Apocalipsis 20:2 - Dios Iwene

² Jo̧bama, böjȩnö ichibö, toba'dadanöso̧nö do̧batö ka̧lenasonö 'diinö nu'yö di̧batö ödobe chedijatö. Jo̧bama, jejenö di̧batö ödajökwema, Awetja, damötjö ji̧na a̧ko'da, omöna yöba̧lo̧. Ja̧danö, di̧batö ödajökwema lekwe, mil imiamebiya jenanö, labebökönö bo̧.

Apocalipsis 20:2 Referans Kwoze

2 Pedro 2:4

Jau chömöledö, isabenö jobadönö Dios lȩebakwa̧ wene döwaisobe, jobadöjayedönö Diosma ida̧ökö damötjö lȩebinobetjö̧. Jau chömöledö, damötjö ángelesdötjö sulabenö ja̧binadöma Dios lȩebi̧tjö tjö̧jibinokobe, sulabenö ja̧tjiökwe Diosma jobadönö ödinobe, Dios lȩebakwawö̧ tjö̧jena tjö̧bobö, ja̧danö jobe ka̧lena tjö̧bobe, inesö Dios lȩebakwa̧ möle baibenanö kabatö, ¿jö̧tö?

Apocalipsis 12:9

Ikenama nöbo̧ toba'dadanöso̧nöma mölejȩbetjö böjȩkwö labinö jabö lotjobe chedijatö. Jo̧bama damötjö, a̧ko'da ji̧na, Awetja mikwo̧, böjȩnö ju̧kwadönö okobe deinö omöna yöba̧lo̧, jö̧ba̧lö, ötjabökwe. Ja̧danö, iteda ömöayedö, sulabedö ángelesdönöbi labinö jabö lotjinawö̧, mölejȩbetjö böjȩkwö.

Judas 1:6

Ja̧danö, Dios ömöayedö ángelesdötjö, ju'wedöma Dios tjö̧jobö otidina öpöjödö jelobe latjebinobe. Ja̧danö jejenö labebajadönö Diosma ka̧lena ödinobe, yȩa'wo okwa tjö̧bobö Dios inesö lȩebakwa̧ möle baibenanö kabatö, ¿jö̧tö?

Juan 12:31

Ida̧ökö Dios yöawi̧ möle badekwacha, jojodönö edö, otiwanö tjö̧jinojobö, sulabenö tjö̧jinojobö yöawi̧ mölema. Ja̧danö, Diosma, ujulu i̧sebö, böjȩnö ju̧kwadönö tjuluwo̧nö söbebö loi̧ möle badekwacha— yöawinobe Jesúsma—.

Isaías 27:1

Ja̧danö, ja̧ möle Isabenö Jo̧ma Leviatan ötjabökwe jwaibalawanö jo̧nö lȩebakobe. Inesö nöbo̧ a̧ko'da Leviatanma, Dios öba a'otjö döibajakobe, öwali'bo wi̧su̧inö ja̧bö döibajakwo̧ Leviatanma, jo̧kwaijayonö Diosma iteda itea kwölöte'o, inesö nöa'o juluwa'onö kwabö loakobe jwaibalawanö jo̧ Leviatannö.

Génesis 3:15

Ja̧danö, ökwöma isuju jöpöjojo kwö̧jakwo̧ja. Ja̧danö, isujuma kwöpöjojosuju jö̧jakwuju. Ba̧kwelö̧jatebö wene ja̧kobe ökwötjö tupadanö ju̧kwadökwö, isujutjö tupadanö jojodökwö. Kwöpöjojodöda tjuju̧kwakwedö. Ja̧danö, isujutjö tupadanö jojodötjö bakwo̧ma kwuunö öja̧takwo̧ja. Ja̧danö, jo̧ba ökesayunö yö̧köbakwo̧ja— lȩbebö jö̧ba̧lijetö Isabenö Jo̧ Diosma a̧ko'danöma.

1 Pedro 5:8

Jweinö omukwatö eda̧lö kwö̧jaduwo chömöledö, kwöpöjojo Awetjama, ökwödönö suli̧ öwaedobö isakwobetjö̧. Kwöpöjojonö baikwö wanedö yötawa chömöledö: Didiba nöbo̧ma tulubö kwebacho̧, ukwakwo̧nö isakwö, ¿jö̧tö? Ja̧danö, Awetjama ökwödönö suli̧ öwaedobö isakwo̧ chömöledö, jo̧kwajabetjö̧ jweinö omukwatö eda̧lö kwö̧jaduwobö jo̧be.

