2 Samuel 19:27 - Dios Iwene

²⁷ Ja̧danö ju'wibi chuluwo̧, chi̧'yobö jö̧ta̧lijayonö, jo̧ba Sibama sulabenö omöna yöa̧linobe ökwö la'aka chuluwo̧nö, ichobö öpöjödo̧, jö̧ba̧lö. Jejenö baledina yötawakwö chuluwo̧, ja̧danö ökwö inesö la'aka chuluwo̧ma, Dios weökwe angeldanö waiso̧ja, jo̧kwajabetjö̧ ökwöda otiwanö kwomukwati̧danö ja̧köbo.

2 Samuel 19:27 Referans Kwoze

2 Samuel 14:20

Jau chuluwo̧, kwitji̧ jawa ajayinö kwomukwatina balewö lobö wainö kwomukwatotö jö̧ba̧lö, ökwönö yöta̧lobö weatö Joabma. Ja̧danö jo̧ba weaja̧ tojata̧lö ja̧ jawa yöta̧lobö domukwatijayonö, isabenö waiso̧ja chuluwo̧, ja̧danö dotojoböma jwiatö. Jau chuluwo̧, Dios weökwe angel öwaisi̧danö okobe jwiinö ditebo jawa waiso̧ja, ja̧danö dotojo jö̧da̧laja̧ma, kwöwaisachibajabe, —jö̧ba̧lö jatadinobe.

2 Samuel 14:17

ja̧danö omukwataju, tupakwö chomukwatijatö, –Chuluwo̧ la'aka luwo̧ ötjönö pjaatitjö̧ma ötjöbi chi̧tji̧bi otiwanö wene jwiinö dö̧jena, –jö̧ba̧lö chomukwatijatö. Jau la'aka chuluwo̧, ökwöma Dios weökwe angeldanö ichejekwo̧ja, wene dujuna̧li̧ a̧ja̧kwö, otiwi̧bi suli̧bi böjö jweinö yökawobö waiso̧köbobetjö̧. Kwuluwo̧ Isabenö Jo̧ Diosnö ateba, ökwökwö ja̧nö pjaatobö, —jö̧ba̧lö yöja̧linobe Tecoa jojosujuma.

2 Samuel 16:3

Jejenö yöa̧lökwe, la'aka luwo̧ Davidma abebö a̧ja̧kwinobe, —¿Kwuluwo̧mine Saul ö̧'dö̧ Mefibosetja? ¿Jo̧bama ichajökiji̧? —jö̧ba̧lö. Abebö a̧ja̧kwökwe, Siba atadinobe, —Jo̧bama Jerusalennö ö̧jibajabe, baikwö omukwatö, –Babe israel jojodöma cha'dömine Saul webö ö̧jinemi ötjöda webö chö̧jobö tjujunakobe, —jö̧ba̧lö.

1 Samuel 29:9

Atadökwe, Aquisma yöa̧linobe, —Ötjöma chöwaisa, isabenö chöba a'otjö wene jwibo̧ja jö̧ba̧lö, Dios weökwe angelso̧danö, wene jwibo̧ja. Jo̧kwaijayonö, jejenö chöwaisijayonö, ju'wedö filisteo luwedöma wainö omukwatadö, ja̧danö jobadöma yötja̧lajabe, –Davidma ökwödökwö ölakwabikwawöma ichö̧kö̧, –jö̧ba̧lö.

Éxodo 20:16

Ja̧danö ju'wibi wetaduwakwö: Kwömöledöso̧, wene juna̧lo̧ma omukwatö juno̧ luwo̧ öbajale a'otjö ja̧nö kwatadaduwobö aebitjö̧ma omöna yöka̧laduwoko.

2 Samuel 16:4

Jejenö yöa̧lökwe, la'aka luwo̧ Davidma Sibanö yöa̧linobe, —Mefiboset jejenö ötjönö öpöjödö ö̧jibinobetjö̧, okobe jwiinö jo̧ba ujuna̧linama, ökwönö chiyakwö, —jö̧ba̧lö. Yöa̧lökwe, Sibama atadinobe, —Chuluwo̧, kwöba a'o bȩbachibö chösödakwö, ba̧kwelöjatebö kwösödi̧nö ja̧bö chö̧jobö chösöda, —jö̧ba̧lö.

2 Samuel 19:17

Ja̧danö Simikwö ju'wedö milbedö Benjamin jojodöbi pjabatö tjichinobe. Ja̧danö Saul ömöayo̧bina Sibabi itji̧mu quincebedönöbi, ömöayedö veitebedönöbi öbibö, juluwanö Jordan ojwebe ichibinobe, la'aka luwo̧ Davidkwö tjöbadekwachobö.

2 Samuel 9:3

Atadökwe la'aka luwo̧ Davidma abebö a̧ja̧kwinobe, —Dios öba a'otjö Jonatannö yöbawö chujunijatö, ömöledönö dösölö̧jinö pjatatakwa̧ wenema, jo̧kwajabetjö̧ abebö cha̧ja̧kwakwö, Saul ömöledötjö ina jelo̧ ö̧jobeji̧, jo̧banö dösölö̧jinö pjatatoböma? —jö̧ba̧lö. Abebö a̧ja̧kwökwe Sibama atadinobe, —Jonatan i̧tji̧mutjö bakwo̧ ina ya̧a̧lobe, ömasapiya suli̧ waekwinama, —jö̧ba̧lö.