Ja̧danö, baikwö yötawakwö Josue, Isabenö Jo̧ Diosda kwabönö i̧'yakwo̧ma, jo̧bama ökwökwö ö̧jakwo̧, ja̧danö la'akatjöda waekwökakwo̧, ja̧danö la'akatjöda ökwönö le'dedibö loökakwo̧, jo̧kwajabetjö̧ yebabinö kwö̧joko, ja̧danö –Dakwö dichibakwajö, –jö̧ba̧löma omukwatö kwö̧joko, —jö̧ba̧lö yöawinobe Moisesma Josuenö.
Hebreos 13:5 - Dios Iwene5 Ja̧danö, ju'wibi yötawaduwakwö. Balada kwujuna̧laduwi̧dama omukwatö kwö̧jaduwoko chömöledö. Otiwanö omukwataduwi tjo̧wi̧ kwujuna̧laduwi̧ma, ju'wi jawabi, ju'wi jawabi, kabatökönö kwemaduwobö omukwatökönö. Chömöledö, ökwödöma jwiinö mikwawinö ji̧ juna̧ladöja, Diosma ökwödönö ile niebobetjö̧. Kwomukwataduwo Dios ökwödönö yöawina. Baikwö laebobe Dios iwenetjöma, iteda yöawina: Ökwödönö la'akatjöda le'dedibö chȩwa̧jökakwo̧sa. La'akatjöda ökwödönö katatibökakwo̧sa. Jejenö laebobe Dios iwenetjö, Diosma ba̧kwȩlö̧jatebö ökwödökwö jo̧, jö̧ba̧lö. Gade chapit la |
Hebreos 13:5
46 Referans Kwoze
Isabenö kwujuluwachibanö pjatatakwo̧sa, baikwö yötawa: Ina 'yaba̧lo̧ kwö̧jayi, kwöpöjojodötjö bakwo̧bi ökwönö ujuluwobö jwiakobe, okobe deinö kwöba a'otjö dötjibajakwedö. Jau Josue, Moiseskwö ja̧nö pjatatinadanö, ökwökwöbi ja̧nö pjatatakwo̧sa, isabenö ba̧kwelöjatebö ökwökwö chö̧ja̧kwo̧sa, la'akatjöda ökwönö katatibökakwo̧sa.
Kwujuluwaduwachibanö, yebabökönö kwö̧jaduwo chömöledö. Ja'yubebi jobe ju̧kwadönö yekabiduwobö jwiobe chömöledö, baikwö yötawa: Kwuluwo̧duwi Isabenö Jo̧ Diosda ökwödökwö i̧'yakwo̧, ja̧danö jo̧bama la'akatjöda waekwökakwo̧, ja̧danö ökwödönö le'dedibö loökakwo̧, jo̧kwajabetjö̧ jobe ju̧kwadönö yekabiduwoböma jwiakobe, —jö̧ba̧lö yöawinobe Moisesma.
Isabenö Jo̧nö kakatibaduwoko chömöledö, jo̧bama isabenö ökwödönö kabatibö̧kö̧. Jau chömöledö, kwuluwo̧duwi imima Isabenö Jo̧ jö̧ba̧lö mikwo̧, jo̧bada Inesö Isabenö Jo̧obetjö̧. Ja̧danö, iteda ösödi̧danö, ökwödö israel jojodönö omudawö ujuninobe, Isabenö Jo̧ ömöledö bakibaduwanö. Jo̧kwajabetjö̧, ja̧ wene omukwatö, ökwödönö kabatibö̧kö̧ Isabenö Jo̧ma chömöledö, —jö̧ba̧lö yöawinobe Samuelma.
Ja̧danö wȩyukwa'ye Salomonnö iyajo̧, tupakwö yöawinobe Davidma: —Chitji̧, kwujuluwachibanö yebabökönö ja̧nö kwotido. Yebabökönö ja̧nö, dakwö ja̧takwajö jö̧ba̧lö omukwatökönö kwö̧jo, ötjö chösödökwe Dios, Isabenö Jo̧ Dios ökwökwö ö̧jobetjö̧. Kwö̧jelö 'da̧bachibökönö, ökwönö le'dedö loökakwo̧ chitji̧, isabenö ökwökwö pjabatö ö̧jakwo̧, okobe jwiinö iteda eju, Isabenö Jo̧ eju, kwotido jö̧ka̧lidanö otidö kakatakwawenanö baibanö.
