Gálatas 1:7 - Dios Iwene

⁷ Isabenö ju'wi wene otiwa jawa wenema jwiobe chömöledö, ökwödönö yödawina weneda. Jo̧kwaijayonö ju'wedöma ökwödönö suli̧ waedö, Cristo jawa wene otiwa jawa wene balewö lobö yötjawobe.

Gálatas 1:7 Referans Kwoze

Hechos 15:24

Belö da̧ja̧kwijatö dömöledötjö ju'wedöma kwiteboduwi 'ya̧nö, ökwödö judío jojodöböködönö jelobenö yötjawiawö̧ kwo̧'wo̧duwinö tjo̧kekwaduwinobe. Dömöledö, ökwödönö yöda̧la. Jobadöma wainö yötjawinobe. Ökwödöma jobadö wainö yöbawadönö wedijökötö jobekwö tji̧'yoböma. Idödada omukwatö tji̧'yinobe.

Gálatas 5:10

Jo̧kwaijayonö, ötjöma Duluwo̧nö cho̧'wo̧ wana̧lö chö̧jobe chömöledö, isabenö ökwödönö pjaatakwo̧ ötjö chomukwati̧danö ökwödöbi kwomukwataduwo jö̧ba̧lö, ja̧danö ökwödönö suli̧ waedö sulabenö yöbawo̧nö lȩebakwo̧ jö̧ba̧lö.

Gálatas 5:12

Baikwö chomukwatobe ökwödönö suli̧ tjöwaedotö jö̧ba̧lö 'wiekwa weba̧ladönöma chömöledö, jobadöma wainö idödada jwiinö 'witjekwo, tjöla'yapobi 'witjekwo jö̧ba̧lö.

2 Corintios 2:17

Ju'wedö sulabenö yöbawö tjotidi̧danö dotiditjö̧ma, waekwena chömöledö. Jobadö sulabenö yöbawadöma idöda balada tjemotö jö̧ba̧lö yötjawobe chömöledö, jo̧kwaijayonö jejenöma yöbawöködösa ökwödöma. Jau chömöledö, jojodö wetjököwö̧sa, Ökwödöma Diosda weawö̧sa, Cristoda ömöayedösa, ja̧danö jo̧bada öba a'otjö jweinö obökönö yöbawadösa. Ja̧danö chömöledö, jejenö wei̧danö yödawiökwe, Diosma otiwanö pjabato̧, ja̧danö ökwödönötjö böjȩ bakwameachibanö jojodönö pjaatobe.

Apocalipsis 20:3

Ja̧danö, di̧batö ödajökwenöma ángelma laju okwa jaobe chedijatö. Jabajo̧ma yawepi̧nö yö̧bebö tumato̧. Ja̧danö, yö̧ebajemima tö'awa'be pöbebo̧. Ja̧danö, mil imiamebiya jenanö laju okwada bo̧, Awetjama, böjȩnö ju̧kwadönö sulabenö öbibökönö. Ja̧danö, mil imiamebiya baibena, ángelma jo̧banö ejatö kaatakwo̧, lekwökönöda ö̧jobö.

2 Juan 1:10

Ja̧danö chö̧ja̧wo̧dö, lȩtebaduwakwö. Cristo yöawina öpöjödadö, jelobekwö yöbawö ichadönö tekataduwoko kwejuduwi okwa. Ja̧danö, ja'yubebi ösödö yöka̧laduwoko jobadönöma.

1 Juan 4:1

Chö̧ja̧wo̧dö chösödawö̧, a̧ja̧kwaduwitjö. Okobe jwiinö yöawakwawa kwa̧ja̧kwaduwi̧ma juluwanö kwösödaduwoko, Jweinö yöbawo̧, jö̧ba̧lö. Isabenö, bakwo̧ yöawi̧ a̧ja̧kwö ö'wiawakwa̧lö̧jönö kwa̧ja̧kwa̧laduwobö jo̧be, ba̧jekwadö omöna yöbawadö tjö̧jobetjö̧. Jau chö̧ja̧wo̧dö, ö'wiawakwa̧lö̧jönö kwa̧ja̧kwa̧laduwo kwöwaisaduwobö, Ite yöbawo̧ma ¿Dios O̧'wo̧ Luwo̧ öibökweji̧? Ja̧danö, yöawi̧ma ¿Dios O̧'wo̧ Luwo̧tjö̧ ichobeji̧? jö̧ba̧lö.

