Filipenses 4:6 - Dios Iwene

⁶ Ja̧danö, okobe jwiinö baledi̧ma, kwo̧'wo̧ tjo̧kekwaduwa chömöledö, dakwö ja̧dakwajö jö̧ba̧löma. Kwo̧'wo̧ tjo̧bekwökönö, Diosnöda akebaduwo chömöledö, jo̧ba pjaatobö akebaduwonö, otiwanö pjabato̧ja jö̧ba̧lö.

Filipenses 4:6 Referans Kwoze

1 Pedro 5:7

Ja̧danö chömöledö, ökwödöwe, dakwö ja̧dakwajö jö̧ba̧lö yekabiduwenama, Diosnö abebö yekabiduwi̧ iyö loköbaduwo chömöledö, jo̧bama isabenö ökwödönö ösödö ite'ada̧lobetjö̧.

Mateo 6:8

Jobadö atjebi̧danöma abebökönaduwi chömöledö. Kwabe'doduwima isabenö ökwödönö a̧ja̧kwo̧, ja̧danö akebaduwakwa̧ abönö ida̧ökö jwiköbaduwi̧ waiso̧.

Proverbios 16:3

Ja̧danö, ju'wibi yötawa: Kwotidakwa̧ abönö Isabenö Jo̧nö ösödö jo̧banö akeba̧lo, Chuluwo̧ chotidakwa̧ma ökwöda kwösödi̧danö chotidobö öbibö pjakato, jö̧ba̧lö. Jobekwö, Isabenö Jo̧nö ösödö akeba̧lobetjö̧ kwotidakwa̧ma otiwanö laebakobe, iteda ösödi̧danö.

Colosenses 4:2

Ba̧kwȩlö̧jatebö Diosnö abebö kwö̧jaduwo. Jau chömöledö, te'ada̧lönö ja̧nö, Diosnö abebö kwö̧jaduwo, ja̧danö, Otiwanö pjaatajabe, jö̧ba̧lö Diosnö ösödö akebaduwonö.

Efesios 6:18

Ja̧danö chömöledö, ba̧kwȩlö̧jatebö Dios O̧'wo̧ Luwo̧ ökwödö kwo̧'wo̧ luwo̧duwinö öba̧ja̧da̧lonö a̧ja̧kwö akebaduwo Diosnöma, okobe jwiinö pjaataduwokwö. Kwö'wachibaduwoko chömöledö, Diosnö aekwama. Ba̧kwȩlö̧jatebö, ö'wachibökönö akebaduwo Diosnöma, iteda ömöledö babibadönöma pjaatobö.

Colosenses 3:17

Jau chömöledö, okobe jwiinö yöka̧laduwi̧ma, Duluwo̧ Jesús jawa i̧sebö yöka̧laduwo, ja̧danö okobe jwiinö ja̧köbaduwi̧ma, Duluwo̧ Jesús jawa i̧sebö ja̧köbaduwo. Ja̧danö, Jesús pjaatinobetjö̧, ba̧kwȩlö̧jatebö Dabe'do Diosnö kwösödaduwo, Otiwanö pjabato̧ja, jö̧ba̧lö.

Lucas 18:1

Ju'wi möle Jesúsma iteda öba̧ja̧di̧ waisachadönö ba̧ja̧dö yöawinobe, me'dawachibökönö ba̧kwȩlö̧jatebö Diosnö atjebobö. Ja̧danö, ba̧ja̧dö, jobadönö wanedö yöawinobe baikwö:

Lucas 12:22

Jemi ikenama Jesúsma iteda öba̧ja̧di̧ waisachadönö yöawinobe: —Böjȩ jawama nöinö mikwawokobetjö̧ baikwö yötawaduwakwö chömöledö: Böjȩnö kwö̧jaduwi̧ jawama omukwatö kwö̧jaduwoko, Aaa, ¿taji dukwakwa̧jö? ¿taji 'dudawakwa̧jö? jö̧ba̧löma.

