Éxodo 13:9 - Dios Iwene

⁹ Ja̧danö, ja̧ ba'ali kwujunaduwena Isabenö Jo̧ pjaatinama kwomukwataduwo, jo̧ba weina yökawaduwakobetjö̧. Wanedö yötawa: Ja̧ ba'ali kwujunabiduwakwa̧ma wȩyudö lödawobedanö ja̧kobe, ja̧ wȩyukwa edinö Isabenö Jo̧ weina kwomukwataduwakobetjö̧. Kwömamuduwinö, kwöbaduwinö wȩyu̧dö lödawobedanö ja̧kobe ja̧ ba'alima, Isabenö Jo̧ ökwödönö weina omukwatö ju'wedönö yökawaduwakobetjö̧. Chömöledö, Isabenö Jo̧ iteda ujulunö Egiptotjö lakebaduwobö pjaatobetjö̧ jo̧ba weina yökawaduwobö ja̧kobe.

Éxodo 13:9 Referans Kwoze

Deuteronomio 6:8

Ba̧kwelöjatebö ja̧ jawa omukwatö kwö̧jaduwo chömöledö, baikwö yötawa, yötawi̧ jawa wȩyudajadö, kwöbaduwinöbi, kwömamijuduwinöbi di̧katakwawaduwo, ba̧kwelöjatebö edinö kwomukwataduwakobetjö̧,

Éxodo 13:16

Ja̧danö, yemidanö yöta̧laduwakwö: Dios weina ba'ali kwujunaduwena Isabenö Jo̧ pjaatinama kwomukwataduwo. Ja̧ ba'ali kwujunabiduwakwa̧ma kwömamuduwinö kwöbaduwinö wȩyu̧dö lö̧dawobedanö ja̧kobe, Isabenö Jo̧ ökwödönö pjaatina kwomukwatakobetjö̧, iteda ujulunö Egiptotjö ladebinö.

Éxodo 12:14

Ja̧danö, ökwödöma ba̧kwȩlö̧jatebö bakwöta o̧bakwena ötjö, Isabenö Jo̧ pjatatina, kwejubiya wame chöbaledinama omukwatö ba'ali kwujunaduwo, ötjö babe möle weti̧danö. Ja̧danö, weawa baibanö kwiweyudaduwo ba̧kwȩlö̧jatebö ökwödötjö jojodöbi ja̧ ba'ali tjujunobö, jobadöbi, jobadötjö tupadanö jojodöbi, ötjö pjatatina omukwatö.

Romanos 10:8

Jau chömöledö, wainö weobe Dios iwene, kwomukwataduwobö. Baikwö laebobe: Ji̧kwa wenema ödöokobe ökwödötjöma, isakwö kwi̧'yaduwobö, ida̧ökö ökwödökwö jo̧betjö̧. Ja̧danö, ida̧ökö kwinenenöbi, kwomajadenöbi jo̧be ichejekwa, ji̧kwa wenema, ödöokobe, jö̧ba̧lö laebobe Dios iwene. Jau chömöledö, ja̧ ji̧kwa wenema, ökwödönö yötawi̧ weneda.

Isaías 59:21

Ju'wibi yöawobe Isabenö Jo̧ma: Ja̧danö, ötjöma jobadö tjö̧jibinö pjatatajawö̧nö isabenö pjatatakwa̧ wene yöbawö chujunakwo̧sa, baikwö: Ökwödökwö jo̧ cho̧'wo luwo̧ma, la'akatjöda kwö̧jaduwelö laebökakwo̧. Ja̧danö ötjö yötawi̧, yöka̧laduwobö chiyaja̧ chiwenema, ba̧kwelöjatebö yöba̧lö kwö̧jaduwakwedöja, ja̧danö kwitji̧muduwibi ba̧kwelöjatebö yöba̧lö tjö̧jakwedö, ja̧danö tji̧tji̧mu tupadanö jojodöbi ba̧kwelöjatebö chiwene yöba̧lö tjö̧jakwedö. Bemi tupakwö, ba̧kwelöjatebö 'dö̧ibajökönö, jobekwö yöba̧lö kwö̧jaduwakwedöja, jö̧ba̧lö yöawobe Isabenö Jo̧ma.

Mateo 23:5

Okobe jwiinö jobadö ja̧tji̧ma, jojodö jobadönö tjedo jö̧ba̧lö ja̧badö. Jau chömöledö, jobadöma Dios iwene jawatjö wȩyukwöja isapjo nöapjo okwa anö, tjöbanöbi tjöjanöbi di̧batakwawedö, ja̧danö tjökamijido̧ ö'öbönö isa'ye ödöa'ye di̧batadö, isabenö jwaikwöda Diosnö ösödadösa jö̧ba̧lö.

