Apocalipsis 5:13 - Dios Iwene

¹³ Jemi ikenama cha̧ja̧kwijatö okobe deinö, mölejȩnö ju̧kwadöbi, böjȩnö ju̧kwadöbi, böjȩ teebe ju̧kwadöbi, ojwe nöödö okwa ju̧kwadöbi, inesö ba̧kwawakanö bo̧nöbi, Obeja Itji̧danö Jo̧nöbi ösödö lo̧tji̧ma. Biya̧ lo̧awa lo̧tji̧ma cha̧ja̧kwijatö: Ösödö lo̧daduwo inesö ba̧kwawakanö bo̧nöbi, ja̧danö, obeja itji̧danö jo̧nöbi. Dösödodönö, Jwiinö otiwadöja, jwiinö mikwawadöja, jö̧ba̧lö. Jwiinö dewinö dejatadöja, jwiinö juluwadöja, jö̧ba̧lö, dösödodönö, jö̧ba̧lö lo̧tjijatö.

Apocalipsis 5:13 Referans Kwoze

Filipenses 2:10

Ja̧danö jejenö inesö otiwi̧ imi imidinobetjö̧, Jesús imi a̧ja̧kwö okobe deinö mölejȩbe ju̧kwadöbi, böjȩnö ju̧kwadö ina 'yaba̧ladöbi, wobinadöbi

1 Crónicas 29:11

Ökwödaja inesö dejatinö juluwo̧ma, ökwödaja inesö kwöpöjojodönö juluwo̧ma, ökwödaja okobe deinö tjuluwo̧ma chuluwo̧. Jau chuluwo̧, okobe deinö mölȩjȩnö ju̧kwadöbi, bö̧jȩnö ju̧kwadöbi ökwöda kwö̧möayedö, ja̧danö okobe jwiinö mölȩjȩnö ji̧bi, bö̧jȩnö ji̧bi ökwöda kwiteaobe chuluwo̧. Ja̧danö ökwöda inesö la'aka luwo̧köbobetjö̧, ökwönö ösödö yöda̧lakwö chuluwo̧.

Apocalipsis 5:3

Jejenö abebö a̧ja̧kwijayonö bakwo̧bi deijatö mölejȩnö ju̧kwadötjöbi, böjȩnö ju̧kwadötjöbi, böjȩ teebe ju̧kwadötjöbi, jwiinö mikwawo̧ma, jöja pöekwöja kabebö edo̧ma.

Apocalipsis 5:12

Biya̧ lo̧awa labinö lo̧tjijatö: Obeja itji̧danö jo̧ma, kwabö lotjinökwema jwiinö mikwawo̧. Jwiinö mikwawo̧obetjö̧, dösödobö jo̧be. Jo̧banöda dösödo, Ökwöma inesö la'aka luwo̧ja, ja̧danö, okobe jwiinö juna̧lo̧ja, jö̧ba̧lö. Jo̧banöda dösödo, Ökwöma okobe jwiinö waiso̧ja, jö̧ba̧lö, ja̧danö, okobe jwiinö juluwo̧ja, jö̧ba̧lö, Jo̧banöda otiwanö omukwatö dösödo, Ökwöma Duluwo̧ja, jö̧ba̧lö, jwiinö dewinö dejato̧ja, jö̧ba̧lö. Jo̧banöda otiwanö yöba̧lö dösödo, Ökwöma jwiinö mikwawo̧ja, jö̧ba̧lö lo̧tjijatö ángelesdöma i̧sȩko̧nö ja̧nö, Obeja Itji̧danö Jo̧nö ösödö.

Romanos 11:36

Jau chömöledö, Diosda okobe deinöbi, okobe jwiinöbi otidina. Ja̧danö okobe jwiinöbi okobe deinöbi iteda ujulunöda dö̧jobe böjȩnöma, Dios ösödi̧ ja̧bö dö̧jo jö̧ba̧lö. Jo̧banöda dösödo ba̧kwȩlö̧jatebö chömöledö, Otiwo̧ja, juluwo̧ja, jö̧ba̧lö. Jo̧banöda dösödoböma chösöda chömöledö.

