Jo̧kwajabetjö̧, ajayinö kwösödinaduwa jawa kakatibaduwo chömöledö. Wanedö yötawa: Sulabenö kwösödaduwi̧bi, sulabenö ja̧köbaduwi̧bi kwabö loköbaduwo chömöledö. Jau chömöledö, kwi̧lȩkwa̧muböködökwö ja̧awabi, ja̧danö sulabenö alewakwawabi, ja̧danö sulabenö 'da̧'da̧akwawa kwösödaduwi̧bi, ja̧danö sulabe jawa kwösödaduwi̧bi, kakatibaduwo chömöledö. Ja̧danö ökwöda kwemotö jö̧ba̧lö ösödakwawabi kakatibaduwo chömöledö, ökwöda kwemotö jö̧ba̧lö ösödakwawama, o̧'wo̧ jawa ösödakwawi̧danö ichejekwobetjö̧.
Efesios 5:3 - Dios Iwene3 Chömöledö, Dios ömöledö bakibinaduwobetjö̧ sulabe ja̧bökönö ja̧duwi. Ja̧danö, bakwo̧ ilekwo debo̧, jeluju jelujunöma ja̧böma kwö̧jaduwa. Ja̧danö, bakwuju jilekwe debujuma, jelo̧ jelo̧nöma ja̧böma kwö̧jaduwa. Ja̧danö, chömöledö, ju'wi taba̧lö̧ji jawabi ja̧köbaduwa. Ja̧danö, ju'wedö tjujuna̧li̧bi edö jwiinö ösödö, Chujuna̧lobö jö̧ta̧la, jö̧ba̧löma kwomukwataduwa. Chömöledö, Dios ömöledö bakibinaduwobetjö̧, ja'yubebi biya̧ sulabe jawa yötawaja̧ma kwi̧sebaduwoko. Gade chapit la |
Efesios 5:3
58 Referans Kwoze
Babema öwaitjöda yötawa chömöledö. Bakwo̧ ilekwobökujukwö jo̧bi, bakwuju jilekwebö̧kö̧kwö ju̧jubi, ju'wi jwiinö taba̧lö̧ji jawa ja̧badöbi Dios Cristokwö webö tjö̧jobekwöma yelösöda tetjachökakwedö. Ja̧danö, bakwo̧, böjȩ jawada ösödanö edö, Diosnö omukwatökönö böjȩ jawada ösödö edo̧ma Dios Cristokwö webö tjö̧jobekwö teachökakwo̧.
Ja̧danö ju'wedö yötja̧lena, Aaa, kwakwawama dukwobö jo̧be, ja̧danö dukwa'woma, kwakwawa'woda jo̧be jö̧ba̧lö. Jau chömöledö, jejenö jo̧be, ja̧danö kwakwawabi, dukwa'wobi söbebö loakwo̧ Diosma. Jo̧kwaijayonö diteba'oma söbebö loökakwo̧ Diosma chömöledö. Duluwo̧ Jesús iteba'o woawatjö tjeachajinö ja̧inadanö, ökwödö diteba'obi woawatjö tjeachajinö ja̧akwo̧ Diosma iteda ujulunö. Ja̧danö, jejenöobetjö̧, omukwatökönaduwi, Aaa, putasujunö ja̧titjö̧ma chiteba'o jawadaobetjö̧ sulökena jö̧ba̧lö. Jau chömöledö, diteba'oma putabedönö ja̧do jö̧ba̧lö jö̧ka'o, Duluwo̧ ösödi̧danö ja̧do jö̧ba̧lö ja̧'o chömöledö, ja̧danö Duluwo̧ma diteba'o ite'ada̧lobe.
Jau chömöledö, okobe jwiinö sulabenö tjomukwati̧ma, tjomajadetjö laebi̧, jojodönö kwabö lotjobö tjomukwati̧bi, tji̧lȩkwa̧muböködökwö sulabenö ja̧awa ja̧danö ju'wibi sulabenö 'da̧'da̧akwawa ja̧awa ja̧tjobö tjomukwati̧bi, tjönaukwobö tjomukwati̧bi, omöna yötja̧lobö tjomukwati̧bi, jojodönö sulabenö yötja̧lobö tjomukwati̧bi.
