Hechos 7:25 - Dios Iwene

²⁵ Ja̧danö, Moisésma omukwatijetö, Chömöledöma ötjönöma tjöwaisena, Moisésma Dios weinökwe dö̧jibinö pjaatobö, jö̧ba̧lö. Moisésma jejenö omukwatijayonö ömöledöma jejenöma omukwatijöködötö—yöbawijetö Estebanma—.

Hechos 7:25 Referans Kwoze

Colosenses 1:29

Jejenö okobe deinö chöda̧pedo jö̧ba̧lö ötjöma usula emawö chotidobe chömöledö. Jau chömöledö, Cristoma ötjönö ujulu iyobe, ja̧ chotido jö̧ba̧lö, ja̧danö iyaja̧ ujulunö jwaikwöda jejenö otidö chö̧jobe.

2 Corintios 6:1

Jejenö laebobe otiwa jawa wenema chömöledö, ja̧danö Dioskwö bakobe otidö, budekwödanö abebadösa jojodönö, Dios mikwa jwiinö otiwanö iyö pjaati̧ma kwöpöjödaduwa jö̧ba̧lö. Jau chömöledö, Dios iwene damötjö tjiwȩyudinadanö jo̧be, baikwö laebobe Dios iwene: Ökwödönö pjatatakwa̧ möle baibenama, ökwödönö cha̧ja̧kwijatö, ja̧danö kwö̧jibaduwinö pjatatakwa̧ möle baibenama, ökwödönö pjatatijatö, jö̧ba̧lö laebobe Dios iwene. Jejenö laebobe Dios iwene chömöledö, ja̧danö Dioskwö bakobe otidö yödawobe: Dios ökwödönö pjaatakwa̧ möle jö̧ba̧lö badekwachi̧ma, babe möleda badekwachobe, ja̧danö kwö̧jibaduwinö pjaatakwa̧ möle badekwachi̧ma babe möleda badekwachobe, jo̧kwajabetjö̧ Dios iyi̧ öpöjödökönö, Cristonö kwösödaduwo jö̧ba̧lö yödawobe jojodönö.

1 Corintios 15:10

Jo̧kwaijayonö, Diosma mikwa jwiinö otiwa jawa iyinobetjö̧, Jesús webawo̧ chö̧jobe chömöledö. Ja̧danö, Dios ötjönö iyinama waekwinokobe chömöledö, ja̧danö ju'wedönötjö o̧penönö 'diinö chotidijatö chömöledö. Jo̧kwaijayonö, ötjöda chotidijökötö chömöledö, Diosda otiwa jawa iyö ötjönötjö 'diinö otidinobe ichejekwa.

Romanos 15:18

Jau chömöledö, tabada̧lökönö yötawa ötjö chotidinama, jo̧kwaijayonö ötjöda chotidinamaökö, Cristo ötjönötjö otidinada yötawa chömöledö. Judío jojodöböködönö yöbawöbi, i̧seböbi yötawijatö Dios iwene, jobadöbi Dios wei̧ ja̧tjo jö̧ba̧lö.

Hechos 21:19

Jeju tebachö Pabloma, Dokwa chömöledö, abebajo̧ jobadönö yöawijatö okobe jwiinö Dios judío jojodöböködönö pjaatinama, Pablo jobadökwö yöbawö ö̧jonö.

Hechos 15:7

Lekwe yötja̧lakwawaja̧ ikenama Pedroma jamatö jö̧ba̧lijetö: —Chömöledö, ökwödöma kwöwaisaduwa ötjönö baledinama. Ajayinöma, Jesús weina dotidobö yöba̧lakwawö doko̧ko̧kwena Diosma ötjönö 'da̧batö ujuninobe judío jojodöböködönö yötawobö otiwa jawa wenema, jobadöbi a̧ja̧kwö Jesúsnö tjösödobö.

