Apocalipsis 21:8 - Dios Iwene

⁸ Jo̧kwaijayonö jejenömaökö ju'wedönöma. Yebabinö, ¡Ayö! Diosnö chösöditjö̧ma inia tjötinö baledena, jö̧ba̧lö, yebabo̧danö yebabinadönöma otiwi̧ma chiyökakwo̧sa. Ja̧danö, Diosnö kabatibinadönöbi, ja̧danö, sulabedökwö pjabacha̧linadönöbi otiwa jawama chiyökakwo̧sa. Jobadönö ökwöla nöola okwa lotakwo̧sa. Ja̧danö, tji̧lȩkwa̧muböködökwö sulabenö ja̧binadönöbi, ja̧danö, jojodönö kwabö lobinadönöbi, ja̧danö, mea bobinadönöbi, ja̧danö, ju'wedö tjo̧'wo̧ tjöwana̧lobö tjotidinökwenö tjo̧'wo̧ wana̧linadönöbi, ja̧danö, bakwelajatebö omöna yöba̧linadönöbi, jobadönöma ökwöla nöola okwa lotakwo̧sa. Jobema jwiinö tubinö ubobe, azufre mikwi̧ tubi̧ma. Joola okwa lotji̧ma, 'dö̧ibaji̧ woawa mikwemi, jö̧ba̧lö weijatö Diosma ötjönöma, chiwȩyudobö.

Apocalipsis 21:8 Referans Kwoze

Apocalipsis 2:11

Chömöledö, a̧ja̧kwaduwi biya̧, Dios O̧'wo̧ Luwo̧ yöawi̧, okobe deinö ötjönö ösödö ko̧ko̧kwa̧lö tjö̧baji̧tenia. Baikwö yöawobe: Sulabetjö juluwinadönöma, 'dö̧ibaji̧ woawa baledökakobe. Ja̧danö, ökwöla tiibokola ubolanö, ba̧kwȩlö̧jatebö inia tjöbö tjuju̧kwökakwedö. Jejenö Dios O̧'wo̧ Luwo̧ma yöawobe okobe deinö ötjönö ösödadönö, ko̧ko̧kwa̧lö tjö̧baji̧tenia ju̧kwadönöma, jö̧ba̧lö yöawobe ba̧kwȩlö̧jatebö jo̧, ajayinö ji̧nabi, ja̧danö, 'dö̧ibajena baibanö ö̧jakwo̧bi, ja̧danö wobajo̧ yemidanö tjebachajina jo̧ma ökwödönöma— jejenö weijatö chedökwema ötjönöma, iteda yöawi̧ wȩyudö wetobö Esmirna jojodötjö itenö ösödadönö te'ada̧lakwawa jojonö, ite'ada̧lawö̧nö̧ yöawobö.

Apocalipsis 22:15

Jo̧kwaijayonö ju'wedöma tetjachökakwedö. Jobadöma 'yayi̧ Jerusalén comunidad ö'öböda tjuju̧kwakwedö, sulabedöma. Jobadöma mea bobadöbi, tji̧lȩkwa̧muböködökwö sulabenö ja̧döbi, jojodönö kwabawö lobadöbi, jojodö tjotidina tjo̧'wo̧ jawa tjo̧'wo̧ wana̧ladöbi, omöna yöba̧lö ja̧döbi. Jobadöma tetjachökakwedö— jö̧a̧lijatö Jesúsma.

Proverbios 19:9

Ja̧danö, ju'wibi yötawa wanedö: Bakwo̧ lȩekwa yöbawo̧ öba a'o ja̧nö iteda edinatjö̧bi, a̧ja̧kwinatjö̧bi yöawobö wetjökwe. Isabenö yötawa: Jo̧bama lȩekwa yöbawo̧nö yöawena jweinö yöawobö jo̧be. Omöna yöbawo̧nö isabenö lȩtjebakwo̧. Yelösöda omöna yöbawo̧nöma lȩtjebakwa̧tjö ö̧jibobö jwiobe, ja̧danö döibajoböbi jwiobe.

