Éxodo 13:3 - Dios Iwene

³ Ja̧danö, Moisésma yöba̧lijetö Israel jojodönöma: —Babe möle, Egiptotjö lakebaduwi̧ mölema ba̧kwȩlö̧jatebö kwomukwataduwo, Isabenö Jo̧ma Egipto jojodö usula emawö kwotidaduwobö wetji̧tjö kwö̧jibaduwinö pjaatobetjö̧. Iteda ujulu i̧sebö Isabenö Jo̧ma Egiptotjö lakebaduwobö pjaatobetjö̧ ba̧kwȩlö̧jatebö̧ kwomukwataduwo. Jo̧kwaobetjö̧ bakwȩlö̧jatebö bite ja̧wo̧ badekwachena ba'ali kukwaduwo 'ye'yeachö̧kö̧ pankwö.

Éxodo 13:3 Referans Kwoze

Deuteronomio 24:18

Jau chömöledö, ökwödö Egiptonö kwö̧jinaduwa wene kwomukwatibaduwo. Jobe ja̧nö, ju'wedö tjö̧möayedö kwö̧jinaduwobe, ¿jö̧tö? Jo̧kwaijayonö jobe usula emawö kwö̧jinaduwelö, kwuluwo̧duwi Isabenö Jo̧ Diosma kwö̧jibaduwinö pjaatinobe chömöledö, jo̧kwajabetjö̧ ja̧ jawa omukwatö, kwö̧'da̧deduwitjö usula emawö ju̧kwadönö yötawaja̧danö dösölöjinö kwedaduwobö yötawaduwakwö.

Deuteronomio 5:15

Jobadö babe kwömöayedö tjö̧ji̧danö, damötjö̧ ökwödöbi Egipto jojodö tjömöayedö kwö̧jinaduwobe, usula emawö. Jo̧kwaijayonö tjömöayedö kwö̧jinaduwelö, kwuluwo̧duwi Isabenö Jo̧ Diosma, iteda inesö ujulunö ökwödönö labebö, baikwö ichejebinobe. Jo̧kwajabetjö̧, jejenöobetjö̧, okobe deinö ökwödöbi, kwömöayedöduwibi otikwökö möle otidökönö kwö̧jaduwobö jo̧be.

Éxodo 20:2

—Ötjöma Isabenö Jo̧sa, Kwösödaduwökwe Diossa. Ötjödasa Egiptotjö lakebaduwinö pjabatinama, Egipto jojodö wetjawö̧ otidö kwö̧jaduwitjö. Baikwö wetaduwakwö:

Deuteronomio 16:12

—Ba̧kwȩlöjatebö Egipto nijinö kwö̧ji̧naduwa jawa kwomukwatibaduwobö jo̧be chömöledö, ja̧danö ja̧ jawa omukwatibö, yöbawö weti̧danö Diosnö ösödö ba'ali kwujunaduwo, –Duluwo̧ Diosma otiwanö Egiptotjö dö̧jibinö pjaatinobe, –jö̧ba̧lö.

Deuteronomio 5:6

–Ötjöma kwösödaduwökwe Isabenö Jo̧ Diossa, usula emawö tjömöayedö kwö̧jinaduwelö Egiptotjö labebö ichejebinasa.

Deuteronomio 15:15

Ja̧ weawama baikwö labebö lobö yötawa: Ajayinöma ökwödöma Egipto nijinö ja̧nö, ju'wedö tjömöayedö kwö̧jinaduwobe, jö̧tö? Jo̧kwaijayonö kwuluwo̧duwi Isabenö Jo̧ Diosma ja̧ kwö̧ji̧naduwelö kwö̧ji̧baduwanö eminobe, ja̧danö ja̧ lakebaduwinö pjaatina omukwatö, kwömöayedö israel jojodönö ökwödöbi lakebaduwobö wetaduwakwö.

Deuteronomio 6:12

teada̧lönö kwö̧jaduwo, kwuluwo̧duwi Isabenö Jo̧nö kwo̧'wo jwikibaduwapji jö̧ba̧lö. Jau chömöledö, Isabenö Jo̧ma ökwödönö pjabatö, ju'wedö tjömöayedö kwö̧jinaduwelö Egipto nijitjö baikwö ichejebinobe, ja̧danö wene jwiinö kwiteboduwinö kwö̧jaduwenama, teada̧lönö kwö̧jaduwo, jo̧banö kwo̧'wo jwibibö kakatibaduwapji jö̧ba̧lö.

