Hechos 6:3 - Dios Iwene

³ Jo̧kwaobetjö̧, chömöledö, ökwödötjö emö junaduwi jelemutjö du̧ju̧tajanö ömadönö, pjaatakwawa jojodönö, ja̧ iyawa webadö batjibinö. Jobadö emö kwujunaduwakwawö̧ma, Otiwanö omukwatö ju̧kwadö, jö̧ba̧lö, jojodö yötja̧lawö̧nöda emö kwujunaduwo. Ja̧danö, jobadö emö kwujunaduwakwawö̧ma waisanö omukwatadönöda kwujunaduwo. Ja̧danö, Dios O̧'wo̧ Luwo̧ öba̧ja̧dawö̧nöda emö kwujunaduwo. Emö kwujunaduwawö̧nö wedakobe jobadöda iyawa wetjobö.

Hechos 6:3 Referans Kwoze

Deuteronomio 1:13

jo̧kwajabetjö̧ ökwödö bakwasokwena jojodöma ökwödötjö waisadö, ja̧danö otiwanö omukwatadö, ja̧danö jojodö otiwanö tjomukwatawö̧nö omudawö kwujunaduwo, ja̧danö omudawö kwujunaduwajawö̧nö kwuluwedöduwi lȩekwa luwedö batjibanö 'da̧batö chujunocha, –jö̧ba̧lö ökwödönö yötawijatö Sinaitjöma.

1 Timoteo 5:10

ja̧danö, wobekwinadötjö tjite'ada̧lakwawö̧ma sule jojodö, Bidöma otiwanö ja̧bö ji̧nadö, jö̧ba̧lö tjöwaisawö̧nöda. Ja̧ otiwanö ja̧bö tjuju̧kwina jawama baikwö yötawa: Otiwanö tji̧tji̧munö bötjatö, jelobetjö ichajadönö tjejunö tebatö, ju'wedö Jesúsnö ösödadö tjömöayujudanöbujusa jö̧ba̧lö pjabatö, usula emawadönö pjabatö, ja̧danö jwaikwöda okobe jwiinö otiwanö ja̧awa ja̧bö. Jejenö ja̧bö ji̧nadö ya̧dö tji̧lȩkwa̧munö wobekwinadönöda kwujuno, Jesúsnö ösödadö tjite'ada̧lawö̧, jö̧ba̧lö

3 Juan 1:12

Ja̧danö, jelo̧ dömöledöso̧ Demetrionö yötawa. Jojodöma ba̧jekwadö jo̧banö otiwanö yötja̧lobe, Demetrioma otiwi̧ jawa ja̧bö jo̧, Dios isabenö ji̧ yöawi̧ a̧ja̧kwo̧, jö̧ba̧lö. Ötjöbi jejenö yöta̧la jo̧banöma, Otiwi̧ jawa ja̧bö jo̧ Demetrioma, jö̧ba̧lö. Ja̧danö, kwöwaisa ötjö yöta̧li̧ma jweinöda yöta̧lobe.

Santiago 1:17

Isabenö chö̧ja̧wo̧dö, Diosma suli̧ jawa iyoböma jwibo̧. Ja̧danö, ökwödö sulabenö ja̧dobö domukwati̧ma ¿Diostjö ichobeji̧? Ichokobe Diostjöma. Suli̧ jawa ja'yubebi ichokobe Diostjöma. Dios iyi̧ma bakwai̧ otiwi̧da ji̧. Ja̧danö chö̧ja̧wo̧dö, ja̧ otiwi̧ jawa iyi̧ma Diostjöda ichobe, okobe deinö mölejȩbe dejatinö lö̧jadönö otido̧tjöda. Ja̧danö, jobadö Dios otidinawö̧, mölejȩbe dejatinö lö̧jadöma ju'wikwenama nöinö dejatadö. Ja̧danö, ju'wikwenama ja'yubeda dejatadö. Ju'wi möle jwiinö ba̧kwȩlö̧jateböma dejatöködö. Ja̧danö, ju'wikwena tjidejatemima isa'wo tjöeba̧lawö̧. Jo̧kwaijayonö chö̧ja̧wo̧dö, Dios otiwi̧ma la'akatjöda tjöeba̧lokobe. Wajuwanö ji̧, tjöbeba̧lökönö. Ba̧kwȩlö̧jatebö bakwai̧da tjöbeba̧lökönö ichobe Dios otiwi̧ma, jo̧batjö. Ja̧danö, Diosma la'akatjöda balewachökö. Bakwainöda jo̧, otiwo̧da. Ja̧danö, jo̧ba iyi̧ma otiwi̧da iyo̧.

