Hechos 25:8 - Dios Iwene

⁸ Ikenama Pabloma jobadö jwötjeba̧li a̧ja̧kwö atadö yöbawijetö: —Ötjöma bidö yötja̧li̧danö, sulabenö ja̧tina yötja̧li̧danö ja̧tijökötö. Ökwödö judío jojodö ja̧biabö duju̧kwobö wetjina jelobekwö omukwatö ja̧tijökötö. Ja̧danö, Dios eju okwa, wetjökö jawa ja̧bö, suleju baibanö ja̧tijökötö. Ja̧danö, ötjöma sulabenö ja̧tijökötö, la'aka luwo̧ César mikwo̧ wei̧bi a̧ja̧kwökönö— atadö yöbawijetö Pabloma.

Hechos 25:8 Referans Kwoze

Hechos 28:17

Ikenama, wa̧pötakwa möle baledajena Pabloma Romanö ju̧kwadö judío jojodötjö la'aka luwedönö a̧debijetö, ejubekwö tjichobö. Ichö ko̧ko̧kwajadönö yöbawijetö: —Dokwa chömöledö. Ötjönö baledina yötawotö jö̧ba̧lö jwötatö ökwödönö, kwöwaisaduwobö. Belö dömöledö judío jojodöma, Jerusalénnö ju̧kwadöma ötjönö do̧batajadö iyö lotjijatö romano jojodö la'aka luwedönöma, Cesareanö ju̧kwadönöma. Chömöledö jweinö yötawa, ötjöma la'akatjöda jobadö judío jojodönö sulabenö ja̧tijökötö. Ökwödötjö ajayinö ji̧nadö wetjina jawa la'akatjöda sulabenö yötawijökötö, jobadö ötjönö omöna jwötjeba̧li̧danö. Sulabenö ja̧tököjayonö jobadöma ötjönöma iyö lotjijatö.

Hechos 24:12

Bidö ötjönö jwöbeba̧ladöma tjedijökötö ötjönöma, Jerusalénnö ja̧nö ju'wedökwö labinö yötalakwawi̧ma. Tjedijökötö jojodö tjölakwabikwawinö ja̧ti̧ma, chuluwo̧. Ötjöma jejenöma ja̧tijökötö Dios eju okwabi, judío jojodö yötjaweju okwabi, jelobebi bemi comunidadma.

2 Corintios 1:12

Chömöledö, otiwanö ökwödönö ja̧bö dö̧jina wene yötawaduwakwö, ökwödönö sulabenöma ja̧binöködösa jö̧ba̧lö. Jau chömöledö, okobe jwiinö böjȩnö ja̧nö ja̧di̧ma, ja̧danö ökwödönö ja̧bö dö̧ji̧ma sulabenö ja̧bökönö dö̧jijatö, Dios pjaatonö jweinö ja̧bö dö̧jijatö chömöledö. Ja̧danö, ja̧bö dö̧jinama ökwödöda waisanö omukwatöma ja̧dijökötö chömöledö, Diosda lȩlö̧jinö edö ökwödönö pjaatobetjö̧, otiwanö ja̧bö dö̧jijatö chömöledö. Jejenö yötawaja̧ma, jweinö yötawa chömöledö, ja̧danö chomajadenö chöwaisa, isabenö yötawa jö̧ba̧lö.

Hechos 28:21

Jejenö yöawiawö̧ jobadö Romanö ju̧kwadö judío jojodötjö la'aka luwedöma atadijadötö: —Ökwödöma yelösöda da̧ja̧kwijökötö ökwönö sulabenö jwötjeba̧li̧ma. Judeanö ju̧kwadö judío jojodöma kwialusöjanö wetjijökötö. Jobe 'yi̧nadöbi baikwö ȩwa̧jö yötjawijökötö ökwönö sulabenö ja̧köbina jwötjeba̧linama.

Hechos 25:10

Jejenö abebö a̧ja̧kwiökwe: —Chöpöjöda. Chi̧'yökö jobe Jerusalénbema, ötjönö kwabö lotjobö omukwatadö tjuju̧kwobema. Ötjöma Romaso̧sa. Ökwöma Roma la'aka luwo̧ ömöayo̧ja. Belöda a̧ja̧kwö weawa wene yöawakwawemi jo̧obe. ¿Tajawedö weköbo jö̧ka̧la Jerusalénbe, belöda chö̧jobema? Ötjöma Romaso̧chobetjö̧ belöda weawa wene yökawo— jö̧ba̧lijetö Pabloma Festonöma. Ina jö̧ba̧lijetö: —Ökwöma kwöwaisa. Ötjöma judío jojodönö sulabenö ja̧tijökötö.

Hechos 24:6

Ja̧danö, Dios ejuma sulabeju baibanö ja̧bö, judío jojodöböködönö okwa teatakwawa ösöditjö̧, do̧datijatö.

Hechos 23:1

Ja̧danö, Pabloma, judío jojodötjö la'aka luwedö tjöba a'o ja̧nö, jobadönö jweinö edö yöbawijetö: —Chömöledö isabenö jö̧ta̧la. Ötjöma, la'akatjöda chö̧jinenanö baibanö omukwatiachijatö chomajade okwa, Ötjöma Dios öba a'otjö otiwanö ja̧bö jo̧sa, jö̧ba̧lö— yöbawijetö Pabloma.

Daniel 6:22

Chuluwo̧ Dios öba a'otjö wene jwiinö chö̧jiökwe, Diosma iteda weökwe ángelnö weajabe, didibadö tjaa umu'dudobö, jo̧kwajabetjö̧ ötjönö suli̧ tjöwaedökötö. Jau chuluwo̧, Dios öba a'otjöbi, ökwö kwöba a'otjöbi wene jwiinö chö̧jobe, isabenö suli̧ waedökönö otiwanö chö̧jobetjö̧— jö̧ba̧lö atadinobe Danielma.

Génesis 40:15

Yökawonö, chitebotjö naukwibö baikwö ichejebö iyö lotjinökwesa. Ja̧danö, yökawo, Sulabema yelösöda ja̧tököjayonö tjödinobe ka̧lela okwa chö̧boböma—yöbawijetö Joséma, faraón owa'do̧ iyawa jojonöma.

Hechos 24:14

Jo̧kwaijayonö jweinö yötawakwö: Bidö, ötjönö jwöbeba̧ladöma, Pabloma Jesúsnö ösödo̧, jö̧ba̧lö, jweinö yötja̧lobe. Ja̧danö Jesúsnö ösödadö, ji̧kwa mananö kwebachadö ötjabiwö̧ tjomukwati̧danö omukwato̧sa, Jesúsnö ösödö. Jo̧kwaijayonö Jesúsnö chösödijayonö ina da'dödömine yötjawinabi chösödobe. Jo̧kwaijayonö Jesúsnö chösödiawö̧ bidöma tjöpöjöda, Ja̧ ösödakwawama wainö ji̧, jö̧ba̧lö. Chuluwo̧, yötawakwö, ötjöma, bidö tjomukwati̧danö, Moisés iwȩyudinabi, Dios yöawi̧ yöbawadö tjiwȩyudinabi chösöda, Jobadö tjiwȩyudina jweinö tjiwȩyudinobe, jö̧ba̧lö.