1 Pedro 5:11

Isabenö otiwanö pjabato̧ Dabe'doma, jo̧bada ba̧kwȩlö̧jatebö, kabatökönö inesö la'aka luwo̧ ö̧jobö jo̧be chömöledö, jejenö otiwa. Jau chömöledö, usula kwemawaduwijayonö, 'diinö ja̧nö jwaikwöda Diosnö kwo̧'wo̧ wana̧lö kwö̧jaduwo, ökwödönö te'ada̧lo̧ jö̧ba̧lö.

Lucas 2:14

—Mölejȩbe jo̧ Diosnö jwiinö tjösödobö jo̧be, ja̧danö böjȩtjö jojodö Dios o̧'wo̧ ösöwanö edawö̧ma wene jwiinö tjö̧jakobe— jö̧ba̧lö yötja̧linobe.

Isaías 42:10

Okobe deinö Isabenö Jo̧ Diosnö lo̧köbaduwo, 'yayi jawa lo̧awa jo̧banö lo̧köbaduwo. Bö̧jȩ ba̧kwemeachibanö ju̧kwadö ösödö lo̧köbaduwo, —Diosma otiwo̧, —jö̧ba̧lö. Bö̧jȩ bakwachö̧je ju̧kwadöbi, jwaibalawabe kwebachadöbi, jwaibalawanö ju̧kwadöbi, ödö ju̧kwadö jwaibalawa ö'öbö ju̧kwadöbi, okobe deinö lo̧köbaduwo.

Apocalipsis 6:16

Jobadö jwötjeba̧li̧ cha̧ja̧kwijatö: —¡Ayö! Mö'ösa'iju, inawiya, tjöbeba̧li ökwödönöma, dö̧jibobö. ¡Ayö! Inesö ba̧kwawakanö bo̧ edökakobetjö̧ ökwödönö tjöbeba̧li. Obeja Itji̧danö Jo̧tjöbi tjöbeba̧li, jwiinö labinö lȩbebo̧tjöma.

Judas 1:25

Jau chömöledö, Diosma bakwo̧da, jelo̧ma deobe, ja̧danö Duluwo̧ Jesucristonötjö Diosda dö̧jibinö pjaatajabe. Jo̧banöda okobe deinö tjösödo jö̧tja̧lökwema, jo̧bada inesö salöinö dejato̧ma, jo̧bada okobe jwiinö juluwo̧ma, jo̧bada inesö la'aka luwo̧ma, la'akatjö böjȩ otidakwa̧ abönöbi, babebi, ba̧kwȩlö̧jatebö 'dö̧ibajökenanöbi, jejenö otiwa. Biya̧data.

Romanos 16:27

Okobe jwiinö ja̧i̧ waisanö ja̧bo̧ma Diosda, jelo̧ma deobe. Jo̧banöda kabatökönö dösödo, Otiwo̧ja, waiso̧ja, juluwo̧ja, jö̧ba̧lö, Jesucristo ökwödö dö̧jibinö pjaatinobetjö̧. Jobekwö chösöda chömöledö, jo̧banö dösödobö. Biya̧data.

Romanos 9:5

Ja̧danö, jobadö Israel jojodöma inesö ajayinö ji̧nadö, Diosnö ösödinadö tji̧tji̧mu tupadanö jojodö. Ja̧danö, jobadö tjömöledöso̧, Israelso̧ baibanö ichinobe Cristoma. Jo̧ba Cristoma okobe deinö tjuluwo̧ Dios, ja̧danö jo̧banöda böjȩ jojodö tjösödo ba̧kwȩlö̧jatebö. Jau chömöledö, jo̧banö tjösödobö chösöda.