Jo̧kwaijayonö ju'wedöma tetjachökakwedö. Jobadöma 'yayi̧ Jerusalén comunidad ö'öböda tjuju̧kwakwedö, sulabedöma. Jobadöma mea bobadöbi, tji̧lȩkwa̧muböködökwö sulabenö ja̧döbi, jojodönö kwabawö lobadöbi, jojodö tjotidina tjo̧'wo̧ jawa tjo̧'wo̧ wana̧ladöbi, omöna yöba̧lö ja̧döbi. Jobadöma tetjachökakwedö— jö̧a̧lijatö Jesúsma.
Jo̧kwaijayonö jejenömaökö ju'wedönöma. Yebabinö, ¡Ayö! Diosnö chösöditjö̧ma inia tjötinö baledena, jö̧ba̧lö, yebabo̧danö yebabinadönöma otiwi̧ma chiyökakwo̧sa. Ja̧danö, Diosnö kabatibinadönöbi, ja̧danö, sulabedökwö pjabacha̧linadönöbi otiwa jawama chiyökakwo̧sa. Jobadönö ökwöla nöola okwa lotakwo̧sa. Ja̧danö, tji̧lȩkwa̧muböködökwö sulabenö ja̧binadönöbi, ja̧danö, jojodönö kwabö lobinadönöbi, ja̧danö, mea bobinadönöbi, ja̧danö, ju'wedö tjo̧'wo̧ tjöwana̧lobö tjotidinökwenö tjo̧'wo̧ wana̧linadönöbi, ja̧danö, bakwelajatebö omöna yöba̧linadönöbi, jobadönöma ökwöla nöola okwa lotakwo̧sa. Jobema jwiinö tubinö ubobe, azufre mikwi̧ tubi̧ma. Joola okwa lotji̧ma, 'dö̧ibaji̧ woawa mikwemi, jö̧ba̧lö weijatö Diosma ötjönöma, chiwȩyudobö.
Chömöledö, otiwanö kwö̧jaduwijayonö ja'yubeda jo̧be, chöpöjödi̧ma. Ökwödötjö ju'wedöma jelobekwöda omukwatö ja̧köbaduwobe. Ja̧ omukwatö ja̧köbaduwi̧ma yelösöda chöpöjöda, biya̧: Chedemi ina kwösödaduwobe damötjö ji̧na, Balaammine omukwatina, jo̧ba omukwatö ö̧jinadanö omukwatö ja̧nö. Damötjö Balaamminema weinobe la'aka luwo̧ Balacminenö Israel jojodönöma jelobekwö öibobö, sulabenö ja̧tjobö. Jejenö weökwe, Balacminema, Israel jojodönö, tjo̧'wo̧ jawa tjiyaja̧ kwakwawa tjukwoböbi, tji̧lȩkwa̧muböködökwö tjö̧joböbi, jelobekwö omukwatö ja̧tjobö öibinobe. Ökwödötjö ju'wedöma ina jo̧ba Balaammine sulabenö omukwatö ja̧inadanö omukwatö ja̧köbaduwobe.
Chömöledö, jwiinö suli̧ jawa cha̧ja̧kwobe ökwödönö, ökwödö kwö'da̧deduwitjö bakwo̧ ilekwobökujukwö ja̧i̧ wenema. Jau chömöledö, baikwö cha̧ja̧kwinobe: Ökwödö Jesúsnö ösödadötjö bakwo̧ma iteda abe'do ilekwonö ja̧bö jo̧ jö̧ba̧lö. Jejenö jwiinö sula chömöledö, ja̧danö böjȩ jojodö Diosnö öpöjödadöbi jejenö ja̧böködö, jwiinö sula jö̧ba̧lö.
Ja̧danö ju'wibi wetaduwakwö: Kwömöledöso̧ eju ösödöma kwedaduwoko, ötjö cheju baibanö chösöda, jö̧ba̧lö. Ja̧danö, kwömöledöso̧ ilekwonöma ösödöma kwedaduwoko, chösödoko, jö̧ba̧lö. Ja̧danö kwömöledöso̧ ömöayo̧nöbi ömöayujunöbi, ötjöda chömöayedö batjibanö chösöda, jö̧ba̧lö kwedaduwoko. Ja̧danö a̧jwi̧mu̧ pa̧kayönöbi a̧jwi̧mu̧ bu̧lu̧dönöbi ju'wi jayebi kwömöledöso̧ ujunani̧ma ösödama kwedaduwoko, ötjöda chajwimu batjibanö chösöda, ja̧danö iteabi ötjö chitea baibanö chösöda, jö̧ba̧lö— jejenö domulataja jawa weawa yöbawijetö Isabenö Jo̧ma.
