Hechos 13:39 - Dios Iwene

³⁹ Ina yöbawijetö: —¿Dakwö kwomukwataduwa chömöledö? ¿Moisés wȩyudö weina ja̧awa jojodö tjusuli̧ söbebö loi̧ma jo̧beji̧? Ja̧maökö chömöledö. Söbebö loökö. Wanedö yötawa: Moisés wȩyudö weina ja̧bö ju̧kwadöma ka̧lena ba̧kwaweju okwa ba̧jadödanö, ka̧lenasiju yö̧tjebawö̧danö ju̧kwadö. Jobadö tjö̧jibinö pjaatoböma jwiobe. Moisés wȩyudö weina ja̧tji̧ma tjö̧jibinö pjaatökö chömöledö. Tjusuli̧ söbebö loökö jejenöma. Ja̧danö, Diosma Moisés wȩyudö weina ja̧badönö yöawokobe, Bidöma suli̧ jwibadö batjibajabe, jö̧ba̧lö, Moisés wȩyudö weina tja̧ja̧kwobetjö̧. Jobadöma ju'wi möle Dios lȩebenama Dios lȩebi̧tjö tjemakwedö. Jo̧kwaijayonö, jejenömaökö Jesúsnö ösödadönöma. Jobadöma ka̧lena ba̧kwawejutjö tjö̧jibanö latjebawö̧danö ju̧kwadö chömöledö. Jobadöma, tjusuli̧ söbebö loinawö̧, ida̧ökö suli̧ jwibadö babibinadö. Jobadöma Dios lȩebi̧ma tjemökakwedö, ja̧ lȩebi̧tjö tjemakwa̧ tjö̧jibinö pjaatinawö̧ma— yöbawijetö Pabloma—.

Hechos 13:39 Referans Kwoze

Gálatas 2:16

ökwödöma döwaisa Dios weina Moisés iwȩyudina ja̧böma sulabe jwibadö baibakwawokobe, sule Jesucristonö ösödöda sulabe jwibadö badibobö jo̧be jö̧ba̧lö döwaisobe, ¿jö̧tö? Ja̧danö ökwödöbi judío jojodöböködödanö bakweminö Cristo Jesúsnö dösödinobe, dö̧jibinö ja̧bo̧ jö̧ba̧lö. Jau, ökwödöma Moisés iwȩyudina ja̧böma sulabe jwibadö badibijökötö, bakwo̧bi Moisés iwȩyudina ja̧böma sulabe jwibo̧ baibokobetjö̧. Ökwödöma Cristonö dösödijatö, sulabe jwibadö badibo jö̧ba̧lö, jo̧kwajabetjö̧ judío jojodöböködönö weköboko judío jojodö ja̧tji̧danö ja̧tjo jö̧ba̧lö— lȩtebijatö Pedronöma.

Romanos 10:4

Jau chömöledö, Cristoda okobe jwiinö Dios Moisésnö weina ja̧bina, ¿jö̧tö? Jo̧kwaijayonö, Cristoda okobe jwiinö ja̧inajayonö, Cristonö ösödadönöbi jö̧ba̧lo̧ Diosma, Bidöma sulabe jwibadö, jö̧ba̧lö. Ja̧danö, Cristoma Moisés iwȩyudinama söbebö loinobedanö ichejekwa chömöledö, Dios Moisésnö weina ja̧bökönö sulabe jwibadö badibobetjö̧.

Romanos 8:3

Jau chömöledö, Dios weina, jojodö baikwö ja̧bö tjö̧jo jö̧ba̧lö iwȩyudinobe Moisésma. Jo̧kwaijayonö, ja̧ iwȩyudinama ökwödönö pjaatoböma jwiinobe. Sulabe dujuna̧linobetjö̧, ökwödönö pjaatoböma jwiinobe. Jo̧kwaijayonö, Moisés iwȩyudina ökwödönö pjaatinököjayonö, Diosda ökwödönö pjaatinobe. Diosma iteda itji̧nö weinobe, jojo baibanö, sulabe juna̧ladödanö ichejekwo̧ baibanö. Jo̧bama ökwödödanö ichejekwinajayonö, sulabe jwibina jo̧bama. Ja̧danö Diosma jo̧banöda weinobe, sulabe dujuna̧li̧tjö dö̧jibobö. Ja̧danö, midawö woinobe, ökwödö sulabe dujuna̧li söbebö loobö.

