Hebreos 6:1 - Dios Iwene

¹ Jo̧kwaobetjö̧ chömöledö, jamatiböma kwö̧jaduwa, da̧peachökönöma. Ida̧ökö döwaisa Jesúsnö ösödadönö la'aka ba̧ja̧dakwawa, ajayinö tjöba̧ja̧dinama. Chömöledö ja̧ tjöba̧ja̧dinama jwiinö inesö ba̧ja̧dakwawa. Jo̧kwaijayonö babema ja̧ tjöba̧ja̧dina omukwatö tupakwö do̧'wo̧ luwo̧ okwa da̧peachö di̧'yobö jo̧be. Ja̧danö, yemidanöbi yemidanö ja̧ la'aka tjöba̧ja̧dina döwaisachoböma jwiobe. Tjo̧wi̧, ja̧ ajayinö tjöba̧ja̧di̧ döwaisachinatjö tupakwö da̧peachö di̧'yaduwo, chömöledö. Ja̧danö, ja̧ ajayinö tjöba̧ja̧dinama ¿tajida? Bakwöta jawama biya̧ chömöledö: Domukwati̧ balewachö wame jawa ja̧di̧ kadatibobö jo̧be, wame jawama dö̧jibinö pjaatökö, jö̧ba̧lö. Jejenö domukwati̧ balewachö, Dios yöawina ösödö dö̧jobö jo̧be. Ja̧ ajayinö la'aka tjöba̧ja̧dinama döwaisa.

Hebreos 6:1 Referans Kwoze

2 Corintios 7:1

Ja̧danö chömöledö, ja̧ wene Dios yöbawö ujuninobetjö̧, okobe jwiinö yȩdekwinö ja̧i̧ jawatjö didichawaduwo chömöledö, wamenö jojodö tjedi̧ jawatjöbi, okwanö jojodö tjedökö jawatjöbi, ja̧danö Diosnö yebabinö ja̧nö, bakwainö sulabe jwii̧ jawada isakwö dö̧jaduwo.

Hechos 26:20

Ja̧ ötjönö baledinama abönö yötawijatö Damasconö ju̧kwadönö. Ikenama Jerusalénbe 'ya̧jo̧ yötawijatö jobe ju̧kwadönö. Ikenama okobe jwiinö Judea nijinö ju̧kwadönö yötawijatö, judío jojodöböködönöbi. Sulabenö kwomukwataduwi̧ kabatibö balewachaduwi, jö̧ba̧lö, yöbawiachijatö. Jejenö kwomukwataduwi̧ balewachajadö, kwöbalewachaduwi̧ i̧sebö, Diosnö ösödö ju̧kwaduwi, jo̧ba ösödi̧da ja̧bö, jö̧ba̧lö, yöbawiachijatö.

Hebreos 12:13

Ja̧danö chömöledö, ökwödö jwaikwöda me'dawachibökönö kwi̧'yaduwi̧ma kwö̧ja̧wo̧döduwi me'dawadönö pjaatobe jobadö otiwanö tji̧'yobö. Wanedö yötawaduwakwö: Jwaikwöda kwi̧'yaduwi̧ma mana jweinö 'wibiabö i̧'yi̧danö ji̧. Ja̧danö, jwaikwöda juluwachibö kwi̧'yaduwena, mana jweinö 'wibiabö 'yo̧ i̧'yi̧danö, kwö̧ja̧wo̧döduwi me'dawadö, ji̧ka ji̧ka kwetjachobedanö kwebachadöma kwökömaduwinö jweinö 'ya̧dö, jama jweamanö. Jejenö me'dawadöma otiwanö kwökömaduwinö 'ya̧dö, mebökönö, tji̧bȩjwi̧yabi 'debawökönö. Ja̧ wanedö yötawi̧ma wanekwachobe, Ökwödöma juluwachibanö, jwaikwöda kwi̧'yaduwobö jo̧be, ju'wedö me'dawadöma ökwödönö edö jobadöbi tjo̧'wo̧ luwo̧nö juluwachibanö, jwaikwöda tji̧'yakobetjö̧.

