Efesios 2:10 - Dios Iwene

¹⁰ Chömöledö, Diosma ökwödönö otiwanö pjabatijetö yemidanö do̧'wo̧ luwo̧nö 'yabibajadö badibanö. Ja̧danö, otiwanö pjabatijetö, Cristo Jesúskwö bakobe dötewadö badibanöma. Diosma jejenö pjabatijetö ökwödönöma, otiwanö ja̧bö dö̧jobö. Ajayitjöda omukwatijetö ökwödönöma, do̧'wo̧ luwo̧nö 'yabibajadö, Cristo Jesúskwö dötewadö otiwanö ja̧bö dö̧jakwa̧ma.

Efesios 2:10 Referans Kwoze

Filipenses 2:13

Jau chömöledö, Diosma ba̧kwȩlö̧jatebö ökwödönö otido̧, jo̧ba ösödi̧danö kwösödaduwakobetjö̧, ja̧danö jo̧ba ösödi̧danö ja̧köbaduwakobetjö̧.

Colosenses 1:10

Duluwo̧ ömöledö tjö̧jo jö̧tja̧li̧danö kwö̧jaduwo jö̧ba̧lö. Jau chömöledö, Duluwo̧ ösödi̧danö ja̧bö kwö̧jaduwobö dösöda, ja̧danö okobe jwiinö otiwanö ja̧awa jwaikwöda ja̧bö kwö̧jaduwobö dösöda, ja̧danö tupakwö Diosnö kwöwaisaduwobö dösöda.

2 Corintios 5:17

Jau chömöledö, Cristonö ösödadöma ida̧ökö jo̧bakwö wotjinobe, ja̧danö ida̧ökö jo̧bakwö tjetjachajinobe. Jo̧kwajabetjö̧, baikwö jo̧be chömöledö, bakwo̧ Cristokwö dötewanö ö̧jitjö̧ma, Dios 'yayinö otidajökwe baibanö jo̧ jo̧bama. Jau chömöledö, Cristokwö dötewadönöma, damö jawama ida̧ökö 'dö̧ibajinobe, ja̧danö babe dö̧ji̧ma, 'yayinö ja̧kwawa baibinobe. Jo̧kwajabetjö̧ chömöledö, damö jawa ida̧ökö 'dö̧ibajinobetjö̧, tupakwö ja̧ jawa domukwatoböma jwiobe, jwaikwöda 'yayinö ja̧kwawa jawada domukwatobö jo̧be.

2 Corintios 9:8

Ja̧danö baikwö yötawaduwakwö chömöledö, Diosma isabenö juluwo̧, a̧'dȩlökönö okobe jwiinö jwiköbaduwi̧ iyakobetjö̧, ja̧danö jwiköbaduwi̧tjö bajalekwönönö nöinö iyakwo̧ chömöledö. Jau chömöledö, jejenö iyakwo̧, ökwödöbi kwujuna̧laduwakobetjö̧, ja̧danö ju'wedönö pjakataduwoböbi kwujuna̧laduwakobetjö̧.

Efesios 4:24

Ja̧danö, ju'wi, 'yayi̧ jawa, otiwanö omukwataduwi chömöledö, Dios otiwanö omukwati̧danö. Dios otiwanö omukwati̧ma, isabenö suli̧ jwii̧ omukwati̧, wainö ji̧ jawa omukwati̧ma.

Filipenses 1:6

Jau chömöledö, Diosda ökwödönö otiwa jawa kwo̧'wo̧ luwo̧duwi jawa jamatö otidinama, ¿jö̧tö? Ja̧danö chöwaisa, jamatö otidina jawama, Diosma okobe jwiinö otidö kaatakobe jö̧ba̧lö. Ja̧danö, Jesucristo yemidanö ichakwa̧ möle baibenama ja̧ okobe jwiinö kwo̧'wo̧ luwo̧duwinö otidi̧ma kaatakwawakobe chömöledö.

2 Timoteo 3:17

Jau Timoteo, Dios iwene jejenö tjöba̧ja̧dobö jo̧be, Dios ömöayedöma isabenö otiwanö otikwa waisachibö, okobe jwiinö Dios jobadönö wei̧ otiwanö waisanö tjotidakobetjö̧.

