2 Timoteo 4:10 - Dios Iwene

¹⁰ Jau Timoteo, ajayinö ötjökwö otidina Demas mikwo̧ma, böjȩ jawa ösödobetjö̧ ötjönö le'dedibö i̧'yajabe, ja̧danö böjȩ jawa ösödobetjö̧ Tesalónicabe i̧'yajabe. Ja̧danö, ju'wibi Crescentema Galacia nijibe i̧'yajabe, ja̧danö Titoma Dalmacia nijibe i̧'yajabe,

2 Timoteo 4:10 Referans Kwoze

2 Timoteo 1:15

Timoteo, kwöwaisa, ba̧jekwadö Asia nijitjö Jesúsnö ösödadöma ötjönö katjatibinobe, ja̧danö jobadötjö Figelobi, Hermógenesbi ötjönö katjatibinobe.

2 Corintios 2:13

Jo̧kwaijayonö, döjawo̧ Tito deitjö̧, nöinö cho̧'wo̧ tjo̧achijatö, Titoma daijö, Corintio jojodönö dakwö yöawakwa̧jö jö̧ba̧lö. Jau chömöledö, Titoma kwiteboduwitjö ȩwa̧jo̧, jo̧babi ötjökwö Troasbe ichibakwo̧ jö̧ba̧lö chomukwatijayonö, deinobe. Jo̧kwajabetjö̧ jobetjö labebö, Macedoniabe chi̧'yijatö jo̧banö isakwö, ökwödönö yöawakwa̧ cha̧ja̧kwakobetjö̧.

Hechos 16:6

Ikenama Pablo, Silas, Asiabe yöbawö tji̧'yo jö̧tja̧lijayonö Dios O̧'wo̧ Luwo̧ma webijökötö jobe tji̧'yoböma. Jo̧kwaobetjö̧ jobe kwebachökönö jelobe, Frigia nijibi, Galacia nijibi baledö

Filemón 1:24

Ja̧danö, ötjökwö otidadö Marcos mikwo̧bi, Aristarco mikwo̧bi, Demas mikwo̧bi, Lucas mikwo̧bi detjawobedanö dokwa atjebobe ökwödönö.

2 Timoteo 4:16

Ajayinö lȩekwa luwedö tjöba a'o chö̧jenama, jo̧dawa'ye chö̧jijatö, okobe deinö le'dedibö tji̧'yinobetjö̧. Jejenö le'dedibö tji̧'yijayonö, ötjönö le'dedibö 'yi̧nadönö Dios lȩlö̧jinö edobö chösöda, le'dedibö tji̧'yina omukwatökönö.

Filipenses 2:21

Ju'wedö okobe deinö Jesucristo jawa junibö, idöda jawada omukwatadö chömöledö,

2 Corintios 7:6

Jo̧kwaijayonö, Diosma o̧'wo̧ tjo̧achadönö tjujuluwachibanö pjabato̧ chömöledö, ja̧danö ökwödönö pjaatinobe. Jau chömöledö, do̧'wo̧ luwo̧nö ujuluwachibanö pjabatö, döjawo̧ Tito ichobö weinobe Diosma.

Hechos 17:11

Ja̧danö, Bereanö ju̧kwadö judío jojodöma, Pablo yöawi̧ a̧ja̧kwö ösödö a̧ja̧kwijadötö. Jobadöma Tesalónicanö ju̧kwadö judío jojodötjö o̧penönö ösödö a̧ja̧kwijadötö. Jobadöma tjo̧'wo̧ ösöwanö, Da̧ja̧kwobö jö̧da̧la, jö̧ba̧lö, a̧ja̧kwijadötö Dios iwenema. Ju'wi möle jwiinö tja̧ja̧kwaja̧ ikenama, Dios iwene, damötjö tjiwȩyudina waisachö eda̧lijadötö, Pabloma Dios iwene yöawi̧da jweinö yöbawo̧, jö̧ba̧lö.

Hechos 17:1

Ikenama, Pablo, Silas Filipostjö labebö 'ya̧nö kwebachijadötö Anfípolis comunidadbi, Apolonia comunidadbi. Jobe kwebachajadöma Tesalónica comunidadnö ichibijadötö. Jenama judío jojodö yötjaweju ji̧jetö.

2 Pedro 2:15

Jau chömöledö, otiwanö ja̧awatjö 'da̧bachibö, Balaam mikwo̧ ökömanö lutja̧libobedanö ichejekwa, jo̧ba ja̧inadanö ja̧bö. Jau chömöledö, kwöwaisaduwa, jo̧ba Beor mikwo̧ itji̧ Balaam mikwo̧ma, balada emotö jö̧ba̧lö sulabenö yöawobö ösödinobe, ¿jö̧tö?

Tito 1:4

Tito, ökwöma ötjöda chitji̧danöbo̧ja bakobe Jesúsnö ösödö dö̧jobetjö̧. Ja̧danö, böja kwialusöja wȩyudö wetakwö. Dabe'do Diosnöbi, dö̧jibinö pjabato̧ Cristo Jesúsnöbi ateba, ökwönö lȩlö̧jinö edö, kwo̧'wo̧ luwo̧ ösöwachibanö tupakwö pjatjato jö̧ba̧lö.