Hebreos 2:14

Ja̧danö chömöledö, ökwödö Dios ju'wedö i̧tji̧mu ötjabiwö̧ma jojodödasa. Diteba'obi dökwösobubi juna̧ladösa. Ja̧danö, woba jojodösa. Jo̧kwaobetjö̧ Jesúsbi, ökwödönö pjaatobö jojoda baibanö öbötjachinobe ökwödö woba jojodödanö. Isabenö Dios Itji̧ma jojoda öbötjachinobe woobö ökwödö dusula dumusidi̧ midawö. Ja̧danö, jo̧bama dumusidi̧ midawö woenama Awetjanö ujuluwinobe. Jo̧ba Awetjama yelösöda juluwo̧ jojodönö Diostjö 'da̧bachibö wotjobö öibobö. Jo̧kwaijayonö Jesúsma jo̧banö ujuluwinobetjö̧ Dios i̧tji̧mu babibinadönö Diostjö 'da̧bachibö wotjobö öbibökö. Chömöledö jo̧ba Awetjama ujulu jwibo̧ ökwödö Jesúsnö do̧batö eminadönö öibobö, Diostjö 'da̧bachibö wodoböma.

Romanos 16:20

Jau chömöledö, do̧'wo̧ luwo̧nö wene jwiinö dö̧jobö pjabato̧ma Diosda, ja̧danö juluwanö söbebö loakobe döpöjojo Awetja ujuluma. Jejenö söbebö loenama, Awetjanö kwömasapaduwinö kwöja̧taduwobedanö ja̧kobe chömöledö, ökwödönö ujuluwokobetjö̧. Ja̧danö, Duluwo̧ Jesús kabatökönö mikwa jwiinö otiwa jawa iyö ökwödökwö ja̧nö pjaatobö ateba Diosnö chömöledö.

Juan 16:11

Ja̧danö, jo̧ba ichakwo̧ma öwaitjöda öba̧ja̧dakwo̧ jojodönö Dios lȩebakwa̧, tjöwaisachibanö. Ja̧danö ida̧ökö Diosma Awetja, böjȩtjö uluwo̧ baibanö jo̧nö lȩebi̧tjö weinobetjö̧ jojodö tjöwaisachibakobe, Jojodönöbi, suli̧ juna̧ladönöma, Dios lȩebakwawö̧, jö̧ba̧lö. Jejenö jojodö tjöwaisachibanö tjo̧'wo̧ luwo̧nö öba̧ja̧dakobe jo̧ba ichakwo̧, Dios O̧'wo̧ Luwo̧ma— jejenö yöawinobe Jesúsma öba̧ja̧di̧ waisachadönöma.

Apocalipsis 13:2

Ja̧danö, jo̧bama wainö ichejekwo̧, yawidanö. Ja̧danö, ömasapiya waya ömasapadanö lö̧kwe, nöbo̧, inejebiyabi ödöbo̧. Ja̧danö, aama didiba aadanö lö̧kwe. Ja̧danö, toba'dadanöso̧ma iteda ujulu iyo̧ ojwe okwatjö labebajo̧nöma, jojodönö weobö, inesö la'aka luwo̧ ba̧kwawakanö ba̧nö.

Apocalipsis 12:17

Jejenö baledobetjö̧ toba'dadanöso̧ma isujunö jwiinö ölabobe chedijatö. Jo̧kwaobetjö̧ jobuju ji̧tji̧munö, ajayinö jeminawö̧nö inia tjötjinö ja̧otö jö̧ba̧lö i̧'yobe chedijatö. Jobadöma, ajayinö jeminawö̧ ji̧tji̧muma, Dios weina a̧ja̧kwadö, Jesús jawa yöbawadö. Ja̧danö, toba'dadanöso̧ma so̧bi̧ya̧pu̧nö jamatö jo̧nö chedijatö, ojwe ö'öbö.

Apocalipsis 12:15

Ja̧danö, toba'dadanöso̧ma isujunöma o̧bebö loobö omukwatö, aatjö ojwedanö doibobö ja̧obe chedijatö, isujunöma ojwe emibö o̧bebö loobö.