Efesios 4:1

Jo̧kwaobetjö̧ chömöledö, Diosma ökwödönö otiwanö pjaatobetjö̧ budekwö lȩtebaduwakwö, Otiwanö Dios ösödi̧ jawada ja̧bö ju̧kwaduwi, jö̧ba̧lö. Ötjöma Duluwo̧ weina yötawobetjö̧ ka̧lena ba̧kwaweju okwama bo̧sa. Bena ba̧nö budekwö lȩtebaduwakwö, baikwö: Diosma ökwödönö jwöinobe iteda ömöledö bakibaduwobö. Jo̧kwaobetjö̧, iteda ömöledö bakibinaduwobetjö̧ otiwanö ja̧bö ju̧kwaduwi, iteda ösödi̧ jawada ja̧bö, chömöledö.

2 Timoteo 2:21

Jejenö jo̧be Timoteo, ja̧danö baikwö yötawakwö: Bakwo̧ suli̧tjö 'da̧bachibö ja̧nö idichawitjö̧ma, Dios ömöayo̧ otiwo̧ ö̧jena, dȩja̧pa̧ nöinö mikwawapa̧danö. Ja̧danö, suli̧tjö 'da̧bachibö ö̧jobetjö̧, Duluwo̧ jo̧banö otiwanö weobö ja̧kobe, isabenö okobe jwiinö otiwi̧ otikwa otidobö.

Tito 2:14

Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

Isaías 43:21

Ökwödö ötjöda chömöledö bakibaduwanö chotidinawö̧nö pjabatö, jobekwö chotidakwo̧sa chömöledö, ja̧ baledi̧ edö, —Diosma isabenö iteda ömöledönö otiwanö pjabato̧, —jö̧ba̧lö ötjönö ösödö yöka̧laduwakobetjö̧, jö̧ba̧lö yöa̧lobe Diosma, ökwödö Israel jojodönö.

Efesios 1:4

Ja̧danö ajayinö, böjȩ ina otidapjii Diosma omudawö junijetö ökwödönöma iteda ömöledö babibö, Jesúskwö bakobe dötewinö badibakwa̧ma. Ja̧danö, omudawö junijetö iteda öba a'otjö suli̧ jwiinö, wene jwibadö badibakwa̧ma.

1 Timoteo 6:18

Ja̧danö, balada luwedönö otiwanö ja̧tjobö yöbawidönö, baikwö wanedö yötawa: Otiwanö ja̧awa luwedö baibanö tjuju̧kwobö yöbawidönö, a̧'dȩlökönö ju'wedönö pjabatö.

Tito 3:14

Jau Tito, ökwödö dömöledö jobe Cretanö ju̧kwadö Jesúsnö ösödadöma tjöwaisachibobö jo̧be, otiwanö ja̧bö tjö̧jobö. Ja̧danö, inesö pjatjato jö̧tja̧li̧ma otiwanö pjatjatena, mikwa jwii̧ jawada ja̧bö tjö̧japji jö̧ba̧lö.

Hebreos 10:24

Ja̧danö chö̧ja̧wo̧dö, ökwödöma dömöledökwö ja̧nö domajadenö budekwabinö yödawakwawobö jo̧be, Dömöledönö ösödabikwawö dö̧jaduwo, bakwelajatebö pjabatö, jö̧ba̧lö.

Tito 3:8

Jau Tito, biya̧ yötawaja̧ma, jweinö yötawajabe. Tito, biya̧ ökwönö yötawaja̧ma, Jesúsnö ösödadönö yökawobö chösöda. Ja̧danö, otiwanö tja̧ja̧kwobö webidönö, jobadö Diosnö ösödadöma jwaikwöda otiwanö ja̧awa ja̧badö batjibanö tjuju̧kwakobetjö̧. Jejenö ja̧bö ja̧kwawama otiwa, ja̧danö jojodönö pjaatakwawa ji̧.

Colosenses 3:10

ja̧danö balekwado̧ 'yabayo̧ o̧'wo̧ luwo̧ ökamijido̧ 'dukawinaduwobe ichejekwa. Jau chömöledö, jo̧ba 'yabayo̧ kwo̧'wo̧ luwo̧duwima, Dios otidinökwe, ja̧danö jo̧banö otidobe Diosma, Diosdanö ichejekwo̧ baibanö, otiwanö Diosnö kwöwaisaduwakobetjö̧.