Ina yöbawijetö: —Jacob a̧ja̧kwitjö. Ötjöma ökwökwö jo̧sa. Ba̧kwȩlö̧jatebö ökwönö chite'ada̧lakwo̧sa okobe jwiinö kwi̧'yobema. Ja̧danö, ju'wi möle bemi nijinöma ökwönö tjetatakwo̧sa. Isabenö ökwönö junibö̧kö̧sa Isaac. Ja̧danö okobe jwiinö ötjö chiwene yöbawö chujuni̧danö badekwachakobe— yöbawijetö Isabenö Jo̧ Diosma Jacobnö, i̧'wi̧dinö.
Jo̧kwajabetjö̧ baikwö yötawaduwakwö chömöledö: Böjȩnö kwö̧jaduwi̧ jawama omukwatö kwö̧jaduwoko, Aaa, ¿taji dukwakwa̧jö?, ¿taji dowakwa̧jö?, ¿taji 'dudawakwa̧jö? jö̧ba̧löma. Jau chömöledö, ja̧kwawa mikwawi̧ma, sule kwakwawadamaökö, ja̧danö sule kwiteba'oduwinö 'duawakwawadamaökö, ¿jö̧tö? Jo̧kwajabetjö̧ ja̧ jawa omukwatö kwö̧jaduwoko chömöledö.
Jo̧kwajabetjö̧, ajayinö kwösödinaduwa jawa kakatibaduwo chömöledö. Wanedö yötawa: Sulabenö kwösödaduwi̧bi, sulabenö ja̧köbaduwi̧bi kwabö loköbaduwo chömöledö. Jau chömöledö, kwi̧lȩkwa̧muböködökwö ja̧awabi, ja̧danö sulabenö alewakwawabi, ja̧danö sulabenö 'da̧'da̧akwawa kwösödaduwi̧bi, ja̧danö sulabe jawa kwösödaduwi̧bi, kakatibaduwo chömöledö. Ja̧danö ökwöda kwemotö jö̧ba̧lö ösödakwawabi kakatibaduwo chömöledö, ökwöda kwemotö jö̧ba̧lö ösödakwawama, o̧'wo̧ jawa ösödakwawi̧danö ichejekwobetjö̧.
Ja̧danö guardia jojodötjöbi ju'wedö abebö tja̧ja̧kwinobe: —¿Ökwödöja? ¿Dakwö ja̧bö di̧sebobö ökwödöma isabenö sulabenö domukwati̧ kabatibö balewachadösa jö̧ba̧löma?— Atjebökwe Juanma atadinobe: —Kwuluwedö tjimidi̧da emö kwö̧jaduwo. Ja̧danö ju'wibi, jojodönö 'döbebö naukwöma yebeabinöma kwemaduwoko. Ja̧danö ju'wibi, balada kwemaduwotö jö̧ba̧lö jojodönö omöna yöka̧laduwa, Bidöma sulabenö ja̧badö, jö̧ba̧löma. Kwuluwedö tjimidi̧da emö kwösödaduwo, Otiwa, jö̧ba̧lö— atadinobe Juanma.
Jobadö sulabenö yöbawadöma jwaikwöda tji̧lȩkwa̧muböködökwö ja̧tjotö jö̧ba̧lö isakwadö, ja̧danö öpöjödachibökönö jwaikwöda sulabenö ja̧böda ju̧kwadö. Ja̧danö, ju'wibi, jwaikwöda balada tjemotö jö̧ba̧löda omukwatadö ja̧nö, tjo̧'wo̧ luwo̧nö ina da̧peachöködönö ötjibobedanö ichejekwa, 'daliwanö tjö̧libobö. Isabenö sulabenö ja̧bö tjö̧jobe chömöledö, jo̧kwajabetjö̧ Dios lȩebakwawö̧ tjö̧jobe.
Babema öwaitjöda yötawa chömöledö. Bakwo̧ ilekwobökujukwö jo̧bi, bakwuju jilekwebö̧kö̧kwö ju̧jubi, ju'wi jwiinö taba̧lö̧ji jawa ja̧badöbi Dios Cristokwö webö tjö̧jobekwöma yelösöda tetjachökakwedö. Ja̧danö, bakwo̧, böjȩ jawada ösödanö edö, Diosnö omukwatökönö böjȩ jawada ösödö edo̧ma Dios Cristokwö webö tjö̧jobekwö teachökakwo̧.