Deuteronomio 30:14

Jobekwö abebö kwa̧ja̧kwaduwobö jwiobe chömöledö, Dios wei̧ma ida̧ökö ökwödökwö yöne jo̧betjö̧ chömöledö, baikwö yötawa: Ida̧ökö jo̧ba wei̧ kwineneduwinö jo̧be, ida̧ökö Dios wei̧ yöka̧laduwobetjö̧, ja̧danö ida̧ökö kwomajadeduwinö kwöwaisaduwobe, otiwanö wei̧ a̧ja̧kwö kwö̧jaduwobö. Jo̧kwajabetjö̧ isabenö wayökö chömöledö, Dios wei̧ a̧ja̧kwö kwö̧jaduwobö.

Éxodo 13:3

Ja̧danö, Moisésma yöba̧lijetö Israel jojodönöma: —Babe möle, Egiptotjö lakebaduwi̧ mölema ba̧kwȩlö̧jatebö kwomukwataduwo, Isabenö Jo̧ma Egipto jojodö usula emawö kwotidaduwobö wetji̧tjö kwö̧jibaduwinö pjaatobetjö̧. Iteda ujulu i̧sebö Isabenö Jo̧ma Egiptotjö lakebaduwobö pjaatobetjö̧ ba̧kwȩlö̧jatebö̧ kwomukwataduwo. Jo̧kwaobetjö̧ bakwȩlö̧jatebö bite ja̧wo̧ badekwachena ba'ali kukwaduwo 'ye'yeachö̧kö̧ pankwö.

Apocalipsis 18:8

Jo̧kwaobetjö̧, jobadönö yelösöda lȩbebo̧sa, Ba̧kwȩlö̧jatebö, Otiwadösa, jö̧ba̧lö omukwatinadönöma. Ja̧danö, inia tjötjinö te'ada̧lökönö baledakobe jobadönöma. Yelösöda lȩbebo̧sa tjubudekwabinö. Ja̧danö a̧wi̧chi̧ tjötjinöbi baledakwedö. Yelösöda jobadönöma juwö lotjakwawö̧. Ötjö, Kwuluwo̧duwi Diosma juluwo̧chobetjö̧ jwiinö inia tjötjinö baledakobe jobadönöma. Ötjö, Kwuluwo̧duwi Dios jobadönö lȩbebö yöbawo̧ma.

Isaías 51:9

Duluwo̧ Isabenö Jo̧, baikwö adebakwö, A̧la̧ibi, juluwanö a̧la̧ibi, inesö kwujulu kwi̧sȩbakobetjö̧. Damötjö kwujulu kwi̧sȩbinadanö, yemidanö a̧la̧ibö ökwödönö pjakatobö atebakwö. Jau duluwo̧ Dios, ökwöda damötjö Rahab ötjabökwe, inesö jwaibalawanö ji̧na labo̧nö dȩdȩbö loköbijatö, ja̧danö dȩdebö lobajo̧, pjei̧kwena kwubulabinobe, jö̧tö? Jobekwö yemidanö kwujulu kwi̧sȩbobö atebakwö.

Isaías 49:16

Jau chömöledö, ötjöma kwimiduwi 'dȩbö wȩyudö chödinobe ötjöda chömamijunö, ja̧danö ba̧kwelöjatebö kwiteboduwi Jerusalen tjöekwemi edö jo̧sa, la'akatjöda ökwödönö cho̧'wo jwitiboböma jwibo̧sa.

Isaías 40:10

Edaduwi, kwuluwo̧duwi Isabenö Jo̧ Diosma iteda ujulunö icho̧ma, jwiinö juluwo̧obetjö̧, webö ö̧jakwo̧. Jau, döpöjojodönö ujuluwajabe, ja̧danö jobadö tjujulutjö ejatajawö̧nö öbibö ichobe, —jö̧ba̧lö yökawaduwo.

Isaías 27:1

Ja̧danö, ja̧ möle Isabenö Jo̧ma Leviatan ötjabökwe jwaibalawanö jo̧nö lȩebakobe. Inesö nöbo̧ a̧ko'da Leviatanma, Dios öba a'otjö döibajakobe, öwali'bo wi̧su̧inö ja̧bö döibajakwo̧ Leviatanma, jo̧kwaijayonö Diosma iteda itea kwölöte'o, inesö nöa'o juluwa'onö kwabö loakobe jwaibalawanö jo̧ Leviatannö.

Proverbios 3:21

Ja̧danö, ju'wibi jwebebö yötawakwö chitji̧: Ba̧kwȩlö̧jatebö jweinö omukwatö kwö̧jo. Ja̧danö, ba̧kwȩlö̧jatebö ajayinö otiwanö kwomukwato jweinö kwomukwatina badekwachinö.

Proverbios 1:9

Wanedö yötawakwö chitji̧: Isabenö, kamijido̧sa'ye, jwiinö otiwa'ye kwuunö kwöwanawena otiwanö öwawobe ¿jö̧tö̧? Jobekwö otiwanö kwöwanawi̧ öwawi̧danö ökwö jweinö omukwatö kwö̧ji̧ma otiwanö öwawobe ökwönö jwebebö yödawi̧ma do̧katinobetjö̧. Ja̧danö, ju'wibi wanedö yötawakwö: La̧wo̧sopja jwiinö otiwopja kwölawobe otiwanö öwawi̧danö ökwö jweinö omukwatö kwö̧ji̧ma otiwanö öwawobe, ökwönö jwebebö yödawi̧ma do̧katinobetjö̧.