Tito 2:7

Jau Tito, ökwöbi okobe jwiinö ökwö ja̧bö kwö̧ji̧ma, otiwanö ja̧bö ja̧kwawa i̧sebö kwö̧jo, ju'wedö edö tjöwaisakobetjö̧ otiwanö ja̧bö ja̧kwawama. Ja̧danö, jojodönö yöbawö kwö̧ji̧ma, bakwainö otiwanö omukwatö, obökönö yökawo,

1 Corintios 3:9

Jau chömöledö, ötjöbi, Apolosbi bakobe Dios wei̧ otidö batjo otikwa jojodödanö ichejekwadösa. Ja̧danö, ökwödö Corintio jojodöma Dios öbatjodanö ichejekwadöja chömöledö. Ja̧danö ju'wi wanedö yötawa chömöledö: Ökwödöma Dios ejudanö ichejekwadöja.

1 Pedro 2:12

Jau chömöledö, ökwödöma Diosnö ösödöködö tjö'da̧de ja̧nö, otiwanö ja̧bö kwö̧jaduwo, otiwanö ja̧bö kwö̧ja̧duwi̧ tjedakobetjö̧. Ajayinöma isabenö ökwödönö wanedö sulabenö ja̧badö jö̧ba̧lö yötja̧lena chömöledö, jo̧kwaijayonö jwaikwöda otiwanö ja̧bö kwö̧jaduwitjö̧ma, otiwanö ja̧bö kwö̧jaduwi̧ edö tjöwaisachibena, Aaa, Jesúsnö ösödadöma isabenö otiwanö ja̧bö ju̧kwadö, jö̧ba̧lö. Ja̧danö chömöledö, jejenö tjöwaisachibobetjö̧, 'dö̧ibaji̧ möle Dios ichakwa̧ möle badekwachenama, jo̧banö tjösödena, Otiwo̧ja, jö̧ba̧lö.

Tito 3:1

Tito, belö yödawina tjomukwatibobö yöbawi Cretanö ju̧kwadö Jesúsnö ösödadönö, la'aka tjuluwedö wetji̧bi, ju'wedö tjuluwedö wetji̧bi ja̧bö tjö̧jobö. Jau Tito, öpöjödabökönö tjo̧'wo̧ ösöwanö tjuluwedö wetji̧ ja̧bö tjö̧jobö jo̧be. Ja̧danö, okobe jwiinö otiwanö ja̧awa ja̧bö dö̧jo jö̧ba̧ladö batjibanö tjö̧jobö,

Isaías 29:23

Jau, ja̧ möle itji̧mu tupadanö jojodö, ötjöda chotidinawö̧ israel jojodönö edakobe, itebö nijinö ja̧nö, ötjönö ösödö tjö̧jakwa̧ma. Ja̧ möle tja'dömine Jacob ösödinökwe Sulabe Jwibo̧ Diosnö ösödö, —Isabenö otiwo̧ da'dö ösödinökwe Diosma, —jö̧ba̧lö ösödö tjö̧jakwedö, ja̧danö ötjö Israel jojodö tjösödökwe Diosnö omukwatö, tjöbajale jalaka baibanö ösödö tjö̧jakwedö.

Mateo 5:16

Ökwödöbi ja̧danö chömöledö. Ökwödö böjȩ jojodö tjö'da̧de ja̧nö, otiwanö ja̧bö ja̧nö kwidejataduwo, okobe deinö otiwanö ja̧bö kwö̧jaduwi̧ tjedakobetjö̧, ja̧danö jejenö edö, okobe deinö mölejȩbe jo̧ kwabe'doduwinö tjösödakobetjö̧— jö̧ba̧lö yöawinobe Jesúsma.

Juan 3:21

Jo̧kwaijayonö Dios wei̧ a̧ja̧kwö ja̧döma Dios weinökwe dewinö jo̧ idejatobekwö 'ya̧dö, otiwanö ja̧tji̧ öwaitjöda öwawobö, Ökwödö otiwanö ja̧bö dö̧ji̧ma Dios pjaati̧tjöda otiwanö ja̧dösa, jö̧ba̧lö.

2 Tesalonicenses 2:17

ökwödönö kwo̧'wo̧ luwo̧duwi ösöwachibanö pjatjatobö dösöda, ja̧danö kwujuluwachibaduwanö pjatjatobö dösöda, yöka̧laduwi̧bi, kwotidaduwi̧bi ba̧kwȩlö̧jatebö otiwanö ja̧köbaduwakobetjö̧.

