Éxodo 15:16 - Dios Iwene

¹⁶ ¡Ayö! jö̧ba̧lö, okobe deinö Canaán nijinö ju̧kwadöma yebabidöda tjuju̧kwobe, kwujulu kwisȩbaja̧ yötjawi̧ tja̧ja̧kwajabetjö̧, jwiinö juluwo̧, jö̧ba̧lö. Jejenö, yebabinö tjuju̧kwobetjö̧ jobadö tjuju̧kwemi döbaledena wi̧inö tjö̧jobe, inawa wi̧achawa ji̧danö. Isabenö Jo̧, ökwödö, ökwö kwömöledö, Egiptotjö dö̧jibinö pjabatö lakebinawö̧ma jobadö tjuju̧kwemi döbaledenanö kabatö jejenö, wi̧inö tjö̧jobe.

Éxodo 15:16 Referans Kwoze

Deuteronomio 2:25

Babe möle jamatö, bö̧jȩ bakwemeachibanö jojodö ökwödönö omukwatö yetjaibobö pjatatakwo̧sa. Ja̧danö, jwiinö kwujuluwaduwobö pjatatobetjö̧, ökwödönö bö̧jȩ ba̧kwemeachibanö jojodö tja̧ja̧kwenama, yebabinö tjö̧bawö, usula emawö tjö̧jakwedö, -Idö israel jojodötjö dakwö dö̧jibakwajö? -jö̧ba̧lö, —Dios yöawina jawa yöawinobe Moisesma.

1 Samuel 25:37

Ja̧danö, ikena möle yeayi, ida̧ökö 'dukwachi̧ bö̧jachajökwe ö̧jioko, Abigailma baledina wene yöjawinobe, ja̧danö yöjawökwe, 'dö̧achibinobe, ja̧danö inawa pjolachibökönö bi̧danö, Nabalma itea kamapjonöda ö̧binobe, pjolachibökönö.

Josué 2:9

Ja̧danö, jobadönö yöja̧linobe, —Chöwaisa, Isabenö Jo̧ma ditebo nijima juluwanö ökwödö israel jojodönö iyakobe, jö̧ba̧lö. Isabenö okobe deinö chitebo jojodöma yebabinö tjö̧bawö tjö̧jobe kwöbaduwi a'otjö, jwiinö yedabobetjö̧.

2 Pedro 2:1

Jau chömöledö, Dios yöawi̧ yöbawadöma Dios O̧'wo̧ Luwo̧ yöawi̧da yötjawinobe, jo̧kwaijayonö, jobadö otiwanö yötjawonö, Dios yöawi̧ yöbawöködöbi yötjawinobe. Jobadöma Dios yöawi̧ yötjawököjayonö, Dios yöawi̧ yöbawadösa, jö̧ba̧lö omöna yötja̧linobe. Ja̧danö chömöledö, ökwödö kwö'da̧deduwitjö jobadöjayedö omöna yöbawadö tjö̧jakobe chömöledö, Dios iwene yöbawadösa, jö̧ba̧lö omöna yöba̧ladöma. Jobadöma isa̧ökö wene yötjawakobe, suli̧ tjöwaedotö jö̧ba̧lö. Ja̧danö ju'wibi, Duluwo̧nö, jobadö tjö̧jibobö midawinanö tjöpöjödakobe, la'aka luwo̧bö̧kö̧ jö̧ba̧lö. Jejenö suli̧ waedadöma, Dios juluwanö jobadönö lȩebobö ja̧badö chömöledö.

1 Pedro 2:9

Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.

Tito 2:14

Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

Deuteronomio 11:25

Ja̧danö, kwöpöjojodöduwitjö bakwo̧bi kwöba a'oduwi ja̧nö, tjöbeba̧lö ölakwabikwawoböma jwiakobe, okobe deinö kwekachaduwi̧tenia niji ju̧kwadö jwiinö ökwödönö yetjaibobö kwuluwo̧duwi Isabenö Jo̧ Dios weakobetjö̧. Jau chömöledö, ökwödönö yöbawö ujuninadanö, isabenö jejenö pjaatakobe, jo̧ba wei̧ kwa̧ja̧kwaduwobetjö̧.

Éxodo 11:7

Ja̧danö, Egipto jojodö tjubudekwi̧ labinö ökwöonö Israel jojodö tjuju̧kwelöma wi̧achakobe, jojodöbi tjubudekwökakobe, ja̧danö awili bakwo̧bi ubudekwökakobe. Tjubudekwökakobe Israel jojodöma tji̧tji̧mu ö'wö batjibokobetjö̧. Jejenö edö jweinö kwöwaisachibakobe, Isabenö Jo̧ma iteda ömöledönö wainö 'da̧batö juno̧, ökwödö Egipto jojodönö lȩebi̧danö baledökönö, jö̧ba̧lö. jejenö yöawobe Isabenö Jo̧ma ökwönöma, faraón— yöbawijetö Moisésma.