Colosenses 3:15

Ja̧danö, kwömöledöduwikwö wene jwiinö kwo̧'wo̧ luwo̧duwi ösöwachibanö kwö̧jaduwo chömöledö. Ja̧ kwo̧'wo̧ luwo̧duwi ösöwachibanö kwö̧jaduwi̧ma, Cristotjö ichi̧ chömöledö. Ja̧danö, kwömöledöduwi Cristonö ösödadökwö kwo̧'wo̧ luwo̧duwi ösöwachibanö kwö̧jaduwo jö̧ba̧lö, Diosma ökwödönö jwöinobe, Cristo iteba'o bakwa'o bakibaduwanö. Ja̧danö, Diosnö kwösödaduwo chömöledö, otiwanö pjabato̧ja jö̧ba̧lö.

1 Samuel 30:6

Tjömöledö deiawö̧, tjo̧'wo sulawö̧ tjö̧jinobe David ömöayedöma, ja̧danö tjo̧'wo sulawö̧ ja̧nö, ju'wedöma tjuluwo̧ Davidnö inawiya ikwawö lotjobö yötja̧lakwawinobe. Jejenö yötja̧lakwawiökwe, jwiinö o̧'wo tjo̧achinobe Davidma, jo̧kwaijayonö Uluwo̧ Isabenö Jo̧ Diosma ujuluwachibanö pjaatinobe.

Efesios 5:20

Jejenö lo̧bö Diosnö kwösödaduwo ba̧kwȩlö̧jatebö, jwiinö sulabenö baledenabi, otiwanö jenabi. Jesucristoma ökwödö kwuluwo̧duwiobetjö̧, Diosnö kwösödaduwo, Dabe'do ökwönö dösöda, otiwanö pjabato̧ja, jö̧ba̧lö.

Lucas 10:41

Yöja̧lökwe Jesúsma atadinobe: —Chömöledösuju chösödoko Marta, ju'wi jayebi, ju'wi jayebi nöinö kwo̧'wo̧ tjo̧kekwa, jo̧kwaijayonö ja̧ jayema isabenö mikwawökö ji̧ Marta.

Lucas 18:7

¿Diosja? Sulabenö otido̧ bajalianö ajebi̧ a̧ja̧kwinatjö̧ma, Diosma ¿iteda ömöledö jo̧banö tjubudekwi̧ a̧ja̧kwökenaji̧? Dios omudawö ujuninawö̧ma yö̧tebi mölebi Diosnö budekwadö, ökwödönö pjabatö döpöjojodönö lȩkebo jö̧ba̧lö, ja̧danö lekwe möle atjebijayonö, Diosma juluwanöma pjaatokobedanö ichejekwa, ¿jö̧tö? ¿Dakwö kwomukwataduwa? ¿Isabenö pjaatökenaji̧? Isabenö pjaatakwo̧ chömöledö. Lekwe pjaatokobedanö ichejekwijayonö isabenö a̧ja̧kwo̧ chömöledö, ja̧danö isabenö pjaatakwo̧. Jau chömöledö, isabenö yötawaduwakwö, ajayinö a̧ja̧kwokobedanö ichejekwijayonö, isabenö juluwanö pjabatö tjöpöjojodönö lȩebakwo̧ chömöledö. Jo̧kwajabetjö̧ kabatibökönö Diosnö budekwö akebaduwo chömöledö, isabenö ökwödönö a̧ja̧kwo̧obetjö̧. Jau chömöledö, isabenö Dios lȩebakwa̧ lȩbebö ötjö jojo baibanö jȩminökwema ichö lȩtebocha. Ja̧ wene ösödö kwite'ada̧laduwobö jo̧be. Chöwaisa chömöledö, böjȩ jojodöma, juluwanö tjime'dawachibobe, jo̧kwajabetjö̧ chichibakwa̧ abönö ba̧jekwadö tjime'dawachibena, döpöjojodönö la'akatjöda lȩebökena jö̧ba̧lö. Jo̧kwaijayonö isabenö kwöpöjojodönö lȩbebö chichocha chömöledö, jo̧kwajabetjö̧ isabenö me'dawachibökönö kwite'ada̧laduwo chömöledö, Diosma isabenö a̧ja̧kwobetjö̧— jö̧ba̧lö yöawinobe Jesúsma.