1 Juan 3:15

Ja̧danö, Diosma öjawo̧nö o̧'wo̧ sulinö edo̧nöma jojonö kwabö lobo̧danö, bakwainö, edobe. Ja̧danö döwaisa chömöledö, jojonö kwabö lobo̧ma Dios 'yayi̧ ja̧kwawa iyi̧ma jwibo̧ o̧'wo̧ luwo̧nö, ba̧kwȩlö̧jatebö ja̧kwawama, jö̧ba̧lö. Isabenö ökwödö, do̧'wo̧ luwo̧nö 'yabayedöma dö̧ja̧wo̧dökwö ösödabikwawö duju̧kwobö jo̧be.

Apocalipsis 19:20

Jo̧kwaijayonö kabayu dewo̧ wamenö wo̧ma, iteda ömöayedökwö ojwe okwatjö labebinanö do̧a̧lobe chedijatö. Ja̧danö, böjȩ teebetjö labebinanö, Dios iwene yöbawo̧sa, jö̧ba̧lö, omöna yöba̧lo̧nöbi do̧a̧lobe chedijatö. Ja̧danö, jo̧ba böjȩ teebetjö labebinama, ujulu i̧sebö jojodönö jelobekwö tjomukwatinö öbibo̧, ojwe okwatjö labebinanöbi, jo̧ba o̧'wo̧ jawabi tjösödinö. Ja̧danö, jo̧bama, jojodönö jelobekwö tjomukwatinö, tjöbanöbi, tjömamiju tjöwaisobekwöchobesamunöbi ojwe okwatjö labebina imi seyu do̧bö wȩyukwa tjösödobö öbibo̧. Ja̧danö, kabayu dewo̧ wamenö wo̧ma, jobadö du̧ju̧tajanöma, ina 'yaba̧ladönöma, ökwöla nöola okwa loobe chedijatö, jwiinö tubinö azufre mikwi̧ ubolanö.

Hebreos 13:4

Ja̧danö chömöledö, ju'wibi yötawaduwakwö. Ökwödötjö kwilekwonö kwemobö, ja̧danö kwilekwenö kwemobö omukwatadönö yötawa. Yebabinö omukwatö kwemaduwo kwilekwonö, ja̧danö kwilekwenö. Ja̧danö, eminadönöbi yötawa. Yebabinö omukwatö kwuju̧kwaduwo kwilekwokwö, ja̧danö kwilekwekwö. Ja̧danö, okobe deinö yötawaduwakwö. Emökönöma kwalewaduwa, Diosma emökönö alewadönö lȩebakobetjö̧. Ja̧danö, Diosma jeluju jilekwenö alewujunö, jelo̧ ilekwonö alewo̧nö lȩebakwo̧.

1 Timoteo 4:2

Ja̧danö, ja̧ wene ju'wedö jojodöbi yötjawakwedö, omöna yöba̧ladöma. Jobadöma lekwe möle tjomajade yöawi̧, biya̧ma sula biya̧ma otiwa jö̧ba̧lö tjomajadenö yöawi̧ma tja̧ja̧kwinokobetjö̧, tjomajadenö wajwibadö babibadö biya̧ma otiwa, biya̧ma sula jö̧ba̧lö.

Mateo 8:26

Jejenö yötja̧lökwe, Jesúsma atadinobe: —¿Tajawedö Diosnö kwo̧'wo̧ wana̧lökönö yekabiduwobedaja̧?— jö̧ba̧lö. Ikenama, a̧laibö Jesúsma weinobe jwa̧lȩ'epjo yöachibobö, ja̧danö balawa loaja̧bi yöachibobö. Jejenö weenama, ja̧ jwiinö baibinobe, ja̧danö o̧pesobuma yöachibinobe.

Apocalipsis 9:21

Ja̧danö, jobadöma idöda tjösödi̧da omukwatö ju̧kwadö. Jojodönö kwabawö lotji̧bi, mea boawa ja̧tji̧bi, tjilekwobökujukwö tjilekwebökökwö tjö̧ji̧bi, tjönaukwabi̧bi kabatibö balewachöködö. Jejenö ötjönö i̧sebi̧ chedijatö.