Mateo 21:32

Jau, Juanma ökwödönö ja̧kwawa jawa mana i̧sebö yöawinajayonö, jo̧ba yöawi̧ öpöjödinadöja, jo̧kwaijayonö jobadö sulabedö impuesto ötjabi̧ balada emadöbi, putabedöbi Juan yöawi̧ tjösödinobe. Ja̧danö, jobadö Juan yöawi̧ tjösödi̧ kwedinaduwijayonö, sulabenö kwomukwati̧ kabatiböma kwöbalewachinaduwokobe, ina jo̧ba yöawi̧ kwösödinaduwokobe. Jo̧kwajabetjö̧, jobadö sulabedö Dios la'aka luwo̧ ö̧jakwa̧ tetjachijayonö, jobema tebachöködöja— jö̧ba̧lö yöawinobe Jesúsma, ö'weje pjabatadönöbi, Moisés iwȩyudina ba̧ja̧dadönöbi.

Hebreos 7:11

Ja̧danö chömöledö, Dios iwenetjö laebobe, Dios iteda Itji̧nö yöawinama, Ökwöma Melquisedec ötjötjö jojodötjö ö'weje la'aka pjabato̧ ö̧jinadanö ö'weje la'aka pjabato̧ baibanö kwö̧jakwo̧ja, jö̧ba̧lö. Ja̧danö, Diosma ¿tajawedö jejenö yöawinada, Itji̧ma Melquisedecdanö ö̧jakobe, ju'wedö ö'weje pjabatadö, Levítjö tupadanö jojodödanöbö̧kö̧? jö̧ba̧lö. Jobadö Levítjö tupadanö jojodönöda Diostjö jojodötjö ö'weje pjabatö tjotidobö wetjinawö̧. Chömöledö döwaisa, Dios wei̧ Moisés iwȩyudinatjö baikwö laebobe: Diosma Levítjö tupadanö jojodönöda 'da̧batö ujuninobe Diostjö jojodötjö ö'weje pjabatö tjotidobö. Ja̧danö, jobadö, Diostjö jojodötjö ö'weje pjabatadöma otidiatjinobe, Dios wei̧ Moisés iwȩyudinatjö wei̧danö, jojodö tjiyi̧ Diosnö iyö. Jejenö otidiatjinobe jojodö Diosnö tjiyi̧ iyö, jojodö Dioskwö tjichibobö suli̧ jwibadödanö. Jo̧kwaobetjö̧ ¿tajawedö jelo̧, wainö Diostjö jojodötjö ö'weje pjabato̧ baibanö jo̧ ichobö ji̧nada? Yötawaduwakwö chömöledö. Jobadö Diostjö jojodötjö ö'weje pjabatadö tjotidi̧, Dios wei̧ Moisés iwȩyudinatjö wei̧danö tjiyi̧ma pjaatinokobe jojodönö, Dioskwö suli̧ okobe jwiinö jwibadödanö tjichiboböma. Jobadö ö'weje pjabatadö tjotidi̧ma okobe jwiinö pjaatitjö̧ma jojodö Dioskwö suli̧ jwibadödanö tjichibobö, Diosma jelo̧ ö'weje pjabato̧ baibanö jo̧nö, iteda Itji̧nö yötawokoinena, Ökwöma ötjötjö jojodötjö ö'weje la'aka pjabato̧ kwö̧jakwo̧ja, jö̧ba̧lö. Ajayinö Diostjö jojodötjö ö'weje pjabatadö tjotidi̧ mikwawitjö̧ma jelo̧ ö'weje pjabato̧ baibanö jo̧ ichobö jwitoinena. Isabenö, jelo̧ wainö jo̧, Levítjö tupadanö jojo Aaróndanöbö̧kö̧ ichoböma jwitoinena ajayinö Diostjö jojodötjö ö'weje pjabatadö tjotidi̧ mikwawitjö̧ma. Isabenö chömöledö, ajayinö Diostjö jojodötjö ö'weje pjabatadö tjotidi̧ pjaatokobetjö̧ jojodö Dioskwö suli̧ jwibadödanö tjichibobö, Diosma jelo̧nö yöawinobe. Isabenö jelo̧nö yöawinobe, Melquisedec, emöbi jemökökwedanö, ja̧danö la'akatjöda wobinö̧kö̧danö wainö jo̧nöma. Jau chömöledö, jelo̧ wainö jo̧nö yöawinobe Diosma, ajayinö Diostjö jojodötjö ö'weje pjabatadö tjotidena teachakwo̧nöma.