Romanos 8:29

Jau chömöledö, Diosma la'akatjöda öwaisinobe jo̧banö tjösödakwedönöma, iteda ömöledö batjibakwedönöma. Ja̧danö, jejenö waisö, jobadönö 'da̧batö ujuninobe, iteda itji̧ Jesúsdanö ichejekwadö batjibo jö̧ba̧lö. Ja̧danö, weinobe, Jesúsda iteda i̧tji̧mutjö abönö pöe baibobö, ökwödö döpöe baibobö chömöledö.

Hechos 9:31

Ja̧ mölema okobe deinö Jesúsnö ösödadöma Judeanö ju̧kwadöbi Galileanö ju̧kwadöbi Samarianö ju̧kwadöbi otiwanö ju̧kwijadötö, usula emawökönö. Ja̧danö, Dios O̧'wo̧ Luwo̧ pjaatobetjö̧ Diosnö omukwatö tjo̧'wo̧ luwo̧nö ösödö juluwijadötö, tjo̧'wo̧ luwo̧ jawama. Ja̧danö, Diosnö otiwanö yebabinö omukwata̧lö ju̧kwijadötö. Ja̧danö, Dios O̧'wo̧ Luwo̧ pjaatobetjö̧ ba̧jekwachijadötö Jesúsnö ösödadöma.

Isaías 60:21

ja̧danö okobe deinö kwömöledö israel jojodöma, bakobe weti̧ a̧ja̧kwö tjö̧jakwedö, ja̧danö 'döbibajökönö, ba̧kwelöjatebö otiwanö israel nijinö tjö̧jakwedö. Jau chömöledö, jojodö towi tjujuni̧danö, ötjöda israel jojodönö chujunocha, —Duluwo̧ Diosma otiwo̧, —jö̧ba̧lö ötjönö tjösödakobetjö̧. Ja̧danö chujunajawö̧, otiwanö 'diinö tjö̧jakwedö.

2 Corintios 5:5

Diosda diteba'o otiwa'o ökwödönö iyobö omukwatö ujuninobe chömöledö, ja̧danö jejenö iyakwa̧ wenema ökwödönö yöbawö ujuninobe. Baikwö yötawa Dios ökwödönö yöbawö ujunina wenema chömöledö: Diosma iteda O̧'wo̧ Luwo̧nö ökwödönö iyinobe, isabenö tupakwö kwiteba'o 'yaya'obi chiyakobe jö̧ba̧lö. Ja̧danö chömöledö, Dios O̧'wo̧ Luwo̧nö ida̧ökö dujuna̧lobetjö̧, ju'wibi döwaisobö jo̧be, tupakwöma diteba'o 'yaya'obi dujuna̧lakwedösa jö̧ba̧lö. Jau chömöledö, ja̧ wene yöbawö junö Diosma iteda O̧'wo̧ Luwo̧nö ökwödönö iyinobe.

Isaías 44:21

Ja̧ jawa kwomukwatibaduwo ökwödö Jacob itji̧mu tupadanö jojodö, la'akatjöda jobadö ja̧tji̧danö ja̧köbaduwoko ökwödö Israel jojodö, ökwödöma ötjöda chömöayedököbaduwobetjö̧. Jau, ötjöda ökwödönö otidö chujunijatö̧, ötjöda chömöayedö kwö̧jaduwobö, ja̧danö ötjöma ökwödö israel jojodönö la'akatjöda cho̧'wo jwitibökakwo̧sa.

1 Timoteo 5:25

Jojodö otiwanö ja̧tji̧bi ja̧danö. Ju'wedökwena otiwanö ja̧tjenama, juluwanö öwawobe, okobe deinö edö tjöwaisobö, otiwanö ja̧tjinobe jö̧ba̧lö. Ja̧danö ju'wedökwena otiwanö ja̧tjenama, juluwanö öwawokobe otiwanö ja̧tji̧ma, jo̧kwaijayonö juluwanö öwawököjayonö, tupakwö öwawakobe otiwanö ja̧tjinobe jö̧ba̧lö.