Mateo 10:19

Jo̧kwaijayonö, ökwödönö do̧tjatenama, kwo̧'wo̧ tjo̧kekwaduwa chömöledö, ja̧danö, Ayö, ¿dakwö atjebi̧ma datadakwa̧jö?, ¿dakwö yödawakwa̧jö? jö̧ba̧löma kwo̧'wo̧ tjo̧kekwaduwa. Isabenö yökawaduwobö baibenama, yökawaduwakwa̧ kwujuna̧laduwakwedöja.

Proverbios 15:8

Ja̧danö, ju'wibi yötawa: Isabenö Jo̧ma jwiinö öpöjödo̧ sulabenö omukwatadö tjö̧ji̧ma. Jobadö jo̧banö kwabö juwö tjiyi̧bi edö jwiinö öpöjödo̧ Isabenö Jo̧ma, sulabenöda omukwatö tjö̧jobetjö̧. Jobekwö öpöjödokobe Isabenö Jo̧ma, Dios wei̧ a̧ja̧kwö ju̧kwadönöma. Isabenö Jo̧ma Dios wei̧ a̧ja̧kwö ju̧kwadönö jwiinö ösödo̧. Jobadö Diosnö atjebi̧ma a̧ja̧kwö jwiinö ösödo̧. Jobadöma ba̧kwȩlö̧jatebö Dios wei̧ a̧ja̧kwö tjö̧jobö isakwadötjobetjö̧ Isabenö Jo̧ma jwiinö ösödobe jobadönöma.

Lucas 12:29

Diosma isabenö ökwödönö ite'ada̧lakwo̧ chömöledö, jo̧kwajabetjö̧ Diosda te'ada̧lö iyakwo̧ jö̧ba̧lö, kwukwaduwakwa̧bi, kwowaduwakwa̧bi kwisakwaduwoko, ja̧danö ja̧ jawa omukwatö kwo̧'wo̧ tjo̧kekwaduwoko chömöledö.

1 Samuel 1:15

Jejenö yöa̧loko, Anama jatadinobe: —Ja̧maökö chuluwo̧, 'dukwachokokosa, ubasobu o̧'dobubi, ju'wi nio ojwiobi owa̧löma chö̧jokobe. Cho̧'wo luwo̧nö o̧'wo tjo̧tekwujusa, ja̧danö baledaja̧ kwedaja̧ma, cho̧'wo tjo̧tekwi̧ Isabenö Jo̧ chuluwo̧ öba a'otjö yöba̧lö atebajabe.

1 Corintios 7:32

ja̧danö böjȩ jawa kwo̧'wo̧ tjo̧kekwaduwoko chömöledö. Ja̧danö, tji̧lȩkwa̧munö juna̧ladönöbi, debadönöbi baikwö yötawa: Bakwo̧ ilekwonö debo̧ma, jwaikwöda Duluwo̧ wei̧ jawada otidobö jo̧be, Duluwo̧ ösödi̧ jawada jwaikwöda ja̧bö ö̧jo jö̧ba̧lö.

1 Pedro 4:7

Ja̧danö chömöledö, 'dö̧ibaji̧ möle yöneawachibobe. Jo̧kwajabetjö̧, jweinö omukwatö eda̧lakwawö kwö̧jaduwo, ja̧danö waisanö omukwatö Diosnö abebö kwö̧jaduwo.

Mateo 13:22

Ja̧danö, sȩa'wonö meaja̧ ödebiya badekwachi̧ma, Dios la'aka luwo̧ ö̧jakwa̧ wene a̧ja̧kwö tjösödijayonö, böjȩ jawa nöinö omukwatadönö, ja̧danö balada tjemobö isakwadönö badekwachobe. Jobadöma ja̧ jawa nöinö tjomukwatobetjö̧, otiwanöma tjöda̧peachokobe, ja̧danö tjo̧'wo̧ luwo̧ wa̧ji̧ jawama otiwanöma wa̧jokobe.

Daniel 3:16

Jejenö yöawiawö̧, Sadracbi, Mesacbi, Abednegobi la'aka luwo̧nö tjatadinobe: —Duluwo̧ Nabucodonosor, ökwönö datadobö jwiobe, weköbaja̧danö dösödakwedösa jö̧ba̧löma.