Efesios 4:12

Jejenö Cristoma Dios ömöledö babibinadönö, bakwo̧nökwena, iyabinobe tjotidawakwena, okobe deinö Dios ömöledö babibinadönö öbibö tjöba̧ja̧dobö. Jejenö öbibö tjöba̧ja̧do jö̧ba̧lö, iyabinobe Cristoma, okobe deinö Dios ömöledö babibinadöma otiwanö tjotidobö Dios weinama. Ja̧danö, okobe deinö Cristo iteba'obedöma tjo̧'wo̧ luwo̧nö jemi tupakwö juluwachibanö tji̧'yobö iyabinobe tjotidawakwenama.

Juan 12:44

Ikenama Jesúsma yemidanö labinö yöawinobe jojodönöma: —Ötjönö ösödadöma, Bitema Dios weinökwe, jö̧ba̧lö, sule ötjönödama ösödöködö. Ötjönö webinanöbi ösödadö.

Juan 5:24

Ina yöawinobe Jesúsma judío la'aka luwedönö: —Isabenö yötawa, ötjö yötawi̧ a̧ja̧kwadö, ötjönö webinanö ösödadöma, ba̧kwȩlö̧jatebö ja̧kwawa tjujuna̧lakwedö. Jobadöma lȩtebökakwawö̧. Wobajaletjö tjö̧jibanö babibö, ba̧kwȩlö̧jatebö tjuju̧kwakwedö— yöawinobe—.

Mateo 3:2

—Sulabenö kwomukwataduwi̧ kabatibö balewachaduwi, Dios yöbawö weakwa̧ möle yöneawachibobe— jö̧ba̧lö.

1 Timoteo 3:16

Dösödi̧ wenema isabenö otiwa jawa wene Timoteo, jojodö ajayinö wajwitjina wene, Dios i̧sebina wenema. Ja̧danö bakwo̧bi, Aaa, sulabe wene, isa̧ökö wene, jö̧a̧loböma jwia. Ja̧ Cristo Jesús jawa wenema biya̧: Jo̧bama jojo baibanö öwawinobe. Jo̧banö i̧sebinobe Dios O̧'wo̧ Luwo̧ma, sulabe jwibo̧ jö̧ba̧lö. Jo̧banö tjedinobe ángelesdöma. Jo̧banö tja̧ja̧kwinobe böjȩ bakwameachibanö ju̧kwadö jojodöma. Jo̧banö tjösödinobe böjȩ bakwameachibanö ju̧kwadö jojodöma. Jo̧bama mölejȩbe kaekwajinobe.

2 Corintios 7:10

Jau chömöledö, böjȩ jojodö tjo̧'wo̧ tjo̧achi̧danö o̧'wo̧ tjo̧achakwawama, pjaatökö ji̧ chömöledö, sulabenö tjomukwati̧ tjöbalewachokobetjö̧ woawada ji̧. Jo̧kwaijayonö Dios ösödi̧danö o̧'wo̧ tjo̧achakwawama otiwa, sulabenö tjomukwati̧ tjöbalewachinö ji̧obetjö̧, ja̧danö tjö̧jibinö ja̧i̧.

