Gálatas 5:24 - Dios Iwene

²⁴ Baikwö yötawa chömöledö: Cristo Jesús ömöledöma ajayinö tjösödina kabatibö, tjiteba'o wame luwo̧nöbi, jo̧ba sulabenö ösödi̧bi, towisa'onö bȩtjinobe ichejekwa, ö'wöchinö ja̧bö.

Gálatas 5:24 Referans Kwoze

Romanos 6:6

Tupakwö yötawaduwakwö chömöledö: Ökwödö do̧'wo̧ luwo̧ ajayi luwo̧ma woinobe, bakobe Cristokwö towisa'onö ja̧nö. Ja̧danö, ajayi luwo̧ do̧'wo̧ luwo̧ma woinobe, jemi tupakwö sulabe dujuna̧li̧ ökwödönö juluwökönö.

Romanos 13:14

Wainö ja̧bö kwö̧jaduwo chömöledö. Baikwö wanedö yötawa: Duluwo̧ Jesucristo jawa 'dukawaduwo chömöledö, ja̧danö Dios ösödi̧ jawada ja̧köbaduwobö kwisakwaduwo. Ja̧danö, sulabenö dösödi̧ jawama, böjȩ jojodö sulabenö dösödi̧ jawa ja̧köbaduwoböma kwisakwaduwoko chömöledö.

Romanos 8:13

Jau chömöledö, suli̧ ömöayedödanö ju̧kwadöma, wotjakwedö chömöledö. Jo̧kwaijayonö, Dios O̧'wo̧ Luwo̧ ömöayedödanö ju̧kwadöma, wotjökakwedö. Jobadöma, Dios O̧'wo̧ Luwo̧ pjaatobetjö̧, sulabe tjösödi̧ma kabatibadö. Ja̧danö sulabe tjösödi̧ kabatibö, sulabenö tjösödi̧ma kwabö lotjobedanö jo̧be, sulabe tjösödi̧ jawa katjatibobetjö̧. Ja̧danö, jobadöma ba̧kwȩlöjateböda tjuju̧kwakwedö.

Romanos 8:9

Jo̧kwaijayonö, jejenöböködöja ökwödöma. Ökwödöma suli̧ ömöayedödanöböködöja, Dios O̧'wo̧ Luwo̧ ömöayedödanöbedöja, kwo̧'wo̧ luwo̧duwinö ö̧jobetjö̧. Jau chömöledö, Dios O̧'wo̧ Luwo̧ma, okobe deinö Cristo ömöledö tjo̧'wo̧ luwo̧nö jo̧ chömöledö. Ja̧danö, Dios O̧'wo̧ Luwo̧ma bakwo̧ o̧'wo̧ luwo̧nö deitjö̧ma, Cristo ömöledöso̧bö̧kö̧ jo̧bama.

Gálatas 6:14

Jo̧kwaijayonö ötjöma sule bakwöta jawada yöbawo̧sa, biya̧da otiwa, jö̧ba̧lö. Sule Duluwo̧ Jesucristo towisa'onö midawö woina weneda jejenö yöta̧lobe chömöledö, Biya̧ weneda jwiinö otiwa, jö̧ba̧lö. Ja̧danö, wanedö yötawa: Jesúsma towisa'onö midawö woinobetjö̧, ötjöma böjȩ jawa katatibinobedanö ichejekwa, ja̧danö balekwa mikwa böjȩ jawama ötjönö kaatibinobedanö ichejekwa.

1 Pedro 2:11

Chösödawö̧ chömöledö, ökwödöma isabenö kwiteboduwi mölejȩbetjö ödö ja̧nö, lekwema böjȩnö jö̧ködöja. Jo̧kwajabetjö̧ ökwödönö budekwödanö atebaduwakwö, böjȩ jojodö sulabenö tjösödi̧ jawa ja̧bökönö kwö̧jaduwobö. Ja̧ sulabenö kwösödaduwi̧ jawama baikwö wanedö yötawa, kwo̧'wo̧ luwo̧duwinö ölakwabikwawobedanö ichejekwa, jo̧kwaijayonö ja̧ jawa ja̧bökönö kwö̧jaduwo.

1 Corintios 3:23

Ja̧danö ökwödöma Cristo ömöledöbedöja chömöledö, ja̧danö, Cristoma Dios ömöledöso̧ chömöledö.

2 Corintios 10:7

Chömöledö, Cristo ömöayo̧ chö̧ji̧ma isabenö öwawobe, kwöwaisaduwobö, ¿jö̧tö? Jejenö öwaetjöda öwawijayonö, ökwödötjö jelo̧ omukwatena, Aaa, Pabloma Cristo ömöayo̧bö̧kö̧, ötjödasa Cristo ömöayo̧ma jö̧ba̧lö. Jejenö omukwatoböma jwia chömöledö, ötjö Pablobi isabenö Cristo ömöayo̧sa, ja̧danö Cristo ömöayo̧sa jö̧ba̧lö omukwato̧ma, ötjönöbi jweinö omukwatobö jo̧be, isabenö Pablobi Cristo ömöayo̧ jö̧ba̧lö.

Gálatas 3:29

Ja̧danö Cristobedö kwö̧jaduwitjö̧ma, Abraham i̧tji̧mu tupadanö jojodöbedöja, ja̧danö Dios chiyocha jö̧a̧linama kwemaduwakwedöja.

