Isaías 40:15 - Dios Iwene

¹⁵ Jau, Dios öba a'otjö, okobe deinö tjiteboteniama, sule balde'dotjö to̧i̧danö ichejekwadö, ja̧danö sule i̧so̧pja̧ tjö̧ba̧ja̧daja̧ ikena nönawakanö okobe a̧ji̧baja̧pja̧danö ichejekwadö. Jau, jwaibalawa ö'öbö niji emitjö̧ma, nijiso̧pja ja'yuwopjada ichejekwena.

Isaías 40:15 Referans Kwoze

Isaías 40:22

Bö̧jȩ wame ja̧ka iteaka inesö la'aka luwo̧ ö̧bakanö bo̧ Diosma, jwiinö möakwo bo̧, ja̧danö jo̧ba öba a'otjö bö̧jȩ jojodöma pjebadö ma̧la̧ka̧yudanö ichejekwadösa. Jau chömöledö, inesö juluwo̧obetjö̧, sabana'wo sedatö tjö̧ni̧danö, mölejȩ sedatö nöno̧, iteda eju sabana'wotjö otikwejudanö baibakobetjö̧.

Isaías 29:5

Jemi ikenama, Isabenö Jo̧ Okobe Jwiinö Juluwo̧ Diosma kwöpöjojodöduwinö lȩebakwo̧, juluwanö ichibö söbebö loakwo̧ kwöpöjojodöduwinö. Jobekwö ichibö lȩebakwa̧, baikwö wanedö yötawa: Jelobetjö ichajadö kwöpöjojodöduwi tjö̧ba̧jȩkwijayonö, nijiso̧pja̧ ejeopja̧danö batjibakwedö, jadanö inesö ba̧jȩkwadö kwöpöjojodöduwi labidöma, trigo sula'wo jwa̧le'epjo e'ewibi̧danö tjichejekwakwedö. Jau, böba labinö ökwöinö, ja̧danö niji̧ tjö̧awinö, labinö ökwöinö ichakwo̧ Isabenö Jo̧ma. Ja̧danö jwa̧le'epjo labinö doibapjokwö ichibakwo̧, ja̧danö jwiinö ubola ökwölakwö ichibakwo̧, kwöpöjojodöduwinö söbebö loakobetjö̧.

Isaías 11:11

Ja̧danö, damötjö iteda ömöledö israel jojodönö pjaatinadanö, ja̧ möle chuluwo̧ Diosma yemidanö iteda ömamu deatakobe, iteda ömöledö israel jojodötjö ina 'yaba̧ladönö ko̧ko̧dibö israel nijibe tjeatakobetjö̧. Jau, Dios lȩebinatjö ji̧binadö Asiria nijinö ju̧kwadönöbi, Egipto nijinö ju̧kwadönöbi, Patros nijinö ju̧kwadönöbi, Etiopia nijinö ju̧kwadönöbi, Elam nijinö ju̧kwadönöbi, Sinar nijinö ju̧kwadönöbi, Hamat nijinö ju̧kwadönöbi, jwaibalawa ö'öbötenia niji ju̧kwadönöbi o̧ko̧ko̧dakobe, yemidanö tjitebo israel nijinö tjö̧jakobetjö̧.

Isaías 59:18

Isabenö jweinö lȩebakwo̧ Diosma, jo̧ba öpöjojodö sulabenö ja̧badönö. Sulabenö ja̧tja̧ja̧ badekwachinö, balekwa mikwa jweinö lȩebakwo̧. Dameakwö lȩebakwo̧ öpöjojodönö, sulabenö ja̧tjiökwe balekwa mikwa lȩebakwo̧, bö̧jȩ bakwachö̧jȩ ju̧kwadö öpöjojodönöbi jweinö lȩebakwo̧.

Daniel 11:18

Jemi ikenama, jwaibalawa ö'öbö niji ujuluwobö isakwakobe, ja̧danö jobetjö ju'wi comunidadkwenada ujuluwakobe. Ja̧danö, bajalianö öpöjojodötjö bakwo̧ guardia luwo̧ma jo̧banö ujuluwakobe, ja̧danö Siria luwo̧ juluwo̧sa̧ jö̧ba̧lö omukwati̧ kaatibobö ja̧akobe. Siria la'aka luwo̧ma, ajayinö jo̧banö ujuluwakwo̧nö omukwatinobe, mikwawö̧kö̧, ötjödanö juluwö̧kö̧ jö̧ba̧lö. Jo̧kwaijayonö jejenö omukwati̧ kaatibobö ja̧akobe öpöjojoma, ja̧danö balekwa mikwa Siria luwo̧ ujulu jwii̧ wene öwawatö i̧sebakobe, mikwawö̧kö̧ja, ötjödanö juluwö̧kö̧ja jö̧ba̧lö.

