Hechos 17:30 - Dios Iwene

³⁰ ¿Kwöwaisaduwiji̧? Diosma lekwe omukwatijökötö jo̧banö wajwibadö sulabenö ja̧tjinama, Ina lȩtebökö, jö̧ba̧lö. Jo̧kwaijayonö babema jejenömaökö. Babema Diosma weobe jojodönö, Sulabenö tjomukwati̧ kabatibö tjöbalewacho, jö̧ba̧lö.

Hechos 17:30 Referans Kwoze

Hechos 14:16

Ina yöbawijetö: —A̧ja̧kwaduwitjö. Damötjöma Diosma junibijetö israel jojodöböködönöma, jobadö sulabenö tjösödi̧da wainö ja̧bö tjuju̧kwobö.

Lucas 24:47

Ja̧danö ju'wibi tjiwȩyudinobe: Okobe deinö sulabenö tjomukwati̧ kabatibö balewachö Dios weakwo̧ jö̧a̧linökwenö ösödadönöma, tjusula söbebö loakwo̧ Diosma jö̧ba̧lö yötjawobö ja̧kobe. Ja̧ yötjawakwa̧ma, Jerusaléntjö jamatö böjȩ bakwameachibanö baibanö yötjawobö ja̧kobe, jö̧ba̧lö laebobe damötjö tjiwȩyudinama.

1 Pedro 4:3

Jau chömöledö, Jesúsnö kwösödaduwakwa̧ abönö ökwödöma ida̧ökö yelösöda lekwe möle böjȩ jojodö sulabenö ja̧bö tjö̧ji̧danö ja̧bö kwö̧jinaduwobe. Jo̧kwajabetjö̧ tupakwö jejenö ja̧bö kwö̧jaduwobö jwiobe, tjo̧wi̧ta jö̧ba̧lö. Jau chömöledö, ökwödöbi ajayinöma kwi̧lȩkwa̧muböködönö ösödö ji̧aköbinaduwobe, ja̧danö kwi̧lȩkwa̧muböködökwö sulabenö ja̧bö ji̧aköbinaduwobe, ja̧danö 'dukwachawö̧ ji̧aköbinaduwobe, ja̧danö ju'wedökwö ju'wedökwö 'da̧'da̧bakwawö alewiaköbinaduwobe, ja̧danö nio ojwiyo kwowa̧laduwobö pjiesta juniaköbinaduwobe, ja̧danö jwiinö sulabenö ja̧bö o̧'wo̧ jawa ösödö ji̧aköbinaduwobe ajayinöma. Jejenö ida̧ökö yelösöda lekwe ja̧bö kwö̧jinaduwobe chömöledö, jo̧kwajabetjö̧ tjo̧wi̧ta jö̧ba̧lö ja̧ jawa ja̧bökönö kwö̧jaduwo chömöledö.

Romanos 3:25

Jau chömöledö, Jesúsda woinobetjö̧, Jesúsnö ösödadönö lȩbebö̧kö̧ Diosma. Jejenö ja̧bö i̧sebobe Diosma, iteda suli̧ jwii̧bi, jojodönö suli̧ jwitjinö ja̧i̧bi. Jau chömöledö, damötjö Diosma lȩlö̧jinö edö, jojodö sulabenö ja̧tji̧ lȩebinokobe.

Hechos 3:19

Jo̧kwaobetjö̧ kwomukwataduwi̧ma kabatibö balewachaduwi, Diosnö omukwatö, Diosma ökwödö kwusuladuwi̧ söbebö loobö. Jejenö kwöbalewachaduwitjö̧ma kwo̧'wo̧ luwo̧duwi ösöwö kwö̧jaduwena, Duluwo̧ Diosma ökwödökwö ö̧jobetjö̧— yöbawijetö.

Romanos 2:4

Chömöledö, Diosma lekwe ite'ada̧lobe ökwödönöma. Lȩbebökönö lekwe ite'ada̧lobe, sulabenö ja̧köbaduwijayonö. Ja̧danö ite'ada̧lobema, ¿kwomukwataduwökenaji̧? Diosma lekwe ite'ada̧lobe ökwödönöma, sulabenö kwomukwataduwi̧ kwöbalewachaduwo jö̧ba̧lö, jweinö kwomukwataduwo jö̧ba̧lö.

Romanos 1:28

Chömöledö, bidöma, Diosnö tjomukwatoböma tjöpöjödobe. Ja̧danö, sulabeda tjomukwatiökwe jobadönö kaatibobe Diosma, Wainö sulabenö tjomukwati̧da ja̧bö ju̧kwadö, jö̧ba̧lö. Jo̧kwajabetjö̧, taba lö̧ji̧ jojodö ja̧awökö jawada i̧sebö ju̧kwadö.

Hechos 20:21

Judío jojodönöbi, judío jojodöböködönöbi, bakwaidödanö edö yöbawiachijatö. Sulabe tjomukwati̧ kabatibö tjöbalewacho, jö̧ba̧lö, yöbawiachijatö. Jesúsnö tjösödo jö̧ba̧lö, yöbawiachijatö— yöbawijetö Pabloma.