Ja̧danö, ju'wi jawabi. Tjöbeba̧lö̧jönö kwite'ada̧laduwo ökwödötjö bakwo̧bi, bakwujubi, ilekwo̧bökujukwö, jilekwebö̧kö̧kwö tjalewapji jö̧ba̧lö. Ja̧danö, ju'wi jawabi. Tjöbeba̧lö̧jönö kwite'ada̧laduwo ökwödötjö bakwo̧ da'dömine Esau sulabenö omukwatinadanö omukwatapji jö̧ba̧lö. Chömöledö döwaisa. Esauma abönö pöenö otiwanö iyakwa̧ emibakwo̧ ji̧na, Dios weinadanö. Jo̧kwaijayonö jo̧bama abönö pöe otiwanö emibakwa̧ weinama öpöjödö, Dios iyakwa̧ma mikwawokobe, jö̧ba̧lö, ja̧ emibakwa̧ mikwanö iyinobe öjawo̧nö, kwakwawada bakwötanöda ukwobö emö.
Ja̧danö ju'wibi yebabinö chomukwatobe chömöledö, yemidanö kwiteboduwibe chichibenama, Dios ömöledö otiwanö ja̧bö tjö̧ji̧danö ina ja̧bökönö kwö̧jaduwiökwe, Diosma kwö'da̧deduwitjö tabakwö chö̧jobö ja̧ena, ja̧danö ökwödönö cho̧'wo̧ tjo̧achena, ajayi sulabenö ja̧köbinaduwa ina kakatibaduwokobetjö̧. Jau chömöledö, yebabinö chomukwatobe ökwödönö, ina tji̧lȩkwa̧muböködökwö ja̧awa katjatibinökena jö̧ba̧lö, tji̧lȩkwa̧muböködönö ösödinö omukwatakwawabi, ju'wi 'da̧'da̧bakwawö ja̧kwawa jawa tjösödi̧bi jö̧ba̧lö. Jejenö omukwatö ökwödönö pjabatö chiwȩyudajabe, kwujuluwaduwachibanö pjabatö chömöledö, kwiteboduwibe ichibö ökwödönö lȩtebapji jö̧ba̧lö.
Ja̧danö, ya̧dö damöbedönöbi baikwö ja̧bö tjö̧jobö kwöba̧ja̧dodönö: Ja̧bö tjö̧ji̧ma otiwanö Diosnö ösödadö ja̧bö tjö̧ji̧danö ja̧bö tjö̧jobö. Ju'wedönö omöna yöba̧lö tjoma'apekwönöma yötja̧loko, ja̧danö nio ojwiyo 'dukwachinö owa̧löma tjö̧joko, wainö ja̧bö tjö̧jobö kwöba̧ja̧dodönö, otiwa jawa ba̧ja̧dadö baibanö tjö̧jobö.
Jojodöma idödada ösödabikwawö tjö̧jakobe, ja̧danö jwaikwöda balada tjösödakobe, ja̧danö otiwadösa jö̧ba̧lö tjomukwatakobe, ja̧danö ju'wedötjö bajalekwönönöbedösa jö̧ba̧lö tjomukwatakobe. Ja̧danö, ju'wedönö sulabenö yötja̧lakobe, ja̧danö tjabe'dodönö tja̧ja̧kwökakobe, ja̧danö iyawa edö otiwanö iyajabe jö̧ba̧löma tjösödökakobe, ja̧danö Diosnö omukwatökönö sulabenö ja̧bö tjö̧jakobe.