1 Timoteo 5:10

ja̧danö, wobekwinadötjö tjite'ada̧lakwawö̧ma sule jojodö, Bidöma otiwanö ja̧bö ji̧nadö, jö̧ba̧lö tjöwaisawö̧nöda. Ja̧ otiwanö ja̧bö tjuju̧kwina jawama baikwö yötawa: Otiwanö tji̧tji̧munö bötjatö, jelobetjö ichajadönö tjejunö tebatö, ju'wedö Jesúsnö ösödadö tjömöayujudanöbujusa jö̧ba̧lö pjabatö, usula emawadönö pjabatö, ja̧danö jwaikwöda okobe jwiinö otiwanö ja̧awa ja̧bö. Jejenö ja̧bö ji̧nadö ya̧dö tji̧lȩkwa̧munö wobekwinadönöda kwujuno, Jesúsnö ösödadö tjite'ada̧lawö̧, jö̧ba̧lö

1 Juan 1:7

Jo̧kwaijayonö ökwödötjö bakwo̧ otiwanö ja̧bö, dewinö jo̧ Dios omukwati̧danö omukwatö jo̧ma, dewa'wo okwa kwebachö jo̧, Dios ö̧jobema. Jejenö kwebacho̧ma isabenö omajadenö Dioskwö bakobe dötekwö jo̧, Dios iwene, isabenö ji̧ wene ösödö. Ja̧danö, jejenö ja̧nö jo̧ba dewa'wo okwa kwebacho̧ma Cristotjö ö̧ja̧wo̧dönö ile nibebö ö̧jobe. Ja̧danö, jo̧bama Dios öba a'otjö okobe jwiinö suli̧tjö dichö loinökwe, Dios Itji̧ Jesús ökwösobu ebawinö imidawinobetjö̧. Chö̧ja̧wo̧dö, ökwödöma jejenö kwi̧'yaduwobö jo̧be, kwomajadeduwinö Dioskwöbi, kwö̧ja̧wo̧dökwöbi bakobe dötekwö ja̧nö.

Hechos 9:36

Jobetjö Lidanö jejenö baledonö jelobe, Jope mikwobe, jobe jujuma, Tabita mikwujuma ö'wöchaju ö'wö babibijotö. Ja̧danö, jobujuma Jesúsnö ösöduju. Jobujuma, griego tjiwenenö Dorcas mikwuju. Jobujuma ina 'yajayi otiwanö pjabatö ji̧abijotö. Kabatökönö pjabatiabijotö usula jojodönö. Ja̧danö ö'wö baibajajunö ju'wedöma dichijadötö jobujunöma, wobajadönö dichajitjadanö. Dichajadöma mösȩko̧nö lödijadötö, Jojodö edö tjichakobe, jö̧ba̧lö.

Isaías 61:3

Jau, okobe deinö Jerusalen comunidadtjö budekwadönö, ökwölaso̧pja tjuunö tjöwanajelö, balekwaka o̧bubiyatjö otikwaka butjawaka tjubutjawobö chiyobö weökwesa, ja̧danö tjubudesobu ji̧nemi, balekwobu o̧'wo ösöwachibakwawa o̧te chiyobö weinökwesa, ja̧danö budekwadö 'dutjawa̧do̧ 'dutjawajemi, balekwa̧do̧ tjo̧'wo ösöwachibanö Diosnö ösödadö 'dutjawa̧do̧ chiyobö weinökwesa. Ja̧ möle 'diinö ja̧nö Dios wei̧ a̧ja̧kwö tjö̧jobetjö̧, —Isabenö Jo̧ wei̧ a̧ja̧kwi̧owi encina towibiya, —jö̧ba̧lö ötjabikwawö̧. Jobekwö 'diinö tjö̧jobö ujunakwo̧ Diosma, jobadönö edö, jo̧banö otiwanö omukwatö tjösödakobetjö̧.

Isaías 19:25

Jobadö wapösokwa jojodöma Isabenö Jo̧ Okobe Jwiinö Juluwo̧ Dios pjaati̧tjö isabenö otiwanö tjemakwedö. Diosma jobadönö yöawakwo̧, —Isabenö otiwanö pjatatakwawö̧, chömöledö Egipto jojodönöbi, ötjöda chotidinawö̧ Asiria jojodönöbi, ötjöda chömöledö batjibanö 'da̧batö chujuninawö̧ Israel jojodönöbi, —jö̧ba̧lö, jadanö yöawaja̧danö badekwachinö isabenö jobadönö pjaatakwo̧.

Gálatas 6:15

Chömöledö, dötade bajalesado̧ 'wibekwadö dö̧ji̧bi, 'wibekwöködö dö̧ji̧bi ja'yubebi mikwawokobe chömöledö, ju'wida mikwawi̧ma, 'yabayedö dö̧ji̧da.

