Deuteronomio 2:21 - Dios Iwene

²¹ Jobadö zanzumitas jojodöma anaquitas jojodö tjö̧ba̧jekwi̧danö tjö̧ba̧jekwinobe ajayinöma, ja̧danö ödöbaedö tjö̧jidanöbi, juluwadö tjö̧ji̧danöbi tjö̧jinobe. Jo̧kwaijayonö ödöbaedö juluwadö tjö̧jijayonö, Isabenö Jo̧ma amonitas jojodönö pjabatö, jobadönö söbebö loinobe, tjiteboinemi nijinö, amonitas jojodöda tjö̧jobö, idöda tjitebo baibanö.

Deuteronomio 2:21 Referans Kwoze

Jueces 11:24

Ja̧maökö, baikwö yötawa: Ökwödöma kwösödaduwökwe Quemosnö ösödadöja, ja̧danö kwösödaduwökwe Quemosma ökwödönö niji iyitjö̧ma, iyaja̧ nijinö kwö̧jaduwobö jwienaji̧? Jȩna, ja̧danö baikwö yötawakwö: Okobe jwiinö dösödökwe Isabenö Jo̧ Dios iyaja̧ nijinö ökwödö israel jojodö dö̧jobö jo̧be. Jau, ökwödönö pjabatö, ajayi bemi nijinö ji̧nadönö ujuluwinobe dösödökwe Diosma, jo̧kwajabetjö̧ isabenö iyina nijinö dö̧jobö jo̧be.

Deuteronomio 3:11

Ja̧danö, la'aka luwo̧ Ogma, ja̧ nijinö ju̧kwadö inesö ödöbaedö refaitas ötjabawö̧tjö bajaleapo ji̧na. Jo̧bama isabenö nöbo̧inobe, iteapjo camapjoma 'dii jawatjö otikwapjo ujuna̧linobe, ö'wejemu jawa metro jenanö ödöapjoma, ja̧danö jakwölakwö dötölajata metro jenanö ödöapjo. Ja̧ Og iteapjo camapjoma, ina amonitas jojodö tjitebo comunidad Rabanö jo̧be, ja̧pjo edö, isabenö nöbo̧ ö̧jina edö tjöwaisobö.

Deuteronomio 2:22

Ja̧danö, amonitas jojodönö pjaati̧danö, Seirnö ju̧kwadö Esau itji̧mu tupadanö jojodönöbi pjaatinobe. Jobadönö pjabatö, Seir nijinö ajayinö ji̧nadö horeos jojodönö söbebö loinobe, tjiteboinemi nijima, idöda tjitebo niji baibanö tjemobö, ja̧danö babe mölebi baibanö, ina jobe tju̧ju̧kwobe Esau itji̧mu tupadanö jojodöma.

Deuteronomio 1:28

Jobe di̧'yobö jwiobe, isabenö labobetjö̧. Jau, dömöledöma yedaibanö yötjawajabe, jobe ju̧kwadö inesö tjujuluma. Tjitebobetjö edö kwebachajadö, yötjawajabe: Jobe ju̧kwadöma ökwödötjö bajalekwönönö ödöbaedö, ökwödötjö bajalekwönönö juluwadö, ja̧danö tjitebo comunidadbiyama, otiwanö 'diinö tjöekwobe, tjöekwemima mölȩjȩbe ichibenanö. Ja̧danö ju'wibi, jobe inesö juluwadö ödöbaedö anaquitas jojodö ötjabawö̧nö dedijatö, jö̧ba̧lö tjedaja̧ yötjawinobe. Isabenö ja̧ niji tedachoböma jwiobe, labobe, –jö̧ba̧lö Dios jobe kwi̧'yaduwobö wei̧ma kwöpöjödinaduwobe.

Deuteronomio 2:20

Ja̧ Amonitas jojodö tjitebo labebö loawama, baikwö laebobe: Tjitebo nijima, ju'wedö jojodöma inesö ödöbaedö Refe itji̧mu tupadanö jojodö tjitebo, jö̧ba̧lö ötjabobe, jobadö Refe itji̧mu tupadanö jojodöma ajayinö ja̧ nijinö tjö̧jinobetjö̧. Ja̧danö, amonitas jojodöma ja̧ nijinö ajayinö ji̧nadönö zanzumitas jö̧ba̧lö ötjabinobe.