Isabenö jö̧ta̧la, jejenöma wedoko. Jo̧kwaobetjö̧ kwialusöja diwȩyudo jobadönö wedakwöja. Moisés weinatjö ja'yubeda ja̧bö tjö̧jo wȩyudö lȩdebaduwo, chömöledö. Baikwö diwȩyudo: Ju'wedö tjo̧'wo̧ jawa ösödö, juwö iyawa kwakwawatjö u'yukwi̧ma kwukwaduwoko. Ja̧danö, ju'wi lȩdebi̧ma biya̧: Kwilekwobökujukwöbi kwö̧jaduwoko. Kwilekwebökökwöbi kwö̧jaduwoko. Ju'wi biya̧: Kwukwaduwakwo̧ma abönö ökwösobuma nijibe ebawinö nubö kwönaduwo, ökwösobu jwiinö baibanö. Itebiyama ökwösobukwö kwukwaduwoko. Chömöledö, jejenö, ja'yubeda wȩyudö lȩdebaduwo, Moisés weinatjö ja'yubeda ja̧bö tjö̧jobö.
Ja̧danö, ju'wi jawabi yötawakwö: kwömöledötjö ju'wedönö 'da̧batö kwujuno ökwönö pjabatadönö, wene juna̧ladö yötja̧lakwawi̧ a̧ja̧kwö omukwatö tjujunakwedönö. 'Da̧batö kwujunawö̧ma jweinö omukwatö kwujuno, Diosnö yebabinö ösödadönöda. Ja̧danö, jojodö tjösödawö̧nöda, jweinö omukwatadö, jö̧ba̧lö, 'da̧batö kwujuno. Ja̧danö, balada tjemobö omöna yöba̧löködönöda kwujuno. Jobadönöma wene junala̧dö yötja̧lakwawi̧ a̧ja̧kwö, omukwatö tjujunobö weköbo. Ja̧danö, jobadö 'da̧batö kwujunajawö̧tjö ju'wedöma tjömöledö domulatajabedö tjuluwedö batjibanö, tjömöledö wene juna̧ladö yötja̧lakwawi̧ a̧ja̧kwö omukwatö tjujunobö 'da̧batö kwujuno. Ja̧danö, ju'wedönö kwujuno, cincuentabedö tjuluwedö batjibanö, wene juna̧ladö yötja̧lakwawi̧ a̧ja̧kwö omukwatö tjujunobö. Ja̧danö, ju'wedönö kwujuno, cienbedö tjuluwedö batjibanö, wene juna̧ladö yötja̧lakwawi̧ a̧ja̧kwö omukwatö tjujunobö. Ja̧danö, ju'wedönö kwujuno, milbedö tjuluwedö batjibanö, wene juna̧ladö yötja̧lakwawi̧ a̧ja̧kwö omukwatö tjujunobö.
Jobadö sulabenö yöbawadöma jwaikwöda tji̧lȩkwa̧muböködökwö ja̧tjotö jö̧ba̧lö isakwadö, ja̧danö öpöjödachibökönö jwaikwöda sulabenö ja̧böda ju̧kwadö. Ja̧danö, ju'wibi, jwaikwöda balada tjemotö jö̧ba̧löda omukwatadö ja̧nö, tjo̧'wo̧ luwo̧nö ina da̧peachöködönö ötjibobedanö ichejekwa, 'daliwanö tjö̧libobö. Isabenö sulabenö ja̧bö tjö̧jobe chömöledö, jo̧kwajabetjö̧ Dios lȩebakwawö̧ tjö̧jobe.
Ja̧danö chömöledö, ida̧ökö i̧sebinadanö isabenö ökwödönö sulabenö yöbawadönö lȩebobö waiso̧. Jau chömöledö, jobadöma sulabenö 'da̧'da̧akwawa ösödö jwaikwöda sulabenö ja̧bö tjuju̧kwobe, ja̧danö Dios wei̧ öpöjödö tjuju̧kwobe, jo̧kwaijayonö Dios lȩebi̧tjö dötjibajökakwedö. Jau chömöledö, damötjö ji̧nadö jojodönö lȩebinadanö, ökwödönö sulabenö yöbawadönöbi ite'ada̧lobö waiso̧ Diosma chömöledö, lȩebakwa̧tjö dötjibapji jö̧ba̧lö. Jau chömöledö, jobadö sulabenö yöbawadöma, tjujuluwököjayonö, Aaa, juluwadösa, jö̧ba̧lö omukwatö, yebabökönö sulabenö yöba̧ladö ángelesdö juluwadönöma, idö ángelesdöma sulabedö jö̧ba̧lö.