1 Samuel 7:12

Ikenama Samuelma inawa nöawa emö, Mizpa comunidadbi Sen comunidadbi 'da̧de ödinobe, ja̧danö lödajo̧ jawa Ebenezer jö̧ba̧lö imidinobe, —Ba̧kwelöjatebö pjabataiadanö babebi pjaatajabe Isabenö Jo̧ma, —jö̧ba̧lö.

1 Corintios 7:21

Ja̧danö, tjömöayo̧ baibanö tjeminökwe kwö̧jonö Dios ökwönö jwöinatjö̧ma, kwo̧'wo̧ tjo̧acha, ina kwuluwo̧ ömöayo̧ kwö̧joböma sulökö. Ja̧danö kwuluwo̧ ömöayo̧ ina ja̧nö, Diosnö ösödö kwö̧jo. Jo̧kwaijayonö kwuluwo̧ ömöayo̧ kwö̧ji̧tjö lakebobö ji̧tjö̧ma, otiwanö lakebo.

1 Reyes 8:28

Jo̧kwaijayonö bejunöda kwö̧jököjayonö, yayonö ötjö kwömöayo̧ atebi̧ kwa̧ja̧kwobö atebakwö. Jau chuluwo̧, kwömöayo̧sa ötjöma, ja̧danö beju ökwö kweju badeibö ja̧nö, ökwönö budekwö atebakwö, jadanö atebi̧ a̧ja̧kwö pjakatobö atebakwö chuluwo̧.

Daniel 6:10

Danielma ja̧ weawa wȩyudö sello dobö ödina wene a̧ja̧kwinobe, ja̧danö a̧ja̧kwajo̧, ba̧kwȩlö̧jatebö abebajiadanö o̧do okwa tebachö Diosnö aebinobe. Jo̧bama ba̧kwȩlö̧jatebö mö̧sȩko̧ ventana po̧bebö, Jerusalénkwö edö Diosnö o̧'wo̧ wana̧lö abebiainobe, ja̧danö la'aka luwo̧ weaja̧ a̧ja̧kwajo̧, yayonö mösȩko̧nö uyu̧ko̧nö bamatö ventanasa'donö banö aebinobe, ju̧kwawökönö. Ba̧kwȩlö̧jatebö abebajiadanö, mölekwena wa̧pötakwanö jejenö Diosnö aebinobe, otiwanö pjabato̧ja jö̧ba̧lö.

Mateo 6:34

Jo̧kwajabetjö̧ itekwayi jawa omukwatöma kwö̧jaduwoko chömöledö, dakwö ja̧dakwa̧jö jö̧ba̧löma. Jau chömöledö, itekwayi möleda ja̧ möle jawa kwomukwataduwena, ja̧danö ju'wi möle jwiinö, iya̧da möle jawada kwomukwataduwobö jo̧be, ju'wi möle jawa omukwatökönö— jö̧ba̧lö yöawinobe Jesúsma.

1 Timoteo 2:1

Ja̧danö, Jesúsnö ösödadönö weawa yötawa Timoteo, Jesúsnö ösödadönö weköbobö. Jesúsnö ösödadönö ajayi weti̧ma biya̧, Jesúsnö ösödadöma Diosnö atjebobö jo̧be. Ja̧danö, Jesúsnö ösödadö jwibö tjö̧jenama, Diosnö atjebobö jo̧be iyobö. Ja̧danö, ju'wedö jojodönö atjebobö jo̧be, Dios jobadönö pjaatobö. Ja̧danö, Diosma otiwanö iyinobetjö̧, jo̧banö atjebobö jo̧be, otiwanö pjabatö kwiyajabe jö̧ba̧lö. Ja̧danö, Jesúsnö ösödadöma Diosnö atjebobö jo̧be okobe deinö jojodönö pjaatobö.

1 Timoteo 5:5

Jesúsnö ösöduju jilekwenö wobekwinuju jömöledö debujuma, jömöledönö jo̧'wo̧ jöwana̧loböma jwibuju. Ja̧danö, Diosnöda jo̧'wo̧ wana̧luju, jo̧bada ite'ada̧lobö, ja̧danö kabatökönö Diosnö abebuju, kabatökönö Dios pjaatobö abebuju jobujuma, yö̧tebi, mölebi. Jobujujayedönö Dios ömöledö tjite'ada̧lobö jo̧be.