Isaías 41:27 - Dios Iwene

²⁷ Ötjödasa ja̧ baledakwa̧ yöbawinama, ötjöda Sion mösa'onö ju̧kwadönö yötawijatö, —Babeda tjichiba, —jö̧ba̧lö. Ja̧danö ötjöda Jerusalennö ju̧kwadönö yöbawo̧nö webo̧sa, otiwa jawa wene yöawobö.

Isaías 41:27 Referans Kwoze

Isaías 40:9

Sion mösa'oma, otiwa jawa yöawelö, jo̧kwajabetjö ökwödö Sion mösa'o jojodöma, mösa'o möa'o wa̧pekwa'otjö labinö jwökeba̧laduwo. Jau ökwödö Jerusalennö ju̧kwadöma, otiwa jawa wene yöbawadöja, jo̧kwajabetjö̧ yebabökönö labinö jwöbeba̧lö yökawaduwo. Ju'wi Juda niji comunidadbiya jojodönö yöbawö jwökeba̧laduwo: —Edaduwi, kwuluwo̧duwi Dios icha.

Isaías 52:7

Ayö, otiwa jawa wene yötjawakwedö tjichi̧ma jwiinö otiwobe, mösa'ijutjö tjömasapiya edö, —Jwiinö otiwobe, —jö̧ba̧lö edadösa. Jau, wene jwiinö dö̧jakwa̧ wene yöbawö ichadö, do̧'wo ösöwachibanö ja̧kwawa jawa yöbawö ichadö, otiwanö dö̧ji̧bakwa̧ jawa yöbawö ichadönö edö ösödadösa. Jau, Sion mösa'o ju̧kwadönö yöbawadö, —Kwuluwo̧ Diosma webö jo̧, —jö̧ba̧lö, ja̧danö ja̧ wene yöbawadö tjichi̧ma do̧'wo ösöwachibanö edadösa.

Isaías 48:3

Ja̧danö, ökwödö weti̧ a̧ja̧kwöködönö, baikwö yötawaduwakwö: Damötjö ökwödönö yötawijatö, —Baikwö baledakobe, —jö̧ba̧lö. Ötjöda yöbawö chujunijatö, baledakwa̧ma, ja̧danö jemi ikena yöbawajo̧, ju'wibi juluwanö chotidijatö yötawaja̧danö badekwachakobetjö̧.

Isaías 44:28

Jobekwö badekwachinö webo̧sa chömöledö, ja̧danö ju'wibi yötawaduwakwö: Ötjöma Ciro jö̧ba̧lö imikwakwo̧nö yötawa, —Ciroda chömöayo̧ obejadönö teada̧lo̧danö ja̧nö, chömöledö israel jojodönö webö ö̧jakwo̧, ja̧danö okobe jwiinö weti̧ otidö ö̧jakwo̧. Wetökwe jo̧bada Jerusalen comunidad jawa weakobe, –Jerusalen comunidad tjotidobö jo̧be, –jö̧ba̧lö, ja̧danö wetökwe jo̧bada cheju jawa weakwo̧, –Dios eju la'akama, yemidanö tjotidobö jo̧be, –jö̧ba̧la. Jobekwö yötawaduwakwö baledakwa̧, badekwachinö wetakwa̧ma, jö̧ba̧lö yöa̧lobe Diosma.

Apocalipsis 2:8

Ja̧danö, chedökwema ina chiwȩyudobö weijatö ötjönöma: —Juan, biya̧ yötawi̧ma wȩyudi weköbo, Esmirna jojodötjö ötjönö ko̧ko̧kwa̧lö ba̧nö ösödadönö te'ada̧lakwawa jojonöma. Jo̧banö weköbo, ötjönö ösödadönö biya̧ yötawi̧ yöawo. Baikwö wȩyudi weköbo: Biya̧ chiwȩyudi̧ma ba̧kwȩlö̧jatebö jo̧, ajayinö ji̧nabi, ja̧danö, 'dö̧ibajena baibanö ö̧jakwo̧bi yöawi̧. Ja̧danö wobajo̧ yemidanö tjebachajina yöawi̧, biya̧ chiwȩyudi̧ma.

Romanos 10:15

Ja̧danö, ¿dakwö yöawobö yöbawo̧ma, jo̧banö, Yöbawaji, jö̧ba̧lö wetjokobema? Waekwena, ¿jö̧tö? Dios iwene baikwö laebobe Dios iwene yöbawadönöma: Otiwa jawa wene yötjawakwedö tjichi̧ma jwiinö otiwobe, jö̧ba̧lö laebobe.

Isaías 48:12

Chömöledö Jacob itji̧mu tupadanö jojodö, ötjöda chömöledö bakibaduwanö jwötinawö̧ israel jojodö, yötawi̧ kwa̧ja̧kwaduwo, baikwö: Ötjödasa ba̧kwelöjatebo jo̧ Diosma. Ajayitjöda ji̧nasa̧ chömöledö, ja̧danö bajaleapo löji mölebi chö̧jakwo̧sa.

Isaías 44:6

Israel jojodötjö inesö la'aka luwo̧, Isabenö Jo̧, israel jojodönö tjöbeba̧lö pjabato̧, Okobe Jwiinö Juluwo̧ Isabenö Jo̧ Diosma baikwö yöa̧lobe: Ötjöma ju'wedötjö ajayinö ji̧nasa̧, ja̧danö ju'wedötjö ikena chö̧jakwo̧sa. Jelo̧ Diosbo̧ma deobe, ötjödasa isabenö Diosbo̧ma.

Isaías 43:10

Jo̧kwaijayonö ökwödö israel jojodöma, Isabenö Jo̧ i̧sȩbina edö waisadösa. Baikwö yöa̧lobe Isabenö Jo̧ma: Ökwödö israel jojodöma isabenö chi̧sȩbina edö waisadöja, isabenö Diosbo̧ chö̧ji̧ma. Jau, chömöayedö bakibaduwanö omudawö chujuninawö̧ja, ötjönö kwöwaisaduwobö, ja̧danö ötjönö kwösödaduwobö, ja̧danö okwa jawa otiwanö kwöwaisachibaduwobö, —Okobe deinö tjösödawö̧tjöma, Isabenö Jo̧ Diosda isabenö Diosbo̧, —jö̧ba̧lö. Jau, ötjö chö̧jakwa̧ abönö tjotidinökwema deobe la'akatjöda, ja̧danö chö̧jaja̧ ikena ö̧jakwo̧ diosbo̧bi deakobe la'akatjöda, ötjödasa Diosbo̧ma.

Isaías 41:4

Tida jobekwö ujuluwobö webo̧ma? Ajayitjö baikwö bajalenö, ja̧jaye webo̧ma tida? Ötjödasa jobekwö webo̧ma, ötjö Isabenö Jo̧ Diosda. Ötjödasa ajayinö jobekwö webinama, ja̧danö ötjödasa bajaleapo jobekwö wetakwo̧ma, jö̧ba̧lö laebobe Dios tjitebokwena jojodönö yöa̧li̧ma.

Isaías 46:9

Damötjö̧ ötjö chujulu chi̧sȩbina jawa kwomukwatibaduwo chömöledö. Jelo̧ ötjödanöbo̧ ö̧jobeji̧? Deobe jö̧tö? Isabenö ötjödasa Diosbo̧ma, jelo̧ma deobe. Jau bakwo̧bi ötjödajayo̧ma deobe,