Apocalipsis 20:11 - Dios Iwene

¹¹ Ja̧danö, chedijatö Diosnö, inesö ö̧baka, dewakanö bo̧nö. Ikenama böjȩbi, mölejȩbi jwiinö baibobe chedijatö, yemidanö baibökönö.

Apocalipsis 20:11 Referans Kwoze

Apocalipsis 21:1

Ikenama chedemi mölejȩ 'yayinö baibajöjȩ chedijatö. Ja̧danö, böjȩbi 'yayinö baibajöjȩ chedijatö. Ajayinö otidina mölejȩbi, böjȩbi, tjo̧wi̧ 'dö̧ibajobe chedijatö. Ja̧danö, chedemi ojwe nöödöbi jwiobe.

2 Pedro 3:7

Ja̧ okobe jwiinö Dios yöbawö weobetjö̧ baledinobe chömöledö. Ja̧danö, babe ji̧ mölejȩbi, böjȩbi jo̧bada weobetjö̧ ina jo̧be chömöledö, tupakwö mölejȩbi böjȩbi Dios söbebö loenanö kabatö. Jau chömöledö, tupakwöda böjȩbi, mölejȩbi juwö söbebö lotakwo̧sa, jö̧ba̧lö Dios omukwatö ujuninobetjö̧, böjȩbi mölejȩbi te'ada̧lobe ichejekwa, inesö Dios böjȩ jojodö ja̧tji̧ otiwojobö sulojobö jö̧ba̧lö yöawakwa̧ möle baibenanö kabatö, ja̧danö Diosnö öpöjödadönö söbebö loakwa̧ möle baibenanö kabatö. Ja̧danö, ja̧ möle baibenama, Diosma böjȩbi mölejȩbi juwö söbebö loakobe chömöledö. Jau chömöledö, damötjö okobe jwiinö Dios yöawi̧danö baledinobe, jo̧kwajabetjö̧ ju'wibi döwaisobö jo̧be, Cristo yemidanö ichakwo̧ yöawinadanö isabenö ichakwo̧, ja̧danö isabenö jobadö sulabenö obadönö lȩebakwo̧.

Mateo 25:31

Tupakwö yöawinobe Jesúsma: —Ötjö jojo baibanö jeminökwema, yemidanö chichocha, ja̧danö chichenama, dejatinö chujulunö okobe deinö chömöayedö ángelesdökwö chichocha, inesö la'aka luwo̧ batibanö. Ja̧danö, wa̧kwawaka inesö salöinö dewakanö chöbamatocha,

Daniel 2:35

Jemi ikenama okobe jwiinö o̧'wo̧ jawa a̧ja̧ma nijakwö meinobe, ja̧danö 'dii jawabi, lete'obi, broncebi, platabi, orobi okobe jwiinö bakobe 'dalachajibinobe, ja̧danö i̧so̧pja baibanö suli̧ waekwinobe. Ja̧danö jwa̧lȩ'epjo ja̧ i̧so̧pja jayubebi ji̧bökönö e'ewibobe kwedinobe, ajayinö kwedajökwe o̧'wo̧ jawama bakobenö jwiinö baibanö. Ja̧danö, jemi ikenama ju'wibi kwedinobe, ja̧ inawa ajawama nöamachibobe kwedinobe, mösa'o nöa'o, böjȩ bakwameachibanö ja̧'o baibanö nöamachibobe kwedinobe— jö̧ba̧lö yöawinobe Danielma.

Romanos 2:5

Jo̧kwaijayonö, jejenö ite'ada̧lijayonö, jwaikwöda sulabenö omukwatadöja, kwomukwataduwi̧ balewachökönö. Ja̧danö, jwiinö labi̧ jawa lȩebakobe Diosma, ökwödönöma, jojodönö lȩebi̧ möle baibenama. Ja̧ möle baibenama, jweinöda lȩebakwo̧ Diosma, jojodö ja̧tji̧ mikwa baibanö.

Mateo 24:35

Jau chömöledö, isabenö yötawi̧danö baledakobe. Baikwö yötawa: Böjȩbi, mölejȩbi isabenö 'dö̧ibajakobe, jo̧kwaijayonö ötjö yötawi̧ma ba̧kwȩlö̧jatebö ja̧kobe— jö̧ba̧lö yöawinobe Jesúsma.

Apocalipsis 16:20

Ja̧danö, böjȩma jwiinö tjö̧bebö lileibobetjö̧ ö'wejesa'ijuma jwiinö baibanö, bakwa'obi jwiinö, ojweda baibanö chedijatö. Ja̧danö, mö'ösa'ijubi jwiinö baibanö, bakwa'obi jwiinö, nijida baibanö chedijatö.

Apocalipsis 6:14

Ja̧danö, mölejȩma ösöja 'bo̧dachibi̧danö baibobe chedijatö, öwawököje baibanö. Ja̧danö, mö'ösa'ijubi, ö'wejesa'ijubi jelöma pjolachibö jelobekwö jamatobe chedijatö.