Hechos 20:28

Ina yöbawijetö: —Ju'wi jawabi yötawa ökwödönö, te'ada̧lakwawa jojodönö. Kwö̧jaduwobema otiwanö kwite'ada̧laduwo, kwo̧'wo̧ luwo̧duwi juluwachibanö tupakwö kwi̧'yaduwobö Dioskwö. Ju'wibi yötawa. Ju'wedönöbi kwite'ada̧laduwo Diosnö ösödadönöma. Dios O̧'wo̧ Luwo̧ma ökwödönö 'da̧batö junijetö jobadönö kwite'ada̧laduwobö. Wanedö yötawa: O̧bȩja̧dönö te'ada̧lakwawa jojo a̧jwi̧mu tjöekwanö ite'ada̧li̧danö ökwödöma Jesúsnö ösödadönö kwite'ada̧laduwo. Kwite'ada̧laduwawö̧nöma ida̧ökö Dios ja̧inobe iteda i̧tji̧mu batjibinö. Diosma iteda itji̧ ökwösobu ebawö ö'wöchö imidawinobetjö̧, ida̧ökö Dios ja̧inobe jobadönöma iteda i̧tji̧mu batjibinö, iteda itji̧nö ösödadöma. Jobadönöma kwite'ada̧laduwo— yöbawijetö Pabloma.

Isaías 51:10

Jau chuluwo̧, ökwöda damötjö jwaibalawa köködö lobinaja, inesö da̧kwawa köködö lobinaja, ökwöda kwömöledö israel jojodö, tjö̧jibinö pjakatajawö̧ma otiwanö tjöbaledakobetjö, jö̧tö? Yemidanö jobekwö pjakatobö adebakwö.

2 Samuel 7:23

Ja̧danö ökwö kwömöledö israel jojodöjayedöbi deobe bö̧jetjöma. Okobe deinö tjitebokwena jojodötjö, ökwö omudawö kwujuninawö̧ma, sule israel jojodöda. Jau chuluwo̧ Dios, bö̧jȩ ba̧kwemeachibanö ju̧kwadö usula tjemawijayonö, sule israel jojodöda usula emawö dö̧jiökwe, dö̧jobekwö 'ya̧nö, usula demawi̧tjö̧ ladebinö kwemijatö ja̧danö inesö juluwo̧ kwö̧ji̧ wene i̧sȩbö, ökwödönö otiwanö pjakatijatö, Diosma juluwo̧ jö̧ba̧lö tjöwaisachibanö. Jau chuluwo̧, egipto nijitjö kwömöledönö emajo̧, bemi nijinö ju̧kwinadönöbi, tjösödawö̧ diosbedö jö̧tja̧lawö̧nöbi a'dewö loköbijatö, kwömöledöda bemi nijinö dö̧jobö.

1 Samuel 2:9

Isabenö Jo̧ma isabenö tjöeba̧lakwo̧ jo̧banö tjo̧'wo wana̧ladönöma, jo̧kwaijayonö sulabedönö yȩa'wo okwa debö tji̧'yobö weakwo̧. Jau, isabenö idöda tjujulunö tjujuluwökakwedö bö̧jȩ jojodöma, Isabenö Jo̧da ujuluwakwo̧ma.

Deuteronomio 32:9

Ja̧danö, jejenö 'da̧batö junajo̧, Isabenö Jo̧ma iteda ömöledö batjibakwedönöbi 'da̧batö ujuninobe, ökwödö israel jojodönö 'da̧batö ujuninobe, iteda ömöledö dö̧jobö.

Deuteronomio 32:6

Ökwödöma wajwibadö omukwatöködödanöbedöja chömöledö, baikwö yötawa: Isabenö Jo̧ma kwabe'doduwibo̧, jo̧bada ökwödönö otidinobetjö̧, ja̧danö ju'wibi ökwödönö otidajo̧, kwiteboduwisaso juluwaso bakibaduwanö ujuninobe, jö̧tö? Isabenö otiwanö pjaatinobe chömöledö, ja̧danö jejenö pjaatiawö̧ balekwa mikwa jo̧banö kwöpöjödaduwobö otiwenaji̧? Sula chömöledö, jo̧banö kwösödaduwo jö̧ba̧ladöja.

Éxodo 23:27

Ja̧danö, ju'wedö tjuju̧kwitenia kwichibaduwena, jobe ju̧kwadöma ötjönö omukwatö jwiinö yetjabikobe ¡ayö¡ juluwo̧ pjaatinawö̧, jö̧ba̧lö. Jejenö yebabinö ja̧nö jobadö kwöpöjojodöduwima ¿taji ja̧dakwa̧jö? jö̧ba̧lö omukwatöködödanö batjibakwedö. Ikenama, jwiinö yetjabobetjö̧ ökwödö kwö̧jaduwelö, ja̧danö, tjitebotjö 'dötjibakwedö.

Génesis 35:5

Ja̧danö, jobe Shequemtjö labebö Betelbe ȩwa̧jijadötö. Tjȩwa̧jobe okobe deinö tjöbaledemi comunidadesnö ju̧kwadöma jwiinö yebabijadötö jobadönö. Jwiinö yetjabobetjö ölakwabikwawö lubijöködötö Jacob i̧tji̧munö balekwa mikwa kwabö lotjobö.

