Deuteronomio 9:1 - Dios Iwene

¹ Tupakwö yöawinobe Moisesma, israel jojodönö: —Chömöledö israel jojodö, a̧ja̧kwaduwitjö: Ökwödöma juluwanö Jordan ojwe pekibaduwakwedöja, ju'wedö tjitebo niji 'döbebö, ökwödöda kwiteboduwi baibanö kwemaduwakobetjö̧. Jobadöma ökwödötjö bajalekwönönö tjö̧ba̧jekwijayonö, ja̧danö ökwödötjö bajalekwönönö tjujuluwijayonö, ja̧danö tjitebo comunidad möakwö mölejebe ichibanö 'diinö tjöekwijayonö, jobadönö kwujuluwaduwobö pekibaduwakwedöja.

Deuteronomio 9:1 Referans Kwoze

Deuteronomio 11:31

—Jau chömöledö juluwanö Jordan ojwe pebibö, kwuluwo̧duwi Isabenö Jo̧ Dios ökwödönö iyakwȩmi nijibe kwi̧'yaduwakwedöja, ja̧danö ja̧ niji kwiteboduwi baibanö emajadö, jobe kwö̧jaduwenama,

Deuteronomio 4:38

Ja̧danö ökwödöma kwiteboduwi kwujuna̧laduwakobetjö̧, jo̧bama ju'wedö tjitebo jojodönö a'dewö loinobe, jobadö tjiteboinemi nijinö ökwödöda kwö̧jaduwobö. Jau chömöledö, jobadö a'dewö loinawö̧ma ökwödö israel jojodötjö bajalekwönönö juluwadö tjö̧jinobe, jo̧kwaijayonö yayonö iteda ujulunö jobadönö ujuluwinobe, ja̧danö tjö̧jinemi niji ökwödöda kwiteboduwi baibanö iyinobe. Ja̧u chömöledö, babe möle ja̧ niji juna̧ladöja, ökwödöda kwiteboduwi ji̧nö.

Deuteronomio 1:28

Jobe di̧'yobö jwiobe, isabenö labobetjö̧. Jau, dömöledöma yedaibanö yötjawajabe, jobe ju̧kwadö inesö tjujuluma. Tjitebobetjö edö kwebachajadö, yötjawajabe: Jobe ju̧kwadöma ökwödötjö bajalekwönönö ödöbaedö, ökwödötjö bajalekwönönö juluwadö, ja̧danö tjitebo comunidadbiyama, otiwanö 'diinö tjöekwobe, tjöekwemima mölȩjȩbe ichibenanö. Ja̧danö ju'wibi, jobe inesö juluwadö ödöbaedö anaquitas jojodö ötjabawö̧nö dedijatö, jö̧ba̧lö tjedaja̧ yötjawinobe. Isabenö ja̧ niji tedachoböma jwiobe, labobe, –jö̧ba̧lö Dios jobe kwi̧'yaduwobö wei̧ma kwöpöjödinaduwobe.

Josué 1:11

—Jojodö tju̧ju̧kwemi ba̧kwemeachibanö kwebachö jojodönö yökawaduwo baikwö: –Wapötakwa möle baledibajenama, Jordan ojwe pedibakwedösa, Duluwo̧ Isabenö Jo̧ Dios iyakwa̧ niji ditebo baibanö demobö. Jo̧kwajabetjö̧ kwu̧kwaduwa kwakwawa ko̧ko̧dö kwotidaduwo, —jö̧ba̧lö yötjawobö weinobe Josuema.

Deuteronomio 11:23

Isabenö Jo̧ma isabenö okobe deinö kwöpöjojodö, babe kwiteboduwinö ju̧kwadönö a'dewö loakobe, kwöba a'oduwitjö. Ja̧danö chömöledö, jobadöma ökwödö kwö̧ba̧jȩkwaduwitjö bajalekwönönö tjö̧ba̧jȩkwijayonö, ja̧danö kwujuluduwitjö bajalekwönönö tjujuluwijayonö, jobadö tjiteboinemi nijinö kwöjaduwakwedöja, Diosnö kwösödaduwiökwe ökwödönö pjaatobetjö̧.