Hebreos 7:19

Isabenö chömöledö, Dios ajayinö wei̧, Dios wei̧ Moisés iwȩyudinama, jojodönö pjaatokobe Dioskwö suli̧ okobe jwiinö jwibadödanö tjichibobö. Jo̧kwaobetjö̧ Diosma yöbawö ujuninobe ju'wi wene, jwiinö mikwawi̧ wene, ajayinö weinatjö o̧penönö mikwawi̧ wenema. Ja̧ balekwa yöbawö ujuninatjö Diosma yöawobe, Tjo̧wi̧, jojodö ötjökwö suli̧ okobe jwiinö jwibadödanö tjichibobö jo̧be, jö̧ba̧lö. Isabenö chömöledö, Dios balekwa yöbawö ujuni̧ma ajayinö yöbawö ujuninatjö o̧penönö mikwawi̧, ökwödönö okobe jwiinö pjabatö.

Romanos 10:10

Jau chömöledö, Jesúsnö ösödö, dö̧jibinö pjabato̧, jö̧ba̧lö dösödiökwe, Diosma ökwödönö yöbawo̧, Bidöma sulabe jwibadö, jö̧ba̧lö. Ja̧danö, Jesúsda la'aka luwo̧ yöba̧lö, dö̧jibobe.

Romanos 8:1

Ja̧danö chömöledö, babema Cristo Jesúskwö a̧jö dö̧jobetjö̧ bakwo̧bi deobe ökwödönö yöba̧lo̧ma, Bidöma sulabedö, Dios lȩebakwawö̧, jö̧ba̧lö.

Romanos 4:15

Jau chömöledö, Moisés iwȩyudinama Dios lȩebakwa̧da i̧sebobe. Jojodö Dios weökö jawa ja̧tjobema, Dios jobadönö lȩebobö jo̧be chömöledö. Jau chömöledö, Dios weina jo̧bema, Dios weökö jawa ja̧badösa, ¿jö̧tö? Jo̧kwaijayonö ja'yubetjinajayebi weinökötjö̧ma, ¿ina Dios weökö jawa ja̧denaji̧ chömöledö? Weawa jwiitjö̧ma, weökö jawa ja̧awabi jwiena, ¿jö̧tö? Ja̧danö, weawa jwiitjö̧da waekwökönö dö̧jo jö̧da̧linobe chömöledö.

Romanos 3:19

Jau chömöledö, döwaisa, Diosma Moisésnö weinobe, iwȩyudobö, jojodö ja̧bö tjö̧jo jö̧ba̧lö wei̧ma. Ja̧danö, ja̧ weinama, Israel jojodönö weinobe, okobe jwiinö ja̧bö tjö̧jo jö̧ba̧lö. Jo̧kwaijayonö, okobe jwiinö ja̧bö tjö̧jo jö̧tja̧lijayonö, ja̧tjinokobe, yelösöda waekwinobe. Jau chömöledö, böjȩ jojodöma okobe jwiinö Dios weina ja̧bö jö̧ködö, bakwo̧bi deobe ja'yubebi junibökönö ja̧bo̧ma. Jau chömöledö, bakwo̧bi deobe, okobe jwiinö Dios weina waekwökönö ja̧bo̧ma. Ja̧danö, Dios weina Moisés iwȩyudinama suli̧ jwibadö badiboböma pjaatokobe chömöledö, okobe jwiinö ja̧bö dö̧jokobetjö̧. Jau chömöledö, Moisés iwȩyudinama sule sulabe dujuna̧li̧ weneda yöawobe. Ja̧danö, Dios lȩebenama, okobe deinö ökwödö böjȩ jojodöma atadakwawa jwidakwedösa, lȩkeboko yöda̧lo jö̧ba̧lö.