2 Timoteo 2:19

Jo̧kwaijayonö, ju'wedö tjösödi̧ waekwijayonö, Dios yöbawö ujunina wenema waekwokobe, la'akatjöda söawachokobe. Jau Timoteo, Diosma isabenö wene ujuninobe, inawa pjolachibököwadanö. Wanedö yötawa: Diosma isabenö wenesawa inawa ujuninobe, ja̧danö jawanö seyudanö wȩyukwawa jo̧be, ja̧danö baikwö laebobe wȩyukwi̧ma: Diosma iteda ömöledönö waiso̧, jö̧ba̧lö laebobe, ja̧danö ju'wibi laebobe: Okobe deinö Duluwo̧ ömöledösa jö̧ba̧ladöma, sulabetjö 'da̧bachibö tji̧'yobö jo̧be, jö̧ba̧lö laebobe.

Hechos 20:21

Judío jojodönöbi, judío jojodöböködönöbi, bakwaidödanö edö yöbawiachijatö. Sulabe tjomukwati̧ kabatibö tjöbalewacho, jö̧ba̧lö, yöbawiachijatö. Jesúsnö tjösödo jö̧ba̧lö, yöbawiachijatö— yöbawijetö Pabloma.

Hechos 11:18

Ikenama Pedrokwö wene juna̧lakwawö yöba̧ladöma Pedro yöawobe a̧ja̧kwö wene tjujuna̧li̧ma kabatakwawijadötö. Wene tjujuna̧li̧ma kabatibö Diosnö ösödö jö̧ba̧lijadötö: —Diosma judío jojodöböködönöbi otiwanö pjaatinobe. Tjomukwati̧ balewachö itekwöda tjichibobö, itekwöda ba̧kwȩlö̧jatebö tjuju̧kwobö pjaatinobe— jö̧ba̧lö, ösödijadötö Diosnö.

Hechos 3:19

Jo̧kwaobetjö̧ kwomukwataduwi̧ma kabatibö balewachaduwi, Diosnö omukwatö, Diosma ökwödö kwusuladuwi̧ söbebö loobö. Jejenö kwöbalewachaduwitjö̧ma kwo̧'wo̧ luwo̧duwi ösöwö kwö̧jaduwena, Duluwo̧ Diosma ökwödökwö ö̧jobetjö̧— yöbawijetö.

Juan 14:1

Ikenama Jesúsma yöawinobe jobadönö: —Kwo̧'wo̧duwi tjo̧kekwaduwa. Diosnöbi ötjönöbi kwo̧'wo̧duwi wana̧lö ja̧duwi— yöawinobe Jesúsma—.

Marcos 6:12

Jejenö weawö̧ Jesús öba̧ja̧di̧ waisachadöma labebö jelobebi jelobebi du̧ju̧tajakwena yöbawö 'yi̧jadötö. Jelobe, jelobebi du̧ju̧tajakwena 'ya̧jadöma jojodönö yöbawiabijadötö: —Sulabenö tjomukwati̧ kabatibö balewachaduwi— jö̧ba̧lö.

Marcos 1:1

Ötjöma, Marcos mikwo̧sa. Biya̧ wene chiwȩyuda, otiwa jawa wene yöbawö. Ja̧ otiwa jawa wenema Jesucristo ö̧jina wene, Dios Itji̧. Abönö yötawa, ja̧ otiwa jawa wene ajayi baledina.

Mateo 4:17

Ja̧ möle Jesúsma jamatö yöawinobe, jojodönö yöawi̧ma, baikwö: —Sulabenö kwomukwataduwi̧ kabatibö balewachaduwi, Dios la'aka luwo̧ ö̧jakwa̧ möle yöneawachibobe— jö̧ba̧lö jamatö yöawinobe.

1 Juan 4:12

Chö̧ja̧wo̧dö, Diosma edawö̧kö̧. Bakwo̧bi deobe Diosnö edo̧ma. Edawö̧kö̧jayonö ökwödöma dö̧ja̧wo̧dönö ile nibebö dö̧jenama di̧sekwobe, Diosnöma edö ja̧dösa, jö̧ba̧lö. Jau chö̧ja̧wo̧dö, Dioskwö ja̧nö, jo̧banö edö dö̧jobedanö jo̧be, jo̧ba ile nibebö ö̧ji̧danö dö̧jobetjö̧. Ja̧danö chö̧ja̧wo̧dö, dö̧ja̧wo̧dönö ile nibebö dö̧jena Diosma ökwödökwö dötewinö i̧'yobe. Jejenö Dioskwö 'ya̧nö ökwödö do̧'wo̧ luwo̧nö pjabatö öibobe Diosma, dö̧ja̧wo̧dönö ile nibebö dö̧jobö, jo̧ba ökwödönö ile niebi̧danö. Chö̧ja̧wo̧dö, Diosma jejenö ösödo̧, jo̧ba ökwödönö ile niebi̧danö ökwödöma dö̧ja̧wo̧dönö ile nibebö dö̧jobö.

