Génesis 48:4 - Dios Iwene

⁴ baikwö yöa̧lijatö: —Jacob, a̧ja̧kwitjö. Ökwönö pjatatakwo̧sa ba̧jekwadönö 'yakebobö, ja̧danö ökwötjö tupadanö jojodö tjöba̧jekwachobö. Ja̧danö, jobadöma, ökwötjö tupadanö jojodöma tjöba̧jekwachobetjö idödada webawö tjuju̧kwakwedö. Ju'wedö tjitebonö tjuju̧kwökakobe, idödada tjitebokwenia jelobebi, jelobe tjuju̧kwakwedö. Ja̧danö, bemida, Canaán niji chiyakwo̧sa jobadönöma, ba̧kwȩlö̧jatebö tjitebo baibanö— jö̧ba̧lö yöawijatö Juluwo̧ Diosma ötjönöma. Jejenö yöbawijetö Jacobma itji̧ Josénöma.

Génesis 48:4 Referans Kwoze

Génesis 17:8

Abraham, bemi niji Canaán mikwemi, jelobetjö ichinadö kwö̧jaduwemima ökwönö, ökwötjö tupadanö jojodönöbi chiyakwo̧sa, ba̧kwȩlö̧jatebö ökwödö kwiteboduwi baibanö. Jao Abraham, ökwötjö tupadanö jojodöbi Tjuluwo̧ Dioschakwo̧sa — yöbawijetö Diosma Abrahamnöma.

Génesis 35:11

Ina jö̧ba̧lijetö: —Ötjöma Jwiinö Juluwo̧ Diossa. Ökwönö pjatatakwo̧sa ökwötjö tupadanö jojodö böjȩ ba̧kwemeachibanö tjöba̧jekwachinö. Tjöba̧jekwachobetjö̧ idödada webawö tjuju̧kwakwedö, tjitebokwena jelobebi, jelobe. Ja̧danö, ökwötjö tupadanö jojodötjöma la'aka luwedö tjö̧jakobe.

Deuteronomio 32:8

Jau chömöledö, okobe deinö la'aka luwedötjö inesö La'aka Luwo̧ Diosma jojodönö 'da̧batö ujuninobe, tjitebokwena jojodö batjibanö, ja̧danö tjitebo bakwachobekwena omukwatö ujuninobe. Jau, teada̧ladö angeledö tjö̧ba̧jekwi̧danö, tjitebokwena jojodönö 'da̧'yö ujuninobe.

Éxodo 1:7

Jo̧kwaijayonö jobadö Israeltjö tupadanö jojodöma tji̧tji̧munö yebawö, yebawö nöinö yebawijadötö, jwaikwöda ba̧jekwachadö, ja̧danö juluwadö batjibinö. Jobadöma okobe jwiinö Egipto nijinö ju̧kwijadötö jwiinö tjöba̧jekwachobetjö̧.

Génesis 47:27

Ja̧danö, Jacob ömöledö, Israel jojodö mikwadöma lekwe Egiptonö ju̧kwijadötö, Gosén nijinö. Jobadöma idöda tju̧kwa tjuju̧kwemima emijadötö. Jobe ja̧nö tji̧tji̧munö ba̧jekwadö 'yabebö ju̧kwijadötö.

Génesis 46:3

Ikenama Diosma yöbawijetö: —Ötjöma Diossa, kwabe'do Isaac uluwo̧ Diossa. Yebabökönö 'ya̧wi Egiptobe, jobeda kwö̧jo. Jobetjöda ökwötjö tupadanö jojodönöma pjatatakwo̧sa tjö̧ba̧jekwachobö. Jo̧kwaobetjö̧ yekabi, Egiptobe 'ya̧wi̧.

Génesis 32:12

Dios, ötjönö jö̧ka̧lina omukwati̧, Kwi̧'yobema pjatatakwo̧sa, jö̧ba̧lö, jö̧ka̧linama. Ja̧danö, jö̧ka̧linama omukwati, ökwötjö tupadanö jojodöma so̧bi̧ya̧pu̧ i̧so̧pja̧danö tjöba̧jekwachinö pjatatakwo̧sa, jö̧ba̧lö. Jejenö ötjönö kwiwene yöbawö junö jö̧ka̧linobetjö̧ atebakwö: ¡Pjabatitjö!— abebijetö Jacobma Diosnöma.

