Génesis 21:17 - Dios Iwene

¹⁷ Ja̧danö, Diosma Agar jitji̧ ubudekwi̧ a̧ja̧kwö mölejebetjö webijetö ángelnöma. Jo̧ba Dios weajökwe ángelma jwöbijetö Agarnö: —Agar ¿taji waekwaja̧da? Yebabökönuwi. Diosma kwitji̧ ubudekwi̧ a̧ja̧kwajabe.

Génesis 21:17 Referans Kwoze

Génesis 16:11

Yötawakwö. Ökwöma metu'wo jujuja. Ja̧danö, kwitji̧nö kwemakwujuja, Ismael, jö̧ba̧lö kwimidakwo̧nöma. Agar, Isabenö Jo̧ Diosma usula emawö kwubudekwi̧ a̧ja̧kwobetjö̧ jejenö kwimidakobe kwitji̧nö, Ismael jö̧ba̧lö.

Éxodo 3:7

Ikenama Isabenö Jo̧ma jö̧ba̧lijetö: —Isabenö chedobe ötjö chömöledönö, Egiptonö ju̧kwadönö juluwanö tjotidobö wetjobema, jwiinö inia tjötjinö. Ja̧danö, tjuluwedötjö tjö̧jibinö pjatatobö jwötjeba̧li̧ma cha̧ja̧kwobe. Chöwaisa, jwiinö usula tjemawobe, jö̧ba̧lö.

Marcos 5:36

Ja̧danö, Jesúsma, jobadö yötjawi̧ a̧ja̧kwö jö̧ba̧lijetö Jaironö: —Jairo, kwo̧'wo̧ tjo̧kekwa. Ötjönöda kwo̧'wo̧ wana̧litjö—jö̧ba̧lijetö.

Mateo 15:32

Ikenama Jesúsma iteda öba̧ja̧di̧ waisachadönö jwöinobe, ja̧danö jobadönö yöa̧linobe: —Bidö jojodönö cho̧'wo̧ tjo̧achobe, ida̧ökö wa̧pötakwa möle baledibanö ötjökwö tjö̧jajabe, ja̧danö kwakwawa tjukwoböma jwibadö. Tjȩwa̧jobö wetoböma chöpöjöda, tjȩwa̧jemi ja'ö a̧wi̧chi̧tjö 'dö̧bachibö metjapji jö̧ba̧lö— yöa̧linobe.

Isaías 41:10

Yekabiduwoko ökwödö israel jojodö, ötjöda ökwödökwö jo̧chobetjö̧, ja̧danö kwo̧'wo tjo̧bekwö kwö̧jaduwoko, ötjöda kwösödaduwökwe Dioschobetjö̧. Jau, ötjöda kwujuluwaduwachibanö pjatatakwo̧sa, meköbaduwapji jö̧ba̧lö, ötjöda chömamu juluwamu chöwaisobekwöchobesamunö do̧balö pjatatakwo̧sa.

Isaías 22:1

Baikwö laebobe Dios yöawi̧, Jerusalen comunidad, tji̧'wi̧didanö baledakwa̧ edawemi wabeko jö̧ba̧lö ötjabemi baledakwa̧ jawa: —Ökwödö Jerusalennö ju̧kwadö, tajawedö okobe deinö kwejuduwi mö kwönöchaduwaja̧daja?

2 Reyes 13:23

Jo̧kwaijayonö, Isabenö Jo̧ma lȩlöjinö edinobe Israel jojodönö, ja̧danö lȩlöjinö edö, otiwanö pjaatinobe. Ajayinö Abrahamnöbi, Isaacnöbi, Jacobnöbi yöbawö ujunina wene omukwatö, öba a'otjö israel jojodö sulabenö ja̧bö tjö̧jijayonö, jobadönö bakobe söbebö loobö öpöjödinobe Isabenö Jo̧ma, ja̧danö babe mölebi baibanö, ina öba a'otjö a'dewö lobö̧kö̧ israel jojodönö.