Deuteronomio 7:1

Tupakwö yöawinobe Moisesma, israel jojodönö: —Chömöledö, kwuluwo̧duwi Isabenö Jo̧ Diosma ökwödönö öibakobe, tekachaduwakwa̧ nijibe, jobe tebachajadö kwiteboduwi baibanö kwö̧jaduwobö. Ja̧danö, köbaduwi a'otjö, jelemutjö dötölataja tjitebokwena jojodönö a'dewö loakobe, hititas jojodönöbi, gergeseos jojodönöbi, amorreos jojodönöbi, cananeos jojodönöbi, ferezeos jojodönöbi, heveos jojodönöbi, jebuseos jojodönöbi. Jobadöma kwujuluduwitjö bajalekwönönö juluwadö, ja̧danö kwö̧ba̧jȩkwaduwi̧tjö bajalekwönönö ba̧jȩkwadö chömöledö,

Deuteronomio 3:18

Tupakwö yöawinobe Moisesma, —Ja̧danö, ja̧ möle ökwödö niji chiyinawö̧nö wetijatö, baikwö: –Kwuluwo̧duwi Isabenö Jo̧ Diosma ökwödönö iyajabe, bemi nijinö kwö̧jaduwobö, kwiteboduwi baibanö. Jo̧kwaijayonö, ida̧ökö jejenö kwiteboduwi kwujuna̧laduwijayonö, yayonö ökwödötjö ölakwabikwawadöma Jordan ojwe pebibö, tjölakwabikwawobö ja̧kobe. Jau, okobe deinö ökwödötjö ölakwabikwawadöma, ju'wedö kwömöledöduwi israel jojodö tjabönö, ölakwabikwawa jawa kwebatö pekibaduwobö ja̧kobe.

Josué 4:19

Ja̧ möle jejenö baledina mölema, ajayi jawo̧tjö domulataja jawa möle baledinobe. Ja̧danö, ojwe baledajadö, Guilgal ötjabobe tjabakwemi tjujuninobe, jobe tjabekwobö. Jobe Guilgalma, Jerico comunidad ö'öbö jo̧be, jawo̧ laebobekwö.

Josué 4:5

Ja̧danö, jobadönö jwöbajo̧, Josuema weinobe: —Kwuluwo̧duwi Isabenö Jo̧ Dios iteapjo ojwe okwa jo̧bekwö 'ya̧wibaduwi, ja̧danö jobetjö bakwo̧nökwena inawa bakwawa omudawö kwemaduwo, okobe jwiinö doce inawiya baibanö. Jau, israel jojodötjö docesaso dö̧jobetjö̧, doce inawiya kwemaduwo,

Josué 3:16

ojwema isuwö kaatibinobe. Ja̧danö, ojwiyo isuwo jö̧a̧lajobuma, ödö, u'da Saretan yöne comunidad Adan mikwobe ö'öbö okwatinobe, a̧li̧kwö kököachibenanö. A̧li̧kwö jwaibalawa Arabanö ja̧wa, Mar Muerto ötjabawabe isuwo jö̧a̧lijayonö, Adan comunidad ö'öbö lamatö, jobetjöda okwatibinobe. Jo̧kwajabetjö̧, jejenö kököachibiawö̧, israel jojodöma jobe Jerico yöneawinö tjöbaledinobe.

Josué 3:14

Jejejenö yöawawö̧, israel jojodöma tjabakwemitjö latjebinobe, Jordan ojwe petjibobö, ja̧danö tjabönö tjö̧'da̧de pjabatadöma Dios iteapjo tje'ewinobe.

Josué 3:6

Ja̧danö, tji̧'yakwa̧ badekwachenama, Josuema tjö̧'da̧de pjabatadönö weinobe, —Babe Dios iteapjo kabebö, jojodö tjabönö kwi̧'yaduwo, —jö̧ba̧lö. Weawö̧, isapjo kabebö, jojodö tjabönö tji̧'yinobe.

Deuteronomio 27:2

Ja̧danö, yötawi̧ jawa kwiteboduwibe ichibajadö kwomukwatibaduwoböma baikwö wetaduwakwö: Kwa'dödömine tjösödinökwe Isabenö Jo̧ Diosma yöbawö ujuninobe, inesö otiwemi niji ökwödönö iyobö, batjobi otiwanö wa̧jemi, ja̧danö ajikwakwawedönöbi otiwanö tjajikwemi nijima, ja̧danö babe ja'yubenö lekwajabetjö Jordan ojwe pekibaduwobö öibakobe kwuluwo̧duwi Isabenö Jo̧ Diosma chömöledö, kwiteboduwi baibanö jobe kwö̧jaduwakobetjö̧. Ja̧danö, Jordan ojwe pebibajadö, Ebal mösa'obe kwi̧'yaduwo chömöledö, ja̧danö jobe ichibajadö, inawiya nöawa öwiyawi̧ jobe kwödaduwo, ja̧danö lödajadö, dewinö kwidiwaduwo. Ikenama okobe jwiinö bi̧ya̧ ökwödönö weti̧ jawa ja̧ inawiyanö kwi̧wȩyudaduwo, jobe Ebal mösa'onö.