1 Pedro 1:21

Ja̧danö, Cristo ökwödönö pjaatinobetjö̧, Diosnö ösödadöja chömöledö. Jau chömöledö, Diosda Cristonö wobajaletjö tjeachajinö ja̧binama, ja̧danö jo̧banö dejatinö ujulu iyinama, jo̧kwajabetjö̧ Cristonö kwösödaduwenama, Dios yöawi̧ ösödadöja, ja̧danö Diosnö kwo̧'wo̧ wana̧ladöja. Jau chömöledö, Dabe'do Diosma isabenö otiwanö pjaatinobe sulabetjö dö̧jibobö, jo̧kwajabetjö̧ ja̧ pjaatina omukwatö sulabenö ja̧bökönö dö̧jobö jo̧be.

Santiago 1:4

Jejenö kwi̧'yaduwo, kwo̧'wo̧duwi 'dibachibö jwaikwöda 'ya̧nö chö̧ja̧wo̧dö, kwo̧'wo̧ luwo̧duwinö kwöda̧peachaduwobö. Ja̧danö jejenö, da̧peachadö kwö̧jaduwobetjö̧ kwö̧jaduwi̧ma bakwai̧da, otiwanö ji̧da kwi̧sekwaduwobe. Kwomukwataduwi̧bi, ja̧köbaduwi̧bi otiwanö ji̧da kwi̧sekwaduwobe, ja'yubebi ji̧bökönö, kwo̧'wo̧ luwo̧duwinö kwöda̧peachaduwobetjö̧. Jo̧kwaobetjö̧ chö̧ja̧wo̧dö ökwödönö wene baledena kwo̧'wo̧duwi ösöwanö kwö̧jaduwo, Otiwa, jö̧ba̧lö. Jejenö baledi̧ma döda̧peachobö pjaatobe, dö̧ji̧ma bakwai̧da, otiwanö ji̧da di̧sekwinö, jö̧ba̧lö.

Hebreos 11:6

Jo̧kwaijayonö Diosma ja'yubebi o̧'wo̧ ösöwanö edokobe jo̧banö tjo̧'wo̧ wana̧löködönöma. Chömöledö, Diosnö tjo̧'wo̧ wana̧lö tjö̧ji̧da, Enoc ö̧jinadanö, Dios iteda o̧'wo̧ ösöwanö edi̧ma. Jo̧kwaobetjö̧, Diosnö ichibo jö̧ba̧lo̧ma Diosnö ösödobö jo̧be, Isabenö Diosma jo̧, jö̧ba̧lö. Ja̧danö, Diosnö ichibo jö̧ba̧lo̧ma Diosnö ösödobö jo̧be, Diosma otiwa jawa iyakwo̧ itenöda ösödö ichibobö isakwo̧nöma, jö̧ba̧lö.

Colosenses 4:12

Ja̧danö, ökwödö Colose jojodötjö jojo ja̧danö Cristo Jesús ömöayo̧ Epafras mikwo̧ma ökwödönö deawobedanö dokwa jö̧ba̧lö aebobe. Jo̧bama kabatökönö ökwödönö omukwatö nöinö Diosnö aebobe chömöledö, kwo̧'wo̧ luwo̧duwi da̧peachö kwö̧jaduwakobetjö̧, ja̧danö dötölatajanö omukwatökönö, jwaikwöda Dios ösödi̧ jawada ja̧bö kwö̧jaduwakobetjö̧.

