Isaías 27:1 - Dios Iwene

¹ Ja̧danö, ja̧ möle Isabenö Jo̧ma Leviatan ötjabökwe jwaibalawanö jo̧nö lȩebakobe. Inesö nöbo̧ a̧ko'da Leviatanma, Dios öba a'otjö döibajakobe, öwali'bo wi̧su̧inö ja̧bö döibajakwo̧ Leviatanma, jo̧kwaijayonö Diosma iteda itea kwölöte'o, inesö nöa'o juluwa'onö kwabö loakobe jwaibalawanö jo̧ Leviatannö.

Isaías 27:1 Referans Kwoze

Isaías 51:9

Duluwo̧ Isabenö Jo̧, baikwö adebakwö, A̧la̧ibi, juluwanö a̧la̧ibi, inesö kwujulu kwi̧sȩbakobetjö̧. Damötjö kwujulu kwi̧sȩbinadanö, yemidanö a̧la̧ibö ökwödönö pjakatobö atebakwö. Jau duluwo̧ Dios, ökwöda damötjö Rahab ötjabökwe, inesö jwaibalawanö ji̧na labo̧nö dȩdȩbö loköbijatö, ja̧danö dȩdebö lobajo̧, pjei̧kwena kwubulabinobe, jö̧tö? Jobekwö yemidanö kwujulu kwi̧sȩbobö atebakwö.

Apocalipsis 12:3

Ikenama ju'wi i̧sebi̧ma mölejȩbetjö öwawachobe chedijatö. Jobetjö toba'dadanöso̧nö chedijatö, jwiinö nöbo̧nö, duwo̧nö. Jo̧bama uubiya jö̧kwe, jelemutjö doyulatajanö. Ja̧danö, ö'yekiyabi juna̧lo̧, domulataja jawa ökiya. Ja̧danö, inesö la'aka luwedö tjubutjawi̧danö, butjawa ökiya butjawo̧, uubiya bakwayukwena bakwakakwena.

Isaías 66:16

Jau chömöledö, bö̧jȩ ba̧kwemeachibanö ju̧kwadönö lȩebakobe Isabenö Jo̧ma, ökwölanöbi, iteda itea kwölöte'onöbi labinö lȩebakobe, isabenö ba̧jȩkwadönö lȩbebö loakobe Isabenö Jo̧ma.

Apocalipsis 20:2

Jo̧bama, böjȩnö ichibö, toba'dadanöso̧nö do̧batö ka̧lenasonö 'diinö nu'yö di̧batö ödobe chedijatö. Jo̧bama, jejenö di̧batö ödajökwema, Awetja, damötjö ji̧na a̧ko'da, omöna yöba̧lo̧. Ja̧danö, di̧batö ödajökwema lekwe, mil imiamebiya jenanö, labebökönö bo̧.

Apocalipsis 19:21

Ja̧danö, kabayu dewo̧ wamenö wo̧ma ju'wedönö, okobe deinö sulabo̧ duwo̧ ömöayedönö aatjö laebajapi̧nö dȩdȩbö loobe chedijatö. Dȩdȩbö loajawö̧ tjitebiya, mö köba̧ladö okobe deinö kwadö, tjomeawachibanö. Jejenö baledobe chedijatö.

Diosnö ösödo̧ Job mikwo̧ usula emawina jawa 40:19

—Okobe deinö ötjö Dios chotidinawö̧tjö, bajalekwönönö juluwo̧ baibanö chotidinökwe jo̧ba hipopotamo ötjabökwenö. Isabenö juluwo̧ baibanö chotidinökwe jo̧banö, ja̧danö ötjöda jo̧banö chotidinobetjö̧, jo̧banö juluwo̧sa.

Apocalipsis 17:15

Ina yöawijatö ötjönöma: —Ojwebiya ba̧jekwi̧ ödö kwedaja̧, isuju jelo̧ jelo̧nö juju ö'öbönö jö̧bena ojwebiya kwedaja̧, jojodönöda wanekwachobe, böjȩ okobe jwiinö ju̧kwadö jojodö, jelobebi, jelobe ju̧kwadönö, wainökwena tjiwene yöba̧ladönö.

Apocalipsis 17:1

Ikenama ángelesdö jelemutjö du̧ju̧tajanö dȩja̧'di̧junö okwi̧ sa̧badötjö bakwo̧ ichö ötjönö jö̧a̧lijatö: —Juan, ötjökwö ichi, chi̧sebokwö. Dios, isuju, jelo̧ jelo̧nö ju̧junö lȩebakwa̧ kwedo ichi. Jobujuma, ojwebiya ba̧jekwi ödö lö̧jena ö'öbönö bu̧ju.

Apocalipsis 16:13

Ikenama chedijatö wa̧medukwa isapjobedönö, sulabedönö, puledanö ichejekwadönö. Jobadötjö bakwo̧ toba'dadanöso̧ aa okwatjö labebo̧. Ja̧danö, jelo̧, ojwe okwatjö labebina aa okwatjö labebo̧. Ja̧danö, jelo̧, böjȩ okwatjö labebina, Ötjöma Dios yöawi̧ yöbawo̧sa, jö̧ba̧lö, omöna yöba̧lo̧ aa okwatjö labebo̧.