Deuteronomio 16:3

Ja̧danö, ja̧ iyawa kwukwaduwenama, ye'yeachi̧ jawakwö kwukwaduwoko chömöledö. Ja̧ ba'ali kwukwaduwena, jelemutjö dötölataja möle baledibanö ye'yeachi̧ jawa jwi̧i panda kwukwaduwo. Ja̧ panma, usula emawa jawa pan ötjabobe, baikwö labebö lobö yötawa: Juluwanö teada̧lökönö Egipto nijitjö lakebinaduwobetjö̧, pan ye'yeachakwa̧ kwiteada̧loböma jwiinobe, juluwanö lakebaduwobetjö̧, jö̧tö? Ja̧danö ba̧kwelöjatebö Dios mönö öbaledina omukwatakwawa ba'ali kwukwaduwenama, ja̧ panbi kwukwaduwo, ba̧kwelöjatebö ja̧ Egipto nijitjö juluwanö lakebinaduwa kwomukwatibaduwakobetjö̧.

Deuteronomio 8:14

Ja̧danö, jejenö baibenama, teada̧lönö kwö̧jaduwo, –Aaa, otiwadösa, –jö̧ba̧lö, kwuluwo̧duwi Isabenö Jo̧ Diosnö kwo̧'wo jwikibaduwapji jö̧ba̧lö. Jau chömöledö, kwuluwo̧duwi Diosnö kwo̧'wo jwikibaduwobö jwiobe, baikwö yötawa: Kwuluwo̧duwi Isabenö Jo̧ Diosda usula emawö ju'wedö tjömöayedö kwö̧jinaduwelö Egipto nijitjö labebö öbibinama.

Éxodo 13:14

Ju'winö kwi̧tji̧mu̧duwitjö bakwo̧ abebö a̧ja̧kwena ¿tajawedö kwimidobeda? jö̧ba̧lö baikwö kwatadonö: Isabenö Jo̧ma iteda ujulunö Egiptotjö ladebobö pjaatinobe, labinö dotidobö wetjanelö duju̧kwibanö.

Josué 24:17

jo̧ba duluwo̧ Isabenö Jo̧ Diosda ökwödönöbi, da'dödönöbi Egiptotjö ladebinö baikwö ichejebinobetjö̧. Jau, jo̧bada Egipto jojodö tjömöayedö dö̧jitjö dö̧jibinö pjabatinama, ja̧danö jo̧bada yökawaja̧ inesö juluwi̧ ji̧ jawa dedonö i̧sȩbinama. Okobe jwiinö kwedachena, jo̧bada tjöbeba̧lö pjaatinobe, ja̧danö ju'wedö tjö̧'da̧denö döbaledonö, jo̧bada otiwanö tjöbeba̧lö pjaatinobe.

Deuteronomio 13:10

Jobadöma kwuluwo̧duwi Isabenö Jo̧ Dios, Egipto nijitjö ju'wedö tjömöayedö kwö̧jinaduwelö ichejebina Diosnö kakatibaduwobö sulabenö ötjibobö tjisakwobetjö̧, jejenö inawiya ikwö kwabö loköbaduwobö ja̧kobe chömöledö.

Deuteronomio 24:22

Jau chömöledö, damötjö jobadö tjö̧ji̧danö ökwödöbi ju'wedö tjö̧möayedö Egiptjo nijinö kwö̧jinaduwobe. Jo̧kwajabetjö̧ ökwödönö baikwö wetaduwakwö, ja̧ damötjö̧ kwö̧ji̧naduwa wene omukwatö, kwiteboduwi nijinö ju̧kwadö jelobetjö ichajadönöbi, löyödönöbi, tjilekwamu wobekwinadönöbi dösölöjinö kwedaduwobö, —jö̧ba̧lö yöawinobe Moisesma.

Éxodo 12:42

Ja̧ yö̧tema Isabenö Jo̧ma, iteda yöbawö ujuni̧danö otiwanö te'ada̧lijetö Israel jojodönö, Egiptotjö latjebinö pjabatö. Jo̧kwaobetjö̧ Israel jojodöma bakwöta o̧bakwena ja̧ yö̧te baibena Isabenö Jo̧ weinadanö wainö tjujunobö jo̧be, Isabenö Jo̧ ite'ada̧lina omukwatö. Ja̧danö, ba̧kwȩlö̧jatebö, Israel jojodötjö tupadanö jojodöma ja̧ yö̧te wainö tjujunobö jo̧be, Isabenö Jo̧ ite'ada̧lina omukwatö.