Chömöledö, Dios ömöledö bakibinaduwobetjö̧ sulabe ja̧bökönö ja̧duwi. Ja̧danö, bakwo̧ ilekwo debo̧, jeluju jelujunöma ja̧böma kwö̧jaduwa. Ja̧danö, bakwuju jilekwe debujuma, jelo̧ jelo̧nöma ja̧böma kwö̧jaduwa. Ja̧danö, chömöledö, ju'wi taba̧lö̧ji jawabi ja̧köbaduwa. Ja̧danö, ju'wedö tjujuna̧li̧bi edö jwiinö ösödö, Chujuna̧lobö jö̧ta̧la, jö̧ba̧löma kwomukwataduwa. Chömöledö, Dios ömöledö bakibinaduwobetjö̧, ja'yubebi biya̧ sulabe jawa yötawaja̧ma kwi̧sebaduwoko.
Jo̧kwaijayonö, ja̧ chiwȩyudinama, baikwö jö̧ba̧lö chiwȩyudijatö: Jesúsnö ösödadösa jö̧ba̧ladötjö jejenö sulabenö ja̧badötjö 'da̧bachibö kwö̧jaduwo. Jau chömöledö, Jesúsnö ösödadösa jö̧ba̧ladötjö ilekwobökujukwö ja̧bö jo̧tjöbi, ja̧danö Jesúsnö ösödadösa jö̧ba̧ladötjö iteda nöinö emotö jö̧ba̧lö isakwo̧tjöbi, ja̧danö Jesúsnö ösödadösa jö̧ba̧ladötjö o̧'wo̧ jawa ösödö jo̧tjöbi, ja̧danö Jesúsnö ösödadösa jö̧ba̧ladötjö ju'wedönö sulabenö yöba̧lö jo̧tjöbi, ja̧danö Jesúsnö ösödadösa jö̧ba̧ladötjö 'dukwachinö owa̧lö jo̧tjöbi, ja̧danö Jesúsnö ösödadösa jö̧ba̧ladötjö naukwabinö jo̧tjöbi 'da̧bachibö kwö̧jaduwo jö̧ba̧lö chiwȩyudijatö. Jau chömöledö, Jesúsnö ösödadösa jö̧ba̧ladötjö ju'wedö jejenö sulabenö ja̧bö tjö̧jitjö̧ma, jobadötjö 'da̧bachibö kwö̧jaduwo, kwanöbi jobadökwö ba̧nö kwökönö.
Ja̧danö sȩa'wonö meaja̧ ödebiya badekwachi̧ma, Dios iwene a̧ja̧kwö tjösödijayonö, jemi tupakwö böjȩnö tjö̧ji̧ jawa nöinö tjomukwatobe, ja̧danö balada tjemobö tjisakwobe, ja̧danö böjȩ jawatjö tjo̧'wo̧ ösöwobö tjisakwobe. Jobadöma ja̧ jawa nöinö tjomukwatobetjö̧, otiwanöma tjöda̧peachokobe, ja̧danö tjo̧'wo̧ luwo̧ wa̧ji̧ jawama otiwanöma wa̧jököwö̧.
Nöinö jo̧be Dios öba a'otjö tjomajade okwatjö suli̧ jwöebi̧ laebi̧ma. Biya̧ jawabi: Ju'wedö tjujuna̧li̧ ba̧wa̧lö̧jinö edawa, ja̧danö, ju'wedönö sulabenö ja̧awa, ja̧danö, bakwo̧ sulabenö ja̧ina yöbawökönö ö̧ji̧, ja̧danö, jwiinö taba̧lö̧ji̧ jawa ja̧awa, tjomajade okwatjö laebi̧ suli̧ jwöebi̧ma. Ja̧danö ju'wibi: Tjo̧'wo̧ sulinö edawa, ja̧danö, ju'wedönö omöna yöba̧lö jwöeba̧lakwawa, ja̧danö, ju'wedönötjö o̧penönö otiwanö jo̧sa, jö̧ba̧lö, omukwatakwawa, ja̧danö, o̧'wo̧ jwibo̧danö omukwatökönö ja̧awa. Nöinö jo̧be tjomajade okwatjö suli̧ laebi̧ma.
Ja̧danö ju'wibi wetaduwakwö: Kwömöledöso̧ eju ösödöma kwedaduwoko, ötjö cheju baibanö chösöda, jö̧ba̧lö. Ja̧danö, kwömöledöso̧ ilekwonöma ösödöma kwedaduwoko, chösödoko, jö̧ba̧lö. Ja̧danö kwömöledöso̧ ömöayo̧nöbi ömöayujunöbi, ötjöda chömöayedö batjibanö chösöda, jö̧ba̧lö kwedaduwoko. Ja̧danö a̧jwi̧mu̧ pa̧kayönöbi a̧jwi̧mu̧ bu̧lu̧dönöbi ju'wi jayebi kwömöledöso̧ ujunani̧ma ösödama kwedaduwoko, ötjöda chajwimu batjibanö chösöda, ja̧danö iteabi ötjö chitea baibanö chösöda, jö̧ba̧lö— jejenö domulataja jawa weawa yöbawijetö Isabenö Jo̧ma.