2 Reyes 13:4

Jobekwö nöinö balediökwe, bajaliyanö Isabenö Jo̧nö aebinobe Joacazma, lȩlöjinö edobö, ja̧danö aebiökwe, a̧ja̧kwö pjaatinobe Isabenö Jo̧ma. Jau, Isabenö Jo̧ma edö öwaisinobe israel jojodö usula tjemawi̧ma, —Siria luwedöma labinö israel jojodönö usula tjemawinö webadötö, —jö̧ba̧lö.

1 Samuel 11:5

Jejene baledonö, Saulma pa̧ka̧yadökwö batjo sobö otidinobe, ja̧danö batjotjö ȩwa̧jenama, jojodö tjubudekwi̧ a̧ja̧kwinobe. A̧ja̧kwö, Saulma abebö a̧ja̧kwinobe, —Taji waekwa, jojodö tajawedö tjubudekwobeda? —jö̧ba̧lö. Abebö a̧ja̧kwawö Jabes jojodö yötjawaja̧ yötjawinobe Saulnö.

Jueces 18:23

Ja̧danö yö̧ne ichibö, jwötjeba̧linobe Dansaso jojodönö, ja̧danö jwötjeba̧liawö̧, Dansaso jojodöma jalachibö abebö tja̧ja̧kwinobe Micaiasnö, —Taji waekwa? Tajawedö ba̧jȩkwadökwö dökömanö lukibaduwaja̧da? —jö̧ba̧lö.

Éxodo 22:27

Jo̧bama jeledo̧ yö̧te abawado̧ma jwiiökwe ¿tajinö jwaekwobö yö̧te tiyuwenama? Ja̧danö, ötjönö jwöeba̧litjö̧ma, pjabatitjö, jö̧ba̧lö, a̧ja̧kwö pjatatakwo̧sa, lȩlö̧jinö edo̧sachobetjö̧— webijetö Isabenö Jo̧ma Moisesnö weawa wene ujunobö Israel jojodönö.

Éxodo 22:23

Yötawaduwakwö: Jobadönö usula tjemawinö weköbaduwitjö̧ma, jobadö ötjönö jwötjeba̧li̧ a̧ja̧kwö pjatatakwo̧sa.

Éxodo 14:13

Jejenö jwötjeba̧lökwe: —Chömöledö yekabiduwa. Kwo̧'woduwi 'dibachibö ja̧duwi. Makö kwedaduwakwedöja Isabenö Jo̧ ökwödö kwö̧jibaduwinö pjaati̧ma. Ja̧danö, kwö̧jibaduwinö pjaatobetjö̧ idö Egipto jojodö ichadö, babe kwedaduwawö̧nöma yemidanöma kwedaduwökakwawö̧.

Génesis 46:3

Ikenama Diosma yöbawijetö: —Ötjöma Diossa, kwabe'do Isaac uluwo̧ Diossa. Yebabökönö 'ya̧wi Egiptobe, jobeda kwö̧jo. Jobetjöda ökwötjö tupadanö jojodönöma pjatatakwo̧sa tjö̧ba̧jekwachobö. Jo̧kwaobetjö̧ yekabi, Egiptobe 'ya̧wi̧.

Génesis 16:9

Ikenama Isabenö Jo̧ Diosma, ángeldanö ichejekwö öwawachajo̧ma Agarnö webijetö: —Kwuluwuju jö̧jobekwö tjebachaji, Agar. Okobe jwiinö weji̧ma kwa̧ja̧kwo— webijetö.

Génesis 15:1

Jemi ikenama Isabenö Jo̧ Diosma Abramnö i̧sebijetö, i̧'wi̧didanö. Ja̧danö, Abramma Isabenö Jo̧ Dios yöawobe a̧ja̧kwijetö, baikwö yöawi̧ma: —Abram yekabi. Ötjöma ökwönö tjöbeba̧lo̧sa, sulabe baledokobö. Ja̧danö Abram, ötjöma ökwönö jwiinö mikwawinö chiyakwo̧sa— yöbawijetö.