Efesios 5:18

Ja̧danö, ju'wibi yöbawö wetaduwakwö chömöledö. 'Dukwachinöma kwowa̧laduwa. Owa̧lo̧ma o̧'wo̧ luwo̧nö omukwatökönö ju'wida sulabenö ja̧bö jo̧, okobe jwiinö ö̧ji̧ma. Wanedö yötawa chömöledö: Nio ojwiyo 'dukwachinö kwowa̧laduwa, ja̧da tupakwö kwuluwo̧duwi baibanö 'ya̧nöma. Dios O̧'wo̧ Luwo̧da ökwödö kwuluwo̧duwima, nio ojwiyo owa̧lakwawamaökö. Jo̧kwaobetjö̧ jo̧bada öba̧ja̧da̧lonö ja̧bö ju̧kwaduwi chömöledö.

1 Corintios 16:3

Jau chömöledö, ja̧ balada Jerusalénbe e'ewö tjiyakwedönö omudawö kwujunaduwo, ja̧danö ötjö chichibenama, kwujunaduwajawö̧nö kwialusöja wȩyudö chiyocha, ju'wedö jobadönö tjöwaiso jö̧ba̧lö. Ja̧danö, jobadönö wetocha kwiyaduwaja̧ e'ewö tji̧'yo Jerusalénbe.

Hechos 22:12

Jobema, bakwo̧, Ananías mikwo̧ma, Dios wei̧ ja̧bö jo̧ma ö̧jijatö. Okobe deinö jobe ju̧kwadöma, judío jojodöma, Ananiásnö tjösödökwe, Otiwanö ja̧bö jo̧, jö̧ba̧lö.

Hechos 10:22

Jejenö abebö a̧ja̧kwiawö̧ atadijadötö: —Duluwo̧ Cornelioma, ciennö guardia jojodö tjuluwo̧ma weatö ökwödönöma ökwönö öbibö di̧'yobö. Jo̧ba Duluwo̧ma otiwanö omukwatö jo̧. Diosnö otiwanö yebabinö omukwato̧. Okobe deinö judío jojodöma tjösödökwe Duluwo̧nöma. Dios weajökwe ángelma öwawachajo̧ webijetö Duluwo̧nöma ökwönö weobö, iteda ejube kwi̧'yobö, ökwö yökawi̧ a̧ja̧kwobö— yöbawijadötö.

Hechos 6:6

Ja̧danö, jobadönö emö junajadö Jesús webawedö tjöba a'o tjöjamatobö öbibö 'yi̧jadötö, tjemajawö̧nöma. Ikenama Jesús webawedöma ötjibajawö̧ tjuu wamenö 'bibeba̧lö Diosnö abebijadötö. Jejenö jobadönö jwibadönö tju̧kwa iyawa webadö baibanö junijadötö.

Hechos 2:4

Ikenama jobadönö okobe deinö Dios O̧'wo̧ Luwo̧ma tebachibö jamatijetö. Tebachibö öjamatajawö̧ma ju'wedö tjiwene wajwitjijayonö yöbawijadötö. Ja̧ yötjawi̧ma Dios O̧'wo̧ Luwo̧da pjabatijetö, ju'wedö tjiwenenö yötjawobö.