Éxodo 15:5

Jobadöma o̧pesobu jwiinö da̧kwobu okwa mȩtja̧jabe, nijibe tjö̧bamatinö, inawa ömökawa meaji̧danö.

Éxodo 15:6

Isabenö Jo̧ kwömamu kwöwaisachamuma jwiinö juluwamu. Jamu jwiinö juluwamunö pjebebö loköbajabe kwöpöjöjödönö.

Éxodo 15:13

Ja̧danö, Isabenö Jo̧, ökwödönö kwösödi̧ma balewachökönö ökibajabe ökwödönö, döpöjojodötjö dö̧jibinö pjakatajawö̧nöma. Ja̧danö, ökwödönö kwujulunö öbibö kwi̧'yobe ökwö wainö kwujuninemi niji jobekwö.

Éxodo 18:8

Ikenama Moisésma Jetronö yöbawijetö okobe jwiinö Isabenö Jo̧ faraónnö, ja̧danö Egipto jojodönö lȩebina jawa, Israel jojodönö pjabatö. Ja̧danö, yöbawijetö okobe jwiinö jobadönö labi̧ jawa baledinama Egiptotjö labebö tji̧'yobe. Ja̧danö, yöbawijetö Isabenö Jo̧ jobadönö tjö̧jibinö pjaatinama labi̧ jawa baledena.

Éxodo 20:2

—Ötjöma Isabenö Jo̧sa, Kwösödaduwökwe Diossa. Ötjödasa Egiptotjö lakebaduwinö pjabatinama, Egipto jojodö wetjawö̧ otidö kwö̧jaduwitjö. Baikwö wetaduwakwö:

Éxodo 23:20

Ikenama, Isabenö Jo̧ma Moisésnö yöbawijetö: —Moisés, ¡a̧ja̧kwitjö! Ötjöma ángelso̧nö wetocha ökwödö kwi̧'yaduwobe kwabönöduwi, ökwödönö ite'ada̧lö, ökwödönö 'da̧batö chujuninemi otiwanö kwichibaduwakobetjö̧.

Deuteronomio 2:4

ja̧danö lakebaduwakwa̧ abönö, baikwö weköbo israel jojodönö: Isabenö Jo̧ma ökwödönö yöawobe, babema kwömöledöduwi Esau itji̧mu tupadanö jojodö tjitebo ö'wejenö kwöbaledaduwobö jo̧be. Ja̧danö, jejenö kwöbaledaduwiawö̧, jobadöma yetjabikobe ökwödönö, jo̧kwajabetjö̧ teada̧lönö kwö̧jaduwo,

Josué 4:24

Jobekwö iteda ujulu i̧sȩbajabe dösödökwe Isabenö Jo̧ Diosma chömöledö, bö̧jȩ ba̧kwemeachibanö ju̧kwadö jojodöma a̧ja̧kwö tjöwaisachibakobetjö̧, Isabenö Jo̧ Diosma isabenö jwiinö juluwo̧, jö̧ba̧lö. Ja̧danö, ju'wibi, ökwödö israel jojodö ba̧kwelöjatebö kabatökönö kwuluwo̧duwi Isabenö Jo̧ Diosnö yebabinö omukwatö, Jwiinö juluwo̧ Dösödökwe Isabenö Jo̧ma jö̧ba̧lö omukwatö kwö̧jaduwakobetjö̧, jejenö kwöba a'oduwitjö iteda ujulu i̧sȩbajabeta, —jö̧ba̧lö yöawinobe Josuema, inawiya Guilgaltjö ödenama.

Isaías 63:12

Iteda inesö ujulunö, Moises inesö juluwi̧ ji̧ jawa i̧sebobö pjabatinama daida? Jobama da'dödö tjöba a'otjö, ojwiyo 'da̧batö ujuninobe, jwaibalawa ö'wejenö otiwanö tjöbaledobö, ba̧kwelöjatebö jo̧banö otiwanö tjomukwatakobetjö̧,

Éxodo 6:7

Ja̧danö, ökwödöma ötjö chömöledö bakibaduwanö pjatatakwo̧sa. Ja̧danö, ötjöma ökwödö Kwösödaduwökwe Dios chö̧jakwo̧sa. Ötjö pjatati̧ waisachibö yöka̧laduwakwedöja, Isabenö Jo̧ma, ökwödö Dösödaduwökwe Diosma Egipto jojodö juluwanö dotidobö wetji̧tjö dö̧jibinö pjabato̧, jö̧ba̧lö.

Éxodo 23:22

Jo̧kwaobetjö̧ wetökwe ángelso̧ wei̧ ö'wöyawakwawalö̧jinö a̧ja̧kwö, ötjö weti̧da okobe jwiinö kwösödaduwitjö̧ma kwöpöjojodöduwinö lȩtebakwo̧sa, ja̧danö ökwödönö pjabatadönö pjatatakwo̧sa.