Apocalipsis 12:13

Ikenama chedemi, toba'dadanöso̧, ¡Mölejȩbetjö böjȩkwö jatjajökwesa! jö̧ba̧lö, waisachibajo̧nö chedijatö. Jejenö waisachibö jitji̧nö emajajunö kwabö lootö jö̧ba̧lö i̧'yobe chedijatö, jobuju jö̧jobekwö.

Marcos 5:7

Ikenama Jesúsma jö̧ba̧lijetö, o̧'wo̧ luwo̧nö sulabo̧ jo̧nö webö: —O̧'wo̧ luwo̧nö sulabo̧, ökwönö weta. ¡Bitetjö labebaji!— webijetö. Jejenö weökwe o̧'wo̧ luwo̧nö sulabo̧ jo̧ma labinö jwöbeba̧lö jö̧ba̧lijetö, jojo aatjö: —Jesús, Inesö La'aka Luwo̧ Dios Itji̧ ¿dakwö ja̧köbobö kwichaja̧da ötjönöma? Jweinö yöba̧li, Dios öba a'otjö, ötjönöma sulabenö niinö ja̧köbököma. Dios iminö atebatjö, sulabenö inia tjötinö ja̧bökönuwi ötjönöma— jwöbeba̧lö abebijetö o̧'wo̧ luwo̧nö sulabo̧ jo̧ma Jesúsnöma.

Mateo 8:29

Jobadöma Jesús ichobe edö, labinö jwötjeba̧linobe baikwö: —Ökwö Dios i̧tji̧ma, ¿tajawedö dö̧jobekwö kwichobeda? Lȩebakwa̧ möle ina baibököjayonö, ¿ökwödönö lȩbebö kwichaji̧?— jö̧ba̧lö jwötjeba̧linobe.

Diosnö ösödo̧ Job mikwo̧ usula emawina jawa 1:7

Jejenö ichibiökwe, Isabenö Jo̧ma Awetjanö abebö a̧ja̧kwinobe, —Detjö kwichaja̧da? —jö̧ba̧lö. Isabenö Jo̧ abebö a̧ja̧kwökwe, —Bö̧je ba̧kwemeachibanö kwetachajabe, bö̧jetjö baledi̧ jawa eda̧lö, ja̧danö jelobebi, jelobebi kwebachajo̧ chichajabe, —jö̧ba̧lö atadinobe Awetjama.

Apocalipsis 13:4

Ja̧danö, jobadöma toba'dadanöso̧nöbi nöinö ösödadö, ojwe okwatjö labebajo̧nö iteda ujulu iyiawö̧, la'aka luwo̧ baibanö. Ja̧danö, ojwe okwatjö labebajo̧nöma edö, ¡Ayö! Bitema jwiinö juluwo̧, jo̧badanö juluwo̧ma deobe, jö̧ba̧lö, tjösödobe chedijatö. Ja̧danö, ¿Tida jo̧banötjö o̧penönö juluwo̧ma? ¿Tida jo̧banö kwabö lobo̧ma? ¿Tida jo̧banö ujuluwakwo̧ma? Deobe, jö̧ba̧lö, ojwe okwatjö labebajo̧nö tjösödobe chedijatö.

Apocalipsis 9:11

Jobadö ma̧la̧ka̧yö̧ tjuluwo̧ma sulabo̧ ángelso̧. Jo̧bama böjȩ teebe, laju a'o ja̧nö te'ada̧lo̧. Jo̧bama hebreo tjiwenenö Abadón mikwo̧. Ja̧danö, griego tjiwenenö Apolión mikwo̧, ma̧la̧ka̧yö̧ tjuluwo̧ma.

Mateo 19:29

Ja̧danö, ötjönö tjösödobetjö̧ tjeju junibadö, ja̧danö tjöjawujudö ya̧dönöbi, tjö̧ja̧wo̧dö ömadönöbi, tjabe'donöbi, tjojo'donöbi, tji̧tji̧munöbi yöne tjömöledönöbi junibadö, ja̧danö tjöbatjiju junibadöma, ötjönö ösödö tjujunibobetjö̧ isabenö tjujunibinatjö yelösöda bajalekwönönö balekwa iyakwo̧ Diosma, ja̧danö ju'wibi ba̧kwȩlö̧jatebö ja̧kwawa jobadönö iyakwo̧.