Apocalipsis 13:11

Ikenama jelo̧ sulabo̧ laebobe chedijatö, böjȩ teebetjö labebo̧nöma. Jo̧bama obeja ö'yekiya dökölataja jö̧kwe. Jo̧bama toba'dadanöso̧ iwenedanö yöba̧lo̧.

Apocalipsis 13:4

Ja̧danö, jobadöma toba'dadanöso̧nöbi nöinö ösödadö, ojwe okwatjö labebajo̧nö iteda ujulu iyiawö̧, la'aka luwo̧ baibanö. Ja̧danö, ojwe okwatjö labebajo̧nöma edö, ¡Ayö! Bitema jwiinö juluwo̧, jo̧badanö juluwo̧ma deobe, jö̧ba̧lö, tjösödobe chedijatö. Ja̧danö, ¿Tida jo̧banötjö o̧penönö juluwo̧ma? ¿Tida jo̧banö kwabö lobo̧ma? ¿Tida jo̧banö ujuluwakwo̧ma? Deobe, jö̧ba̧lö, ojwe okwatjö labebajo̧nö tjösödobe chedijatö.

Apocalipsis 2:16

Jo̧kwaobetjö̧ ökwödötjö jelobekwö omukwatadönö baikwö weta: Jelobekwö kwomukwatuduwi̧ kabatibö balewachaduwi. Kwöbalewachaduwökötjö̧ma, kwö̧jaduwobekwö labinö chi̧'yakwo̧sa, ökwödönö chitichakwobö chisa̧pi̧nö, chaatjö laebapi̧nö.

Isaías 65:25

Okobe jwiinö chitea'o mösa'o ba̧kwemeachibanö, otiwanö inia tjöbökönö tjö̧jakwedö, otiwanö söbebö lotjököwö̧ tjö̧jakwedö. Ja̧ möle, tebo awilidö lobo ötjabawö̧ma, bakobe obejadökwö dösölö̧jinö ja̧nö, tju̧kwa tjukwakwedö. Ja̧danö didibadöma, meje'ye tjukwakwedö, pakayadö tjukwi̧danö. Ja̧danö a̧ko̧'döma, laböködö ja̧nö, nijinö ba̧nö nijiso̧pja̧da tjukwakwedö. Jobekwö baledakwa̧ ötjö Isabenö Jo̧ yötawajabe, isabenö yötawaja̧danö baledakobe, jö̧ba̧lö yöawobe Diosma.

Isaías 26:21

Jau chömöledö, babe ö̧jelö labebo̧ Diosma, bö̧jȩnö ju̧kwadönö lȩebakobetjö̧. Bö̧jȩnö ju̧kwadö sulabenö ja̧bö tjö̧jiökwe, ö̧jelö labebo̧ Isabenö Jo̧ma, jobadönö lȩebakobetjö̧. Jobekwö lȩebobetjö̧, okobe deinö tjöwaisachibanö öwawakobe, bö̧jȩtjö sulabenö kwabö lotjina wenema. Kwabö lobajadö sulabenö jatja̧ja̧ tjotojinajayonö, öwawachibanö i̧sȩbakobe, bö̧jȩ jojodönö lȩebenama,

Diosnö ösödo̧ Job mikwo̧ usula emawina jawa 3:8

Mea boawa waisadö, inesö labo̧ jwaibalawanö jo̧ Leviatan ötjabökwenö tjiwiludobö waisadö mea bobadö ja̧ chojo'do jemina möle suli̧ waedö mea botjobö chösöda, jwiinö chöpöjödi̧ möle ja̧ mölema.

Diosnö ösödo̧ Job mikwo̧ usula emawina jawa 41:1

Tupakwö yöa̧linobe Diosma: —Inesö juluwo̧ jwaibalawanö jo̧ Leviatan ötjabökwenöbi kwomukwato ja̧danö. Jo̧banö lö̧'awö, a̧jwa̧sopjanö do̧katenaji̧? A̧la̧chi'bonö, aaponö di̧katenaji̧?

Isaías 65:12

Jo̧kwaijayonö, ötjödasa ökwödönö baledakwa̧ omudawö juno̧ma, jobadömaökö. Ja̧danö jobekwö sulabenö ja̧köbaduwi̧tjö̧, ökwödönö baledakwa̧ma baikwö yötawaduwakwö: Ökwödönö jwötenama, atadökönö ji̧nadöja, ja̧danö ökwödönö yötawenama, a̧ja̧kwinöködöja. Weti̧ öpöjödö, chöba a'otjö sulabenö ja̧binadöja, jwaikwöda inesö chöpöjödi̧ jawada ja̧köbaduwobö omudawö juninadöja. Jo̧kwajabetjö̧, ökwödönö baledakwa̧ baikwö omudawö chujunajabe, ökwödönö dȩdȩbö lotjakwa̧ omudawö chujunajabe, ja̧danö dȩdȩbö lotjajawö̧ meköbaduwakwedöja.