Hechos 15:4

Ikenama Jerusalénnö ichibö jobe ju̧kwadö, Jesúsnö ösödadöma edö ösödijadötö jobadönöma, Jesús webawedöbi, ösödadönö te'ada̧lakwawa jojodöbi, ju'wedöbi Jesúsnö ösödadöma, Otiwanö kwichaduwajabe, jö̧ba̧lö. Ichajadöma okobe jwiinö Dios pjaatina yöbawijadötö, Dios iwene yötjawonö pjaatinama.

Hechos 14:27

Ida̧ökö kabatakwawajadöma ȩwa̧jijadötö. Jobe ȩwa̧jadöma jwöbijadötö okobe deinö Jesúsnö ösödadönöma tjuju̧kwobekwö ichö tjoko̧ko̧kwachobö. Ichö ko̧ko̧kwajadönöma yöbawijadötö okobe jwiinö Dios pjaatina, Jesúsnö yötjawonö pjaatina jobadönöma. Baikwö wanedö yöbawijadötö: —Chömöledö, Diosma apjude po̧ebinobe judío jojodöböködöbi Jesúsnö ösödadöma jweinö tjichibobö Diosnö— wanedö yöbawijadötö.

Lucas 18:34

Jobekwö jweinö yöawinobe Jesúsma, Jerusaléntjö iteda woakwa̧ wenema, jo̧kwaijayonö jweinö yöawijayonö, yöawi̧ otiwanö do̧batöma tja̧ja̧kwinokobe Jesús webawedöma. Jobadöma baledakwa̧ wainö tjomukwatinobe, jo̧kwajabetjö̧ jweinö yöawinajayonö öwawinokobe jobadönö, ja̧danö otiwanö tja̧ja̧kwobö jwiinobe.

Lucas 9:45

Jesús jejenö jweinö iteda öba̧ja̧di̧ waisachadönö yöawinajayonö, yöawi̧ otiwanö do̧batö tja̧ja̧kwinokobe. Jobadöma Jesúsnö la'aka duluwo̧ baibakwo̧ jö̧ba̧lö ida̧ökö tjomukwatobetjö̧, woakwa̧ yöawi̧ma otiwanö badekwachinokobe jobadönö, ja̧danö otiwanö tja̧ja̧kwobö jwiinobe. Ja̧danö, ju'wibi otiwanö tja̧ja̧kwököjayonö, abebö tja̧ja̧kwobö yetjabinobe, jo̧kwajabetjö̧ jweinö yöawijayonö, otiwanöma do̧tja̧tinokobe.

Marcos 9:32

Jejenö yöawijayonö Jesús öba̧ja̧di̧ waisachadöma do̧batiböma a̧ja̧kwijöködötö, ¿Dakwö jö̧ba̧lö yöbawo̧jö? jö̧ba̧lö. Wajwitjobetjö̧ yebabinö abebö a̧ja̧kwijöködötö Jesúsnö, ¿Dakwö jö̧ba̧lö yökawa? jö̧ba̧löma.

2 Reyes 5:1

Bakwo̧ Naaman mikwo̧, siria jojodötjö ölakwabikwawadö tjuluwo̧ ö̧jinobe. Jo̧ba Naamanma, isabenö juluwo̧ ö̧jinobe, ja̧danö Isabenö Jo̧ma iyinobe, Naaman weonö, Siria jojodö tjujuluwobö. Jo̧kwajabetjö̧ Naaman uluwo̧ Siria inesö la'aka luwo̧bi, ju'wedö jojodöbi otiwanö tjomukwatökwe ö̧jinobe Naamanma. Isabenö juluwo̧ ö̧jinobe Naamanma, jo̧kwaijayonö ju'wibi, inesö labi̧ tjö'wöchi̧ lepratjö 'dö̧achinobe Naamanma.