Colosenses 1:28

Jo̧kwajabetjö̧, Cristonö yödawobe okobe deinö jojodönö chömöledö. Jau chömöledö waisanö omukwatö okobe deinö jojodönö lȩbebö yödawobe, ja̧danö jobadönö döba̧ja̧dobe, jobadö bakwo̧nökwena Cristokwö dötewanö ja̧nö tjo̧'wo̧ luwo̧nö tjöda̧peacho jö̧ba̧lö, ja̧danö wanedö yötawa jejenö da̧peachajadönö Dios öba a'o öbibö dujuno jö̧ba̧lö.

Efesios 2:5

sulabenö ja̧bö dö̧jijayonö pjaatinobe Diosma. Ökwödöma do̧'wo̧ luwo̧nöma wobinadödanö dö̧jijayonö Diosma, do̧'wo̧ luwo̧nö 'yadibajinö ja̧inobe, Cristokwöda dö̧jobö. Chömöledö Diosma mikwa jwiinö otiwa jawa iyö dö̧jibanö pjaatinawö̧sa.

1 Pedro 5:10

Isabenö babe usula kwemawaduwobö jo̧be chömöledö, ikenama ja'yubenö lekwajabetjö jejenö usula emawajadönö, Diosma ökwödö usula kwemawaduwaja̧tjö kwö̧bibajaduwinö otidö loakobe chömöledö. Jau chömöledö, Diosda, mikwa jwiinö otiwanö iyo̧da ökwödönö jwöinöbe, Cristokwö dötewanö ja̧nö, jo̧ba ba̧kwȩlö̧jatebö salöinö idejatobe ökwödö kwö̧jaduwobö, ja̧danö isabenö jo̧bakwö kwö̧jaduwakwedöja chömöledö. Ja̧danö chömöledö, ina böjȩnö kwö̧jaduwayi, Diosda 'diinö kwö̧jaduwobö pjaatakwo̧, ja̧danö pjolachibökönö kwö̧jaduwobö ujunakwo̧, ja̧danö kwujuluwaduwachibanö pjaatakwo̧ chömöledö.

Efesios 2:1

Chömöledö, Diosma ökwödö wobinadödanö ju̧kwadönöma yemidanö 'yakibajaduwinö ja̧inobe, kwo̧'wo̧ luwo̧duwinöma. Jau chömöledö, ökwödöma ajayinöma Dios wei̧ öpöjödö, sulabe kwösödaduwi̧da ja̧bö kwuju̧kwaduwobetjö̧ wobinadödanö kwuju̧kwinaduwobe, kwo̧'wo̧ luwo̧duwinöma.

1 Corintios 13:10

Jo̧kwaijayonö mölejȩbetjö okobe jwiinö bakwainö otiwanö baibenama, ja'ödama döwaisökena, ja̧danö ja'ödama yödawökena. Jau chömöledö, ja̧ mölema okobe jwiinö döwaisakwedösa, ja̧danö okobe jwiinö yödawakwedösa.

Hechos 17:30

¿Kwöwaisaduwiji̧? Diosma lekwe omukwatijökötö jo̧banö wajwibadö sulabenö ja̧tjinama, Ina lȩtebökö, jö̧ba̧lö. Jo̧kwaijayonö babema jejenömaökö. Babema Diosma weobe jojodönö, Sulabenö tjomukwati̧ kabatibö tjöbalewacho, jö̧ba̧lö.

Hechos 2:38

Jejenö abebö tja̧ja̧kwiökwe Pedroma atadijetö: —Chömöledö, ökwödötjö, bakwo̧nökwena sulabenö kwomukwataduwi̧ma kabatibö balewachaduwi. Ja̧danö, ojwenö ubu̧datobö abebaduwi, Jesucristonö kwo̧'wo̧ kwöwana̧laduwi̧ i̧sebö. Jejenö ja̧baduwi, Dios ökwödö sulabe kwujuna̧laduwi̧ söbebö loakobetjö̧. Jejenö ja̧köbaduwenama Dios O̧'wo̧ Luwo̧ma tebachibö öjamatakobe ökwödönö— yöbawijetö Pedroma—.