Lucas 13:5

Ju'wedö Jerusalénnö ju̧kwadötjö bajalekwönönö sulabedötjinokobe chömöledö. Dios öba a'otjö jobadöbi, ju'wedö Jerusalénnö ju̧kwadöbi, ökwödöbi bakwaibedöja. Jau chömöledö, Dios öba a'otjö ökwödöbi isabenö sulabenö omukwatadöja, ja̧danö sulabenö kwomukwataduwi̧ kabatibö kwöbalewachaduwökötjö̧ma, ökwödöbi isabenö Dios lȩebi̧tjö kwemaduwakwedöja— jö̧ba̧lö yöawinobe Jesúsma.

Hechos 17:23

Bemi kwiteboduwi kwebachö chedijatö kwo̧'wo̧ kwöwana̧laduwi̧ juwö iyajiköbaduwemima. Ja̧danö, bakwemi chedijatö, Bemima wajwidökwenö do̧'wo̧ döwana̧lemi, jö̧ba̧lö, wȩyukwobe. Babema yötawa ökwödönöma. Jo̧banöda, ökwödö wajwiköbaduwonö kwo̧'wo̧ kwöwana̧laduwökwenöda yötawa.

Hechos 11:18

Ikenama Pedrokwö wene juna̧lakwawö yöba̧ladöma Pedro yöawobe a̧ja̧kwö wene tjujuna̧li̧ma kabatakwawijadötö. Wene tjujuna̧li̧ma kabatibö Diosnö ösödö jö̧ba̧lijadötö: —Diosma judío jojodöböködönöbi otiwanö pjaatinobe. Tjomukwati̧ balewachö itekwöda tjichibobö, itekwöda ba̧kwȩlö̧jatebö tjuju̧kwobö pjaatinobe— jö̧ba̧lö, ösödijadötö Diosnö.

Marcos 6:12

Jejenö weawö̧ Jesús öba̧ja̧di̧ waisachadöma labebö jelobebi jelobebi du̧ju̧tajakwena yöbawö 'yi̧jadötö. Jelobe, jelobebi du̧ju̧tajakwena 'ya̧jadöma jojodönö yöbawiabijadötö: —Sulabenö tjomukwati̧ kabatibö balewachaduwi— jö̧ba̧lö.

Marcos 1:15

Baikwö yöbawijetö Jesúsma: —Chömöledö. Ida̧ökö Dios La'aka Luwo̧ ö̧jena lekwökakobe. Jo̧kwaobetjö̧ sulabenö kwomukwataduwi̧ma kabatibö balewachaduwi. Otiwa jawa wene ösödaduwi— yöbawijetö.

Mateo 3:2

—Sulabenö kwomukwataduwi̧ kabatibö balewachaduwi, Dios yöbawö weakwa̧ möle yöneawachibobe— jö̧ba̧lö.

2 Corintios 7:10

Jau chömöledö, böjȩ jojodö tjo̧'wo̧ tjo̧achi̧danö o̧'wo̧ tjo̧achakwawama, pjaatökö ji̧ chömöledö, sulabenö tjomukwati̧ tjöbalewachokobetjö̧ woawada ji̧. Jo̧kwaijayonö Dios ösödi̧danö o̧'wo̧ tjo̧achakwawama otiwa, sulabenö tjomukwati̧ tjöbalewachinö ji̧obetjö̧, ja̧danö tjö̧jibinö ja̧i̧.

Lucas 15:10

Mölejȩbetjöbi ja̧danö, bakwo̧ sulabenö ja̧bö jo̧ sulabenö omukwati̧ kabatibö öbalewachenama, Diosma iteda ömöayedö ángelesdökwö o̧'wo̧ ösöwachibanö ö̧jobe— jö̧ba̧lö yöawinobe Jesúsma.

Mateo 4:17

Ja̧ möle Jesúsma jamatö yöawinobe, jojodönö yöawi̧ma, baikwö: —Sulabenö kwomukwataduwi̧ kabatibö balewachaduwi, Dios la'aka luwo̧ ö̧jakwa̧ möle yöneawachibobe— jö̧ba̧lö jamatö yöawinobe.

Isaías 21:12

Abebö a̧ja̧kwökwe, teada̧lö eda̧lo̧ma, –Tjo̧wi yȩayi dewachakwa̧ yöneawachibobe, jo̧kwaijayonö jemi ikenama juluwanö yemidanö yi̧ibakobe. Kwitebonö baledakwa̧ abebö kwa̧ja̧kwobö jö̧ka̧litjö̧ma, yemidanö abebö a̧ja̧kwö kwicho, –jö̧ba̧lö atado̧, —jö̧ba̧lö Dios iteda yöawi̧ yöawinobe, Edom niji jawama.

Mateo 20:7

Aebawö̧: Ökwödönö webo̧ deobetjö̧, dotidokobe, jö̧ba̧lö tjatadinobe. Yötja̧lökwe: Ökwödöbi chöbatjobe otidö 'ya̧duwi, jö̧ba̧lö weinobe.