Deuteronomio 13:5

—Ja̧danö sulabenö Diosnö kakatibaduwobö öbibadö, –Dios yöawi̧ yöbawadösa, –jö̧ba̧lö omöna yöba̧ladönöbi, –Tji̧'wi̧dinö tjedi̧ labebö lobadösa, –jö̧ba̧lö omöna yöba̧ladönöbi kwabö loköbaduwobö ja̧kobe chömöledö, kwuluwo̧duwi Isabenö Jo̧ Diosnö kakatibaduwobö sulabenö ötjibobetjö̧. Jau chömöledö, kwuluwo̧duwi Diosda Egipto nijitjö lakebaduwinö ichejebinama, jo̧bada ju'wedö tjömöayedö kwö̧jinaduwelö kwö̧jibaduwinö pjabatinama, jo̧kwaijayonö jobadö sulabenö öbibadöma jo̧ba wei̧ kakatibaduwobö ötjibobe, wanedö yötawa, Kwuluwo̧duwi Isabenö Jo̧ Diosma jweinö weinobe otiwanö kwekachaduwakwa̧ma manama, ja̧manöda otiwanö kwekachaduwobö, jo̧kwaijayonö jobadöma ja̧matjö 'da̧bachibö, jelobekwö kwi̧'yaduwobö ötjibobe, sulabenö. Jo̧kwajabetjö̧ jobadönö kwabö loköbaduwobö ja̧kobe, inesö suli̧ kwö̧'da̧deduwitjö̧ söbebö loköbaduwakobetjö̧.

Deuteronomio 4:34

—Ja̧danö Dios ökwödönö Egipto jojodö tjö̧'da̧de kwö̧jaduwemi ja'ötjö, iteda ömöledö bakibaduwanö lakebaduwinö pjaatina kwomukwataduwo. Ja̧ ökwödönö pjaatinajaye jelo̧ tjösödökwe ömöledönö pjaatinaji̧? Tjösödawö̧tjö bakwo̧bi ju'wedö tjitebo jojodö tjö̧'da̧de ju̧kwadönö iteda ömöledö batjibobö labebö eminaji̧? Kwöwaisaduwa chömöledö, kwuluwo̧duwi Isabenö Jo̧ Diosma Egipto jojodönö lȩebinobe, ja̧danö iteda ujulunö jojodö edajitjökö jawa i̧sȩbinobe, ja̧danö iteda ujulunö jobadönö ölakwabikwawö ujuluwinobe, isabenö iteda inesö ujulu öwaetjöda öwawinö i̧sȩbinobe, ökwödö Egipto jojodötjö kwö̧jibaduwobö, jö̧tö? Ja̧jaye pjaatakwawa bö̧je jojodö tjösödawö̧tjö bakwo̧bi pjabato̧ ö̧jobeji̧? Deobe.

Éxodo 23:15

Ajayinö ba'ali pan 'ye'yeachö̧kö̧ ba'ali, jö̧ba̧lö, mikwobe. Egiptotjö lakebaduwakwa̧ abönö wetinadanö, ja̧ ba'ali kwujunaduwo bakwöta o̧bakwena, abib mikwo̧ ja̧wo̧nö. Jo̧ba ja̧wo̧nö Egiptotjö lakebaduwinobetjö̧ jo̧ba ja̧wo̧nö kwujunaduwo pan 'ye'yeachö̧kö̧ ba'alima. Ja̧danö, ja ba'alima jelemutjö dötölataja mölȩ baledibanö ba'ali. Pan 'ye'yeachö̧kö̧da kwukwaduwobö jo̧be ja̧ ba'alima. Ja̧danö, ötjönö ösödö ja̧ ba'ali kwanö ichadöma iyawa kwichejebaduwo, ötjönö ösödö kwiyaduwobö.

Éxodo 20:8

Ja̧danö, ju'wibi wetaduwakwö: Jojodö otikwö̧kö̧ mölȩ, wainö kwujunaduwi̧ mölȩ, inesö mölȩma kakatibaduwoko. Ja̧ mölȩ wainö kwujunaduwo, inesö mölȩ, jö̧ba̧lö, ötjönö kwömukwataduwobö.