Deuteronomio 6:6

Ba̧kwelöjatebö babe ökwödönö weawa yötawi̧ omukwatö kwö̧jaduwo chömöledö, la'akatjöda kwo̧'wo jwikibaduwoko.

Éxodo 3:20

Jo̧kwaobetjö̧ chujulu i̧sebö labi jawa baledinö wetocha Egipto jojodönöma. Jejenö baledaja̧ ikena faraónma ökwödönö a'dewö loakobe jobetjöma.

Éxodo 7:4

a̧ja̧kwökakobe ökwödö yökawaduwi̧ma. Ikenama Egipto jojodönö chujulu i̧sebö usula tjemawinö lȩtebocha. Jejenö Egipto jojodönö lȩtebobetjö̧ jwiinö labi̧ jawa webö chömöledö Israel jojodöma okobe deinö, bakwasokwenanö jobetjö latjebobö pjatatakwo̧sa.

Éxodo 13:14

Ju'winö kwi̧tji̧mu̧duwitjö bakwo̧ abebö a̧ja̧kwena ¿tajawedö kwimidobeda? jö̧ba̧lö baikwö kwatadonö: Isabenö Jo̧ma iteda ujulunö Egiptotjö ladebobö pjaatinobe, labinö dotidobö wetjanelö duju̧kwibanö.

Isaías 44:5

Ja̧danö otiwanö pjatatiawö̧, jobadötjö bakwo̧ yöa̧lena, —Isabenö Jo̧ ömöledöso̧sa, —jö̧ba̧lö, ja̧danö jelo̧, —Jacob itji̧ tupadanö jojosa, —jö̧ba̧lö yöa̧lakobe. Ja̧danö jelo̧ iteda ömamunö i̧wȩyudakwo̧, —Isabenö Jo̧ Ömöledöso̧, —jö̧ba̧lö, ja̧danö imi yöa̧lakwo̧, —Israel jojosa, —jö̧ba̧lö, jwiinö kwitjimuduwi israel jojodönö otiwanö pjatatobetjö̧.

Éxodo 12:41

Ja̧danö, Egiptonö tjuju̧kwaja̧ cuatrocientos trienta o̧bi̧ya̧ badekwachi̧ möle okobe deinö Israel jojodöma, Isabenö Jo̧ ömöledöma, bakwasokwena labekwijadötö Egiptotjö.

Deuteronomio 5:15

Jobadö babe kwömöayedö tjö̧ji̧danö, damötjö̧ ökwödöbi Egipto jojodö tjömöayedö kwö̧jinaduwobe, usula emawö. Jo̧kwaijayonö tjömöayedö kwö̧jinaduwelö, kwuluwo̧duwi Isabenö Jo̧ Diosma, iteda inesö ujulunö ökwödönö labebö, baikwö ichejebinobe. Jo̧kwajabetjö̧, jejenöobetjö̧, okobe deinö ökwödöbi, kwömöayedöduwibi otikwökö möle otidökönö kwö̧jaduwobö jo̧be.

Deuteronomio 6:21

Baikwö kwatadaduwo chömöledö, –Damötjö ökwödöma Egipto nijinö ja̧nö, Faraon ömöayedö dö̧jijatö, jo̧kwaijayonö jejenö dö̧jemi ja'ötjö, Isabenö Jo̧ma iteda ujulunö ökwödönö Egipto nijitjö laebinobe.

Jueces 2:12

Tja'dödö tjösödinökwe Isabenö Jo̧ Dios, otiwanö Egipto nijitjö labebö, tjitebobe tjichibobö otiwanö pjabatina Diosnö kabatibö, ju'wedö tjösödawö̧nöda tjösödinobe. Diosnö kabatibö, tjipjeanö ju̧kwadö tjösödawö̧nöda sulabenö bȩbachibö tjösödinobe, Baal ötjabökwe o̧'wo jawanöbi, Asterot ötjaboko jo̧'wo jawanöbi. Ja̧danö jejenö tjösödiökwe, jwiinö ödameakwinobe Isabenö Jo̧ma.

Daniel 9:15

Ökwöma isabenö otiwanö ökwödönö pjabato̧ja chuluwo̧ Dios, ökwöda kwujulunö Egypto nijitjö ladebobö pjakatinobe, ja̧danö jejenö pjabatö okobe deinö kwujulu tjöwaisachibobö kwi̧sebinobe, ja̧ möletjö jamatö baikwö bajalenö okobe deinö kwujulu tjöwaisobe. Ökwöma otiwanö pjabato̧ja chuluwo̧, ja̧danö ökwödöma sulabedösa, suli̧ jawa sulabenö ja̧badösa.