1 Corintios 15:23

Jo̧kwaijayonö, okobe deinö bakwo̧nökwena tjetjachajo jö̧tja̧lenada tjetjachajakwedö chömöledö. Cristoma abönö tjeachajinobe, ja̧danö jo̧ba yemidanö ichenama, jo̧ba ömöledöbi 'yabibajö tjetjachajakwedö chömöledö.

Gálatas 5:20

ja̧danö o̧'wo̧ jawa ösödakwawabi, ja̧danö mea boawabi, ja̧danö jojodö tjöpöjojodö ja̧nö ölakwabikwawabi, ö'wiabinö edawabi, dameakwa̧lakwawabi, a̧'dȩlakwawabi, ja̧danö wainökwena 'da̧bachibö ju'wedö ju'wedökwö jwöjwöakwawabi,

1 Corintios 6:13

Ja̧danö ju'wedö yötja̧lena, Aaa, kwakwawama dukwobö jo̧be, ja̧danö dukwa'woma, kwakwawa'woda jo̧be jö̧ba̧lö. Jau chömöledö, jejenö jo̧be, ja̧danö kwakwawabi, dukwa'wobi söbebö loakwo̧ Diosma. Jo̧kwaijayonö diteba'oma söbebö loökakwo̧ Diosma chömöledö. Duluwo̧ Jesús iteba'o woawatjö tjeachajinö ja̧inadanö, ökwödö diteba'obi woawatjö tjeachajinö ja̧akwo̧ Diosma iteda ujulunö. Ja̧danö, jejenöobetjö̧, omukwatökönaduwi, Aaa, putasujunö ja̧titjö̧ma chiteba'o jawadaobetjö̧ sulökena jö̧ba̧lö. Jau chömöledö, diteba'oma putabedönö ja̧do jö̧ba̧lö jö̧ka'o, Duluwo̧ ösödi̧danö ja̧do jö̧ba̧lö ja̧'o chömöledö, ja̧danö Duluwo̧ma diteba'o ite'ada̧lobe.

Gálatas 2:20

Jau chömöledö, Cristokwö bakobe towisa'onö la̧nö wotinajayonö, 'yaba̧lo̧ chö̧jobe. Jo̧kwaijayonö, babe chö̧ji̧ma, ötjöma ida̧ökö wotinobetjö̧ babe chö̧ji̧ma ötjö chö̧ji̧maökö chömöledö, Cristo ö̧ji̧da. Ja̧danö, babe chiteba'onö chö̧ji̧ma, Dios itji̧nö ösödö, ötjönö ile nibebö midawö wobinanö ösödö chö̧jobe.

Gálatas 3:26

Jau chömöledö, Cristo Jesúskwö bakobe dötewinö ja̧nö, okobe deinö Dios i̧tji̧mubedöja, Jesúsnö kwösödaduwobetjö̧.

Gálatas 3:28

Jo̧kwajabetjö̧, judío jojodöbi, judío jojodöböködöbi bakwayedöda babema, ja̧danö jojodö tjömöayedöbi, tjömöayedöböködöbi bakwayedöda babema, ja̧danö ömadöbi ya̧döbi bakwayedöda babema. Jau chömöledö, okobe deinö Cristo Jesúskwö bakobe dötewadö ja̧nö, bakwo̧dabedöja.

Efesios 3:1

Diosma jejenö ökwödö judío jojodöböködönö otiwanö pjaatinobetjö̧ ökwödönö omukwatö atebobe jo̧banöma. Chömöledö, ötjöma Cristo Jesús webawo̧sa iteda weina yötawobö. Ja̧danö, ökwödönö yötawobö weina yötawobetjö̧ ka̧lena ba̧kwaweju okwa tjödinökwesa.

Efesios 3:6

Biya̧ wene labebö loinobe chömöledö: Ökwödö judío jojodöböködöma, Jesús jawa otiwa jawa wene a̧ja̧kwö kwösödinaduwobetjö̧ judío jojodö Jesúsnö ösödadökwö bakwaso jojodödanö babibinadöja. Ja̧danö, bakwaso jojodödanö bakibinaduwobetjö̧ ökwödöbi Dios otiwa jawa iyakwa̧tjö kwemaduwakwedöja. Ja̧danö, Jesús iteba'obedödanö babibinadöja, judío jojodö Jesúsnö ösödadökwö, tjiteba'o bakwa'odanö. Ja̧danö, tjiteba'o bakwa'o bakibinaduwobetjö̧ ökwödöbi Dios ajayinö yöbawö ujunina, iteda isabenö iyakwa̧ wene yöbawö ujuninama, kwemaduwakwedöja.

Efesios 3:11

Ja̧danö, Dios ajayinö omukwatö ösödinama tjo̧wi̧ badekwachinö ja̧bijetö Diosma, Duluwo̧ Cristo Jesús midawö ö'wö baibenama.

Colosenses 2:11

Ja̧danö, Cristonö dötewadö kwö̧jaduwobetjö̧, isabenö 'wibekwadöja chömöledö. Ja̧ 'wiekwa yöta̧li̧ma, wame jojodö tjötade bajalesado̧ 'witjekwi̧ma yöta̧lökö chömöledö, ju'wi tjo̧'wo̧ luwo̧ jawa 'wiekwada yötawa, Cristo ja̧i̧da. Cristoma ajayi sulabenö kwösödinaduwa 'wibebö loinobe ichejekwa, ja̧ ujulutjö kwö̧jibaduwinö ja̧bö, jo̧kwajabetjö̧ isabenö 'wibekwadöja chömöledö.