Jo̧kwajabetjö̧ bakobe ökwödökwö te'ada̧lakwawa luwo̧ ja̧nö, kwujuluwaduwachibanö baikwö yötawa ökwödö te'ada̧lakwawa luwedönö: Diosma Jesúsnö ösödadönö kwite'ada̧laduwobö ujuninobetjö̧, jobadönö te'ada̧lö kwö̧jaduwo chömöledö. Ja̧danö jejenö kwite'ada̧laduwenama, öpöjödinö, Aaa, wetjökwechobetjö̧ chite'ada̧lo jö̧ba̧lömaökö chömöledö, te'ada̧lakwawa ösödö kwite'ada̧laduwo. Ja̧danö, sule balada kwemaduwotö jö̧ba̧löma kwite'ada̧laduwoko chömöledö, isabenö pjakataduwobö ösödö, jobadönö kwite'ada̧laduwo chömöledö.
Jobadö 'wi̧inö batjibobö jo̧be, yötjawoko jö̧tja̧li̧ jawa yötjawobetjö̧. Ja̧danö, jejenö yötjawoko jö̧tja̧li̧ jawa yötjawobetjö̧, ju'wedö jojodö okobe deinö tjömöledökwö isabenö wene katjatibobe. Jejenö sulabenö yöbawadöma otiwanö omukwatöma yöbawöködö, sule nöinö balada tjemotö jö̧ba̧löda, jojodönö omöna yöbawadö.
Jau Tito, Jesúsnö ösödadönö te'ada̧lakwawa luwo̧ma Dios otidawa jawa luwo̧ baibanö jo̧. Jo̧kwajabetjö̧ te'ada̧lakwawa luwo̧ otidobö kwujunakwo̧ma ju'wedö jo̧banö sulabenö yötja̧lobö jwibo̧nöda kwujunobö jo̧be. Ja̧danö, te'ada̧lakwawa luwo̧ otidakwo̧ma, Aaa, ötjöma waiso̧sa, jö̧ba̧lö omukwatö̧kö̧, ja̧danö juluwanö o̧'wo̧ sulachibö jö̧kö̧, ja̧danö 'dukwachinö nio ojwiyo owa̧lö̧kö̧, ja̧danö ju'wedönö ölakwabikwawö kwakwabö̧kö̧, ja̧danö iteda nöinö balada emotö jö̧ba̧lö ösödö̧kö̧, te'ada̧lakwawa luwo̧ otidakwo̧ma.
Chömöledö, baikwö wetaduwakwö: Ba̧kwȩlö̧jatebö otiwa jawa wene ösödadö otiwanö ja̧bö tjö̧ji̧danö ja̧bö kwö̧jaduwo chömöledö, ökwödökwö chö̧jitjö̧bi, detitjö̧bi ökwödönö yötjawi̧ cha̧ja̧kwakobetjö̧: Filipos jojodöma bakwainö ösödö 'diinö pjolachibökönö ju̧kwadötö jö̧ba̧lö, ja̧danö biya̧da isabenö wene jö̧ba̧lö, bakwainö omukwatö bakobe otiwa jawa wene tjöbeba̧lö ju̧kwadötö jö̧ba̧lö cha̧ja̧kwakobetjö̧.
Jobe jichibenama, kwösödaduwojö, Bisuma Duluwo̧ ömöayuju, jö̧ba̧lö. Ja̧danö, dömöledö Jesúsnö ösödadönö dösödobö Dios weinadanö, kwösödaduwojö kwömöledösujunöma. Febema ba̧jekwadönö pjabatuju, ja̧danö ötjönöbi pjabatinuju chömöledö. Ja̧danö, ökwödökwö jö̧jenama, ju'wi jaye jwibö jö̧jitjö̧ma, pjakataduwojö, ju'wedönö pjajatinadanö.
