Génesis 40:12 - Dios Iwene

¹² Jejenö yöawiökwe jö̧ba̧lijetö Joséma jo̧banö: —Baikwö yötawa, kwi̧'wi̧dikwaja̧ labebo lobö. Ja̧ wa̧pö'bakwama wa̧pötakwa möle ji̧.

Génesis 40:12 Referans Kwoze

Jueces 7:14

Ja̧danö, ömöledöso̧ atadi̧bi a̧ja̧kwinobe, baikwö: —Ja̧ kwedaja̧ma, baikwö labebö lotakwö, panpja kwedaja̧ma, israel jojo Joas itji̧ Gedeon itea kwölöte'o wanekwachobe, Diosma okobe deinö madianitas jojodönöbi, ju'wedö ölakwabikwawadönöbi ujuluwobö iyajobetjö̧, —jö̧ba̧lö labebö lobö yöawobe a̧ja̧kwinobe Gedeonma.

Génesis 41:12

Ja̧danö, jobe ökwödökwö hebreo jojo möayo̧ ö̧jijatö, ka̧lela ba̧kwaweju okwa ba̧jadönö te'ada̧lakwawa jojo ömöayo̧. Jo̧banö di̧'wi̧dikwaja̧ma yödawijatö. Ikenama jo̧bama labebö lobö yöawijatö ötjö chi̧'wi̧dikwaja̧bi, pan otikwa jojo i̧'wi̧dikwaja̧bi.

Génesis 40:18

Ikenama Joséma jo̧ba i̧'wi̧dikwaja̧ labebö lobö yöbawijetö: —Baikwö yötawa kwi̧'wi̧dikwaja̧ labebö lobö. Lu'dupiya wa̧pöpakwama wa̧pötakwa möle ji̧.

1 Corintios 10:4

Ja̧danö, okobe deinö bakobe Dios iyina ojwiyo tjowinobe, ¿jö̧tö? Jau chömöledö, okobe deinö inawatjö tjowinobe, ja̧danö jawa jobadökwö kweachinawama, Cristodainobe chömöledö.

Mateo 26:26

Kwakwawa tjukwonö, Jesúsma pan emibö, Diosnö aebinobe, otiwanö kwiyajabe jö̧ba̧lö, ikenama 'delawö, iteda öba̧ja̧di̧ waisachadönö iyö, wanedö yöawinobe baikwö: —Bipja̧ma ötjö chiteba'o. Emö kwaduwi— jö̧ba̧lö.

Génesis 40:11

Ikenama chuluwo̧ faraón u̧kwa dȩja̧'do̧ bakwamunö do̧batö jelemunö uba sacho 'yutatobekwö dȩja̧'do̧nö. Ikenama jejenö 'yubatajo dȩja̧'do̧ma chuluwo̧ faraónnö chiyobekwö chi̧'wi̧dikwatö— yöbawijetö.

Génesis 40:13

Ja̧danö, wa̧pötakwa möle baibena kwuluwo̧ faraónma ökwönö latjebobö weakobe, ajayi kwotidinadanö kwotidobö. Jo̧kwaobetjö̧, kwuluwo̧ faraón u̧kwa dȩja̧'do̧ owobö kwiyakobe, ajayi owa'do̧ kwiyinadanö.

Daniel 4:18

Ötjö inesö la'aka luwo̧ Nabucodonosorma jobekwö chi̧'wi̧dinö chedina yötawakwö Beltsasar, ja̧danö labebö loköbobö atebakwö. Jau Beltsasar, okobe deinö ju'wedö chömöayedö waisanö omukwatadöma, labebö lobö yötjawobö jwibadö, jo̧kwaijayonö jobadö yötjawobö jwitjijayonö, chöwaisa ökwönö Beltsasar, isabenö yökawobö jo̧be jö̧ba̧lö. Jau Beltsasar, chöwaisa, isabenö diosbedö tjo̧'wo̧ luwo̧ tjö̧jökweja, ja̧danö isabenö yökawobö jo̧be— jö̧ba̧lö yöawinobe Nabucodonosorma Danielnö.

Génesis 41:28

Ina yöbawijetö: —Chuluwo̧, ötjö yöta̧laja̧danö isabenö baledakobe. Diosma ökwönö i̧sebajabe baledakwa̧ma.