Éxodo 12:19

Jejenö jelemutjö dötölataja möle jenanö kwejubiyaduwi okwa pan otikwa 'ye'yeachi̧ jawa okobe jwiinö jwiobö jo̧be. Isabenö, bakwo̧ panpja̧ 'ye'yeachi̧kwö kwo̧nö, jelobetjö ichö ökwödökwö jo̧nöbi, ja̧danö Israel jojonöbi kwö̧jaduwemitjö a'dewö loköbaduwonö.

Éxodo 12:8

Ikenama, te'ada̧lökönö sököbaduwo ja̧ yö̧teda itebiya kwukwaduwobö. Sököbaduwaja̧ itebiyama pan 'ye'yeachö̧kö̧ pankwö, lei öjiyakwö kukwaduwo.

Éxodo 6:1

Ja̧danö, Isabenö Jo̧ma Moisésnö jö̧ba̧lijetö: —Moisés, ökwöma kwedakobe faraónnö, iteda ömöledönö baledobö wetakwa̧ma. Chujulu chi̧sebiökwe Israel jojodönö kaatakwawakobe, ja̧danö itebotjö latjebobö weakobe— jö̧ba̧lijetö.

Éxodo 3:20

Jo̧kwaobetjö̧ chujulu i̧sebö labi jawa baledinö wetocha Egipto jojodönöma. Jejenö baledaja̧ ikena faraónma ökwödönö a'dewö loakobe jobetjöma.

Éxodo 12:15

Isabenö Jo̧ma ina yöba̧lijetö Moisésnö Aarónnö: Kwejubiya wame chöbaledina omukwatö ba'ali kukwaja̧duwa ikena möle, ju'wi fiesta kwujunaduwo. Ja̧ ba'ali jelemutjö dötölataja möle baledibanö kwujunaduwo. Ja̧ fiesta kwanö pan kwukwaduwakwa̧ma 'ye'yeachö̧kö̧ panda kukwaduwo. Ida̧ökö ja̧ jelemutjö̧ dötölataja mölebiyatjö ajayi mölema kwejubiyaduwi okwa pan otikwa 'ye'yeachi̧ma loköbaduwo kwejuduwitjö okobe jwiinö 'ye'yeachi̧ jawa jwiakobetjö̧. Isabenö, bakwo̧ panpja̧ 'ye'yeachi̧kwö kwo̧nöma kwö̧jaduwemitjö a'dewö loköbaduwonö.

Efesios 1:19

Ja̧danö, Diosnö atebobe do̧batö kwöwaisachibaduwobö kwo̧'wo̧ luwo̧duwinö, Diosma jwiinö juluwo̧, jö̧ba̧lö.

1 Corintios 11:24

Diosnö aebinobe, otiwanö kwiyajabe jö̧ba̧lö. Jemi ikenama, ja̧ panpja̧ 'delawö iyinobe ömöayedönö. Ja̧danö jobadönö wanedö yöawinobe: Bipja̧ma ötjö chiteba'o, ja̧danö ökwödö kwö̧jibaduwobö chiyobe chiteba'oma. Ökwödönö biya̧ chi̧sebaja̧danö ja̧köbaduwo ötjönö omukwatö jö̧ba̧lö yöawinobe.

1 Corintios 5:8

Ja̧danö, wanedö yötawa: Ja̧ Dios ökwödönö dö̧jibinö ja̧ina pjiesta dujunaduwo chömöledö, ja̧danö jejenö dujunenama, damötjö jawama ye'yeachi̧ ji̧ panpja̧ dukwoko. Jau chömöledö, Dios öpöjödinö ja̧awa ye'yeachi̧ jawa ji̧ panpja̧ dukwoko, sulabenö ja̧awa ye'yeachi̧ jawa ji̧ panpja̧ dukwoko. Ju'wida dukwaduwo chömöledö, ye'yeachi̧ jawa jwii̧ panpja̧da, bakwainö otiwi̧ jawa ji̧, isabenö wene ji̧ panpja̧da dukwaduwo chömöledö.