Hechos 1:21

—Jo̧kwaobetjö̧ chömöledö, babema Judas deobetjö̧, jelo̧nö emö dujuno, ökwödökwö yöbawö kweachobö. Emö dujunakwo̧ma ökwödökwö Jesús ina ö̧jayi kwebachiabinada. Jo̧bama, ajayinö, Juan jojodönö ojwenö ubu̧datinobekwö Jesús mölejȩbe kaekwajina möle baibanö ökwödökwö kwebachiabinada, emö dujunakwo̧ma. Jo̧ba emö dujunakwo̧ma, Jesús yemidanö tjebachajo̧nö ediabinada. Ja̧danö, jo̧ba emö dujunakwo̧ma ökwödökwö Jesús yemidanö tjebachajo̧nö dedina yöbawo̧— jö̧ba̧lijetö Pedroma.

Mateo 23:8

Jo̧kwaijayonö, ökwödöma jobadö ja̧tji̧danöma ja̧bökönaduwi chömöledö. Jojodö ökwödönö ba̧ja̧dakwawa luwo̧ jö̧ba̧lö yötja̧loböma webökönaduwi, ba̧ja̧dakwawa luwo̧ kwuluwo̧duwima bakwo̧daobetjö̧, ja̧danö ökwödö okobe deinö jo̧bada öba̧ja̧dawö̧köbaduwobetjö̧.

Isaías 28:26

Ja̧danö, baikwö yötawaduwakwö chömöledö, jobekwö otidi̧ma, Diosda jobekwö waisanö otidobö ö̧ba̧ja̧diökwe, jobekwö otido̧.

Isaías 28:6

Ju'wibi ja̧ möle Diosda lȩekwa luwedönö pjaatakwo̧, okwa jawa waisanö tjomukwatakobetjö̧, jadanö jobada israel jojodötjö ölakawabikwawadönö tjujuluwachibanö pjaatakwo̧, comunidad apjude a'ö ölakwabikwawö, tjitebo comunidad tjötjeba̧lakobetjö̧.

1 Corintios 12:8

Ja̧danö, Dios O̧'wo̧ Luwo̧ma bakwo̧nö iyena, jojodönö waisanö lȩekwa yöawo jö̧ba̧lö. Ja̧danö, jelo̧nö waisakwawa ji̧ wene yöawo jö̧ba̧lö iyo̧ma jo̧bada, Dios O̧'wo̧ Luwo̧da.

Hechos 16:2

Ju'wedö Jesúsnö ösödadöma ösödijadötö Timoteonöma, Otiwanö omukwatö jo̧, jö̧ba̧lö. Listranö ju̧kwadöbi, Iconionö ju̧kwadöbi Jesúsnö ösödadöma ösödijadötö Timoteonöma.

Hechos 15:23

Jobadöma kwialusöja e'ewijadötö Antioquíabe, judío jojodöböködö Jesúsnö ösödadönö iyö. Jöja kwialusöjama baikwö wȩyudö laebijetö: —Dokwa dömöledö. Ökwödöma, kwömöledöduwi Jerusalénnö ju̧kwadöma, Jesús webawedökwö, Jesúsnö ösödadönö te'ada̧lakwawa jojodökwö ökwödönö diwȩyuda böja kwialusöjama. Ökwödönö, judío jojodöböködö Jesúsnö ösödadönö, Antioquíanö ju̧kwadönöbi, Sirianö ju̧kwadönöbi, Cilicianö ju̧kwadönöbi diwȩyuda.

Hechos 9:30

Jo̧kwaijayonö, ju'wedö Jesúsnö ösödadöma ja̧ tjomukwati̧ yötjawi̧ a̧ja̧kwö Saulonö öbibö 'yi̧jadötö Cesareabe. Jobetjö Tarsobe i̧'yobö webijadötö Saulonö.