Apocalipsis 5:6

Jemi ikenama, Obeja Itji̧danö Jo̧nö chedijatö, inesö ba̧kwawaka badeibö jo̧nö. Ja̧danö, tjöbajalebiya a̧tja̧bayedöda ju̧kwawö̧ Obeja Itji̧danö Jo̧ ö̧jena i̧sȩko̧nö tjö̧jijatö. Ja̧danö, damö la'aka luwedöbi, veinticuatronö, jo̧ba ö̧jena i̧sȩko̧nö tjö̧jijatö. Jo̧ba Obeja Itji̧danö Jo̧ma 'yaba̧lo̧ ö̧jijayonö tibatö lobawo̧danö ö̧jijatö. Jo̧bama ö'yekiya juna̧lo̧, jelemutjö dökölataja jawa ö'yekiya. Ja̧danö, öbajalebiyabi jelemutjö dölelatajanö ju̧kwökwe. Jejenö öbajalebiya jelemutjö dölelatajanö Dios O̧'wo̧ Luwo̧ okobe jwiinö ujulu i̧sebi̧ wanekwachobe, böjȩ bakwameachibanö ujulu i̧sebi̧ma.

Apocalipsis 1:6

Jesucristoma ökwödönö 'da̧batö ujuninobe iteda ömöayedö badibanö, itenöda, Duluwo̧, jö̧ba̧lö, öbabidö badibanö. Damötjö, la'aka luwedö, Diostjö jojodötjö ö'weje pjabatadö pjatjatinadanö Jesucristoma 'da̧batö ujuninobe ökwödönöma, jojodönö pjadatobö. Ja̧danö, ökwödöma Diosnö abebadösa, Jesucristo abe'donöma, jojodönö pjaatobö. Chömöledö, Jesucristo otiwanö pjaatinobe ökwödönöma. Otiwanö pjaatinobetjö̧ jo̧banö dösödaduwo, Jwiinö juluwo̧, jö̧ba̧lö, Ba̧kwȩlö̧jatebö webö ö̧jobö jo̧be, jö̧ba̧lö. Chömöledö yötawi̧ma isabenö yötawa.

1 Pedro 4:11

Baikwö yötawa: Yöbawadöma, Dios yöawi̧ yötjawobö jo̧be, ja̧danö pjabatadöma, Dios ujulunö pjabatö tjö̧jobö jo̧be. Jejenö Dios iyinadanö ja̧bö kwö̧jaduwenama, Diosda ökwödönötjö pjaatobe jojodönö chömöledö. Ja̧danö Dios pjaati̧ edö okobe deinö Diosnö tjösödakobe, Jesucristo midawö woinobetjö̧ otiwanö pjabato̧ja jö̧ba̧lö. Jau chömöledö, Dabe'do Diosda ba̧kwȩlö̧jatebö dejatinö juluwo̧ma ja̧danö jo̧bada inesö la'aka luwo̧ma, babebi ba̧kwȩlö̧jateböbi, jejenö otiwa.

Efesios 3:21

Jo̧banö ba̧kwȩlö̧jatebö dösödaduwo, Diosma jwiinö otiwo̧, jö̧ba̧lö. Ökwödö Jesúsnö ösödadö, Jesúskwö bakobe dötewadöma Diosnö dösödaduwo ba̧kwȩlö̧jatebö.

Isaías 24:14

Jemi ikenama, Dios lȩebi̧tjö ji̧binadöma tjo̧'wo ösöwanö tjö̧jakwedö. Tjo̧'wo ösöwachibanö, labinö lo̧tjakwedö. Jawo̧ meajobekwö ju̧kwadöbi tjo̧'wo ösöwanö jwö̧tjeba̧lakwedö, —Isabenö Jo̧ Diosma la'aka duluwo̧ otiwo̧, —jö̧ba̧lö.