Lucas 22:19

Ikenama Jesúsma pan emibö, Diosnö aebinobe, otiwanö kwiyajabe jö̧ba̧lö, ikenama 'delawö, iteda webadönö iyö, wanedö yöawinobe baikwö: —Bipja̧ma ötjö chiteba'o, ja̧danö ökwödö kwö̧jibaduwobö chiyobe chiteba'oma. Ötjönö omukwatö emö kwaduwi— jö̧ba̧lö.

1 Crónicas 16:12

Do̧'wo jwibibökönö, inesö otiwa jawa otidina domukwatibaduwo. Iteda ujulu i̧sȩbö, döpöjojodönö lȩebina jawa domukwatibaduwo.

Mateo 10:12

Jeju tekachaduwenama, Dios jejunö ju̧kwadönö pjaato jö̧ba̧lö tekachaduwo.

Éxodo 6:6

Jo̧kwaobetjö̧ baikwö yökawo Israel jojodönö, ötjö yöta̧li̧ma jobadönöma: Ötjöma Isabenö Jo̧sa. Egipto jojodö ökwödönö juluwanö kwotidaduwobö wetji̧tjö lakebaduwobö pjatatakwo̧sa, jobadö wetji̧tjö kwȩjachajaduwinö. Ja̧danö, ötjöma jwiinö chujulu i̧sebö, Egipto jojodönö jwiinö lȩbebö ökwödönö kwö̧jibaduwinö pjatatakwo̧sa.

Éxodo 7:4

a̧ja̧kwökakobe ökwödö yökawaduwi̧ma. Ikenama Egipto jojodönö chujulu i̧sebö usula tjemawinö lȩtebocha. Jejenö Egipto jojodönö lȩtebobetjö̧ jwiinö labi̧ jawa webö chömöledö Israel jojodöma okobe deinö, bakwasokwenanö jobetjö latjebobö pjatatakwo̧sa.

Éxodo 12:17

Bakwöta o̧bakwena, ba̧kwȩlö̧jatebö ja̧ ba'ali, pan 'ye'yeachö̧kö̧, jö̧ba̧lö ötjabi ba'alima ökwödöbi, ökwödötjö tupadanö jojodöbi kwujunaduwo ötjö pjatatina kwomukwataduwobö. Ökwödö Israel jojodönö okobe deinö bakwasokwena jojodönöma Egiptotjö lakebaduwobö pjatatijatö. Ja̧ pjatatina omukwatö pan 'ye'yeachö̧kö̧ ba'alima kwujunaduwo. Ba̧kwȩlö̧jatebö ökwödötjö tupadanö jojodöbi ja̧ ba'ali tjujunobö webö kwujunaduwo, jobadöbi, jobadötjö tupadanö jojodöbi ba̧kwȩlö̧jatebö ja̧ ba'ali tjujunobö.

Éxodo 13:9

Ja̧danö, ja̧ ba'ali kwujunaduwena Isabenö Jo̧ pjaatinama kwomukwataduwo, jo̧ba weina yökawaduwakobetjö̧. Wanedö yötawa: Ja̧ ba'ali kwujunabiduwakwa̧ma wȩyudö lödawobedanö ja̧kobe, ja̧ wȩyukwa edinö Isabenö Jo̧ weina kwomukwataduwakobetjö̧. Kwömamuduwinö, kwöbaduwinö wȩyu̧dö lödawobedanö ja̧kobe ja̧ ba'alima, Isabenö Jo̧ ökwödönö weina omukwatö ju'wedönö yökawaduwakobetjö̧. Chömöledö, Isabenö Jo̧ iteda ujulunö Egiptotjö lakebaduwobö pjaatobetjö̧ jo̧ba weina yökawaduwobö ja̧kobe.

Deuteronomio 7:8

Baikwö yötawaduwakwö chömöledö, Isabenö Jo̧ ökwödönö ile niebobetjö̧, ja̧danö ökwödönö pjaatakwa̧ wene kwa'dödönö yöbawö ujuninobetjö̧, ökwödönö pjaatobö omudawö ujuninobe chömöledö. Jo̧kwajabetjö̧ Egipto niji la'aka luwo̧ Faraon ömöayedö kwö̧jinaduwelö ökwödönö laebinobe Isabenö Jo̧ma, iteda inesö ujulunö ökwödönö Egiptotjö öibinobe, Faraon ujulutjö kwö̧jibaduwinö.

