Isaías 32:1 - Dios Iwene

¹ Baikwö yötawaduwakwö chömöledö: Yadakwö inesö la'aka luwo̧ jwaikwöda Dios wei̧ a̧ja̧kwö jo̧ma webö ö̧jakwo̧, ja̧danö ömöayedö la'aka luwedöma, otiwanö lȩekwa yötjawo jö̧tja̧li̧danö, otiwanö yötjawakwedö.

Isaías 32:1 Referans Kwoze

Apocalipsis 19:11

Ikenama mölejȩbe chedemi apjude po̧ekwobe chedijatö. Ja̧danö, po̧ekwobe okwatjö kabayu dewo̧nö chedijatö. Jo̧ba kabayu wamenö bakwo̧ ö̧wo̧nö chedijatö. Jo̧ba imima, Jweinö Yöbawo̧ mikwo̧. Jo̧bama, jojodönö lȩbebö jweinö omukwatö webo̧. Ja̧danö, jweinö omukwatö öpöjojodönö ujuluwobö 'yo̧.

2 Samuel 23:3

Jau, israel jojodö dösödökwe Dios, ökwödö israel jojodönö tjö̧beba̧linö teada̧lo̧ma yöawajabe, baikwö yötawobö: Jojodö inesö la'aka tjuluwo̧, Diosnö yebabinö omukwatö, Dios ösödi̧danö ömöayedönö yöbawö webo̧ma, isabenö otiwanö ömöayedönö pjabato̧.

Apocalipsis 17:14

Ja̧danö, jobadöma Obeja Itji̧danö Jo̧nö tjujuluwobö tji̧'yakwedö. Jo̧kwaijayonö waekwakwawö̧ yelösöda. Obeja Itji̧danö Jo̧ma jobadönö jwiinö ujuluwakwo̧. Jo̧bama inesö Duluwo̧obetjö̧, inesö La'aka Luwo̧obetjö̧ jobadönö jwiinö ujuluwakwo̧. Ja̧danö, Obeja Itji̧danö Jo̧kwö ja̧döma, jo̧ba jwöbö, omudawö ujuninawö̧ma, jo̧banö kabatibökönö tjo̧'wo̧ wana̧ladö— yöawijatö ángelma ötjönöma.

Romanos 5:21

Jau chömöledö, jojodö sulabenö ja̧tji̧ma isabenö juluwinobe, jojodö wotjawinö ja̧bö. Ja̧danö Dios mikwa jwiinö otiwa jawa iyi̧bi juluwi̧, jojodö ba̧kwȩlö̧jatebö tjö̧jakwedö batjibanö ja̧bö. Jau chömöledö, Duluwo̧ Jesucristoda midawö woinobetjö̧, Diosma, ökwödönö mikwa jwiinö otiwa jawa iyö, Chedemi bidöma suli̧ jwibadö, jö̧ba̧lö, ba̧kwȩlö̧jatebö ja̧kwawa iyobe ökwödönöma.

Isaías 28:6

Ju'wibi ja̧ möle Diosda lȩekwa luwedönö pjaatakwo̧, okwa jawa waisanö tjomukwatakobetjö̧, jadanö jobada israel jojodötjö ölakawabikwawadönö tjujuluwachibanö pjaatakwo̧, comunidad apjude a'ö ölakwabikwawö, tjitebo comunidad tjötjeba̧lakobetjö̧.

Isaías 11:4

Jo̧ba lȩebakwa̧ma, jojodönö wainökwena edöma lȩebökakwo̧, jweinö Dios wei̧danö lȩebakwo̧. Jweinö bakweminö lȩekwa yöawakwo̧, jwibadöbi, ju'wedö sulabenö ja̧tja̧jawö̧bi öba a'o tjichibenama, mikwawöködö jö̧ba̧löma öpöjödökakwo̧, jojodönö bakweminö edö, isabenö lȩekwa yöawo jö̧a̧li̧danö lȩebakwo̧. Isabenö otiwanö lȩebakwo sulabedönöma, jweinö lȩekwa yöbawö, sulabenö ja̧badönö kwabö lotjobö weakwo̧, debö tji̧'yakobetjö̧.

Isaías 4:6

Jau, iteda ujulunö Isabenö Jo̧ma tjöeba̧lakobe, möle comunidad ju̧kwadönö tubapji jö̧ba̧lö, ja̧danö ju'wibi otiwanö tjöekwemi baibanö pjaatakobe, labinö jwa̧le'ewenabi, ojwiyo o̧benabi, comunidad okwa ja̧nö ja̧tjö̧ otiwanö tjö̧jibakobetjö̧.

Isaías 11:5

Wanedö yöta̧la otiwanö ö̧jo jö̧a̧lidanö ö̧jakwa̧ma, koleasö̧je 'dutjawi̧danö Dios wei̧ a̧ja̧kwakwawa 'duawakwo̧, ja̧danö tja̧do 'dutjawi̧danö, jwaikwöda ja̧bö ö̧jo jö̧a̧li̧danö ja̧kwawa 'duawakwo̧.

Isaías 16:5

Ja̧danö, jemi ikenama, Diosma Davidmine itji̧mu tupadanö jojodötjö bakwo̧nö ujunakobe, inesö la'aka luwo̧ baibanö, Dios jwaikwöda kabatibökönö ile niebökwenö. Ja̧danö, joba Dios ujunajökwema, otiwanö jweinö webö ö̧jo jö̧a̧lidanö webö ö̧jakwo, jweinö lȩekwa yöawakwo̧, ja̧danö jweinö lȩebo jö̧a̧li̧danö lȩebobö isakwakwo̧, ja̧danö Dios wei̧danö a̧ja̧kwö juluwanö wei̧danö jabö ö̧jakwo̧, jo̧ba David itji̧mu tupadanö jojodötjö Dios ujunakwoma.

Isaías 33:5

Isabenö ju'wedötjö bajalekwönönö jo̧, duluwo̧ Isabenö Jo̧ma. Jau, Mölȩjȩbe Jo̧ duluwo̧ma, ja̧danö Sion mösa'otjö webö ja̧nö, otiwanö ja̧bö tjö̧jobö webo̧, iteda wei̧ a̧jakwö tjö̧jobö webo̧.