Hebreos 12:3 - Dios Iwene

³ Isabenö chömöledö, Jesúsnöda kwomukwataduwo. Ökwödö me'dawachibö tjekachajaduwobö kwomukwataduwenama Jesúsnöda kwomukwataduwo, usula emawijayonö jwaikwöda me'dawachibökönö 'yi̧nanöda. Ja̧danö sulabedö, jo̧banö öpöjödadöma jwiinö tjöpöjödobetjö̧ labinö jwötjeba̧linobe. Yayonö Jesúsma jwaikwöda me'dawachibökönö i̧'yinobe. Chömöledö, ökwödönö labi̧ jawa baledenama jo̧ba me'dawachibökönö i̧'yinama kwomukwataduwo, ökwödöbi me'dawachibökönö kwo̧'wo̧ luwo̧duwi juluwachibanö kwi̧'yaduwobö. Ökwödönö labi̧ jawa baledijayonö me'dawachibökönö jwaikwöda kwi̧'yaduwo chömöledö, tjebachajökönö.

Hebreos 12:3 Referans Kwoze

Gálatas 6:9

Jo̧kwajabetjö̧, otiwanö ja̧bö dö̧ji̧ma döpöjödachibaduwoko chömöledö, isabenö yötawaduwakwö, do̧'wo̧ 'dibachibö dite'ada̧litjö̧ma, isabenö dotidina wa̧ji̧ demakwedösa chömöledö.

2 Corintios 4:16

Babe wene döbaledi̧ma baikwö yötawa chömöledö: Nöinö usula demawijayonö, tupakwö dö̧jakwa̧ omukwatö ja'yubeda usula demawobe ichejekwa chömöledö, ja̧danö tupakwö ba̧kwȩlö̧jatebö otiwanö dö̧jakwa̧ma omukwatö, babe usula demawi̧ma lekwokobe ichejekwa. Ja̧danö chömöledö, usula demawi̧tjö Diosma inesö nöinö ba̧kwȩlö̧jatebö ji̧ salöinö ujulu iyakobe ökwödönö. Jau chömöledö, babe usula demawi̧tjö yelösöda bajalekwönönö, ja̧ salöinö ujulu dujuna̧lakwedösa, ja̧danö jejenöobetjö̧, do̧'wo̧ tjo̧bekwöma kadatibokobe. Jau chömöledö, diteba'o wamesa'o woijayonö, okwa luwo̧ do̧'wo̧ luwo̧ma la'akatjöda wobö̧kö̧, mölekwena kabatökönö tupakwö ujuluwachibanö jo̧ okwa luwo̧ do̧'wo̧ luwo̧ma.

Apocalipsis 2:3

Jau chömöledö, ökwödö Éfeso jojodönö edo̧sa. Chöwaisa, ötjönö ösödö yökawaduwobetjö̧ inia tjököbaduwinö baledawö̧ja. Jo̧kwaijayonö chedemi sulabe baledonöbi kwo̧'wo̧duwi 'dibachibö ja̧nö, me'dawachibökönö, otiwanö kwö̧jaduwobe.

1 Corintios 15:58

Jejenö jo̧be chösödawö̧ chömöledö, ja̧danö jejenöobetjö̧, 'diinö kwö̧jaduwo, pjolachibökönö. Ja̧danö jwaikwöda Duluwo̧ wei̧ ja̧bö kwö̧jaduwo kwöwaisaduwobetjö̧, Duluwo̧ wei̧ ja̧bö dö̧ji̧ma isabenö mikwa ji̧ jö̧ba̧lö.