Juan 8:44

Ökwödö kwabe'doduwima Awetjada. Ökwödö ösödö kwö̧jaduwi̧ma Awetja ösödi̧danö ösödö kwö̧jaduwobe. Jo̧bama jojodönö kwabö lobo̧, ajayitjöda babe baibanö. Ja̧danö, isabenö jawa yöbawö̧kö̧, omönada yöbawo̧. Jo̧ba omajade okwa sule omönada a̧jobetjö̧ omönada yöbawo̧. Ja̧danö, isabenö yöawakwawama öpöjödo̧. Jo̧bama ajayinö omöna yöbawina. Ja̧danö, jojodönö tjo̧'wo̧ luwo̧nö öibobe omönada yötjawobö.

Mateo 10:28

Jojodönö yekabiduwa chömöledö, jobadöma sule tjiteba'oda kwabö lobadö, tjo̧'wo̧ luwo̧nö kwabö lotjoböma juluwöködö. Jau chömöledö, Diosnöda yekabiduwobö jo̧be, jo̧bama isabenö jojodönö lȩebobö juluwo̧obetjö̧, jo̧bada ökwöla nöolatjö jojodö tjiteba'obi, tjo̧'wo̧ luwo̧bi söbebö loakwo̧.

Proverbios 19:5

Ja̧danö, ju'wibi yötawa, wanedö: Bakwo̧ lȩekwa yöbawo̧ öba a'o ja̧nö iteda edinatjö̧bi, a̧ja̧kwinatjö̧bi yöawobö wetjökwe. Isabenö yötawa: Bakwo̧ lȩekwa yöbawo̧nö yöawena jweinö yöawobö jo̧be. Omöna yöbawo̧nö isabenö lȩtjebakwo̧. Yelösöda omöna yöbawo̧nöma lȩtjebakwa̧tjö ö̧jibobö jwiobe, ja̧danö döibajoböbi jwiobe.

Deuteronomio 20:8

—Ja̧danö jemi tupakwöbi jobadö ölakwabikwawa luwedö jojodönö yötja̧lobö ja̧kobe, baikwö: –Ökwödötjö bakwo̧ yebabo̧, ja̧danö yebabinö me'dawo̧ ö̧jobeji̧? Jo̧babi ȩwa̧jobö jo̧be, ju'wedö ölakwabikwawa jojodökwö ja̧nö, jobadöbi jo̧ba yeabi̧danö yebabinö tjime'dawobö ja̧apji jö̧ba̧lö, –ölakwabikwawa luwedö yötja̧lobö ja̧kobe.

1 Juan 2:22

Ja̧danö chömöledö, yötawaduwakwö. Bakwo̧, Jesúsma Dios weinökökwe dö̧jibinö pjabatö, jö̧ba̧lö, yöbawo̧ma omöna yöbawo̧. Jo̧ba jojoma belö yötjawinökwe, Cristo öpöjojo ötjabökwe, jö̧ba̧lö. Ja̧danö, jo̧ba jojoma yelösöda omöna yöbawo̧, Jesucristoma Dios Itji̧bö̧kö̧, ja̧danö Diosma Jesucristo Abe'dobö̧kö̧, jö̧ba̧lö.

Isaías 9:15

Ja̧ wanedö yötawaja̧ma, baikwö labebö lobö yötawa: Tjuudanö ichejekwawö̧ma, la'aka luwedöbi, ju'wedö otiwanö tjomukwatawö̧ jojodöbi. Ja̧danö tjöwali'bodanö ichejekwawö̧ma, Dios yöawi̧ yöbawadösa jö̧ba̧lö, omöna jawa yöbawadöma.