Génesis 3:1

Ja̧danö, Isabenö Jo̧ Dios tebonö ju̧kwadö otidinawö̧tjö o̧penönö waisinama a̧ko'da. Jo̧ba a̧ko'dama omöna yöa̧lakwawa waisina, jojodö jo̧ba omöna yöa̧li̧ tjösadakobetjö̧. Ju'wi möle jo̧bama abebö a̧ja̧kwijetö isujunö: —Diosma isabenö batjo okobe jwiinö towibiyanö wa̧ji̧ma kukwaduwoko jö̧ba̧lö ¿weinaji̧?— abebö a̧ja̧kwoko:

Isaías 24:22

Mölȩjȩbe ju̧kwadötjö lȩebawö̧nöbi, bö̧jȩnö ju̧kwadötjö lȩebawö̧nöbi bakobe o̧ko̧kodakobe, bakobe laju okwa ikwö loakobetjö̧. Jobadönö bakobe ka̧lena tjö̧bobö ipje'datakobe, yadakwö jobadönö lȩebakobetjö̧.

Marcos 4:15

Ja̧danö, ödebiya meinama, jojodö tjomajadedanö wanekwachobe, Dios iwene a̧ja̧kwadöma. Ja̧danö, Dios iwene a̧ja̧kwadötjö ju'wedöma Dios iwene tja̧ja̧kwena, tjomajade 'dibadöma, ödebiya mana 'diamanö meinadanö ichejekwadö. Tja̧ja̧kwena, tjomajade 'diobetjö̧ Awetjama ichibö wechebö emibo̧, pji̧yu̧ mebibö tjukwinadanö, mana 'diamanö meaja̧. Ja̧danö, Awetja ichibö wechebö emibenama jobadö a̧ja̧kwadöma ¿dakwö do̧tjatibenada Dios iwenema? Do̧batiböködö— labebö lobö yöbawijetö Jesúsma—.

Apocalipsis 12:3

Ikenama ju'wi i̧sebi̧ma mölejȩbetjö öwawachobe chedijatö. Jobetjö toba'dadanöso̧nö chedijatö, jwiinö nöbo̧nö, duwo̧nö. Jo̧bama uubiya jö̧kwe, jelemutjö doyulatajanö. Ja̧danö, ö'yekiyabi juna̧lo̧, domulataja jawa ökiya. Ja̧danö, inesö la'aka luwedö tjubutjawi̧danö, butjawa ökiya butjawo̧, uubiya bakwayukwena bakwakakwena.

Apocalipsis 12:4

Jo̧ba öwali'boma juluwo̧. Öwali'bonö labinö wökwebö mölejȩbe lö̧jadö si̧li̧'i̧dönöma, ö'wedönöda böjȩkwö jaobe chedijatö. Ja̧danö, jo̧bama metu'wo nioko jö̧bemi badeibö te'ada̧lö jo̧nö chedijatö, jemibökwenö ukwotö jö̧ba̧lö.

Apocalipsis 20:7

Ja̧danö, mil imiamebiya baibena, ángelma Awetjanö ejatö kaatakobe. Ja̧danö, Awetjama laebakobe laju okwatjö, Diosma jejenö laebobö weobetjö̧.

Apocalipsis 20:10

Ikenama Diosma Awetjanö, jojodönö ba̧kwȩlö̧jatebö suli̧ waedö yöba̧lo̧nöma, do̧batö töbebö loobe chedijatö, ökwöla nöola okwa. Jobema, ju'wedö du̧ju̧tajanö ajayinö töbebö loinemi. Ojwe okwatjö labebinanöbi ajayinö töbebö loinemi jemima. Ja̧danö, omöna yöba̧linanöbi, Ötjöma Dios yöawi̧ yöbawo̧sa, jö̧ba̧lö, yöba̧linanöbi, ajayinö töbebö loinemi jemima, ökwöla ubola okwama. Jobema tiibökönö, tubinö yelösöda ubobe, azufre mikwi̧ ubi̧ tubi̧ma. Ja̧danö, jobadö wa̧medukwama, ba̧kwȩlö̧jatebö labebökönö, mölebi yö̧tebi inia tjötjinö baledawö̧.