Génesis 28:3

Ikenama Isaacma Jacobnö Dios dösölö̧jinö pjaatakwa̧ jawa yöba̧lö junijetö: —Jwiinö Juluwo̧ Diosma kwi̧tji̧munö ba̧jekwadö 'yakebobö, ja̧danö ökwötjö tupadanö jojodöma tjöba̧jekwachobö dösölö̧jinö edö pjaatakobe. Jejenö ökwötjö tupadanö jojodöma ba̧jekwadö tjuju̧kwakwedö tjitebokwenia.

Génesis 26:4

Isaac, ökwötjö tupadanö jojodöma si̧li̧'i̧dö tjöba̧jekwi̧danö tjöba̧jekwachobö dösölö̧jinö edö pjatatakwo̧sa. Ja̧danö, jobadönö chiyocha okobe jwiinö bemi nijima. Jau, ökwötjö tupadanö jojodönöma dösölö̧jinö edö pjatatakwo̧sa. Ja̧danö, jobadönö dösölö̧jinö edö pjatatobetjö̧ okobe deinö böjȩnö ju̧kwadönö, bakwasokwenanöma dösölö̧jinö edö pjatatakwawö̧ tjuju̧kwakwedö.

Génesis 22:17

Abraham, isabenö ökwönö dösölö̧jinö edö pjatatakwo̧sa. Ja̧danö, ökwötjö tupadanö jojodönö mölejȩbe tjö̧jadö si̧li̧'i̧dödanö, so̧bi̧ya̧pu̧ so̧pja̧danö tjöba̧jekwachinö pjatatakwo̧sa, Abraham. Ja̧danö, ökwötjö tupadanö jojodö tjöpöjojodönöma tjujuluwobö pjatatakwo̧sa.

Génesis 17:13

Okobe deinö tjemu ömadönö 'wibebö loköbaduwobö jo̧be. Ja̧ 'wibekwö loköbaduwi̧ma ökwödö kwitebiyaduwinö baikwö i̧sebakobe: Ökwödöma, ja̧danö ökwödötjö tupadanö jojodöma ötjö Dios omudawö chujunajawö̧ja. Ja̧danö i̧sebakobe, Ötjö Dios pjatatakwa̧ yöbawö chujunina chiwenedanö isabenö pjatatakwo̧sa, ökwönöbi, ökwötjö tupadanö jojodönöbi, ba̧kwelö̧jatebö.

Génesis 12:2

Ina jö̧ba̧lijetö Isabenö Jo̧ Diosma Abramnöma: —Abram, ökwötjö tupadanö jojodönöma, tjitebonö ba̧jekwachö juluwadö batjibobö dösölö̧jinö edö pjatatakwo̧sa. Ja̧danö Abram, ökwönö otiwanö kwö̧jobö dösölö̧jinö edö pjatatakwo̧sa. Jejenö pjatatobetjö̧ okobe deinö bö̧jenö ju̧kwadöma jojodö yötjawi̧ a̧ja̧kwö tjöwaisachibakwedö, Abramma Dios dösölö̧jinö edö pjaatökwe, jö̧ba̧lö. Ja̧danö Abram, ökwönö dösölö̧jinö edö pjatatobetjö̧, ökwönödamaö̧kö̧, okobe deinö böjȩnö ju̧kwadönö dösölö̧jinö edö pjatatocha— yöba̧lijetö Isabenö Jo̧ Diosma Abramnöma.

Éxodo 1:11

Jo̧kwaobetjö̧ faraónma, ja̧danö iteda ipjea jojodöma ju'wedö tjömöayedönö wainö junijadötö Israel jojodönö webadö batjibanö, jwiinö juluwanö tjotidobö webadöma. Ja̧danö, Faraón wei̧danö kwakwawa, tea tjujunakwemi comunidades tjotidobö webijadötö Israel jojodönöma. Tjujunakwemi dötölataja comunidades, Pitón mikwemi, Ramesés mikwemi tjotidobö webijadötö.

Génesis 17:6

Jao Abraham, ökwötjö tupadanö jojodönöma tjöba̧jekwachinö pjatatakwo̧sa. Jobadöma jelobebi jelobe tjuju̧kwakwedö, bakwasokwena ju̧kwadö. Jobadötjöma luwedö tjuju̧kwakobe, ökwötjö tupadanö jojodötjöma.