Isaías 30:7 - Dios Iwene

⁷ Jau, Egipto la'aka luwo̧ma pjaatakwo̧, jö̧ba̧lö omukwatö tji̧'yijayonö, Egipto niji la'aka luwo̧, –Pjatatakwo̧sa, —jö̧a̧li̧ma mikwawokobe. Jau, inesö juluwo̧ Rahab ötjabökwedanö juluwo̧ Egipto luwo̧ma, jö̧ba̧lö ichejekwijayonö, ja'yubebi pjabatö̧kö̧. Jo̧kwajabetjö̧ jo̧banö baikwö ötabocha, –Ba̧nöda bo̧ Rahab, –jö̧ba̧lö jo̧banö ötabocha, ja'yubebi pjaatokobetjö̧, —jö̧ba̧lö laebobe Dios yöawi̧ma.

Isaías 30:7 Referans Kwoze

Isaías 2:22

Jobekwö isabenö baledakobe chömöledö, jo̧kwajabetjö̧ bö̧jȩ jojodönö omukwatö kwö̧jaduwi̧ma kabatibö, Dios ösödi̧ jawada omukwatö kwö̧jaduwo. Jau chömöledö, bö̧jȩ jojodöma Dios öba a'otjö isabenö mikwawöködö, bö̧jȩ jojodöma sule tjo̧'wo emöda ju̧kwadö, juluwöködö bö̧jȩ jojodöma, jo̧kwajabetjö̧ Diosnöda omukwatö kwö̧jaduwo.

Isaías 7:4

Acaznö badekwajo̧, yökawonö: –Teada̧lönö ja̧nö, yebabökönui. Kwomajadenö tjö̧bawökönö, idö juluwöködö la'aka luwedönö yebabökönö kwö̧jo. Jau Acaz, jobadö siria niji la'aka luwo̧ Rezinbi, israel la'aka luwo̧ Pekabi jwiinö tjö̧dameakwijayonö, juluwöködö, sule ökwöla ubö̧'a, juluwanö tiibö̧'adanö ichejekwadö. Isabenö jobadöma ökwönö suli̧ tjöwaedotö jö̧ba̧lö omukwatö tjujunajabe,

Éxodo 14:13

Jejenö jwötjeba̧lökwe: —Chömöledö yekabiduwa. Kwo̧'woduwi 'dibachibö ja̧duwi. Makö kwedaduwakwedöja Isabenö Jo̧ ökwödö kwö̧jibaduwinö pjaati̧ma. Ja̧danö, kwö̧jibaduwinö pjaatobetjö̧ idö Egipto jojodö ichadö, babe kwedaduwawö̧nöma yemidanöma kwedaduwökakwawö̧.

Isaías 51:9

Duluwo̧ Isabenö Jo̧, baikwö adebakwö, A̧la̧ibi, juluwanö a̧la̧ibi, inesö kwujulu kwi̧sȩbakobetjö̧. Damötjö kwujulu kwi̧sȩbinadanö, yemidanö a̧la̧ibö ökwödönö pjakatobö atebakwö. Jau duluwo̧ Dios, ökwöda damötjö Rahab ötjabökwe, inesö jwaibalawanö ji̧na labo̧nö dȩdȩbö loköbijatö, ja̧danö dȩdebö lobajo̧, pjei̧kwena kwubulabinobe, jö̧tö? Jobekwö yemidanö kwujulu kwi̧sȩbobö atebakwö.

Isaías 30:15

Jobekwö isabenö baledakwawö̧ja chömöledö, Dios yöawi̧ kwöpöjödinaduwobetjö̧. Jau chömöledö, Isabenö Jo, Israel jojodö tjösödökwe Sulabe Jwibo̧ Diosma ökwödönö yöawinobe, —Sulabenö kwomukwataduwi̧ kabatibö, tjebachajö ötjönö kwo̧'wo kwöwana̧laduwitjö̧ma, kwö̧jibaduwakwedöja. Kwujuluduwi̧ma, ökwödöda jawamaökö, wi̧inö ja̧nö, ötjönö ösödö kwo̧'wo kwöwana̧laduwitjö̧ma, ja̧ kwösödaduwi̧da kwujuluduwi̧danö ja̧kobe, —jö̧ba̧lö yöawinobe. Jo̧kwaijayonö yöawi̧ a̧ja̧kwajadö, kwösödaduwoböma öpöjödinadöja chömöledö.

Isaías 28:12

Jau, ajayinö ökwödö iteda ömöledönö yöawinobe, —Bemi niji chiyaduwakwö, nöinö kwotidaduwaja̧tjö kwö'wachaduwobö. Lekwe möle nöinö kwebachö kwö̧jinaduwijayonö, babe bemi nijinö ja̧nö otiwanö kwö'wachaduwobö ja̧kobe, —jö̧ba̧lö yöawinobe, jokwaijayonö yöawi̧ tja̧ja̧kwobö tjöpöjödinobe.