¡Ayö, jobadöwe, isabenö jwiinö Dios lȩebakwawö̧! Jau chömöledö, jobadöma Caín, iteda öjawo̧nö kwabö lobina ja̧bö ö̧jinadanö ja̧bö ju̧kwadö, ja̧danö ju'wibi Balaam sulabenö ja̧inadanö idöda tjemotö jö̧ba̧lö jojodönö omöna yötja̧lobö isakwadö, ja̧danö ju'wibi Coré sulabenö ja̧inadanö Dios yöawi̧ öpöjödö tjöbeba̧lö sulabenö yöbawadö. Jejenö sulabenö ja̧bö tjö̧jiökwe, Diosma isabenö jwiinö labinö lȩebakobe jobadönö chömöledö.
Jobadönöma baikwö yötawa: Okobe jwiinö Dios öpöjödi̧ jawada ja̧badö, ju'wedö tjitea ö'wiabinö omukwatadö, okobe jwiinö jojodö sulabenö ja̧tji̧bi ja̧bö ju̧kwadö. Ju'wedö tjitea ösödö, ö'wö 'yaabinö kwabö lobadö, ölakwabikwawabi jö̧ba̧ladö, omöna yöba̧ladö, ju'wedönö sulabenö ja̧tjotö jö̧ba̧lö omukwatadö. Ja̧danö, tjoma'apekwönö yöba̧lakwawadö,
Jerico jojodönö dujuluwenama, dujuluwajawö̧ tjiteatjö chedijatö, kamijido̧ babilonia nijitjö otikwa̧do̧ jwiinö otiwa̧do̧ wamesa̧do̧ma, ja̧danö ju'wibi plata ö̧pi̧ya doscientos ö̧pi̧ya chedijatö, ja̧danö ju'wibi orotjö cincuenta ö̧piyadanö ömöka'o chedijatö. Jejenö edajo̧, ötjöda chemotö jö̧ba̧lö chösödijatö, ja̧danö emajo̧, cheju i̧sȩdo̧tjö otikweju okwa sobö o̧tjö chotojijatö. Jau Josue, ja̧ chemina jawama, babe cheju okwa, niji okwa jo̧be, ja̧danö ju'wi jawa teebe, plata ö̧pi̧ya bo̧be, —jö̧ba̧lö atadinobe Acanma.
Ja̧danö chömöledö, jejenö tjebachajö Diosnö kwösödaduwiökwe, isabenö lȩlöinö edakobe ökwödönö, kwuluwo̧duwi Isabenö Jo̧ Diosma lȩlöjinö edo̧ Diosobetjö̧. Jo̧bama la'akatjöda kwa'dödönö yöbawö ujunina jawa o̧'wo jwiibökakwo̧, ba̧kwelöjatebö kwa'dödönö yöbawö ujunina jawa omukwatakobe chömöledö. Ja̧danö, yöbawö ujunina omukwatö, la'akatjöda ökwödönö le'dedibö loökakwo̧, ja̧danö la'akatjöda söbebö loökakwo̧ ökwödönö jwiinöma, ba̧kwelöjatebö ökwödötjö ji̧badö tjö̧jibobö pjaatakobe, —jö̧ba̧lö yöawinobe Moisesma, israel jojodönö.
Jemi ikena jweinö omukwatadö yötjawinama baikwö laebobe: Isabenö yötawakwö: Balada nöinö kwemobö kwösödobetjö̧ nöinö, ö'wachökönö kwotidena ¿jö̧tö̧? Jwebebö yötawakwö: Jobekwö balada nöinö kwujuna̧lobö ö'wachökönö kwotidoko kwime'dawachibapji jö̧ba̧lö. Jweinö kwomukwato, ö'wachökönö kwotidoböma kakatibo.
Ja̧danö, chömöledö tjöbajale tjewawadödanöbedönö pjatatocha. Jobadönö ötibakwo̧sa, mana edajitjökö mananö kwetjachobö. Ötjöda jobadönö jwetebakwo̧sa, ja̧danö tjöba a'otjö yȩa'woma, dewi̧ baibanö balewö lotakwo̧sa, otiwanö tjedakobetjö̧. Ja̧danö niji ya̧likwaobe inakoobema, ba̧ba̧ladö chotidocha, ba̧ba̧lawamanö otiwanö kwetjachakobetjö̧. Jobekwö isabenö chömöledönö pjatatakwo̧sa, ja̧danö jobadönö le'dedö lotökakwo̧sa.
Piblisite