Filipenses 1:28 - Dios Iwene

²⁸ Ja̧danö kwöpöjojodöduwinö yebabökönö ju̧kwaduwi chömöledö, ja̧danö jejenö yebabökönö kwö̧jaduwi̧ma kwöpöjojodönö i̧sebakobe, Dios jobadönö söbebö loakwa̧ma, ja̧danö Dios ökwödö kwö̧jibaduwinö ja̧akwa̧ wenebi jobadönö i̧sebakobe.

Filipenses 1:28 Referans Kwoze

Mateo 10:28

Jojodönö yekabiduwa chömöledö, jobadöma sule tjiteba'oda kwabö lobadö, tjo̧'wo̧ luwo̧nö kwabö lotjoböma juluwöködö. Jau chömöledö, Diosnöda yekabiduwobö jo̧be, jo̧bama isabenö jojodönö lȩebobö juluwo̧obetjö̧, jo̧bada ökwöla nöolatjö jojodö tjiteba'obi, tjo̧'wo̧ luwo̧bi söbebö loakwo̧.

Isaías 51:7

Ökwödö weti̧ a̧ja̧kwö ju̧kwadöma, kwomajadeduwinö, —Dios wei̧ma inesö mikwawi̧ a̧ja̧kwö dö̧jobö, —jö̧ba̧lö ösödadöma, ökwödönö yöta̧li̧ kwa̧ja̧kwaduwo: Jojodö ökwödönö obö, sulabenö yötja̧li̧jayonö, jobadönö yekabiduwoko, ja̧danö sulabenö yötja̧li̧ a̧ja̧kwö, kwo̧'woduwi tjo̧kekwaduwoko.

Romanos 8:17

Ja̧danö, ju'wibi jo̧be chömöledö. Dios i̧tji̧mudobetjö̧, Diosma iteda i̧tji̧munö otiwa jawa iyakwa̧ma, ökwödönö ja̧ jawa iyakobe chömöledö. Ja̧danö, otiwa jawa Jesúsnö iyi̧tjöbi, ja̧danö ökwödönöbi iyakobe chömöledö, Jesúskwö bakobe dö̧jobetjö̧. Jau chömöledö, ina böjȩnö ja̧nö, Cristo usula emawinadanö, bakwainö usula emawadösa. Ja̧danö, tupakwö, mölejȩbe ja̧nö, Dabe'do Dios jo̧banö otiwa jawa iyakwa̧bi bakwainö ökwödönöbi iyakobe chömöledö.

Hebreos 13:6

Ja̧danö, Diosma ökwödökwö ba̧kwȩlö̧jatebö ö̧jobetjö̧ yebabökönö dö̧jobö jo̧be. Baikwö laebobe Dios iwenetjö: Ötjönö pjabato̧ma Duluwo̧da. Jo̧bama ötjönö pjaatobetjö̧ yebabökönö jo̧sa. Ja̧danö pjaatobetjö̧ jojodö ötjö inia tjötobö ja̧tjijayonö yebabökönö jo̧sa. Jejenö laebobe Dios iwenetjö. Ja̧danö chömöledö, ökwödöma domajadenö isabenö döwaisobö jo̧be, Chuluwo̧ma ötjökwö ba̧kwȩlö̧jatebö ötjönö pjabatö ö̧jobetjö̧ ötjönö baledi̧ yebabökönö jo̧sa, jö̧ba̧lö.

Isaías 12:2

—Jau, edaduwi, Diosda ökwödönö dö̧jibinö pjabato̧ma, jo̧kwajabetjö̧ jo̧banö do̧'wo wa̧nalö ja̧nö, yebabökönö dö̧jakwedösa. Jau, Isabenö Jo̧ Diosda dujuluwachibanö pjabato̧ma, jo̧bada dö̧jibinö pjabato̧ma, ja̧danö döpöjojodötjö dö̧jibobö pjaatinobetjö̧, jo̧banö ösödö lo̧badösa, —jö̧balö yöka̧laduakwedöja.