Diosnö ösödo̧ Job mikwo̧ usula emawina jawa 9:13

—Ja̧danö Dios ödameakwenama, juluwanö kabatibö̧kö̧ ödameakwi̧ma, damötjö̧ inesö labo̧ jwaibalawanö jo̧ Rahab ötjabökwenöbi, Rahabnö pjabatadönöbi juluwinama jo̧ba Diosda.

Isaías 10:3

Jobekwö sulabenö ja̧köbaduwobetjö̧, ¡ökwödöwe! Dios lȩebakwa̧ mölȩ badekwachenama, dakwö kwö̧ji̧baduwakwajö? Ödötjö ichadö ökwödönö söbebö lobö tjichenama, dakwö kwö̧jibaduwakwajö? Dios yöawi̧ kwöpöjödaduwobema, dite tjöbeba̧lo̧ ö̧jobekwö dökibaduwakwajö? Ja̧danö nöinö kwujuna̧laduwi̧ma, dai kwujunibaduwakwajö, 'dötebapji jö̧ba̧löma?

Isaías 20:6

Babema belö jwaibalawa ö'öbö ju̧kwadötjö ba̧jȩkwadö jobadönö tjo̧'wo wana̧lö ja̧dö, —Egipto jojodöbi, Etiopia jojodöbi dö̧jibinö pjatjatakwedö, Asiria jojodö ökwödönö tjujuluwapji, —jö̧ba̧lö. Jo̧kwaijayonö Asiria luwo̧ jobadönö öbibö ȩwa̧jenama, tabakwö yebabinö jö̧tja̧lakwedö: —Ayö, idö do̧'wo döwana̧linawö̧nö baledina edaduwi. Jobadönö do̧'wo wana̧lö, tjö̧jobekwö dödibajijatö, isabenö Asiria la'aka luwo̧tjö dö̧jibinö pjatjatakwedö, jö̧ba̧lö. Jo̧kwaijayonö jobadönö ujuluwajabe Asiria luwo̧ma, ökwödöwe, dakwö dö̧jibakwajö Asiria luwo̧ ujulutjöma, dö̧jibobö jwiena, —jö̧ba̧lö yebabinö jö̧tja̧lakwedö.

Isaías 30:5

yayonö okobe deinö tabakwö kwö̧jaduwakwedöja. —Egipto jojodöma pjatjatakwedö, —jö̧ba̧lö yöka̧laduwijayonö, pjatjatobö jwitjakwedö. Jobadötjö kwemaduwakwa̧ma, kwöpöjojodöduwitjö ji̧kwawama kwemaduwökakwedöja, ja̧danö ju'wi pjatjatakwa̧ jawabi kwemaduwökakwedöja. Jobadötjö kwemaduwakwa̧ma, taba lö̧ji̧ jawada, ja̧danö jojodöma ökwödönö öbö yötja̧lakwedö, —Israel jojodöma wajwibö Egipto jojodönö tjo̧'wo wana̧linadötö, —jö̧ba̧lö laebobe Isabenö Jo̧ yöawi̧ma.

Isaías 36:9

Jo̧kwaijayonö chedemi kwömöayedötjö dos milbedö kabayudönö wanö ölakwabikwawadö deobe Ezequias, jo̧kwajabetjö̧ ökwödökwö kwölakwabikwawobö juluwö̧kö̧ja. Jau, chuluwo̧ ömöayedö ölakwabikwawa luwedötjö, ju'wedötjö baikwönönö juluwö̧kö̧nöbi kwujuluwobö jwibo̧ja. Ja̧danö, –Egipto jojodöma kolukiyanö ölakwabikwawadönöbi, kabayudönö wanö ölakwabikwawa jojodönöbi wetjakwedö, –jö̧ba̧lö kwo̧'wo kwöwana̧lobö jwiobe, isabenö ökwödötjö kwö̧jibobö jwibo̧ja.

Proverbios 25:19

Ja̧danö, ju'wibi yötawa: Ökwönö labi̧ jawa baledena, sulabenö omukwatö pjabatö̧kö̧ma, ökwönö pjaatobö ¿kwite'ada̧lakwa̧ji̧? Kwite'ada̧lokobe. Sulabenö omukwatö pjabatö̧kö̧ma ökwönö pjaatökakwo̧. Wanedö yötawa: Ji̧ko̧ ji̧ko̧ kwebacho̧ma ¿otiwanö kweachobeji̧? Otiwanö kwebachö̧kö̧. Ja̧danö, o'ye niökwema ¿niökönö ukwobeji̧? Niökwe. Ja̧ ji̧danö pjabatö̧kö̧ma la'akatjöda pjaatökakobe ökwönöma. Jo̧kwabetjö̧ pjaatoböma kwi'tea̧daloko.