Apocalipsis 5:9

Ja̧danö, tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö lo̧tjijatö. Lo̧tji̧ma 'yayi̧ lo̧awa, biya̧: Ökwöda jwiinö mikwawo̧ja, böja ösöja tö'awa'be kabebö kwedoböma. Ökwö, kwabö lotjinökweda, jwiinö mikwawo̧ja, kwökwösobu ebawinö kwimidawinobetjö̧. Ökwöda jwiinö mikwawo̧ja, jojodö Dios ömöledö batjibanö kwimidawinobetjö̧. Böjȩ bakwameachibanö ju̧kwadönö midawinaja, Dios ömöledö batjibanö. Bakwasokwena ju̧kwadönöbi, wainökwena tjiwene yöba̧ladönöbi, jelobebi, jelobe ju̧kwadönöbi, okobe deinö böjȩnö ju̧kwadönö midawinaja.

Colosenses 1:23

Ja̧danö isabenö ökwödöma jwaikwöda Cristonö kwösödaduwobö jo̧be, 'diinö pjolachibökönö kwö̧jaduwobö jo̧be chömöledö, otiwa jawa wene a̧ja̧kwö kwo̧'wo̧ kwöwana̧laduwi̧ wenema kabatibökönö chömöledö. Jau chömöledö, ja̧ otiwa jawa wene, böjȩ bakwameachibanö jojodö tja̧ja̧kwi̧ wenetjö ömöayo̧danö babibinasa chömöledö, ja̧ wene yöbawö chö̧jo jö̧ba̧lö.

Mateo 6:13

Ja̧danö, sulabenö ja̧dakwojobö jö̧ba̧lö ja̧i̧ jawa döbaledenama, dujuluwachibanö pjabati, sulabenö ja̧dapji jö̧ba̧lö. Ja̧danö inesö sulabo̧ ujulutjö dö̧jibinö pjabati, Dabe'do jö̧ba̧lö akebaduwo Kwabe'doduwi Diosnöma— jö̧ba̧lö yöawinobe Jesúsma.

1 Timoteo 4:16

Otiwanö ja̧bö kwö̧ji̧bi, ja̧danö Dios iwene yöbawö kwö̧ji̧bi omukwatönö kwö̧jo, Dios ösödi̧danö ja̧bö kwö̧jobö, ja̧danö jwaikwöda ökwönö yötawaja̧danö ja̧bö kwö̧jobö. Jejenö ja̧bö kwö̧jitjö̧ma, ökwöbi ja̧danö yökawi̧ a̧ja̧kwadöbi kwö̧jibaduwakwedöja.

Juan 1:29

Ju'wi dewachö Juanma edinobe iteda ö̧jobekwö Jesús ichobe. Jesúsnö edö jö̧a̧linobe itekwöda ju̧kwadönö: —Edaduwi. Ite baikwö icho̧ma, Dios weinökwe obeja itji̧danö jo̧. Diosma jo̧banö ö'wöchinö midawö, jojodö tjusuli̧ söbebö loobö weinobetjö̧, obeja itji̧danö jo̧, ötjabökwe.

Apocalipsis 5:1

Ikenama, jobe, inesö ba̧kwawakanö bo̧nö chedemi, ömamu öwaisobekwöchobesamunö ösöja wȩyukwöja do̧ba̧lo̧nö chedijatö, 'bo̧datakwawöja. Jöjama wamekwöchobebi okwakwöchobebi wȩyukwöja. Ja̧danö, tö'awa ö'be pöekwöja, jelemutjö dö'belatajanö pöekwobe chedijatö.

Apocalipsis 13:8

Ja̧danö, ba̧jekwadö, böjȩ bakwameachibanö ju̧kwadöma jo̧banö ösödadö, ojwe okwatjö labebajo̧nöma. Jo̧kwaijayonö ju'wedöma, ba̧kwȩlö̧jatebö ja̧kwawa'yenö tjimi wȩyukwadöma jo̧banö jwiinö öpöjödadönö chedijatö. Jobadöma, böjȩ ina jwiayi, tjimi wȩyukwinawö̧ kwialu'yenö, Obeja Itji̧danö Jo̧, ösötenö bȩtjinökwe u̧kwa kwialu'yenö, ba̧kwȩlö̧jatebö ja̧kwawa wȩyukwa'yenöma.