möle.

Isaías 12:1

Ja̧danö, ja̧ möle Dios jwiinö otiwanö pjaatiawö̧, baikwö yöka̧laduwakwedöja: —Duluwo̧ Isabenö Jo̧, otiwanö pjabato̧ja jö̧ba̧lö yöda̧lakwö. Jau Duluwo̧, ajayinö ökwödönö kwödameakwijatö, jo̧kwaijayonö ajayinö kwödameakwinajayonö, kwödameakwi̧ma kakatibajabe, ja̧danö do̧'wo ösöwachibanö pjakatajabe.

Isaías 49:8

Baikwö yöa̧lobe Isabenö Jo̧ma, iteda ömöayo̧nö: Lȩlöjinö edö pjatatakwa̧ möle badekwachenama, akebi̧ a̧jakwö pjatatajabe, tjö̧jibinö pjatatakwa̧ möle badekwachenama, ökwönö pjatatajabe. Ja̧danö, ökwönö tjöbeba̧lö pjatatakwo̧sa, ja̧danö ökwönö chujunocha, tjitebokwena jojodötjö, ötjötjö ö'weje pjabato̧ bakibanö. Ja̧danö ju'wibi ökwönö chujunocha, israel niji yemidanö otiwachibanö kwotidakobetjö̧, ja̧danö tjitebo niji, jojodö deinelö nijima, 'da̧batö junö, ja̧ niji tjö̧jakwedönö kwiyabobö chujunajabe.

Isaías 35:6

Kwebachöködöma, yama döbö kweachi̧danö, dötjakwedö, ja̧danö tjinene yöba̧löködöma, tjo̧'wo ösöwachibanö jwötjeba̧lakwedö. Jojodö deobe kököelö, ojwese'do doakobe, ojwebiyabi jobe isuwakobe.

Isaías 41:16

Jau, trigo chabö lotji̧danö ja̧köbaduwakwedöja kwöpöjojodöduwinö, ja̧danö jwa̧le'epjo sula'wo e'ewö loi̧danö, jelobekwö e'ewö loakwawö̧ kwöpöjojodöduwinö. Ja̧danö, jobekwö kwujuluwaduwobö pjatatiawö̧, kwo̧'woduwi ösöwachibanö ötjö Isabenö Jo̧nö kwösödaduwakwedöja, ötjö Israel jojodö tjösödökwe Suli̧ Jwibo̧ Diosnö ösödö yöka̧laduwakwedöja, —Dösödökwe Diosma isabenö juluwo̧, —jö̧ba̧lö.

Isaías 43:19

'Yayi jawa, babeda chotidakwa̧ jawa kwomukwataduwo. Ida̧ökö ja̧ 'yayi jawa jamatö chotidajabe chömöledö, edö kwomukwataduwökiji̧? Ötjöma jojodö deobe kököobe ö'wejenö mana chotidocha, ja̧danö ojwebiya jobe kököajemi lamatobö wetocha.

Isaías 49:19

Babema kwiteboduwi Juda nijima, isabenö suli̧ waekwobe, jojodö deobe chömöledö, jo̧kwaijayonö ja'yubenö lekwajabetjö̧ ökwöda kwömöledötjö su̧'bȩ baibakobe kwiteboduwima, kwiteboduwitjö jojodö deobebi tjö̧ba̧jekwachenanö baibanö. Ja̧danö ja̧ möle, kwöpöjojodöduwi, tjö̧möayedö bakibaduwanö ökwödönö juluwinadöma, kwö̧jaduwelö ödö tjö̧jakwedö.

Isaías 61:10

Jwiinö cho̧'wo ösöwachibanö chösödobe Isabenö Jo̧nö, —Chösödökwe Diosma otiwanö pjabato̧, —jö̧ba̧lö. Jau, baikwö wanedö yöta̧la, ji̧ikwa jawa kamisinö 'duatajabe ötjönö, ja̧danö otiwanö ja̧bö ja̧kwawa jawa wamesa̧do̧nöbi 'duatajabe. Jobekwö 'duatajökwe, ö'weje pjabato̧bi, ilekwonö emakwo̧bi jwiinö otiwaka butjawaka tjubutjawi̧danö, ja̧danö jilekwenö jemakwuju sasiyu jöni̧danö, otiwanö 'dubawö jo̧sa, chösödökwe Diosma otiwanö pjaatobetjö̧.

Isaías 65:18

Ja̧ möle jobekwö chotidiawö̧, kwo̧'woduwi ösöwanö, ba̧kwelöjatebö kwo̧'woduwi ösöwachibanö kwö̧jaduwakwedöja. Jau chömöledö, Jerusalen comunidad chotidocha, tjo̧'wo ösöwachibanö tjö̧jemi comunidad baibanö, ja̧danö jobe ju̧kwadöma jwaikwöda tjo̧'wo ösöwanö tjö̧jakwedö.