1 Samuel 19:5

Ja̧danö filisteo jojo Goliatnö kwabö loina omukwati chabe'do, isabenö debö i̧'yo jö̧a̧linobe, Goliatma jwiinö juluwo̧ ö̧jinobetjö̧. Jo̧kwaijayonö iteda otiwanö ö̧jakwa̧ omukwatökönö, Goliatnö kwabö loobö i̧'yinobe, ja̧danö Davidnötjö̧ Isabenö Jo̧ma okobe deinö israel jojodönö dö̧jibanö otiwanö pjaatinobe. Ja̧ möle ökwöbi edö, kwo̧'wo ösödachibanö kwedijatö chabe'do, ¿jö̧tö? Jo̧kwajabetjö̧ tajawedö babe Davidnö kwabö loawa kwösöda chabe'do? Isabenö jo̧banö suli̧ kwöwaedoböma jwiobe chabe'do, isabenö ja'yubebi ökwönö sulabenö ja̧okobetjö̧, —jö̧ba̧lö.

1 Samuel 14:45

Yöa̧liawö̧, jojodöma tjöpöjödinobe, ja̧danö öpöjödö Saulnö yötja̧linobe: —Ja̧maökö, Jonatan debö i̧'yoböma jwiobe. Jo̧bada babe filisteo jojodötjö dö̧jibobö pjabatajo̧ma. Isabenö babe möle Jonatanma Dioskwö bakobe otidö, ökwödö israel jojodönö dö̧jibinö pjaatajabe, jo̧kwajabetjö̧ ja'yubebi jo̧banö kwaköbökakobe, öwö'yetjö bakwa'yebi tjoduwökönö. Jau, Isabenö Jo̧ yaba̧lo̧ ö̧ji̧ wenedanö, ju'wibi isabenö yödawakwö, Jonatannö kwabö lököbökakobe, —jö̧ba̧lö yötja̧linobe israel jojodöma, Jonatannö tjöbeba̧lö. Jejenö Israel jojodöma Jonatannö ö̧jibinö pjatjatinobe, debö i̧'yapji jö̧ba̧lö.

1 Corintios 3:9

Jau chömöledö, ötjöbi, Apolosbi bakobe Dios wei̧ otidö batjo otikwa jojodödanö ichejekwadösa. Ja̧danö, ökwödö Corintio jojodöma Dios öbatjodanö ichejekwadöja chömöledö. Ja̧danö ju'wi wanedö yötawa chömöledö: Ökwödöma Dios ejudanö ichejekwadöja.

Éxodo 2:12

Kwakwaiökwe jelobe jelobebi jalachabiabinö edemi, baima jojodö dea jö̧ba̧lö, egipto jojonö, ömöledöso̧nö kwakwabo̧nö kwabö lobijetö Moisésma. Ikenama kwabö loajökwenöma so̧bi̧ya̧pu̧nö o̧tjö lobijetö.

Hechos 7:24

Ikenama, jobekwö 'ya̧nö Moisésma edijetö egipto jojoma Israel jojonö inia tjöinö ja̧obe. Jejenö ja̧iökwe Moisésma ömöledöso̧nö, israel jojonö pjabatö, balekwa mikwa ja̧bö kwabö lobijetö Egipto jojonöma.

Hechos 7:26

Ju'wi dewachö Moisésma edijetö du̧ju̧taja ömöledönö, israel jojodönöma 'do'dotjakwawobe. Katjatakwawobö jö̧ba̧lijetö Moisésma, Chömöledö, ökwödöma kwömöledöduwi ¿tajawedö 'do'doköbakwawaduwa? jö̧ba̧lö.

Jueces 15:12

Yöa̧lawö̧, yötja̧linobe, —Ökwödöma ökwönö do̧batö, dunu'yobö dichajabe, do̧batajadö filisteo jojodönö diyobö, jobadöma ökwödönö kwabö lotjapji jö̧ba̧lö. —Yötja̧lökwe, —Ökwödöma kwabö lobökönö, sule nu'yöda kwunu'yaduwitjö̧ma, kwunu'yaduwobö wetawocha. Jo̧kwajabetjö̧ yöbawö junaduwitjö, –Isabenö kwabö lobökönö, sule nu'yöda dunu'yakwedösa, –jö̧ba̧lö. Jejenö yöbawö kwujunaduwitjö̧ma, kwunu'yaduwobö wetocha, —jö̧ba̧lö.