Romanos 5:20

Chömöledö, Diosma iteda wei̧ jojodö ja̧bö tjö̧jo jö̧ba̧lö wei̧ma Moisésnö iwȩyudobö weinobe. Jojodö Dios weökö jawa ja̧tji̧ma tjöwaisachibotö jö̧ba̧lö weinobe, ja̧ Moisés iwȩyudinama. Iwȩyudakwa̧ abönö, ida̧ökö Dios weökö jawa ja̧tjinajayonö, Moisés iwȩyudinelöda tjöwaisachibobö ji̧nobe, Aaa, Dios weökö jawa ja̧badösa, jö̧ba̧lö. Ja̧danö, jemi tupakwö, ina jwaikwöda sulabenö ja̧bö tjö̧jinobe jojodöma. Ja̧danö, jemi tupakwö jojodö sulabenö ja̧tji̧ma nöachinobe ichejekwa. Jo̧kwaijayonö, jojodö sulabenö ja̧tji̧ma nöachijayonö, Diosma ina lȩlö̧jinö edinobe jojodönöma. Ja̧danö, jojodö sulabenö ja̧tji̧ nöachemi o̧pekwönönö nöachinobe Dios lȩlö̧jinö edi̧ma ichejekwa. Ja̧danö lȩlö̧jinö edö, mikwa jwiinö otiwa jawa iyö, jojodönö pjaatinobe Diosma.

Romanos 5:9

Jau, Cristoma midawö woinobe, iteda ökwösobu ebawinö. Jejenö ja̧inobe, Diosma ökwödönö yöawakobetjö̧, Chedemi bidöma suli̧ jwibadö, jö̧ba̧lö. Jejenö pjaatotö jö̧ba̧lö midawö woinobe. Ja̧danö ¿dakwö kwomukwataduwa? ¿Ökwödönö, jo̧banö ösödadönö babema öpöjödenaji̧ Jesúsma? Dios lȩebakwa̧ möle badekwachenama ökwödönö öpöjödö, Bidönö lȩkebo, jö̧ba̧lö, ¿weakwa̧ji̧?

Juan 1:17

Damötjö Diosma iyinobe Moisésnö ökwödönö yöawobö, iteda weina jawa wene, a̧ja̧kwö dö̧jobö weinama. Jo̧kwaijayonö Moisés weinatjö̧ Diosma i̧sebinokobe iteda lȩlö̧jino edi̧ma. Iteda weina jawada i̧sebinobe. Ja̧danö Diosma Jesucristonö weenama ja̧ Moisésnö weinatjö o̧penönö mikwawi̧ma iyinobe ökwödönöma. Ja̧danö, Jesucristonötjö Diosma i̧sebinobe iteda jwiinö lȩlö̧jino edi̧ma, jojodönö pjabatö. Ja̧danö, Jesucristonötjö Diosma itedada jweinö yöa̧lina i̧sebinobe ökwödönöma, Ötjö jö̧ta̧li̧danö isabenö ja̧bo̧sa, jö̧ba̧lö.

Hebreos 10:11

Ja̧danö, böjȩtjö Diostjö jojodötjö ö'weje pjabatadö, Levítjö tupadanö jojodöma, Dios ajayinö yöbawö ujunina wei̧ a̧ja̧kwö, yemidanöbi yemidanö, bakwöta mölekwena bakwainö iyiatjinobe. Jo̧kwaijayonö, ja̧ tjiyi̧ma jojodönö okobe jwiinö pjaatinokobe tjusuli̧ söbebö loobö.