Mateo 7:25

Jejenö 'diena otido̧ma, 'dieju juna̧lo̧. Ja̧danö, nöinö ojwiyo o̧ba̧lijayonö, ja̧danö ojwe okwatibijayonö, ja̧danö jwa̧lȩ'epjo labinö jwa̧le'ewijayonö, 'diinö jȩju ujuna̧lena, 'diena otidinobetjö̧.

Mateo 5:48

Jau chömöledö, kwabe'doduwi mölejȩbe jo̧ Diosma, bakwainö otiwanö ja̧bo̧, jo̧kwajabetjö̧ ökwödö jo̧ba i̧tji̧mubi bakwainö otiwanö ja̧bö kwö̧jaduwo— jö̧ba̧lö yöawinobe Jesúsma.

Proverbios 4:18

Jobekwömaökö Dios wei̧ a̧ja̧kwadö tjö̧ji̧ma. Dios wei̧ a̧ja̧kwadöma sulabenö omukwatadö tjö̧ji̧danö jö̧kö̧dö. Wanedö yötawakwö chitji̧: Dewachenama, i̧ya̧nö deapjo dewachobe tjo̧'o̧manö, ja̧wo̧ laebaja̧ tupakwö jwiinö dewobe jweinö öjenanö. Jobekwö Dios wei̧ a̧ja̧kwadö kwetjachamanö dewinö dejatobe, ajayinö dejatemitjö̧ tupakwö jwiinö dewinö dejatobe, otiwanö edö, salöamanöda tji̧'yobö.

1 Timoteo 6:19

Ja̧danö, wanedö yötawa: Jejenö ja̧bö tupakwö tjujuna̧lakwa̧ jawa 'da̧batö tjujunakobe, mölejȩnö tjujuna̧lakwa̧ jawama, ja̧danö isabenö ja̧kwawa Dios chiyocha jö̧ba̧lö yöawina ja̧kwawama tjujuna̧lakwedö.

Lucas 6:48

Jo̧bama otiwanö o̧do otido̧danö ichejekwobe. O̧'do otiwanö otido̧ma, okwa sobö, inawa ichibenanö sobo̧, otiwanö o̧do la'aka jawa ujunobö. Ja̧danö jejenö inawa wame la'aka jawa otidobetjö̧, ojwe okwatibö balawa loijayonö, otiwanö 'diinö o̧do otidinobetjö̧ 'dieju. Jo̧badanö ichejekwo̧ yötawi̧danö ja̧bö jo̧ma chömöledö.

Mateo 21:29

Weökwe: Chotidökö, jö̧ba̧lö atadinobe, jo̧kwaijayonö tupakwö omukwati̧ balewachibö otidö i̧'yinobe abönö pöema.

1 Corintios 2:6

Jau chömöledö, tjo̧'wo̧ luwo̧nö da̧peachadönö yötawenama, waisakwawa ji̧ wene yötawobe jobadönö, waisanö tjomukwatakobetjö̧. Jo̧kwaijayonö, yötawi̧ wene waisakwawa ji̧ma böjȩ waisakwawa jawamaökö, ja̧danö böjȩ luwedö waisanö tjomukwati̧ jawamaökö. Böjȩ luwedönö baikwö yötawa chömöledö, tupakwö tjujulu jwitjakwedö jobadöma. Ja̧danö jobadö waisanö tjomukwati̧ jawama yödawökö.

Colosenses 3:14

Ja̧danö, wanedö yötawa: Ja̧ 'dukawaduwo jö̧ta̧laja̧ma, jeledo̧bi 'dukawaduwo chömöledö, wamesado̧ baibanö. Jau chömöledö, kamijido̧ 'dutjawi̧danö, kwömöledöduwinö ösödabikwawi̧bi 'dukawaduwo chömöledö, jeledo̧tjö wamesado̧ baibanö. Jau chömöledö, ja̧ dömöledönö ösödabikwawi̧ma, inesö mikwawi̧ma, ja̧danö okobe deinö bakobe tjödötewi̧danö ichejekwi̧.