1 Juan 5:10

Ja̧danö chö̧ja̧wo̧dö, Jesúsnö ösödo̧, Jesúsma Dios Itji̧, jojodö tjö̧jibinö pjaatobö weinökwe, jö̧ba̧lo̧ma öwaisobe o̧'wo̧ luwo̧nö, Diosma jweinö yöawinobe Itji̧nöma, jö̧ba̧lö. Jo̧kwaijayonö Dios yöawi̧ öpöjödo̧ma, Diosma omöna yöbawo̧, jö̧ba̧lö, yöa̧lobe, Dios iteda Itji̧nö yöawina öpöjödobetjö̧.

Isaías 57:11

Chömöledö israel jojodö, tinö yekabinaduwada? O̧'wo jawa jwiinö yekabiduwobetjö ötjönö omöna yöka̧laduwaji̧? Tajawedö ötjönö kwo̧'woduwi jwikibaduwaja̧da, ja̧danö, —Dios ösödi̧ma di̧yajö, —jö̧ba̧lö tajawedö omukwatökönö kwö̧jaduwobeda? Lekwe möle ötjöma wi̧inö ja̧nö, ökwödönö lȩbebökönö chiteada̧lobetjö̧, ötjönö yebaböködö bakibaduwaji̧?

Jueces 7:3

Jo̧kwajabetjö̧, baikwö wetakwö, kwömöayedö ölakwabikwawadö tja̧ja̧kwonö, yöbawidönö, –Ökwödötjö yebabinö tjö̧bawadöma, kwejuduwibe kwȩwa̧jaduwobö jo̧be, —jö̧ba̧lö weinobe. Weökwe, weaja̧danö yöawinobe, yebabidö yebaböködötjö böjö 'da̧batö ujunakobetjö̧. Ja̧danö, yöawawö̧, ba̧jȩkwadö tjȩwa̧jinobe, diez milbedö Gedeonkwö tjö̧jibonö, veintidos milbedö tjȩwa̧jinobe.

Apocalipsis 2:2

Jo̧bama baikwö yöawobe ökwödö Éfesonö ju̧kwadönö, jo̧banö ösödadönöma: Ökwödö kwö̧jaduwi̧ma okobe jwiinö chöwaisa. Ja̧danö, otiwanö kwö̧jaduwi̧ma chöwaisa. Chedemi otiwanö, ötjö weti̧ a̧ja̧kwö kwö̧jaduwobe. Ja̧danö, sulabenö baledonöbi ökwödöma kwo̧'wo̧duwi 'dibachibö kwö̧jaduwobe. Ja̧danö, chedemi sulabenö omukwatadö yötjawi̧ma yelösöda kwa̧ja̧kwaduwokobe. Ja̧danö, jelobe omukwatö yöba̧linadönöma kwöwaisachibinaduwobe, Omöna yöba̧ladö, jö̧ba̧lö. Jobadöma, Ökwödöma Jesús webawedösa, jö̧ba̧lö, yötja̧lijayonö ökwödöma, otiwanö omukwatö kwisakwinaduwobe, jweinö yötja̧lojobö, omöna yötja̧lojobö, edö. Jejenöma otiwanö kwöwaisachibinaduwobe, Jobadöma omöna yöba̧ladö, Jesús webawöködö, jö̧ba̧lö.

Isaías 51:12

Adebökwe, baikwö atadö yöba̧lo̧ Isabenö Jo̧ma: Chömöledö, kwo̧'wo tjo̧bekwö kwö̧jaduwelö, ötjödasa kwo̧'woduwi ösöwachibanö pjabato̧ma. Ja̧danö ötjöda ökwödönö pjatatobetjö̧, tajawedö bö̧jȩ jojodönö yekabiduwobö? Jobadöma meje'ye, juluwanö kököbachibö, debi baiba'yedanö ichejekwadö, juluwanö debö 'ya̧dö bö̧jȩ jojodöma, tajawedö jobadönö yekabiduwobeda?

2 Tesalonicenses 2:9

Jau chömöledö, jo̧ba inesö sulabo̧ma Awetja ujulunö ichakwo̧, ja̧danö omöna i̧sebakobe, ujulu i̧sekwa jawabi, jojodö edajitjökö jawabi.