Hebreos 10:4

Jo̧kwaobetjö̧ chömöledö döwaisobö jo̧be, Pakaya, chiwo tjökwösobuma pjaatinokobe jojodö tjusuli̧ söbebö loobö, jö̧ba̧lö. Jo̧kwaobetjö̧ jojodöma ina Dios öba a'o sulabedöda tjuju̧kwobetjö̧ yemidanöbi, yemidanö Diostjö jojodötjö ö'weje la'aka pjabato̧ma jojodö tjusuli̧ midö iyobö weinobe.

Romanos 5:1

Ja̧danö, ökwödö Jesúsda dö̧jibinö pjabato̧, jö̧ba̧lö dösödiökwe, Diosma jö̧a̧linobe, Chedemi bidöma suli̧ jwibadö, jö̧ba̧lö. Jejenö jö̧a̧linobetjö̧, wene jwibadö otiwanö dö̧jobe Dioskwö. Ja̧ wene jwibadö dö̧ji̧ma, Duluwo̧ Jesucristoda ja̧ina.

Hechos 10:43

Okobe deinö Dios yöawi̧ yöba̧ladöma damötjö yöbawijadötö, Jesúsnö ösödadöma suli̧ jwibadö batjibakwedö, jö̧ba̧lö. Ja̧danö, yöbawijadötö, Jesúsnö ösödadö tjusuli̧ma, Jesús ujulunö söbebö loobetjö̧ suli̧ jwibadö batjibakwedö, jö̧ba̧lö— yöbawijetö Pedroma Cornelio eju okwa ja̧dönöma.

Diosnö ösödo̧ Job mikwo̧ usula emawina jawa 25:4

—Isabenö yöta̧laja̧danö jo̧be Job, jo̧kwajabetjö̧ baikwö abebö cha̧ja̧kwakwö: Bö̧jȩ jojodötjö, bakwo̧bi Dios öba a'otjö wene jwibo̧ ö̧jenaji̧? Bö̧jȩ ya̧dö tjeminawö̧tjö, bakwo̧bi bakwainö otiwo̧ ö̧jenaji̧?

Diosnö ösödo̧ Job mikwo̧ usula emawina jawa 9:20

Isabenö sulabenö ja̧tinököjayonö, ötjöda chiwenebi sulabo̧ chö̧ji̧ i̧sȩbena, ja̧danö sulabenö ja̧tinököjayonö, yayonö Dios i̧sȩbena, –Isabenö wene juna̧lo̧ Jobma, –jö̧ba̧lö.

Gálatas 5:3

Yemidanö baikwö labebö lobö yötawa chömöledö: Bakwo̧ Dios jo̧banö ösödo jö̧ba̧lö ötade bajalesado̧ 'wiekwa jawa ja̧itjö̧ma, sule ja̧damaökö chömöledö, ja̧ 'wiekwa jawabi, okobe jwiinö Dios weina Moisés iwȩyudina ja'yubebi junibökönö ja̧obö jȩna, ja̧tjö Dios jo̧banö ösödo jö̧ba̧lö.

Gálatas 3:8

Jau chömöledö, Dios iwenema damötjö tjiwȩyudinatjö laebobe judío jojodöböködöbi Dios yöawi̧ tjösödiökwe, Dios jobadönö: Bidöma sulabe jwibadö jö̧ba̧lö yöawakwa̧ma. Baikwö laebobe Dios iwene Abrahamnö otiwa jawa wene yöawinama: Ökwönötjö okobe deinö böjȩnö ju̧kwadönö pjatatocha, jö̧ba̧lö laebobe.

Gálatas 2:19

Jau chömöledö, Dios weina Moisés iwȩyudinama ida̧ökö ötjönö kwabö loinobedanö ichejekwa chömöledö, ja̧danö ida̧ökö wotinobetjö̧, tupakwö Moisés iwȩyudinama weokobe ötjönöma. Jejenö baibinobe, Diosnö ösödö chö̧jakobetjö̧.