1 Timoteo 6:17

Cristonö ösödadötjö balada luwedönö baikwö yöbawidönö Timoteo, Aaa, ju'wedönötjö o̧penönöbedösa, jö̧ba̧lö tjomukwatokobö. Ja̧danö, böjȩ jawa tjujuna̧li̧, tupakwö jwiakwa̧ jawa tjujuna̧li̧ma tjo̧'wo̧ tjöwana̧lokobö yöbawidönö, Diosnöda tjo̧'wo̧ tjöwana̧lobö jo̧be. Jau, jo̧ba Diosda okobe jwiinö ökwödönö iyo̧ma, do̧'wo̧ ösöwanö dö̧jobö.

1 Timoteo 6:10

Jau Timoteo, baikwö wanedö yötawa: Balada ösödakwawama, sulabe bö'diadanö ji̧, ja̧danö balada ösödakwawatjö, nöinö suli̧ pokwobedanö ichejekwa. Ja̧danö, ju'wedö nöinö balada tjujuna̧lobö tjösödobetjö̧, Cristonö ösödö dö̧ji̧tjö 'da̧bachibö tji̧'yajabe, balada tjujuna̧lobö isakwö. Ja̧danö, jejenö 'da̧bachibö tji̧'yajabema, kabatökönö jwiinö o̧'wo̧ tjo̧achadö tjuju̧kwobe.

Gálatas 1:2

Ötjöma ju'wedö ötjökwö ju̧kwadö dömöledö Jesúsnö ösödadökwö ja̧nö chiwȩyuda böja kwialusöja ökwödö Gálatas nijitjö ko̧ko̧kwö kwöba̧jaduwitenia Jesúsnö ösödadönö.

2 Corintios 8:16

Chömöledö, Diosma isabenö otiwanö pjaatinobe Titonö, ökwödönö pjatatobö chösödi̧danö, Titobi bakwainö ökwödönö pjaatobö ösödo jö̧ba̧lö, ja̧danö jejenö pjaatinobetjö̧, Diosnö ösödö ateba, otiwa jö̧ba̧lö.

2 Corintios 8:6

Ja̧danö, ja̧ wene omukwatö, Titonö yödawijatö, yemidanö ökwödö Corintio jojodö kwiteboduwibe i̧'yobö, ökwödö kwiyaduwakwa̧ jawa pjaatobö. Jau chömöledö, belö Titoda ökwödönö pjaatinobe, ja̧ iyawa baladama 'da̧batö kwujunaduwobö, ¿jö̧tö? Jo̧kwajabetjö̧ jo̧banö yödawijatö, ja̧ Jerusalénnö ju̧kwadönö kwiyaduwobö kwomukwatinaduwa balada jawa pjaatobö, ajayinö kwomukwatinaduwadanö otiwanö kwiyaduwakobetjö̧.

Hechos 18:23

Antioquíanö obukwobeda lekwe ja̧jo̧ Pabloma kwebachö 'yi̧jetö Galaciabebi, Frigiabebi. Jobe kwebachö yöbawö pjabatijetö Jesúsnö ösödadönöma, tjo̧'wo̧ luwo̧nö jemi tupakwö juluwachibanö tji̧'yobö.

Hechos 17:13

Ikenama Pablo, Silas ajayinö latjebinemi Tesalónicanö ju̧kwadö judío jojodöma ju'wedö yötjawi̧ a̧ja̧kwijadötö, Babema Pabloma Dios iwene yöawobe Berea comunidadnö, jö̧ba̧lö. Jejenö a̧ja̧kwö tjo̧'wo̧ sulinö edö Bereabe 'yi̧jadötö, Pablo, Silas tjö̧jobekwö. Jobe 'ya̧nö, Bereanö ju̧kwadö Pablonö, Silasnö jwiinö tjölabobö jwöbeba̧lö yöbawijadötö.

Hechos 15:38

Jo̧kwaijayonö Pabloma öpöjödijetö, belö Marcos, jobadökwö yöbawö 'yö̧könö, Panfilia nijitjö le'dedibö ȩwa̧jinökweobetjö̧.

Hechos 13:13

Ikenama Pabloma, itekwöda kwebachadökwö Pafostjö labebö 'yi̧jetö isowinö Panfilia nijibe. 'Ya̧jadöma Panfilia nijitjöma Perge comunidadnö ichibijadötö. Tjichibajelöma Juanma ju'wedöma tjuju̧kwibonö ȩwa̧jijetö Jerusalénbe.

Lucas 17:32

Lot ilekwonö baledina omukwataduwi chömöledö. Jalachabökönö jweinö döjibajobö jöpöjödobetjö̧, jenada debö ji̧'yinobe, ¿jö̧tö? Ja̧danö jenada ö'wö batjibapji jö̧ba̧lö, jweinö dötjibajobö ja̧kobe, jwiinö labobetjö̧.