Apocalipsis 19:20

Jo̧kwaijayonö kabayu dewo̧ wamenö wo̧ma, iteda ömöayedökwö ojwe okwatjö labebinanö do̧a̧lobe chedijatö. Ja̧danö, böjȩ teebetjö labebinanö, Dios iwene yöbawo̧sa, jö̧ba̧lö, omöna yöba̧lo̧nöbi do̧a̧lobe chedijatö. Ja̧danö, jo̧ba böjȩ teebetjö labebinama, ujulu i̧sebö jojodönö jelobekwö tjomukwatinö öbibo̧, ojwe okwatjö labebinanöbi, jo̧ba o̧'wo̧ jawabi tjösödinö. Ja̧danö, jo̧bama, jojodönö jelobekwö tjomukwatinö, tjöbanöbi, tjömamiju tjöwaisobekwöchobesamunöbi ojwe okwatjö labebina imi seyu do̧bö wȩyukwa tjösödobö öbibo̧. Ja̧danö, kabayu dewo̧ wamenö wo̧ma, jobadö du̧ju̧tajanöma, ina 'yaba̧ladönöma, ökwöla nöola okwa loobe chedijatö, jwiinö tubinö azufre mikwi̧ ubolanö.

Apocalipsis 13:14

Ja̧danö, Diosma jejenö i̧sebobö kaatibokobetjö̧, jo̧ba, böjȩ teebetjö labebajo̧ma, ojwe okwatjö labebajo̧ öba a'o ja̧nö, ujulu i̧sebobe chedijatö. Jejenö ujulu i̧sebiawö̧ jo̧ba omöna yöa̧li̧ ösödö, jojodöma jo̧ba wei̧ a̧ja̧kwö ju̧kwadö. Ja̧danö, ojwe okwatjö labebajo̧ o̧'wo̧ jawa tjotidobö webo̧ kwölöte'onö dȩawatjö̧ woachibajökwe o̧'wo̧ jawama.

Apocalipsis 12:9

Ikenama nöbo̧ toba'dadanöso̧nöma mölejȩbetjö böjȩkwö labinö jabö lotjobe chedijatö. Jo̧bama damötjö, a̧ko'da ji̧na, Awetja mikwo̧, böjȩnö ju̧kwadönö okobe deinö omöna yöba̧lo̧, jö̧ba̧lö, ötjabökwe. Ja̧danö, iteda ömöayedö, sulabedö ángelesdönöbi labinö jabö lotjinawö̧, mölejȩbetjö böjȩkwö.

Apocalipsis 2:20

Jejenö otiwanö kwö̧jaduwijayonö, ja'yube kwomukwataduwi̧ma chöpöjöda. Sulabuju, Jezebel mikwuju, yöjawobö weköbaduwobe. Jobujuma, Dios iwene yöbawujusa, jö̧ba̧lö, jö̧ja̧lijayonö jelobekwö omukwatuju. Jobujunöma yötawaduwakwö. Jobujuma ötjö chömöayedönö jelobekwö öbibuju, sulabenö ja̧tjobö. Ja̧danö, tji̧lȩkwa̧muböködökwö tjö̧jobö, tjo̧'wo̧ jawa tjiyaja̧ kwakwawa sulabenö tjukwobö öbibuju, chömöayedönö sulabenö ja̧tjobö. Jobujuma yelösöda sulabuju. ¿Tajawedö yöjawobö weköbaduwobeda?

Apocalipsis 2:6

Chömöledö, ja'yube kwomukwataduwi̧ma chöpöjödijayonö, ju'wi otiwanö kwomukwataduwi̧ma jo̧be, biya̧: Ökwödöma jweinö omukwatö kwöpöjödaduwobe ju'wedönö, Nicolás mikwo̧ ömöayedönöma. Jobadöma, Nicolás jelobekwö omukwatö ja̧i̧danö jelobekwö omukwatö ja̧badö. Ötjöbi, ökwödödanö, jwiinö chöpöjöda jobadö omukwatö ja̧tji̧ma.