Apocalipsis 20:2

Jo̧bama, böjȩnö ichibö, toba'dadanöso̧nö do̧batö ka̧lenasonö 'diinö nu'yö di̧batö ödobe chedijatö. Jo̧bama, jejenö di̧batö ödajökwema, Awetja, damötjö ji̧na a̧ko'da, omöna yöba̧lo̧. Ja̧danö, di̧batö ödajökwema lekwe, mil imiamebiya jenanö, labebökönö bo̧.

Apocalipsis 12:8

Ja̧danö, ángel, Miguel mikwo̧ma, iteda ömöayedö ángelesdökwö toba'dadanöso̧nö, jo̧ba ömöayedönöbi tjujuluwobe chedijatö. Jo̧kwaobetjö̧ toba'dadanöso̧ma, ömöayedöbi, mölejȩbe tjuju̧kwoböma weököwö̧ babibinadö, böjȩnöda tjö̧jobö.

Apocalipsis 4:2

Ikenama, omönanö Dios O̧'wo̧ Luwo̧ma ötjö cho̧'wo̧ luwo̧ okwanö öwawinö i̧sebijatö mölejȩbe ji̧ jawama. Bakwo̧nö chedijatö, inesö la'aka luwo̧ ba̧kwawakanö bo̧nö.

Diosnö ösödo̧ Job mikwo̧ usula emawina jawa 9:6

ja̧danö niji tjöawobö webo̧, ja̧danö bö̧jȩ la'aka tjö̧awobö webo̧.

Apocalipsis 19:11

Ikenama mölejȩbe chedemi apjude po̧ekwobe chedijatö. Ja̧danö, po̧ekwobe okwatjö kabayu dewo̧nö chedijatö. Jo̧ba kabayu wamenö bakwo̧ ö̧wo̧nö chedijatö. Jo̧ba imima, Jweinö Yöbawo̧ mikwo̧. Jo̧bama, jojodönö lȩbebö jweinö omukwatö webo̧. Ja̧danö, jweinö omukwatö öpöjojodönö ujuluwobö 'yo̧.

Génesis 18:25

Chuluwo̧, ökwöma jejenö lȩkebö̧kena. Otiwanö omukwatö ju̧kwadökwö sulabenö ja̧bö ju̧kwadökwö debö tji̧'yobö söbebö loköbökena. Jejenö söbebö loköbitjö̧ma otiwadönöbi sulabedönöbi bakwainöda kwedena. Ökwöma jejenö kwomukwatökena. Ökwöma böjȩnö ju̧kwadötjö didö sulabenö ja̧tjojobö, didö otiwanö ja̧tjojobö waiso̧ja. Jo̧kwaobetjö̧ jweinö omukwatö weköbakwo̧ja— yöba̧lijetö Abrahamma Isabenö Jo̧ Diosnö.

Isaías 6:1

Juda niji inesö la'aka luwo̧ Uzias mikwo̧ ö'wö baibina o̧bama baikwö baledinobe: Ja̧ o̧bama, ötjö Isaiasma Isabenö Jo̧ Diosnö chedijatö. Inesö la'aka luwo̧ iteakanö ö̧bobe chedijatö, möakanö ö̧bobe chedijatö, ja̧danö inesö la'aka luwo̧ ö̧kamijido̧ ödöado̧ chedijatö. Ja̧do̧ ö̧kamiji̧do̧ otiwado̧ma jwiinö ödöa̧do̧ ji̧nobe, ja̧do̧tjö iteda eju su̧'be baibenanö.

Daniel 7:10

Ja̧danö i̧'yonö, öba a'otjö ökwöla labebö 'yo̧be chedatö, ojwese'dotjö ojwiyo labebö isuwidanö. Jo̧ba ömöayedö yelösöda ba̧jekwadö, millones tupakwö ba̧jekwadö iteda ömöayedö wei̧ tjotidobe chedatö, ja̧danö öba a'otjö yelösöda tjöba̧ja̧dökenanö ba̧jekwadö tjö̧jobe chedatö. Ikenama tjöbamatobe chedatö, Dios jojodö ja̧tji̧ sulojobö otiwojobö yöawakobetjö̧, ja̧danö kwialu'ye, jojodö ja̧tjina wȩyukwa'ye 'bobebö yötja̧lobe chedatö.

Mateo 11:22

Isabenö yötawaduwakwö, Dios lȩebakwa̧ möle baibenama, Tirobi Sidónbi ju̧kwadönö lȩebitjö̧ bajalekwönönö labinö lȩebakwo̧ ökwödö Corazínnö ju̧kwadönöbi, Betsaidanö ju̧kwadönöbi.

Apocalipsis 21:5

Jemi ikenama, inesö ba̧kwawakanö bo̧ma yöawijatö: —A̧ja̧kwaduwitjö. Ötjöma okobe jwiinö ajayi jawama 'yayinö baibanö ja̧bo̧sa— yöawijatö. Ja̧danö, ötjönö weijatö: —Juan, ötjö yötawi̧ma wȩyudi. Yötawi̧ma jweinö yötawa, isabenö ji̧ wene. Biya̧, yötawi̧ma wȩyudi: