2 Samuel 11:1 - Dios Iwene

¹ Imiame baledaja̧ ikenama, la'aka luwedöma ba̧kwelöjatebö ölakwabiwawö labebajitjobe, ja̧danö ölakwabikwawö latjebobö baibenama, Davidma Joabnöbi, ju'wedö ömöayedö ölakwabikwawa jojodönöbi weinobe, amonitas jojodönö tjujuluwobö. Jejenö weawö̧, amonitas jojodönö ölakwabikwawö tjujuluwinobe, tjitebo inesö comunidad Rababe dötjibajenanö, ja̧danö Raba comunidad tjötjösawinobe, jobe tjöbebö ju̧kwadönö tjujuluwobö. Jo̧kwaijayonö, ömöayedö jejenö amonitas jojodönö tjölakwabikwawonö, Davidma okobe Jerusalennö ö̧jibinobe.

2 Samuel 11:1 Referans Kwoze

1 Crónicas 20:1

Imiame baledaja̧ ikenama, la'aka luwedöma ba̧kwelöjatebö ölakwabikwawö labebajitjobe, ja̧danö ölakwabikwawö latjebobö baibenama, David ömöayedö ölakwabikwawa jojodötjö la'aka luwo̧ Joabma ju'wedö David ömöayedö ölakwabikwawa jojodönö öbibö i̧'yinobe, amonitas jojodönö tjujuluwobö. Jobekwö 'ya̧jadö, amonitas jojodö tjitebo ba̧kwemeachibanö ölakwabikwawö tjujuluwinobe, ja̧danö tjitebo inesö comunidad Raba comunidadbe ichibö tjötjösawinobe, jobe tjöbebö ju̧kwadönöbi tjujuluwobö. Jo̧kwaijayonö, ömöayedö jejenö amonitas jojodönö tjölakwabikwawonö, Davidma okobe Jerusalennö ö̧jibinobe. Ja̧danö, Raba comunidad jojodökwö ölakwabikwawö ujuluwinobe Joabma, ja̧danö tjitebo comunidad söbebö loinobe.

1 Reyes 20:26

Ja̧danö, ikenasaba, o̧ba baibenama, Ben-adadma siria jojodötjö ölakwabikwawadönö o̧ko̧kodinobe, ja̧danö ko̧ko̧dajo̧, Afec comunidadbe tji̧'yinobe, israel jojodökwö tjölakwabikwawobö.

1 Reyes 20:22

Jemi ikenama, Dios yöawi̧ yöbawo̧ma Israel la'aka luwo̧ Acab öba a'o ichibö, jo̧banö yöbawö weinobe: —Babema kwujuluwachibanö kwotidobö jobe, ja̧danö yadakwö otiwanö kwölakwabikwawakwa̧ omukwatö kwujunobö jo̧be. Jau Acab, makösaba o̧ba baibenama, Siria la'aka luwo̧ma yemidanö ökwönö mebibö ölakwabikwawakobe, jo̧kwajabetjö̧ otiwanö kwölakwabikwawakwa̧ jawa omukwatö kwotido, —jö̧ba̧lö.

Deuteronomio 3:11

Ja̧danö, la'aka luwo̧ Ogma, ja̧ nijinö ju̧kwadö inesö ödöbaedö refaitas ötjabawö̧tjö bajaleapo ji̧na. Jo̧bama isabenö nöbo̧inobe, iteapjo camapjoma 'dii jawatjö otikwapjo ujuna̧linobe, ö'wejemu jawa metro jenanö ödöapjoma, ja̧danö jakwölakwö dötölajata metro jenanö ödöapjo. Ja̧ Og iteapjo camapjoma, ina amonitas jojodö tjitebo comunidad Rabanö jo̧be, ja̧pjo edö, isabenö nöbo̧ ö̧jina edö tjöwaisobö.

1 Samuel 18:30

Ja̧danö, filisteo jojodöma kabatökönö israel jojodönö tjujuluwotö jö̧ba̧lö ölakwabikwawö tjö̧jinobe, ja̧danö ba̧kwelöjatebö jobadökwö ölakwabikwawö ö̧jenama, Davidma ju'wedö israel jojodö ölakwabikwawa luwedötjö bajalekwönönö waisanö ölakwabikwawö jobadönö juluwiainobe. Jo̧kwajabetjö̧, jejenö waisanö ujuluwiaiawö̧, okobe deinö jojodöma Davidnö otiwanö tjomukwatinobe, —Isabenö Davidma juluwo̧, ölakwabikwawa waiso̧, —jö̧ba̧lö.

2 Samuel 10:14

Ja̧danö, dötjibajobe edö, amonitas jojodöbi Abisai öba a'otjö dötjibajinobe, ja̧danö döbibajö, comunidad okwa tetjachinobe. Jemi ikenama Joabma amonitas jojodönö ölakwabikwawö kabatibö, Jerusalenbe ȩwa̧jinobe.