Hebreos 12:2

Ja̧danö jwaikwö 'ya̧nö, me'dawachibökönö, Jesús, dö̧jibinö pjabato̧nö eda̧löda di̧'yobö jo̧be. Chömöledö, Jesúsma ökwödönö pjaatinobetjö̧ Diosnö do̧'wo̧ wana̧ladö babibinadösa, Jesúsnö do̧batö emö. Ja̧danö, Jesús ökwödönö pjaatinobetjö̧ ba̧kwȩlö̧jatebö Diosnö do̧'wo̧ wana̧ladösa, jo̧banö kabatibökönö, jwaikwöda 'ya̧nö. Jo̧kwaobetjö̧ chömöledö, Jesúsnöda omukwata̧lö, jo̧ba i̧'yinadanö di̧'yobö jo̧be. Jo̧ba ö̧jina omukwataduwi. Yelösöda usula emawö woinobe towisa'onö bȩtjajökwema. Isabenö, ja̧ jo̧banö lȩtjebi̧ma yelösöda jwiinö taba̧lö̧ji̧ jawanö lȩtjebinobe. Jo̧kwaijayonö Jesúsma omukwatinokobe itenöda taba̧lö̧ji̧ jawanö lȩtjebi̧ma. Usula emawijayonö ju'wi möle baibakwa̧ omukwatinobe, jwiinö o̧'wo̧ ösöwanö ö̧jakwa̧ma. Ja̧danö, Jesús towi sötenö bȩtjajökwema ö'wö baibinobe. Jemi ikenama ö'wö babibajo̧ma wobajaletjö tjeachajinobe. Ja̧danö, yemidanö tjebachajo̧ma mölejȩbe kabekwachajö ȩwa̧jinobe. Ȩwa̧jo̧ma Abe'do Dios ö̧bemi öwaisobekwöchobe öbamatinobe. Chömöledö, Jesúsma jwiinö usula emawijayonö kaatibinokobe ju'wi möle baibakwa̧ omukwatobetjö̧, jwiinö o̧'wo̧ ösöwanö ö̧jakwa̧da. Jo̧kwaobetjö̧ chömöledö, jwaikwö 'ya̧nö, kabatibökönö, Jesús, dö̧jibinö pjabato̧nö eda̧löda di̧'yaduwo.

Hebreos 3:1

Isabenö, Jesúsma jwaikwöda i̧'yinobe Dios wei̧ a̧ja̧kwö. Jo̧kwaobetjö̧ chö̧ja̧wo̧dö, ökwödönö, Dios mölejȩbe kwö̧jaduwobö 'da̧batö ujuninawö̧nöma yötawaduwakwö. Dios Itji̧ Jesúsnö omukwata̧lö kwö̧jaduwo. Omukwataduwi. Jo̧ba Jesús yödawökweda, Bitema dö̧jibinö pjabato̧, jö̧ba̧lö. Chömöledö, Jesús, Dios yöawi̧ yöawobö weinökwema Diostjö jojodötjö ö'weje la'aka pjabato̧ baibanö jo̧. Jo̧banö omukwata̧lö kwö̧jaduwo chömöledö.

2 Corintios 4:1

Jau chömöledö, Diosma lȩlö̧jinö edö ja̧ salöi̧ 'yayi̧ wene otiwa jawa wene yödawobö ujuninobe, ¿jö̧tö? Ja̧danö chömöledö, ja̧ wenema isabenö inesö salöi̧ weneobetjö̧, usula demawijayonö, do̧'wo̧ tjo̧bekwöma kadatibokobe chömöledö, isabenö jojodö tja̧ja̧kwobö jo̧be jö̧ba̧lö.

Juan 5:16

Jejenö yöawobetjö̧ jobadö la'aka luwedöma Jesúsnö tjo̧'wo̧ sulinö edö, sulabenö jwötjeba̧lakwawinobe jo̧banöma, jojodö tjotidökö möle otidiawö̧.

1 Samuel 12:24

Isabenö jwaikwöda Isabenö Jo̧nö yebabinö ösödö, wei̧danö ja̧bö kwö̧jaduwobö jo̧be chömöledö, isabenö ökwödönö inesö otiwanö pjaatina wene omukwatö, jo̧banöda kwösödaduwobö jo̧be.

Hebreos 12:5

Ja̧danö ¿kwo̧'wo̧ jwiköbaduwiji̧ Dios iwenetjö laebi̧, labi̧ jawa baledakwawa pjabatö yöawi̧ma? Baikwö laebobe Dios iwenetjö, da'dömine Salomón iteda itji̧nö yöbawö öba̧ja̧dina wene: Chitji̧, labi̧ jawa ökwönö baledenama jweinö, yebabinö kwomukwato, Duluwo̧ Diosda labi̧ jawa ötjönö öba̧ja̧dobö webo̧, jö̧ba̧lö. Ja̧danö, Duluwo̧ Diosma ökwönö yöbawö kwabö lȩebena kwo̧'wo̧ tjo̧bekwökönö kwö̧jo, ba̧ja̧dö yöawobetjö̧.

Lucas 14:1

Ju'wi otikwökö mölema, Jesúsma fariseo jojodötjö luwo̧ ejube ukwobö i̧'yinobe, ja̧danö jobe bakwo̧ ö'wöcho̧bi ö̧jinobe, öbabi i̧bȩjwa̧bi ye'yebacho̧ma. Ja̧danö, otikwökö möle ö'wöcho̧ Jesús öba a'o ö̧jiawö̧, fariseo jojodöbi, Moisés iwȩyudina ba̧ja̧dadöbi te'ada̧lönö tjeda̧linobe Jesúsnö, otikwökö möle dakwö ja̧ojobö jö̧ba̧lö. Jejenö dakwö ja̧ojobö jö̧ba̧lö tjeda̧liökwe, Jesúsma jobadönö abebö a̧ja̧kwinobe: —Moisés iwȩyudinama ¿dakwö laebobeda? Otikwökö möle ö'wöchadönö otidö lotjobö ¿jo̧beji̧?, ¿jwiobeji̧? ¿Dakwö laebobeda?— jö̧ba̧lö.

Deuteronomio 20:3

–Chömöledö israel jojodö, baikwö yötawakwa̧ a̧ja̧kaduwi. Babe möle kwöpöjojodöduwinö kwölakwabikwawaduwakwedöja, jo̧kwaijayonö jobadönö yekabiduwoko. Jobadönö yebabinö tjö̧bawö, Bidönö dakwö dujuluwakwajö, jö̧ba̧löma yekabiduwoko,

2 Tesalonicenses 3:13

Ja̧danö, ökwödö otiwanö ja̧bö ju̧kwadönö baikwö yötawa chömöledö, otiwanö ja̧bö ja̧kwawama kwöpöjödachibaduwa.

Juan 18:22

Jejenö atadiökwe bakwo̧ guardia jojoma Jesúsnö kwainobe ömamunö. Kwabö jö̧a̧linobe: —¿Tajawedö jejenö yöka̧la Diostjö jojodötjö ö'weje la'aka pjabato̧nöma? Jo̧kwadabo̧ yöka̧li̧danö yöka̧la jo̧banöma— jö̧a̧linobe.

Juan 8:52

Jejenö yöawiawö̧: —¡Ayö, tjo̧wi̧ döwaisa! Awetja ömöayo̧ teachibinökweja ökwöma. ¿Dakwö yöka̧la, ötjö yötawi̧ a̧ja̧kwadö la'akatjöda wotjökakwedö, jö̧ba̧lö? Da'dömine Abraham wobijetö. Dios yöawi̧ yöbawinadöbi wobijadötö. Jo̧kwaobetjö̧ ¿dakwö yöka̧la, ötjö yötawi̧ a̧ja̧kwadö wotjökakwedö, jö̧ba̧lö?

Isaías 50:4

Chuluwo̧ Isabenö Jo̧ Diosma ötjönö öba̧ja̧dajabe, iteda waisanö yöa̧li̧ yöta̧lobö, me'dawachibadönö tjujuluwachibanö yöta̧lakwa̧ chöwaisakobetjö̧. Ötjönö ba̧ja̧dö, yȩayikwena ötjönö wiludö, ö̧ba̧ja̧di̧ cha̧ja̧kwobö webo̧, waisachadö tjöwaisachi̧danö, Dios öba̧ja̧di̧ jawa a̧ja̧kwö chöwaisachakobetjö̧.

Proverbios 24:10

Jemi ikena jweinö omukwatadö yötjawinama baikwö laebobe, bakwo̧ iteda itji̧nö jwebebö yöawi̧danö: Chitji̧, ökwönö nöinö wene ichena kwo̧'wo̧ kwujuluwobö jo̧be, budekwökwönö. Wene ichena, ayö ötjöwe, jö̧ba̧lö yebabinö tjö̧bawöda kwö̧jitjö̧ma ¿dakwö pjaatobeda? Pjaatokobe, ja̧danö kwujuluma jwiköbena yebabinö tjö̧bawö̧da kwö̧jitjö̧ma. Kwujuluwo chitji̧.

Juan 8:59

Jejenö yöawiawö̧ jwiinö tjölabinobe judío jojodöma Jesúsnöma. Jwiinö tjölabobetjö̧ inawiya emibö tjikwawo jö̧tja̧lijayonö, Jesúsma ju̧kwawibö laebinobe Dios ejutjöma.

Juan 8:13

Jejenö yöawiawö̧ fariseo jojodöma: —¿Dakwö yöka̧la ökwödada jejenöma? Omöna yöka̧lena. Bakwo̧ itedada otiwanö yöa̧li̧ma mikwawökö. Jelo̧bi jo̧banö bakwainö yöa̧lobö jo̧be— jö̧tja̧liökwe:

Juan 7:12

Ja̧danö, jojodöma Jesús yöawina, ja̧danö, jo̧ba otidina nöinö yötja̧lakwawinobe. Bakwainö omukwatökönö yötja̧lakwainobe, ju'wedöma, Jo̧bama otiwanö jo̧, jö̧ba̧lö, ja̧danö, Otiwanö jö̧kö̧, jojodönö jelobekwö öbibo̧, jö̧ba̧lö.

Lucas 16:14

Jejenö yöa̧liawö̧, fariseo jojodöma a̧ja̧kwö Jesúsnö otjinobe, Bitema wajwibö yöbawo̧, jö̧ba̧lö. Jobadö fariseo jojodöma nöinö balada tjösödinobe, ja̧danö balada ösödadöma Dios wei̧ ja̧böködö jö̧ba̧lö yöa̧liawö̧, öpöjödö Jesúsnö otjinobe.

Lucas 15:2

Jejenö a'dewö loiököwö̧, fariseo jojodöbi Moisés iwȩyudina ba̧ja̧dadöbi tjo̧'wo̧ sulinö yötja̧lakwawinobe Jesúsnö: —Bite Jesúsma sulabedö tjichobö ösödo̧, ja̧danö ju'wibi jobadökwö sulabenö kwo̧— jö̧ba̧lö, Jesúsnö öpöjödö yötja̧lakwawinobe.

Lucas 5:21

Jejenö yöa̧li̧ a̧ja̧kwö, fariseo jojodöbi, Moisés iwȩyudina ba̧ja̧dadöbi tjomukwatinobe idödada: —Bite Jesúsma sulabenö yöba̧lo̧ Diosnö, Diosda jojodö tjo̧'wo̧ luwo̧nö tjusula söbebö lobo̧jayonö, kwusula söbebö lotakwö jö̧a̧lajabe. Jesúsma ötjödasa Dios jö̧ba̧lö ¿omukwatenaji̧? Isabenö Diosnö sulabenö yöba̧lo̧, bite Jesúsma— jö̧ba̧lö tjomukwatinobe.

Lucas 2:34

Jemi ikenama Simeonma Diosnö aebinobe, jobadönö pjaatobö, ja̧danö tjemu ojo'do Maríanö yöawinobe baikwö: —Bite tjemuma Dios 'da̧batö ujuninökwe, Israel jojodötjö ba̧jekwadö jo̧banö öpöjödö mebö metjakobetjö̧, ja̧danö ju'wedö jo̧banö ösödö tjo̧'wo̧ ösöwachibakobetjö̧. Jojodönö i̧sebotö jö̧ba̧lö Dios weinökwe bitema, jo̧kwaijayonö ba̧jekwadö jo̧banö tjöpöjödakobe.

Mateo 22:15

Ikenama, fariseo jojodötjö ju'wedö ko̧ko̧kwö tjomukwatinobe Jesúsnö abebö tja̧ja̧kwakwa̧ma. Jobadöma Jesús sulabenö atadibobö tjisakwinobe.

Mateo 21:46

Jo̧kwajabetjö̧ Jesúsnö öpöjödö jo̧banö do̧tjatobö tjösödinobe, jo̧kwaijayonö jojodö Jesúsnö, Dios yöawi̧ yöbawo̧, jö̧ba̧lö Jesúsnö tjösödiawö̧, jojodönö yebabinö Jesúsnö do̧tjatinokobe.