Romanos 8:1

Ja̧danö chömöledö, babema Cristo Jesúskwö a̧jö dö̧jobetjö̧ bakwo̧bi deobe ökwödönö yöba̧lo̧ma, Bidöma sulabedö, Dios lȩebakwawö̧, jö̧ba̧lö.

Deuteronomio 32:6

Ökwödöma wajwibadö omukwatöködödanöbedöja chömöledö, baikwö yötawa: Isabenö Jo̧ma kwabe'doduwibo̧, jo̧bada ökwödönö otidinobetjö̧, ja̧danö ju'wibi ökwödönö otidajo̧, kwiteboduwisaso juluwaso bakibaduwanö ujuninobe, jö̧tö? Isabenö otiwanö pjaatinobe chömöledö, ja̧danö jejenö pjaatiawö̧ balekwa mikwa jo̧banö kwöpöjödaduwobö otiwenaji̧? Sula chömöledö, jo̧banö kwösödaduwo jö̧ba̧ladöja.

Efesios 2:2

Jejenö ja̧böda ju̧kwiaköbinaduwobe ökwödöma, Diosnö wajwibadö sulabenö ja̧tji̧danö ja̧bö. Ja̧danö, Awetja ösödi̧da ja̧bö ju̧kwiaköbinaduwobe. Jo̧bama iteda ömöayedönö, öwawöködönö webo̧. Ja̧danö, babema böjȩnö ju̧kwadönöbi webo̧, Dios wei̧ öpöjödadönö.

Isaías 43:7

Jau, okobe deinö ötjö chiminö ötjabawö̧, —Bidöma Isabenö Jo̧ ömöledö israel jojodö, —jö̧ba̧lö ötjabawö̧nö chichejebakwo̧sa. Ötjöda jobadönö dadö chotidijatö, ötjöda tjitebosaso batjibanö chotidijatö, ötjö Diosnö tjösödakobetjö̧. Jo̧kwajabetjö̧ jobekwö tjebatajö chichejebakwo̧sa, chömöledö pjelekwachibö ja̧dönö, jö̧ba̧lö yöawobe Diosma, israel jojodönö.

Efesios 1:1

Ötjö, Pablo, böja kwialusöjanö yöbawö chiwȩyuda. Ötjöma Cristo Jesús webawo̧sa, Diosma jejenö omukwatö ösödinobetjö̧. Ökwödönö chiwȩyuda, Éfesonö ju̧kwadönö, Dios ömöledö babibinadönö, Cristo Jesúsnö kwo̧'wo̧duwi wana̧lö ja̧dönö.

Efesios 2:6

Ja̧danö, Diosma ökwödönöma, wobinadö yemidanö tjedachajinö ja̧inobe, Cristokwöda dö̧bajobö mölejȩbe. Chömöledö, Diosma Jesúsnö yemidanö tjeachajinö ja̧enama ökwödönöbi, Cristo Jesús tjeachaji̧danö tjedachajinö ja̧inobe.

Efesios 2:13

Ja̧danö, ajayinöma Diostjö 'da̧bachibö, jo̧ba ö̧jelöma ödöda kwö̧jinaduwobe, chömöledö. Ödö kwö̧jinaduwajayonö babema Cristo Jesúskwö bakobe dötewanö kwö̧jaduwinö bakibinaduwobetjö̧ Diosma iteda ö̧jobekwö kwichibaduwobö ja̧inobe. Chömöledö, Cristo Jesús, iteda ökwösobu ebawinö imidawinobetjö̧ Diosma iteda ö̧jobekwö kwichibaduwobö ja̧inobe.

Efesios 2:15

Cristo Jesús midawö woinobetjö̧ Dios wei̧, Moisés iwȩyudinama mikwawökönö baibijetö. Jejenö ja̧bijetö Cristo Jesúsma, judío jojodöma judío jojodöböködökwö öpöjödakwawökönö tjö̧jobö, wainö ja̧bö jö̧könö. Ja̧danö, Jesúsma ja̧bijetö judío jojodöma judío jojodöböködökwö bakwaibedödanö batjibanö. Ja̧danö, Jesúskwö bakobe dötewanö ja̧nö, 'yaba̧ladödanö, tjo̧'wo̧ ösöwanö ja̧dö batjibinö ja̧bijetö Jesúsma.