1 Corintios 6:11

Ökwödötjö ju'wedöma jejenöbedö kwö̧jinaduwobe ajayinöma chömöledö, jo̧kwaijayonö Duluwo̧ Jesucristo midawö woinobetjö̧, Dios O̧'wo̧ Luwo̧ma kwusuladuwi̧ dichö loinobe, ja̧danö Dios ömöledö bakibaduwanö ökwödönö 'da̧batö ujuninobe, ja̧danö sulabe jwibadö bakibaduwanö ja̧inobe.

Romanos 9:31

Judío jojodönöbi yötawa, baikwö: Jobadöma isabenö sulabe jwibadö batjibobö tjisakwinobe. Ja̧danö, Moisés weina ja̧do jö̧ba̧lö sulabe jwibadö batjibobö tjisakwinobe. Jejenö tjisakwinajayonö, waekwinobe chömöledö.

Juan 5:24

Ina yöawinobe Jesúsma judío la'aka luwedönö: —Isabenö yötawa, ötjö yötawi̧ a̧ja̧kwadö, ötjönö webinanö ösödadöma, ba̧kwȩlö̧jatebö ja̧kwawa tjujuna̧lakwedö. Jobadöma lȩtebökakwawö̧. Wobajaletjö tjö̧jibanö babibö, ba̧kwȩlö̧jatebö tjuju̧kwakwedö— yöawinobe—.

Lucas 18:14

Isabenö yötawaduwakwö, jejenö aebiökwe Diosma jo̧ba impuesto ötjabi̧ balada emawa otido̧ usula söbebö loinobe, ja̧danö jobetjö ȩwa̧jenama, sulabe jwibö ȩwa̧jinobe. Jo̧kwaijayonö sulabe jwiböma ȩwa̧jinokobe jelo̧ abebo̧ fariseo jojoma chömöledö. Otiwo̧sa jö̧ba̧lö omukwatijayonö isabenö otiwo̧inokobe, Diosma usula söbebö loinokobetjö̧. Jau chömöledö, okobe deinö otiwadösa jö̧ba̧lö omukwatadönöma, otiwöködö tjö̧ji̧ i̧sebakobe Diosma, ja̧danö sulabedösa jö̧ba̧lö omukwatadönöma Diosma i̧sebakobe, chedemi bidöma otiwadö, jö̧ba̧lö— Jejenö wanedö yöawinobe Jesúsma, Diosma tjusula waisadönö pjabato̧ jö̧ba̧lö.

Lucas 10:28

Atadökwe, Jesúsma atadinobe: —Jau, isabenö jweinö kwatadajabe, yöka̧laja̧danöda jo̧be. Jo̧kwajabetjö̧, yöka̧laja̧danö ja̧bö kwö̧jitjö̧ma ba̧kwȩlö̧jatebö ja̧kwawa kwujuna̧lakwo̧ja— jö̧ba̧lö atadinobe Jesúsma.

Lucas 10:25

Ju'winö bakwo̧ Moisés iwȩyudina ba̧ja̧dakwawa luwo̧ma Jesúsnö abebö a̧ja̧kwinobe, sulabenö atadojobö jö̧ba̧lö: —Ba̧ja̧dakwawa luwo̧, ¿dakwö ja̧takwa̧da, ba̧kwȩlö̧jatebö ja̧kwawa Dios ötjönö iyobö?— jö̧ba̧lö abebö a̧ja̧kwinobe.

Isaías 53:11

Ja̧danö, usula emawajo̧, otidaja̧ omukwatakobe Dios ömöayo̧ma, ja̧danö otidaja̧ okwa jawa omukwatö, o̧'wo ösöwanö omukwatakwo̧, —Chotidaja̧ma, otiwanö chotidajabe, —jö̧ba̧lö. Baikwö yöa̧lobe Diosma, iteda ömöayo̧nö: Chömöayo̧ma ba̧jȩkwadö tjusula emawajabe, jo̧kwajabetjö̧ iteda ida̧'ökö emawajobetjö̧, jobadönö lȩekwa yöawakwo̧, —Bidöma wene jwibadö, —jö̧ba̧lö.