Hebreos 12:24

Ja̧danö, jobe ichibö kwuju̧kwaduwemima Jesúsbi ö̧jobe, ökwösobu ebawinö dumusidi̧ midawinama. Jo̧bama ökwösobu ebawinö imidawenama Dios 'yayi̧ balekwa yöbawö ujuni̧ma jamatö 'yi̧nobe, ökwödönö pjabatö. Chömöledö, Jesús ökwösobuma, Tjo̧wi̧ Diosma jojodö tjusuli̧ma söbebö loa, jö̧ba̧lö, otiwanö jwöeba̧lobedanö jwöeba̧linobe. Jo̧kwaijayonö damötjö Abel ökwösobu jwöeba̧linadanömaökö, Jesús ökwösobu jwöeba̧linama. Abel ökwösobu nijibe ebawajobuma Abel jwöobedanö jwöinobe Diosnöma, Balekwa mikwa lȩbebi, jö̧ba̧lö. Jo̧kwaijayonö Jesús ökwösobuma jejenömaökö. Otiwanö jwöeba̧lobedanö jwöeba̧linobe, Tjo̧wi̧ tjusuli̧ma söbebö loa, jö̧ba̧lö. Jejenö Jesús imidawinobetjö̧ Dios 'yayi̧ balekwa yöbawö ujuni̧ma jamatö 'yi̧nobe, ökwödö Dios ö̧jobekwö, suli̧ jwibadöda kwichibaduwinö.

Tito 1:16

Jobadöma, Aaa, Diosnö waisadösa. jö̧ba̧lö yötjawijayonö, ja̧tji̧ma wainö i̧sebö yöbawadö, Diosnö öpöjödadösa, jö̧ba̧lö. Ja̧danö, jobadöma sulabedö, Dios wei̧ a̧ja̧kwökönö ja̧badö, ja̧danö ja'yubebi otiwanö ja̧bö tjuju̧kwoböma jwibadö.

Apocalipsis 9:17

Ja̧danö, ötjönö i̧sebi̧ma, baikwö chedijatö, abökönö chi̧'wi̧di̧danö: Jobadö ka̧ba̧yu̧dönö wa̧nö 'ya̧döma tjomuko tjöeba̧li̧ 'dubawadö. Ja̧ tjöeba̧li̧ 'dii̧ jawa 'dutjawi̧ma duwi̧, ökwöla ubi̧danö duwi̧. Ja̧danö, ö̧'dö̧wibi, duwapjayibi, ja̧ jawa tjöeba̧li̧ 'dutjawi̧ jawama. Ja̧danö, tja̧jwi̧mu ka̧ba̧yu̧döma, tjuuma, di̧di̧ba̧dö tjuudanö ichejekwadö. Ja̧danö, jobadö ka̧ba̧yu̧dö tjaatjöma ökwöla ubi̧kwö, imiyu'wokwö tubinö pjubadö. Ja̧danö, ju'wi jawa, azufre mikwi̧ laebi̧ chedijatö, jwiinö tubinö ubi̧ jawa, jobadö ka̧ba̧yu̧dö tjaatjö.

Apocalipsis 21:27

Jo̧kwaijayonö suli̧ jawama teatakwawokobe, jwiinö otiwi̧ jawada. Jobema, 'yayi̧ Jerusalénöma, otiwakwö sulabekwö pjaacha̧lokobe. Ja̧danö, ba̧kwȩlö̧jatebö omöna yöba̧ladöbi tebachöködö. Tjimibiya wȩyukwadöda tetjachobe, Bidöma Dios ö̧jobe tebachö ja̧dö, jö̧ba̧lö, jö̧tja̧lawö̧da. Jobadöma, tjimibiya ba̧jadö, Obeja Itji̧danö Jo̧ u̧kwa kwialu'ye okwa.

Mateo 25:25

Ja̧danö, jejenö chöwaisobetjö̧, yetabijatö, jo̧kwajabetjö̧ kwiyina balada jwiapji jö̧ba̧lö, lajunö sobö cho̧tjijatö. Edi, kwitea balada mil ö̧pi̧biyama biya̧da, jö̧ba̧lö.