1 Reyes 8:42

–Israel jojodö tjösödökwe Diosma otiwo̧, isabenö juluwi̧ ji̧ jawa otidobö juluwo̧, –jö̧ba̧lö a̧ja̧kwajadö, bejutjö ökwönö atjebobö tjichakwedö.

Génesis 15:16

Ja̧danö, kwömöledöma ju'winö, lekwe o̧biya, cuatrocientos o̧biya jenanö baibajena yemidanö tjetjachajakobe baikwö, Canaán nijibe. Ja̧ mölema bemi Canaánnö ju̧kwadö amorita mikwadönö lȩtebakobe. Jobadö lekwe sulabenö ja̧bö tjuju̧kwakwedö. Ja̧danö, sulabenö ja̧tjemitjö o̧penönö sulabenö ja̧bö tjuju̧kwena ötjöma bajaliyanöma lȩtebakwawö̧. Ikenama, lȩtebaja̧ okobe kwömöledöma yemidanö tjetjachakobe baikwö— yöbawijetö Isabenö Jo̧ Diosma Abramnö.

Éxodo 6:7

Ja̧danö, ökwödöma ötjö chömöledö bakibaduwanö pjatatakwo̧sa. Ja̧danö, ötjöma ökwödö Kwösödaduwökwe Dios chö̧jakwo̧sa. Ötjö pjatati̧ waisachibö yöka̧laduwakwedöja, Isabenö Jo̧ma, ökwödö Dösödaduwökwe Diosma Egipto jojodö juluwanö dotidobö wetji̧tjö dö̧jibinö pjabato̧, jö̧ba̧lö.

Éxodo 12:2

—Bemi tupakwöma bite jawo̧ma okobe deinö ja̧wo̧dötjö ajayi̧ ja̧wo̧ baibanö kwujunaduwo.

Éxodo 12:41

Ja̧danö, Egiptonö tjuju̧kwaja̧ cuatrocientos trienta o̧bi̧ya̧ badekwachi̧ möle okobe deinö Israel jojodöma, Isabenö Jo̧ ömöledöma, bakwasokwena labekwijadötö Egiptotjö.

Éxodo 34:18

Ina webijetö Isabenö Jo̧ma Moisésnöma: —Imiamekwena, pan 'ye'yeachö̧kö̧ ba'ali kwanö kwujunaduwo. Ja̧danö, Abib mikwo̧ ja̧wo̧ Egiptotjö lakebinaduwobetjö̧ jo̧ba ja̧wo̧ kwujuno ja̧ ba'alima. Ja̧danö, ja̧ pan 'ye'yeachö̧kö̧ ba'alima jelemutjö dötölataja mölȩ baledibanö pan 'ye'yeachi̧kwö kwukwaduwoko, Egiptotjö lakebinaduwa weti̧danö.

Deuteronomio 6:21

Baikwö kwatadaduwo chömöledö, –Damötjö ökwödöma Egipto nijinö ja̧nö, Faraon ömöayedö dö̧jijatö, jo̧kwaijayonö jejenö dö̧jemi ja'ötjö, Isabenö Jo̧ma iteda ujulunö ökwödönö Egipto nijitjö laebinobe.

Deuteronomio 9:12

Ja̧danö iyajo̧, Isabenö Jo̧ma ötjönö weinobe, –A̧la̧ibi, juluwanö belö yutubajö, kwömöledö israel jojodö tjö̧jobekwö da̧ji̧. Jau Moises, kwömöledö Egipto nijitjö baikwö ökibajawö̧ma, jwiinö sulabenö ja̧tjajabe, juluwanö jobadönö wetina kabatibö, o̧'wo jawa orotjö tjotidajabe, jo̧kwajabetjö̧ juluwanö tjö̧jobekwö yutuköbajo, –jö̧ba̧lö weinobe.