Génesis 11:4

Ikenama yöba̧lakwawijadötö: —Duju̧kwemi comunidad dotido. Ja̧danö, comunidadnö o̧do möeju dotido mölejȩbe ichibanö. Jejenö dotiditjö̧ma okobe deinö böjȩnö ju̧kwadöma ökwödönö tjöwaisakobe, otiwanö tjotidinobe möejuma, jö̧ba̧lö. Ja̧danö, jejenö otidö ökwödöma bakwainö omukwatadö babibajadö benada otiwanö bakobe duju̧kwakobe. Jejenö dö̧jo böjȩ bakwemeachibanö wainökwena duju̧kwökakobetjö̧, ökwödötjö ju'wedö jelobe, ökwödötjö ju'wedö jelobebi— yöba̧lakwawijadötö.

Deuteronomio 6:10

Tupakwö yöawinobe Moisesma: —Chömöledö, kwuluwo̧duwi Isabenö Jo̧ Diosma kwa'dödömine Abrahamnöbi, Isaacnöbi, Jacobnöbi yöbawö ujuninobe, isabenö ökwödö israel jojodönö niji iyakwa̧ wenema, jö̧tö? Ja̧ yöbawö ujunina nijima, baikwö yötawa chömöledö, Ja̧ nijinö ida̧ökö otiwi̧ comunidadbiya jȩmi, jalobe comunidadbiyama. Ja̧ comunidad kwotidinaduwököjayonö, otiwanö jobe kwö̧jaduwobö ja̧kobe.

Daniel 4:11

Jowi da̧peachinobe, bajalema mölejȩbe ichibanö da̧peachinobe, ödötjö böjȩ ö'öbötjöbi otiwanö öwawowi baibanö.

Éxodo 32:1

Moisésma mö'ösa'onö lekwe yutubajökönö ö̧jiawö̧ Israel jojodöma Aarón ö̧jobekwö 'ya̧wibö abebijadötö: —Moisés, ökwödönö Egiptotjö labebö öbibajinama dea. Taji waekwinajö wajwida. Jo̧kwaobetjö̧ do̧'wo̧ jawa juluwanö kwotido dökömanö öbibö 'yo̧nö— abebijadötö Israel jojodöma Aarónnö.

Deuteronomio 4:1

Moises ina yöawinobe israel jojodönö: —Jobekwö Dios ökwödönö pjaatina jawa yötawajabe chömöledö. Ja̧danö, babema baikwö yötawaduwakwö: Ökwödönö chö̧ba̧jadobe Dios ökwödönö wei̧, ja̧bö kwö̧jaduwobö wei̧ma. Ja̧ chöba̧ja̧di̧ jawama otiwanö a̧ja̧kwö kwö̧jaduwo, ina 'yaka̧laduwayi Dios iyakwa̧ nijibe tekachaduwakobetjö̧, ja̧danö kwiteboduwi baibanö kwemaduwakobetjö̧. Jau chömöledö, kwa'dödö tjösödinökwe Isabenö Jo̧ Diosma ja̧ niji iyobe, jo̧kwajabetjö̧ isabenö jo̧ba wei̧ a̧ja̧kwö kwö̧jaduwo.

Josué 1:15

Jejenö pjakataduwobö ja̧kobe, dösödökwe Isabenö Jo̧ Dios ökwödönö iyinadanö, jobadönöbi tjitebo baibanö wene jwiinö tjö̧jobö iyenanö kabatö. Ja̧danö, ökwödö kweminaduwadanö ju'wedö kwömöledöduwibi tjitebo tjemajenama, baikwö kwiteboduwibe kwȩwa̧jaduwobö ja̧kobe, bi̧ya niji Jordantjö jawo̧ laebobekwö kwiteboduwi nijibe, Isabenö Jo̧ ömöayo̧ Moises ökwödönö iyina nijinö otiwanö kwö̧jaduwobö. Jobekwö Moises ökwödönö weinadanö ja̧köbaduwobö badekwachajabe, jo̧kwajabetjö̧ weina omukwatibö ja̧köbaduwo, —jö̧ba̧lö weinobe Josuema.

Josué 14:12

Jo̧kwajabetjö̧, babe Isabenö Jo̧ jö̧a̧lina badekwachinö chitebo baibanö kwiyobö atebakwö, –Kwekachina niji chiyocha, –jö̧a̧lina nijima. Jau Josue, ja̧ damötjö mö'sa'iju jȩmi niji kwetachinemi kwiyobö atebakwö, Isabenö Jo̧ jö̧a̧lina badekwachinö. Ja̧ niji yötjawina kwa̧ja̧kwijatö Josue, –Inesö ödöbaedö anaquita jojodöma, inesö 'diinö tjöbebö tjotidina comunidadnö tju̧ju̧kwobe, –jö̧ba̧lö. Ja̧danö, isabenö jejenö 'diinö tjöbebö tjö̧jobe, jo̧kwaijayonö chedemi Isabenö Jo̧ma ötjökwö pjabatö ö̧jakobe, ja̧danö damötjö̧ jö̧a̧linadanö, jobadönö jobetjö a'dewö lotocha, chitebo baibanö, —jö̧ba̧lö niji abebö yöa̧linobe Calebma.