Apocalipsis 2:10

Yötawaduwakwö lekwokobetjö inia tjököbaduwinö baledakobe ökwödönöma. Jejenö baledi̧ma yekabiduwoko, chömöledö. Kwo̧'wo̧ 'dibachibö kwö̧jaduwo. A̧ja̧kwaduwitjö. Awetjama ökwödötjö ju'wedönö ka̧lena ba̧kwawejunö tjödobö weakobe, ötjönö kwo̧'wo̧ kwöwana̧laduwi̧ma kakatibaduwojobö edobö. Ja̧danö, jo̧bama inia tjököbaduwinö ja̧tjobö weakobe, ja'yubeda lekwe, domulataja möle baibanö. Ja̧danö, chömöledö, kabatibökönö kwo̧'wo̧ kwöwana̧laduwotjö, kwabö lotjobö jö̧tja̧lenabi. Yekabiduwoko chömöledö. Ö'wö bakibaduwaja̧ ikena, chöba a'o kwichibaduwena, ba̧kwȩlö̧jatebö ja̧kwawa chiyakwo̧sa, Otiwanö kwujuluwaduwajabe, jö̧ba̧lö.

1 Tesalonicenses 2:2

Jau chömöledö, kwöwaisaduwa, ökwödönö yöbawö di̧'yakwa̧ abönö, ina Filipos comunidadnö dö̧jayi, jobe jojodöma sulabenö ja̧tjinobe ökwödönö usula demawinö. Jo̧kwaijayonö, ida̧ökö usula demawinajayonö, Dios pjaatobetjö̧ yebabökönö ökwödönö yödawijatö Dios jawa otiwa jawa wenema. Jau chömöledö, döpöjojodö yödawokobö tjölabinajayonö, yayonö yebabökönö yödawijatö ökwödönöma.

Lucas 3:6

Jejenö dotidaduwo, Diostjö icho̧ dö̧jibinö pjabato̧nö okobe deinö otiwanö tjedakobetjö̧, jö̧ba̧lö laebobe Isaias iwȩyudinama Juannö badekwachinö.

Isaías 51:12

Adebökwe, baikwö atadö yöba̧lo̧ Isabenö Jo̧ma: Chömöledö, kwo̧'wo tjo̧bekwö kwö̧jaduwelö, ötjödasa kwo̧'woduwi ösöwachibanö pjabato̧ma. Ja̧danö ötjöda ökwödönö pjatatobetjö̧, tajawedö bö̧jȩ jojodönö yekabiduwobö? Jobadöma meje'ye, juluwanö kököbachibö, debi baiba'yedanö ichejekwadö, juluwanö debö 'ya̧dö bö̧jȩ jojodöma, tajawedö jobadönö yekabiduwobeda?

Génesis 49:18

Dannö yöawaja̧ ikena Jacobma Isabenö Jo̧ Diosnö jwöbijetö: —Isabenö Jo̧ Dios, ökwönöda cho̧'wo wa̧na̧lö, chöpöjöjödötjö chö̧jibanö pjakatakwa̧ te'ada̧lo̧sa— jwöbijetö Isabenö Jo̧ Diosnö ösödö.

Hechos 28:28

Ina yöbawijetö: —A̧ja̧kwaduwitjö kwöwaisachibaduwinö. Ökwödöma, judío jojodöma Dios pjaatina kwöpöjödaduwijatö, jojodö tjö̧jibinö pjaatinama. Jo̧kwaobetjö̧ Diosma webijetö judío jojodöböködönö tja̧ja̧kwobö. Isabenö jobadöma tja̧ja̧kwobö jö̧ba̧ladö, Dios iwenema— yöbawijetö Pabloma.

Juan 16:8

Ina yöawinobe: —Jo̧ba ichakwo̧ma Dios O̧'wo̧ Luwo̧. Jo̧bama böjȩnö ju̧kwadönö ichö jobadö tjo̧'wo̧ luwo̧nö öwaitjöda tjöwaisachibanö i̧sebakobe, Jojodöma sulabe juna̧ladö, jö̧ba̧lö. Ja̧danö, tjöwaisachibanö i̧sebakobe, Jojodöma Dios wei̧danö, jobadö suli̧ jwiinö tjuju̧kwobö wei̧danöma ju̧kwöködö, jö̧ba̧lö. Ja̧danö, jo̧ba ichakwo̧ma jojodö tjo̧'wo̧ luwo̧nö tjöwaisachibanö i̧sebakobe Dios lȩebakwa̧, Dios lȩebi̧tjö isabenö baledakobe sulabe juna̧ladönöma, jö̧ba̧lö.

Marcos 3:3

Ja̧danö, Jesúsma ömamu 'wabo̧nö jwöbijetö: —A̧laibö ichi jojodö tjö'da̧de kwöjamato— jwöbijetö.