Apocalipsis 2:2

Jo̧bama baikwö yöawobe ökwödö Éfesonö ju̧kwadönö, jo̧banö ösödadönöma: Ökwödö kwö̧jaduwi̧ma okobe jwiinö chöwaisa. Ja̧danö, otiwanö kwö̧jaduwi̧ma chöwaisa. Chedemi otiwanö, ötjö weti̧ a̧ja̧kwö kwö̧jaduwobe. Ja̧danö, sulabenö baledonöbi ökwödöma kwo̧'wo̧duwi 'dibachibö kwö̧jaduwobe. Ja̧danö, chedemi sulabenö omukwatadö yötjawi̧ma yelösöda kwa̧ja̧kwaduwokobe. Ja̧danö, jelobe omukwatö yöba̧linadönöma kwöwaisachibinaduwobe, Omöna yöba̧ladö, jö̧ba̧lö. Jobadöma, Ökwödöma Jesús webawedösa, jö̧ba̧lö, yötja̧lijayonö ökwödöma, otiwanö omukwatö kwisakwinaduwobe, jweinö yötja̧lojobö, omöna yötja̧lojobö, edö. Jejenöma otiwanö kwöwaisachibinaduwobe, Jobadöma omöna yöba̧ladö, Jesús webawöködö, jö̧ba̧lö.

2 Juan 1:7

Ja̧danö chö̧ja̧wo̧dö, ba̧jekwadö tjö̧jobe ökwödötjö labebö kwebachadö, ökwödönö jelobekwö kwomukwataduwobö ötjibotö jö̧ba̧lö yöbawadöma. Jobadöma omöna yöbawadö, Jesúsma Dios weinökwemaökö, jö̧ba̧lö. Ja̧danö, Jesúsma jojo babibinö̧kö̧, jö̧ba̧lö, omöna yöbawadö. Ja̧danö, Jojodö tjö̧jibinö pjabatö̧kö̧, jö̧ba̧lö, yelösöda omöna yöbawadö. Jejenö yöbawadöma jojodönö jelobekwö tjomukwatobö ötjibotö jö̧ba̧lö yötjawobe. Jobadöma jelo̧ jojo, Cristo öpöjojo ötjabökwe omöna yöawi̧danö omöna yöbawadö.

1 Juan 2:26

Chö̧ja̧wo̧dö, böja kwialusöjanö yötawi̧ma ökwödönö pjabatö yötawa, jelobekwö omukwatö yöbawadönö kwöwaisaduwobö, ökwödö kwö̧jaduwelöma labebö kwebachadönöma. Jobadöma ökwödönö tjöba̧ja̧dobö jö̧ba̧ladö, jobadö tjomukwati̧danö kwomukwataduwobö.

2 Timoteo 2:18

Jobadöma jweinö yöawakwawatjö 'da̧bachibö tji̧'yajabe, ja̧danö jobadöma sulabenö yötjawobe, wobinadö 'yabibajö tjeachakwawama ida̧ökö baledinobe jö̧ba̧lö. Jejenö sulabenö yöbawö ju'wedönö suli̧ tjöwaedobe, Dios yöawi̧ ösödakwawa katjatibobö ja̧tjobetjö̧.

Gálatas 6:17

Bajaleapo yötawi̧ma biya̧ chömöledö: Ötjönö wene ji̧nö jwöbeba̧ladöma katjatibobö jo̧be, Jesús ömöayo̧chobetjö̧. Jau chömöledö, ötjöma isabenö Jesús ömöayo̧sa, ja̧danö ötjönö kwakwatjina woachinama öwaetjöda i̧sebobe Jesús ömöayo̧ chö̧ji̧ma.

Gálatas 4:17

Ju'wedö sulabenö yöbawadöma isabenö ile nibebö tjedobe ökwödönö chömöledö, jo̧kwaijayonö ökwödönö pjatjatotö jö̧ba̧löma isakwöködö chömöledö. Jobadöma sule ötjötjö 'da̧bachibö kwö̧jaduwobö tjisakwobe chömöledö, jobadönöda kwösödaduwo jö̧ba̧lö.