Éxodo 18:21

Ja̧danö, ju'wi jawabi yötawakwö: kwömöledötjö ju'wedönö 'da̧batö kwujuno ökwönö pjabatadönö, wene juna̧ladö yötja̧lakwawi̧ a̧ja̧kwö omukwatö tjujunakwedönö. 'Da̧batö kwujunawö̧ma jweinö omukwatö kwujuno, Diosnö yebabinö ösödadönöda. Ja̧danö, jojodö tjösödawö̧nöda, jweinö omukwatadö, jö̧ba̧lö, 'da̧batö kwujuno. Ja̧danö, balada tjemobö omöna yöba̧löködönöda kwujuno. Jobadönöma wene junala̧dö yötja̧lakwawi̧ a̧ja̧kwö, omukwatö tjujunobö weköbo. Ja̧danö, jobadö 'da̧batö kwujunajawö̧tjö ju'wedöma tjömöledö domulatajabedö tjuluwedö batjibanö, tjömöledö wene juna̧ladö yötja̧lakwawi̧ a̧ja̧kwö omukwatö tjujunobö 'da̧batö kwujuno. Ja̧danö, ju'wedönö kwujuno, cincuentabedö tjuluwedö batjibanö, wene juna̧ladö yötja̧lakwawi̧ a̧ja̧kwö omukwatö tjujunobö. Ja̧danö, ju'wedönö kwujuno, cienbedö tjuluwedö batjibanö, wene juna̧ladö yötja̧lakwawi̧ a̧ja̧kwö omukwatö tjujunobö. Ja̧danö, ju'wedönö kwujuno, milbedö tjuluwedö batjibanö, wene juna̧ladö yötja̧lakwawi̧ a̧ja̧kwö omukwatö tjujunobö.

Juan 21:23

Jesús ja̧ yöawi̧, Yemidanö chichenama Juan ö'wö baibökönö ö̧jobe chösöditjö̧ma ö'wö baibökönö ja̧tena, jö̧ba̧lö, yöawi̧ma, Jesúsnö ösödadö jelobe ju̧kwadöbi, jelobe ju̧kwadöbi jojodö yötja̧lakwawi̧ma tja̧ja̧kwinobe. Ja̧ yötja̧lakwawi̧ a̧ja̧kwö ba̧jekwadö jelobekwö tjomukwatinobe, Aaa, Juanma ö'wö baibökakwo̧, jö̧ba̧lö. Jejenö tjomukwatijayonö, jejenömaökö, Jesús yöawinama. Baikwö jö̧ba̧lö yöawijatö: Yemidanö chichenama Juan ö'wö baibökönö ö̧jobe chösöditjö̧ma ö'wö baibökönö ja̧tena. Ja̧ma ökwö jawamaökö Pedro, jö̧ba̧lö yöawijatö Jesúsma.

Hechos 1:15

Ju'wi möle jobadö tjoko̧ko̧kwena, ciento veinte jenanö ju̧kwijadötö. Pedroma jobadö tjö'da̧denö jamatö yöbawijetö:

Hechos 6:2

Jejenö jö̧tja̧liawö̧ Jesús webawedöma a̧li̧nösamutjö du̧ju̧tajanö jojodöma jwöbijadötö okobe deinö Jesúsnö ösödadönö, tjichobö. Ichajadönö jö̧ba̧lijadötö: —A̧ja̧kwaduwitjö. Ökwödö Dios iwene döba̧ja̧di̧tjö kabatibö iyabikwawa diyaboböma otiwökö— jö̧ba̧lijadötö—.

Hechos 6:5

Jejenö jö̧tja̧liawö̧, okobe deinö Jesúsnö ösödadöma a̧ja̧kwö ösödijadötö. Jo̧kwaobetjö̧ emö junijadötö Esteban mikwo̧nö. Jo̧bama Diosnö jwiinö ösödö ji̧abijetö. Dios O̧'wo̧ Luwo̧ iteda o̧'wo̧ luwo̧ okwanö öba̧ja̧di̧ a̧ja̧kwö ji̧abijetö. Ja̧danö, ju'wedö tjeminawö̧ma bidö: Felipe, Prócuro, Nicanor, Timón, Pármenas mikwadö. Jelo̧ma Nicolás, Antioquíanö jo̧. Jo̧ba Nicolásma judiobö̧kö̧jayonö judíoso̧danö ji̧abijetö.

Hechos 28:14

Jobema Jesúsnö ösödadönö döbadekwajijatö. Jobadöma da̧debijatö ökwödönöma jobadökwö dö̧jobö bakwöta semana baledibanö. Ikenama jobetjö kwebachö di̧'yijatö dömasapanöda Romabe.