Mateo 21:23

Jesúsma yemidanö Dios eju a̧petusȩko̧ okwa tebachö, jojodönö öba̧ja̧dinobe. Ja̧danö jejenö öba̧ja̧donö, ö'weje pjabatadö la'aka tjuluwedöbi, damöbi Jesús ö̧jobekwö ichö abebö tja̧ja̧kwinobe: —Ja̧köbi̧ma, ¿ti weinadaja̧ ja̧köbobö? ¿Ti ökwönö ujuninada, luwo̧ baibanö jejenö ja̧köbobö?— jö̧ba̧lö.

Mateo 15:2

—Kwöba̧ja̧di̧ waisachadöma, ¿tajawedö da'dödömine wetjinadanöma ja̧böködöda? Da'dödöminema, dukwakwa̧ abönö otiwanö dömamiju didichawobö wetjinobe, jo̧kwaijayonö ja̧ tjidichawobö wetjinadanöma dichawöködö kwöba̧ja̧di̧ waisachadöma, tjukwakwa̧ abönöma— jö̧ba̧lö abebö tja̧ja̧kwökwe,

Mateo 12:24

Jo̧kwaijayonö fariseo jojodö ja̧ wene tja̧ja̧kwenama, jobadöma yötja̧linobe: —Jesúsma tjo̧'wo̧ luwo̧nö sulabedö la'aka tjuluwo̧ Awetja ujulunöda tjo̧'wo̧ luwo̧nö sulabedö ja̧dönö a'dewö lobo̧— jö̧ba̧lö.

Mateo 11:19

Ja̧danö ötjö jojo baibanö jeminökwe chichenama, pjiesta kwanö, ja̧danö ubasobu o̧'dobu owö chichijatö, ja̧danö ötjöma Juan ja̧bö ö̧jinatjö wainö ja̧bö chö̧jijayonö, ötjönöbi öpöjödö wanedö yötja̧lobe, yelösöda nöinö kwo̧, 'dukwachökwe, sulabedö luwedö tjitea balada emadöbi, ju'wedö sulabenö ja̧badöbi tjömöledöso̧, jö̧ba̧lö ötjönö öpöjödö yötja̧lobe. Jo̧kwaijayonö jobadö tjöpöjödijayonö, Juan ja̧bö ö̧jinabi, ja̧danö ötjö ja̧bö chö̧ji̧bi öwaetjöda i̧sebobe, isabenö waisanö omukwatö ja̧badösa jö̧ba̧lö— jö̧ba̧lö yöawinobe Jesúsma.

Juan 9:40

Ja̧ yöawi̧ma fariseo jojodöbi tja̧ja̧kwinobe. Jo̧kwaobetjö̧ Jesúsnö abebö tja̧ja̧kwinobe: —Ja̧ yökawi̧ma, Ökwödönöbi kwöbajaleduwi tjewawawö̧ja, jö̧ba̧lö, ¿yökawobeji̧?— abebö tja̧ja̧kwökwe:

Juan 10:20

Jojodötjö ju'wedö ba̧jekwadöma: —Bitema Awetja ömöayo̧ teachibinökwe. Yelösöda o̧'wo̧ jwibo̧. Da̧ja̧kwökökwe— jö̧tja̧linobe.

1 Pedro 2:23

Jo̧banö sulabenö yötja̧lenama, balekwa mikwa sulabenöma atadinokobe, ja̧danö usula emawenama, usula emawinö ja̧badönö yebeabinöma yöa̧linokobe. Jau chömöledö, Cristoma jwaikwöda Diosnö, inesö jojodö ja̧tji̧ otiwojobö sulojobö jö̧ba̧lö yöbawo̧nö o̧'wo̧ wana̧lö ite'ada̧linobe, jo̧bada bajaliyanö yöawakwo̧ jö̧ba̧lö. Ökwödöbi jo̧ba omukwatinadanö kwomukwataduwo chömöledö, ja̧danö usula kwemawaduwenabi jwaikwöda otiwanö ja̧bö kwöbaledaduwo, Cristo ökwödönö i̧sebinadanö.