Isaías 66:19

I̧sȩkwa jawa baibanö, labinö lȩtebakwo̧sa jobadönö. Ja̧danö lȩtebaja̧tjö ji̧badönö wetocha, tjitebotenia jojodönö yötjawobö, Tarsis nijibebi, Fut nijibebi, 'böawa waisadö tjitebo Lud nijibebi, Tubal nijibebi, Javan nijibebi yöbawö tji̧'yobö. Ja̧danö ötjönö a̧ja̧kwajiböködö, ja̧danö dejatinö chujulu edajiböködö tjitebo jwaibalawa ö'öbö nijibebi tji̧'yobö wetocha, ja̧danö tjitebotenia jojodönö chujulu yötjawakwedö, —Isabenö Jo̧ Diosma isabenö dejatinö juluwo̧, —jö̧ba̧lö.

Isaías 41:5

Tupakwö laebobe Dios yöa̧li̧: Jobekwö wetökwe ichobe edö, jwiinö yebabidö jwaibalawa ö'öbö ju̧kwadöma, bö̧jȩ bakwachö̧je ju̧kwadöbi jwiinö yebabinö ko̧ko̧kwadö.

Génesis 10:5

Ja̧danö, jobadö Jafettjö tupadanö jojodöma ojwe ö'öbönö jelobe, jelobebi ja̧danö, ö'wejesa'onö jelobe, jelobebi ju̧kwijadötö wainökwena tjitebokwena. Ja̧danö, bakwasokwena ju̧kwijadötö, idöda yö̧ne tjömöledökwö. Ja̧danö, bakwasokwena idöda tjiwenekwena yöba̧lö ju̧kwijadötö Jafettjö tupadanö jojodöma.

Isaías 2:22

Jobekwö isabenö baledakobe chömöledö, jo̧kwajabetjö̧ bö̧jȩ jojodönö omukwatö kwö̧jaduwi̧ma kabatibö, Dios ösödi̧ jawada omukwatö kwö̧jaduwo. Jau chömöledö, bö̧jȩ jojodöma Dios öba a'otjö isabenö mikwawöködö, bö̧jȩ jojodöma sule tjo̧'wo emöda ju̧kwadö, juluwöködö bö̧jȩ jojodöma, jo̧kwajabetjö̧ Diosnöda omukwatö kwö̧jaduwo.

Isaías 17:13

Jau, inesö nöobu jwaibalawa labinö ökwöi̧danö labinö ökwöobe tjitebokwena ölakwabikwawa jojodö tjölakwabikwawobö tjichi̧ma, jo̧kwaijayonö katjatibobö weakwo̧ Diosma, ja̧danö weiawö̧, ödö dötjibajakwedö. Jau, mösa'ijutjö jwa̧le'epjo trigo jawa sula'wo e'ewi̧danö, ja̧danö jwa̧lȩ'epjo labinö jwa̧le'ewö nijiso̧pja̧ jalawö jwa̧lȩ'ewi̧danö, katjatibobö weiawö̧ dötjibajakwedö.

Daniel 4:35

Jo̧ba öba a'otjö isabenö mikwawöködösa ökwödö böjȩ jojodöma, jo̧ba ujuluwi̧danöma juluwöködösa. Jo̧bama iteda ösödi̧danöda ja̧bo̧ma, ángelesdö tjöjena mölejȩbetjöbi, jojodö dö̧jena böjȩtjöbi. Bakwo̧bi deobe jo̧banö, Kabati, jö̧ba̧lö webo̧ma, bakwo̧bi deobe sulabenö ja̧köba, ¿tajawedö jejenö ja̧köbaja̧da? jö̧ba̧lö lȩbebo̧ma jö̧ba̧lö yöa̧linobe Nabucodonosorma Diosnö.

Daniel 4:32

ja̧danö jojodö tjö̧'da̧detjö ökwönö a'dewö lotjakwo̧ja. Tebonö ju̧kwadökwö kwö̧jakwo̧ja, ja̧danö pa̧ka̧yö̧ tjukwi̧danö meje'ye kwanö kwö̧jakwo̧ja, jelemutjö döbölataja o̧biya baledibanö. Jejenö baledakobe ökwönö, Diosnö bajalianö kwöwaisachibenanö kabatö, Isabenö Okobe Jwiinö Juluwo̧ Diosda inesö la'aka luwo̧ma, Diosda böjȩ luwedönö omudawö juno̧ma jö̧ba̧lö kwöwaisachibenanö kabatö— jö̧ba̧lö ökwöinobe.