Isaías 5:26 - Dios Iwene

²⁶ Jau, iteda ömöledö israel jojodönö lȩebakobetjö̧, Isabenö Jo̧ma i̧sȩbö jwöakobe ju'wedö tjitebo jojodö ödö ju̧kwadönö, bö̧je bakwachö̧je ju̧kwadö ölakwabikwawa jojodönö su̧wiba̧lö jwöakobe, ja̧danö jwöajawö̧, juluwanö tjichakwedö.

Isaías 5:26 Referans Kwoze

Isaías 7:18

Jau Acaz, ja̧ möle Isabenö Jo̧ma su̧wiba̧lö jwöakobe ichejekwa, ödö Asiria nijitjöbi, Egipto nijitjöbi ölakwabikwawa jojodö tjichakobetjö̧, ja̧danö bajwö̧ ja̧tji̧danö tjichibakwedö Asiria jojodöma, ja̧danö ma̧tu̧lö ja̧tji̧danö tjichibakwedö Egipto jojodöma, tjölakwabikwawobö.

Isaías 18:3

Okobe deinö ökwödö bö̧jȩnö ju̧kwadö, bö̧jȩ ba̧kwemeachibanö jojodöma, mösa'otjö banderasa̧do̧ kabebö tjö̧ni̧ kwedaduwakwedöja, ja̧danö trompeta pjutji̧ kwa̧ja̧kwaduwakwedöja, —Döpöjojodöma ichibö mebadötö, —jö̧balö.

Deuteronomio 28:49

—Jo̧banö öpöjödö kwö̧jaduwiökwe, Isabenö Jo̧ma ödö ju̧kwadö ju'wedö tjitebo ju̧kwadönö jwiinö ödöobetjö öibakobe, ökwödönö metji̧bobö. Ja̧danö, jobadö tjiwene wainö yöba̧ladöma, wiyuli mötjö juluwanö nijakwö jwibachö meibi̧danö, jobadöma ödötjö ichajadö juluwanö ökwödönö metjibakobe.

Isaías 11:12

Iteda itea bandera kaebakobe, tjitebotenia jojodö öwawinö tjedobö, ja̧danö israel jojodö, ajayinö tjitebotjö a'dewö loinawö̧nö o̧ko̧kodakobe, ja̧danö Juda jojodö tjipjelekwachinö ju̧kwadönöbi o̧ko̧ko̧dakobe, bö̧jȩ bajale ju̧kwadönöbi o̧ko̧kodakobe, a̧dekwanö tjitebobe tjetjachajakobetjö̧.

Isaías 39:3

Jemi ikenama Dios yöawi̧ yöbawo̧ Isaiasma ichibö, la'aka luwo̧ Ezequiasnö abebö a̧ja̧kwinobe: —Idöma dakwö yötja̧linada? Ja̧danö, didö tjitebotjö tjichinada? —jö̧ba̧lö. Aebökwe, —Ödö tjitebotjö tjichinobe, Babilonia nijitjö, —jö̧ba̧lö atadinobe Ezequiasma.

Isaías 30:16

Ja̧danö Dios kwö̧jibaduwobö wei̧ öpöjödö, yöka̧linaduwobe, —Ja̧maökö. Ökwödöma kabayudönö wa̧nö, döpöjojodö tjöba a'otjö dödibakwedösa, dö̧jibobö, —jö̧ba̧lö. Ja̧danö, isabenö dökibaduwakwedöja chömöledö. Yöka̧laduwajabe, —Kabayudö juluwanö ö'öbakwawadö tjoma'anö wanö, otiwanö dö̧jibakwedösa, —jö̧balö, jo̧kwaijayonö baikwö yötawaduwakwö, ökwödönö lubadöbi juluwanö lutjakwedö, ökwödönö tjichibenanö baibanö.

Isaías 13:5

Ja̧danö jobekwö o̧ko̧kodajawö̧, ödö tjitebo, bö̧jȩ bajale ji̧ tjitebotjö ichadö. Jau, ja̧ ökwöi̧ kwa̧ja̧kwaduwi̧ma, Isabenö Jo̧ lȩebakwa̧ tjotidakwedö tjichobe ökwöobe, ja̧danö weawö̧, jwiinö söbebö lotjakwedö Babilonia nijima.

Isaías 13:2

—Mösa'o öwaetjöda öwawa'o wame banderasa̧do̧ kabebö kwujuno, edö Babilonia comunidad metjibakwa̧ tjöwaisakobetjö̧. Labinö jwöbeba̧li metjibakwedönö, ja̧danö kwömamu kabebö kwi̧sȩbo, Babilonia luwedö tjitebo comunidad apjude tebachö metjibakobetjö̧.

Isaías 10:3

Jobekwö sulabenö ja̧köbaduwobetjö̧, ¡ökwödöwe! Dios lȩebakwa̧ mölȩ badekwachenama, dakwö kwö̧ji̧baduwakwajö? Ödötjö ichadö ökwödönö söbebö lobö tjichenama, dakwö kwö̧jibaduwakwajö? Dios yöawi̧ kwöpöjödaduwobema, dite tjöbeba̧lo̧ ö̧jobekwö dökibaduwakwajö? Ja̧danö nöinö kwujuna̧laduwi̧ma, dai kwujunibaduwakwajö, 'dötebapji jö̧ba̧löma?

Isaías 13:3

—Baikwö yöawobe Diosma: –Ötjödasa 'da̧batö chujuninawö̧nö webinama, jobekwö metjibobö. Chömöayedötjö juluwadönö jwötajabe, ötjö chödameakwi̧ jobadönötjö lȩtebobö, ja̧danö weti̧danö tjujuluwenama, tjösödakwedö, -Otiwanö juluwadösa, -jö̧ba̧lö, –yöawobe Diosma.

Isaías 13:4

—Mösa'ijutjö ökwöi̧ kwa̧ja̧kwaduwo, ba̧jȩkwadö ölakwabikwawadö kwetjachobe ökwöobe. Jau, ba̧jȩkwadö tjitebokwena jojodö jwöbeba̧lö tjo̧ko̧ko̧kwobe ökwöobe, Isabenö Jo̧ Okobe Jwiinö Juluwo̧ Diosma Babilonia jojodökwö tjölakwabikwawakwedönö o̧ko̧kodobetjö̧.

Isaías 31:9

Jobadökwö chölakwabikwawenama, Asiria ölakwabikwawadö inesö juluwadöma jwiinö yebabinö tjö̧bawö tjö̧jakwedö, ja̧danö ölakwabikwawadö tjuluwedöma, banderasa̧do̧ jȩlö yebabinö dötjibakwedö, —jö̧ba̧lö yöawobe inesö ökwöla kwebato̧ Isabenö Jo̧ma. Jau, Isabenö Jo̧ ö̧ji̧ i̧sȩkwola ubemi comunidadma, Jerusalen comunidadda, ja̧danö Jerusalen mösa'o Sion mösa'otjö ubobe, Dios ö̧ji̧ i̧sekwolama.