Gálatas 2:4

Jau chömöledö, ajayinöma ju'wedö Jesúsnö ösödöködöma Jesúsnö ösödöködötjijayonö, Jesúsnö ösödadödanö ichejekwö ökwödö Jesúsnö ösödadö dö'da̧de tjichibinobe, Cristo Jesúsnö ösödadö dö̧ji̧, Cristo Jesús midawö woinobetjö̧ Moisés iwȩyudina jawatjö dö̧jibina tjedo jö̧ba̧lö. Jobadöma ökwödönö suli̧ tjöwaedotö jö̧ba̧lö, yemidanö Moisés iwȩyudina jawatjö ömöayedödanö badibanö ja̧tjotö jö̧ba̧lö tjichinobe chömöledö,

2 Corintios 4:2

Jau chömöledö, jojodönö yödawobe, jo̧kwaijayonö sulabenö yöbawadö yötja̧li̧danöma yödawokobe. Ökwödö yöbawö dö̧ji̧ma, okobe jwiinö tabatjö ju̧kwawa̧lakwawa ja̧awa döpöjöda, jejenö ja̧doko jö̧ba̧lö. Jau chömöledö, yödawi̧ tjösödo jö̧ba̧löma omöna yödawokobe, ja̧danö Dios iwene jweinö laebi̧tjö balewö lobö wainöma yödawokobe. Jau chömöledö, jejenö yöbawökönö, Dios öba a'otjö ja̧nö, isabenö wene jweinö laebi̧danö yöbawadösa, yödawi̧ a̧ja̧kwajadö tjomajadenö omukwatö, isabenö wene yöbawadö jö̧ba̧lö tjöwaisakobetjö̧.

Hechos 20:30

Ina yöbawijetö: —A̧ja̧kwaduwitjö, ju'wibi yötawa. Ökwödöda jojodötjöbi ju'wedöma omöna yötjawakobe idöda tjomukwati̧da. Omöna yötjawakobe Jesúsnö ösödadönö, Dios iwene, jweinö tja̧ja̧kwina wene kabatibö idöda omöna tjomukwati̧danö tjomukwatobö. Jejenö jobadö omöna yöbawadöma ökwödö kwite'ada̧laduwawö̧nö ökwödötjöma 'dötjebobö omöna yötjawakobe.

Hechos 13:10

jö̧ba̧lijetö: —Awetja itji̧ja. Ökwöma jojodö tjoma'apekwönö ja̧bo̧ja. Jojodönö jelobekwö yöba̧lö sulabenö ja̧bo̧ja. Okobe jwiinö Dios jawa, otiwa jawa öpöjödo̧ja. Ökwöma ba̧kwȩlö̧jatebö pjeanö yöawi̧kwö Duluwo̧ jweinö yöawi̧kwö pjabacha̧lö yöbawo̧ja.

Mateo 24:24

Jau chömöledö, isabenö Dios weakwo̧ jö̧a̧linökwesa jö̧ba̧lö omöna yöba̧ladöma yötjawakobe, ja̧danö Dios yöawi̧ yöbawadösa jö̧ba̧lö omöna yöba̧ladöbi yötjawakobe. Jobadöma jojodö edajitjökö jawa tji̧sebakobe, Dios omudawö ujuninawö̧bi jobadö yötjawi̧ tjösödobö, jo̧kwaijayonö Dios omudawö ujuninawö̧tjobetjö̧ tjösödökakobe.

Gálatas 1:6

Chömöledö, ökwödönö omukwatö, ayö, Gálatas jojodöma ¿tajawedö juluwanö kabatibadöjö? jö̧ba̧lö chomukwatobe. Jau chömöledö, Cristoma mikwa jwiinö otiwanö pjaatinobetjö̧, Diosma ökwödönö jwöinobe, ¿jö̧tö? Jo̧kwaijayonö ökwödönö jwöbinanö juluwanö kabatibadöja, ju'wi wene otiwa jawa ötjabi̧ wene kwösödaduwobö.