Daniel 8:3 - Dios Iwene

³ Ja̧danö, jobe ja̧nö möakwö chedijatö, ja̧danö obejaso̧ nöbo̧nö chedijatö, ojwe ö'öbö jo̧nö. Jo̧ba obejaso̧ma, i'yeka dökalataja ujuna̧linobe, nöakama, jo̧kwaijayonö bakwakama jelekatjö bajalekwönönö ödöaka ji̧nobe. Ja̧kama jeleka laebaja̧ ikena laebijayonö, ajayi laebaja̧katjö bajalekwönönö ödöaka baibanö laebinobe.

Daniel 8:3 Referans Kwoze

Daniel 8:20

Ja̧danö, obejaso̧ kwedajökwema, i'yeka dökalataja juna̧lo̧nöma baikwö labebö lobö yötawakwö: Ja̧ dökalataja badekwachi̧ma Media niji la'aka luwo̧nöbi, Persia niji la'aka luwo̧nöbi badekwachobe.

Daniel 10:5

Ja̧danö, möakwö chedemi, bakwo̧nö chedijatö, jwiinö otiwado̧ dewado̧ 'dubawo̧nö, ödölö̧'anö coleasö̧jȩ bakwai̧ orotjö otikwöjȩ nönawo̧nö chedijatö.

Daniel 7:5

Jemi ikenama, jelo̧bi laebinobe, jwiinö nöbo̧ ojwe yawidanö ichejekwo̧ma. Jo̧bama meibotö jö̧ba̧lö bȩbachö ö̧jinobe, ja̧danö o'yenö tjö̧tö̧böbö jawaö'ibiya wa̧pö'ikwa yö̧ba̧lö ö̧jinobe. Ja̧danö jo̧banö wei̧ cha̧ja̧kwatö, a̧laibi, nöinö itebiya kwukwo jö̧ba̧lö.

Daniel 6:28

Ja̧danö, Danielma otiwanö otidö ö̧jinobe, Darío la'aka luwo̧ ö̧jonöbi, Perso jojo Ciro mikwo̧ inesö la'aka luwo̧ ö̧jonöbi.

Daniel 5:31

Ja̧danö, Belsasar ajayinö yöbawö weinemima, medo jojo Darío mikwo̧ma Babilonia niji la'aka luwo̧ baibinobe. Darío jejenö la'aka luwo̧ baibenama, sesenta y dos o̧biya junalo̧ la'aka luwo̧ baibinobe.

Daniel 2:39

Ja̧danö ökwö la'aka luwo̧ kwöja̧ja okobe, ju'wedötjö jelo̧ inesö la'aka luwo̧ öbamatakobe. Jo̧bama inesö la'aka luwo̧ öjijayonö ökwö kwujuluwi̧danöma ujuluwökakobe. Ja̧danö o̧'wo̧ jawa kwedinökwe platatjö otikwi̧ma, jo̧ba inesö la'aka luwo̧ ö̧jakwa̧ badekwachobe. Ja̧danö jo̧ba ömöledö luwedö tjö̧ji̧ okobe, ju'wedötjö jelo̧ öbamatakobe böjȩ bakwameachibanö jojodö la'aka tjuluwo̧ baibanö, ja̧danö broncetjö otikwi̧ma jo̧ba ö̧jakwa̧ badekwachobe.

Isaías 44:28

Jobekwö badekwachinö webo̧sa chömöledö, ja̧danö ju'wibi yötawaduwakwö: Ötjöma Ciro jö̧ba̧lö imikwakwo̧nö yötawa, —Ciroda chömöayo̧ obejadönö teada̧lo̧danö ja̧nö, chömöledö israel jojodönö webö ö̧jakwo̧, ja̧danö okobe jwiinö weti̧ otidö ö̧jakwo̧. Wetökwe jo̧bada Jerusalen comunidad jawa weakobe, –Jerusalen comunidad tjotidobö jo̧be, –jö̧ba̧lö, ja̧danö wetökwe jo̧bada cheju jawa weakwo̧, –Dios eju la'akama, yemidanö tjotidobö jo̧be, –jö̧ba̧la. Jobekwö yötawaduwakwö baledakwa̧, badekwachinö wetakwa̧ma, jö̧ba̧lö yöa̧lobe Diosma.