Ja̧danö, ja'yubebi suli̧ wei̧tjöma ja̧köbaduwa chömöledö. Wainö ja̧köbaduwo chömöledö. Ökwödönöma Dios ja̧inawö̧ja woawatjö tjekachajaduwinö chömöledö. Jo̧kwajabetjö̧, jo̧bada ömöayedö baibanö kwö̧jaduwo chömöledö. Jwaikwöda Dios wei̧da ja̧bö kwö̧jaduwo, suli̧ wei̧tjöma ja'yubebi ja̧bökönö. Ja̧danö, Dios ömöayedö ja̧nö, otiwanö ja̧bö kwö̧jaduwo, jo̧ba wei̧danö.
Jobadönöma baikwö yötawa: Okobe jwiinö Dios öpöjödi̧ jawada ja̧badö, ju'wedö tjitea ö'wiabinö omukwatadö, okobe jwiinö jojodö sulabenö ja̧tji̧bi ja̧bö ju̧kwadö. Ju'wedö tjitea ösödö, ö'wö 'yaabinö kwabö lobadö, ölakwabikwawabi jö̧ba̧ladö, omöna yöba̧ladö, ju'wedönö sulabenö ja̧tjotö jö̧ba̧lö omukwatadö. Ja̧danö, tjoma'apekwönö yöba̧lakwawadö,
Ja̧danö, ju'wibi yötawa: Inesö la'aka luwo̧, di̧ya sulojobö jö̧ba̧lö, di̧ya otiwojobö jö̧ba̧lö wajwibo̧ma sulabenö omukwatö webo̧. Jo̧bama itebonö ju̧kwadönö lȩ lö̧jökönö edö webo̧ tju̧kwa jawatjö, tjiteatjöbi ichejebö tjiyobö. Jobekwö weokobe inesö la'aka luwo̧ otiwanö omukwato̧ma. Jo̧ba otiwanö omukwato̧ma jobe ju̧kwadötjö, tju̧kwa jawatjö, tjiteatjö emawama jwiinö öpöjödo̧, sula, chemokobe jö̧ba̧lö. Jobekwö öpöjödö otiwanö omukwatobetjö̧ jo̧ba inesö la'aka luwo̧ma lekwe yöbawö webö ö̧jakwo̧.
Jerico jojodönö dujuluwenama, dujuluwajawö̧ tjiteatjö chedijatö, kamijido̧ babilonia nijitjö otikwa̧do̧ jwiinö otiwa̧do̧ wamesa̧do̧ma, ja̧danö ju'wibi plata ö̧pi̧ya doscientos ö̧pi̧ya chedijatö, ja̧danö ju'wibi orotjö cincuenta ö̧piyadanö ömöka'o chedijatö. Jejenö edajo̧, ötjöda chemotö jö̧ba̧lö chösödijatö, ja̧danö emajo̧, cheju i̧sȩdo̧tjö otikweju okwa sobö o̧tjö chotojijatö. Jau Josue, ja̧ chemina jawama, babe cheju okwa, niji okwa jo̧be, ja̧danö ju'wi jawa teebe, plata ö̧pi̧ya bo̧be, —jö̧ba̧lö atadinobe Acanma.
Jau Timoteo, baikwö wanedö yötawa: Balada ösödakwawama, sulabe bö'diadanö ji̧, ja̧danö balada ösödakwawatjö, nöinö suli̧ pokwobedanö ichejekwa. Ja̧danö, ju'wedö nöinö balada tjujuna̧lobö tjösödobetjö̧, Cristonö ösödö dö̧ji̧tjö 'da̧bachibö tji̧'yajabe, balada tjujuna̧lobö isakwö. Ja̧danö, jejenö 'da̧bachibö tji̧'yajabema, kabatökönö jwiinö o̧'wo̧ tjo̧achadö tjuju̧kwobe.
Ja̧danö jejenö atadajo̧ Jesúsma tupakwö yöawinobe: —Chömöledö, te'ada̧lönö kwö̧jaduwo, jwaikwöda kwemaduwotö jö̧ba̧lö isakwö kwö̧jaduwapji jö̧ba̧lö. Jau chömöledö, ju'wedö tjomukwatena nöinö chujuna̧litjö̧ma otiwanö chö̧jena, jo̧kwaijayonö ja̧maökö. Isabenö ja̧kwawa mikwawi̧ma, nöinö tjujuna̧li̧ jawadamaökö chömöledö— jö̧ba̧lö.
Piblisite