Génesis 16:7

Döbibajaju jojodö deena, ojwese'do jobekwö 'yi̧jotö, Shur comunidadbe 'ya̧kwawa mana ö'öbö je'donö. Ja̧danö, jobe jö̧jobe, Isabenö Jo̧ Dios ángeldanö ichejekwö öwawachajo̧ma ichö badekwajijetö jobujunö.

Génesis 22:11

Jo̧kwaijayonö Isabenö Jo̧ Dios weajökwe ángelma jwöbijetö Abrahamnöma: —Abraham, Abraham— jwöökwe: —Chuluwo̧, yöba̧li cha̧ja̧kwo— atadijetö.

Génesis 24:7

Chömöayo̧, jobe chitebotjö, chabe'do ejutjö latebobö weinobe Isabenö Jo̧ Diosma, Mölejebȩ Jo̧ Diosma ötjönöma. Jelobekwö, iteda i̧sebakwemi chi̧'yobö weinobe, bemida. Ja̧danö, Isabenö Jo̧ Diosma iteda iwene yöbawö ujuninobe ötjönöma, ökwötjö tupadanö jojodönö bemi nijima chiyocha, jö̧ba̧lö. Jo̧bama, ötjö yöta̧li̧danö isabenö badekwachakobe, jö̧ba̧lö yöbawö ujuninobe ötjönöma. Chömöayo̧, jo̧bada, Isabenö Jo̧ Diosma, Mölejȩbe Jo̧ Diosma ángelso̧nö weakobe ökwönö pjaatakwo̧nö. Jo̧ba ángelso̧, Isabenö Jo̧ Dios weinökwema chömöledö tjuju̧kwobetjö chitji̧ ilekwo bajibakwujunö badekwajö kwichejebobö pjaatakobe ökwönöma.

Génesis 26:24

Ichibaja̧ yöte Isabenö Jo̧ Diosma öwawachijetö Isaacnö. Öwawachö yöbawijetö: —Isaac, ötjöma kwabe'do Abraham Uluwo̧ Diossa. Yebabökönuwi, ökwökwö chö̧jobetjö̧. Ja̧danö, dösölö̧jinö edö pjatatakwo̧sa. Isaac, ökwötjö tupadanö jojodöma tjöba̧jekwachinö pjatatakwo̧sa. Chömöayo̧ Abrahamnö chiwene yöbawö chujuninadanö dösölö̧jinö edö pjatatakwo̧sa ökwönöma— yöbawijetö Isabenö Jo̧ Diosma Isaacnöma.

Éxodo 3:2

Ja̧danö, baikwö baledijetö: Isabenö Jo̧ma ángeldanö ichejekwo̧ öwawachijetö Moisésnö, ösötje okwatjö ökwöla ubi̧danö ubinö. Moisésma jötje edinö ¡ayö! ötjema ubijayonö ubö lokötjeda ja̧, jö̧ba̧lö eda̧lijetö.

Deuteronomio 26:7

Ikenama, jejenö ja̧tjiawö̧, Isabenö Jo̧, da'dödö tjuluwo̧ Diosnö dubudekwijatö, ja̧danö dubudekwiökwe dubudekwi̧ a̧ja̧kwinobe, ja̧danö usula demawi̧bi, labinö otidö dö̧ji̧bi, ju'wi Egipto jojodö sulabenö ökwödönö ja̧tji̧bi edinobe Isabenö Jo̧ma.

Génesis 16:8

Jo̧ba ángeldanö ichejekwö öwawachajo̧, Isabenö Jo̧ Diosma abebö a̧ja̧kwijetö Agarnöma: —Agar, Sarai jömöayujuma ¿detjö kwichaja̧da? Ja̧danö ¿dai kwi̧'ya?— abebö a̧ja̧kwijetö jobujunöma. Jejenö abebö a̧ja̧kwoko atadijotö: —Chuluwuju jö̧jelö dötibaja— atadijotö Agarma.