Isaías 21:2

Jau, inesö labi̧ jawa chi̧'wi̧didanö i̧sebinobe Diosma, ja̧ baledakwa̧ jawama, baikwö: —Omöna yöba̧lo̧ma jojodö tjösödachibanö omöna yöa̧lakwo̧, jadanö söbebö lobo̧ma, söbebö loakwo̧, sulabenö ja̧tjawö̧ma –Ö̧ö̧, –jö̧ba̧lö tjubudekwenanö baibanö. Jo̧kwajabetjö̧ tjubudekwi̧ a̧ja̧kwö, Elam niji jojodönö weta, –Babilonia comunidad mebibaduwi, –jö̧ba̧lö, ja̧danö Media niji jojodönö weta, –Babilonia comunidad tjösawö ölakwabikwawaduwi, –jö̧ba̧lö, usula emawö tjubudekwi̧ 'dö̧ibajakobetjö̧, —jö̧ba̧lö yöa̧lobekwö chedijatö.

Isaías 13:17

—–Jau, medo jojodönö wetocha, Babilonia jojodönö metjibakwa̧ tjomukwatobö, ja̧danö jwaikwöda Babilonia jojodönö söbebö lotjobö tjösödakwedö. Jobadö medo jojodöma platabi, orobi ösödöködö, jo̧kwajabetjö̧ midö tjö̧jibobö jö̧ba̧ladöbi ji̧kwawa jwitjakwedö.

1 Crónicas 21:16

Ja̧danö, Jerusalennö ja̧nö, Davidma möakwö edinobe, ja̧danö Isabenö Jo̧ weökwe angelnö edinobe, mölejebi, bö̧jebi ö'wejenö jo̧nö. Angelma ömamunö kwölöte'o do̧ba̧lö, Jerusalen comunidad wame debatö ö̧jinobe, ja̧danö jobe ö̧ji̧ edö, Davidbi ju'wedö Jerusalen comunidad luwedöbi kamijido̧ epju̧yunö kalukaa̧do̧ 'dubawö, tjo̧'wo tjoachö tjöba nijakwö tjö̧bamatinobe.

Josué 5:13

Ja̧danö, Josuema Jerico comunidad yöne ö̧jena, möakwö edemi ipjeanö bakwo̧nö edinobe, ömamunö kwölöte'o do̧ba̧lo̧nö. Jo̧banö edö, ö̧jobekwö 'ya̧nö abebö a̧ja̧kwinobe Josuema, —¿Ökwöma didöso̧köba? Ökwöma ökwödö israel jojodötjö ölakwabikwawa jojoköbiji̧? Döpöjojoköbiji̧? Yöbawitjö, —jö̧ba̧lö.

Apocalipsis 5:6

Jemi ikenama, Obeja Itji̧danö Jo̧nö chedijatö, inesö ba̧kwawaka badeibö jo̧nö. Ja̧danö, tjöbajalebiya a̧tja̧bayedöda ju̧kwawö̧ Obeja Itji̧danö Jo̧ ö̧jena i̧sȩko̧nö tjö̧jijatö. Ja̧danö, damö la'aka luwedöbi, veinticuatronö, jo̧ba ö̧jena i̧sȩko̧nö tjö̧jijatö. Jo̧ba Obeja Itji̧danö Jo̧ma 'yaba̧lo̧ ö̧jijayonö tibatö lobawo̧danö ö̧jijatö. Jo̧bama ö'yekiya juna̧lo̧, jelemutjö dökölataja jawa ö'yekiya. Ja̧danö, öbajalebiyabi jelemutjö dölelatajanö ju̧kwökwe. Jejenö öbajalebiya jelemutjö dölelatajanö Dios O̧'wo̧ Luwo̧ okobe jwiinö ujulu i̧sebi̧ wanekwachobe, böjȩ bakwameachibanö ujulu i̧sebi̧ma.

Apocalipsis 13:11

Ikenama jelo̧ sulabo̧ laebobe chedijatö, böjȩ teebetjö labebo̧nöma. Jo̧bama obeja ö'yekiya dökölataja jö̧kwe. Jo̧bama toba'dadanöso̧ iwenedanö yöba̧lo̧.

Daniel 8:2

Ja̧ chi̧'wi̧didanö chedinama, baikwö yötawa: Chi̧'wi̧dinö Elam niji la'aka comunidad Susa comunidad chö̧jijatö, ja̧danö Ulai mikwödö ojwe ö'öbö chö̧jijatö.