Deuteronomio 13:6

—Jau chömöledö, isabenö Diostjö 'da̧bachibö, ju'wedö tjösödawö̧nö kwösödaduwobö öbibadönö kwabö loköbaduwobö jo̧be, baikwö yötawa: Ökwöda yöne kwöjawo̧bi, ökwöda kwitji̧bi, ökwöda kwitjijubi, kwilekwobi, jelo̧ yö̧ne kwömöledöso̧bi Diosnö kakatibaduwobö öbibö, –Ju'wedö tjösödawö̧nö dösödo, –jö̧ba̧lö sulabenö ötjibitjö̧ma, ile nikebaduwawö̧ tjö̧jijayonö, yayonö jobadönö kwabö loköbaduwobö ja̧kobe, ökwödöbi kwa'dödöbi wajwiköbaduwawö̧nö kwösödaduwobö sulabenö ötjibobetjö̧. Jau chömöledö, bö̧jȩ ba̧kwemeachibanö ju̧kwadötjö ju'wedö tjösödawö̧nö̧ kwösödaduwobö sulabenö öbibö, bemi nijinö ju̧kwadö tjösödawö̧nö kwösödaduwobö ötjibitjö̧bi, jelobe ödö ju̧kwadö tjösödawö̧nö kwösödaduwobö ötjibitjö̧bi,

Deuteronomio 13:11

Ja̧danö chömöledö, jejenö sulabenö öbibadönö kwabö loköbaduwiawö̧, ju'wedö israel jojodöma tja̧ja̧kwakwedö, ja̧danö a̧ja̧kwö yetjaibakwedö, ja̧danö yebabinö omukwatö, la'akatjöda jobadö sulabenö öbibadö ötjibi̧danö ötjibökakwedö, –Diosnö katjatibobö ötibitjö̧ma, ötjönöbi lȩtjȩbena, –jö̧ba̧lö.

Deuteronomio 16:1

Tupakwö yöawinobe Moisesma: —Chömöledö, kwöwaisaduwa, damötjö kwuluwo̧duwi Isabenö Jo̧ Dios ökwödönö Egipto nijitjö lakebaduwinö pjaatinenama, ajayi jawo̧ Abib jawo̧nö lakebaduwinö pjaatinobe, jö̧tö? Jau chömöledö, Abib jawo̧nö, yö̧te ja'ö jobetjö lakebaduwinö öibinobe, jo̧kwajabetjö̧ ja̧ baledina omukwatö, ba̧kwelöjatebö o̧ba bakwabakwena Abib jawo̧nö Dios mönö öbaledina omukwatakwawa ba'ali kwujunaduwo.

Deuteronomio 26:8

—Jemi ikenama Isabenö Jo̧ma jobe Egiptotjö ladebinö öibijatö. Iteda inesö ujulu i̧sȩbö, dö̧jibobö ölakwabikwawijatö. Jojodö jwiinö yetjaibinö iteda ujulu i̧sȩbijatö, jojodö edajitjökö jawa i̧sȩbö Egipto nijitjö ladebinö öibijatö.

Jueces 2:12

Tja'dödö tjösödinökwe Isabenö Jo̧ Dios, otiwanö Egipto nijitjö labebö, tjitebobe tjichibobö otiwanö pjabatina Diosnö kabatibö, ju'wedö tjösödawö̧nöda tjösödinobe. Diosnö kabatibö, tjipjeanö ju̧kwadö tjösödawö̧nöda sulabenö bȩbachibö tjösödinobe, Baal ötjabökwe o̧'wo jawanöbi, Asterot ötjaboko jo̧'wo jawanöbi. Ja̧danö jejenö tjösödiökwe, jwiinö ödameakwinobe Isabenö Jo̧ma.

Jueces 6:8

ja̧danö jejenö tjubudekwiökwe, Isabenö Jo̧ma iteda yöawi̧ yöbawo̧nö weinobe, israel jojodönö yöawobö: —Baikwö yöawobe Isabenö Jo̧, israel jojodö tjuluwo̧ Diosma, –Ökwödötjö ajayinö ji̧nadöma Egipto jojodö tjömöayedö tjö̧jinobe Egipto nijinö. Jo̧kwaijayonö, usula emawö, ju'wedö tjömöayedö tjö̧jinelö, jobadönö labebö ötibijatö ökwödötjö ajayinö ji̧nadönö.

Daniel 9:15

Ökwöma isabenö otiwanö ökwödönö pjabato̧ja chuluwo̧ Dios, ökwöda kwujulunö Egypto nijitjö ladebobö pjakatinobe, ja̧danö jejenö pjabatö okobe deinö kwujulu tjöwaisachibobö kwi̧sebinobe, ja̧ möletjö jamatö baikwö bajalenö okobe deinö kwujulu tjöwaisobe. Ökwöma otiwanö pjabato̧ja chuluwo̧, ja̧danö ökwödöma sulabedösa, suli̧ jawa sulabenö ja̧badösa.