Hechos 13:21 - Dios Iwene

²¹ Ikenama, Samuel ina pjabatö webö ö̧jonö, da'dödöminema, Ökwödöma ju'wedö tjuluwo̧danö dösöda, duluwo̧danöbökö, jö̧ba̧lö, omukwatijadötö. Ju'wedö la'aka luwo̧danö jobadönö weobö ösödijadötö, tjuluwo̧ baibanö. Jo̧kwaobetjö̧ Diosma 'da̧batö junijetö jelo̧nö, Kish mikwo̧ itji̧nö, Saúl mikwo̧nö, Benjamíntjö tupadanö jojonö da'dödömine tjuluwo̧ baibanö. Jo̧bama cuarenta o̧biya jenanö ji̧abijetö da'dödömine tjuluwo̧ma— yöbawijetö Pabloma—.

Hechos 13:21 Referans Kwoze

1 Samuel 10:1

Ikenama Samuelma o̧tesayu̧ ja'yuayu̧ do̧batö, Saul uunö toebinobe, ja̧danö Saulnö du̧batö yöawinobe, —Isabenö Jo̧ma isabenö ökwönö omudawö ujunajabe, iteda ömöledö israel jojodö la'aka tjuluwo̧ bakibanö. Ja̧danö, baikwö baledakwa̧ yötawakwö, isabenö Dios ökwönö omudawö ujunaja̧ kwöwaisobö:

1 Samuel 15:1

Ju'wi möle, Samuelma Saulnö yöawinobe baikwö: —Saul, Isabenö Jo̧ Diosda ötjönö webinama, ökwönö o̧te tobebö, israel jojodö la'aka tjuluwo̧ bakibanö chujunobö, ¿jö̧tö? Jo̧kwajabetjö̧, babe Isabenö Jo̧ ökwönö yöbawö wei̧ kwa̧ja̧kwobö jo̧be.

1 Samuel 11:15

Yöa̧lawö̧, okobe deinö israel jojodöma Gilgalbe 'ya̧nö, Isabenö Jo̧ öba a'otjö Saulnö yötjawinobe, —Isabenö Dios omudawö ujuninökwe Saulma okobe deinö israel jojodötjö inesö la'aka luwo̧ ö̧jobe, —jö̧ba̧lö. Ja̧danö jobe Gilgaltjö Diosnö iyawa, Dioskwö ösökwö ja̧kwawa iyawama Diosnö iyö tjukwinobe. Ja̧danö, jobe Gilgaltjö, Saulbi, okobe deinö Israel jojodöbi tjo̧'wo ösödachibanö tjö̧jinobe.

1 Samuel 8:5

Ichibö, Samuelnö yötja̧linobe, —Samuel, ökwöma isabenö ida̧ökö pöeköba, ja̧danö kwi̧tji̧muma, ökwö jweinö jwebebö yökawi̧danöma jwebebö yöbawöködö. Jo̧kwajabetjö̧, baikwö adebakwö: Dipjeanö ju̧kwadöma okobe deinö idöda tju̧luwo̧kwena la'aka luwo̧nö juna̧ladö, jobadönö yöbawö webo̧nö, ja̧danö ökwödöbi jejenö duluwo̧ la'aka luwo̧nö dujuna̧lobö dösöda. Jo̧kwajabetjö̧ bakwo̧nö omudawö kwunjunobö adebakwö, ökwödö israel jojodötjö inesö la'aka luwo̧ yöbawö weobö, ja̧danö wene baibena jwebebö yöawobö, —jö̧ba̧lö atjebinobe Samuelnö.

1 Samuel 9:1

Benjaminsaso jojodötjö bakwo̧ nöinö juna̧lo̧, ju'wibi jojodö otiwanö a̧ja̧kwö tjösödökwe ö̧jinobe, Cis mikwo̧. Jo̧ba Cisma, Abiel mikwo̧ itji̧, ja̧danö Abielma Zeror mikwo̧ itji̧, ja̧danö Zerorma Becorat mikwo̧ itji̧, ja̧danö Becoratma, Benjaminsaso jojo Afia mikwo̧ itji̧.

1 Samuel 9:15

Jemi abönö möle, Isabenö Jo̧ma Samuelnö yöawinobe,