Lucas 16:13

Tupakwö yöawinobe Jesúsma: —Ja̧danö ju'wibi yötawaduwakwö chömöledö, du̧ju̧taja tjömöayedö kwö̧jaduwoböma jwiobe. Du̧ju̧taja tjömöayedö kwö̧jaduwitjö̧ma, kwuluwo̧ bakwo̧nö kwösödaduwonö, jelo̧nö kwöpöjödaduwena, ja̧danö bakwo̧ wei̧ ja̧bö kwö̧jaduwonö, jelo̧nö kwöpöjödaduwena, mikwawö̧kö̧ jö̧ba̧lö. Jau chömöledö, jwaikwöda balada kwemaduwotö jö̧ba̧lö kwisakwaduwitjö̧ma, balada kwemobö kwösödi̧ ömöayedödanö kwö̧jaduwena, ja̧danö balada kwemobö kwösödi̧ ömöayedöbi, Dios ömöayedöbi kwö̧jaduwoböma jwiobe. Jau chömöledö, balada kwemaduwotö jö̧ba̧lö isakwö kwö̧jaduwitjö̧ma, Dios wei̧ ja̧bö kwö̧jaduwi̧ma waekwakobe— jö̧ba̧lö yöawinobe Jesúsma.

Lucas 14:33

Jau chömöledö, böjȩtjö abönö omukwatadöja, ja'öda kwöwaekwaduwapji jö̧ba̧lö, ja̧danö ötjö chöba̧ja̧di̧ waisachadö batjibobö omukwatadöbi jejenö jweinö omukwatönö tjomukwatobö jo̧be, isabenö chöba̧ja̧di̧ waisachadö batjibobö tjösödojobö jö̧ba̧lö. Ja̧danö, ötjö chöba̧ja̧di̧ waisachadöma wotjenanö kabatö jwaikwöda ötjönöda tjösödobö jo̧betjö̧, abönö otiwanö tjo̧mukwatobö jo̧be, isabenö chöba̧ja̧di̧ waisachadö batjibobö tjösödojobö tjöpöjödojobö jö̧ba̧lö. Ja̧danö, okobe jwiinö tjujuna̧li̧ mikwawökö ji̧ jö̧ba̧lö lödibö, chökömanö tjichobö tjöpöjöditjö̧ma, isabenö chöba̧ja̧di̧ waisachadö batjiboböma jwibadö— jö̧ba̧lö yöawinobe Jesúsma.

Mateo 26:56

Baikwö yötawaduwakwö: Okobe jwiinö babe baledi̧ma baledajabe, Dios yöawi̧ yöbawinadö tjiwȩyudinadanö baledakobetjö̧— jö̧ba̧lö yöawinobe Jesúsma. Ikenama, okobe deinö Jesús öba̧ja̧di̧ waisachadöma jo̧banö le'dedibö dötjibajinobe.

Mateo 12:32

Jau chömöledö, ötjö jojo baibanö jeminökwenö sulabenö yöba̧ladöbi Dios lȩebi̧tjö tjö̧jibobö ina jo̧be. Ötjönö sulabenö yötja̧lijayonö, tupakwö sulabenö tjomukwati̧ kabatibö tjöbalewachitjö̧ma Dios lȩebakwa̧tjö tjö̧jibobö ina jȩna. Jo̧kwaijayonö ji̧kwa jwiakobe Dios O̧'wo̧ Luwo̧ ja̧i̧ edö, Awetja ja̧i̧da jö̧ba̧lö yöba̧ladönöma. La'akatjöda tjö̧jibökakwedö. Jau chömöledö, böjȩnö ja̧nöbi, tupakwöbi la'akatjöda ji̧kwa jwiakobe jobadönö— jö̧ba̧lö yöawinobe Jesúsma.

2 Corintios 8:23

Jobadöma kwiteboduwibe tji̧'yakwedö chömöledö, ja̧danö ökwödötjö ju'wedöma, idöma didöjayedöjö jö̧ba̧lö tjomukwatitjö̧ma, baikwö atadakwawa yötawa: Titoma, bakobe ötjökwö otido̧, ja̧danö ötjö ökwödönö pjabatö chotidi̧danö, Titobi bakobe ötjökwö otidobe ökwödönö pjabatö. Ja̧danö ju'wedö Titokwö kwebachadöma, ko̧ko̧kwö tjö̧baji̧tenia ju̧kwadö Jesúsnö ösödadö wetjinawö̧ chömöledö. Jobadönö wetjinobe, ko̧ko̧kwö tjö̧baji̧tenia ju̧kwadö tjiminö kwetjacho jö̧ba̧lö, ja̧danö jobadöma otiwanö ja̧bö ju̧kwadö. Jobadö ja̧bö tjö̧ji̧ edö jojodö tjösödakobe, ja̧danö ju'wibi Duluwo̧ Cristonö otiwanö tjomukwatakobe, isabenö bidö tjuluwo̧ma otiwo̧ jö̧ba̧lö.