2 Reyes 17:7 - Dios Iwene

⁷ Ja̧ baledina labebebö loawama baikwö laebobe: Idöda tjösödökwe Isabenö Jo̧ Dios jobadönö pjabatö, Egipto la'aka luwo̧ Faraon ujulutjö tjö̧jibanö, Egipto nijitjö labebö, idöda tjitebo nijinö tjö̧jobö pjaatinajayonö, Israel jojodöma tjösödökwe Isabenö Jo̧ Dios weökö jawa sulabenö ja̧tjinobe, ja̧danö jo̧banö kabatibö, ju'wedö tjösödawö̧nö tjösödinobe.

2 Reyes 17:7 Referans Kwoze

Josué 23:16

—Kwuluwo̧duwi Isabenö Jo̧ Diosma iteda wei̧ ökwödönö weinobe chömöledö, wei̧ a̧ja̧kwö kwö̧jaduwobö chömöledö, ja̧danö ja̧ wei̧ a̧ja̧kwökönö, ju'wedö tjösödawö̧nö ösödö, jobadönö bȩbachibö kwösödaduwitjö̧ma, Isabenö Jo̧ma jwiinö ödameakwakobe ökwödönö chömöledö. Ja̧danö, jejenö ökwödönö ödameakwitjö̧ma, jwiinö ökwödönö lȩebakobe chömöledö, ja̧danö okobe deinö ökwödönö a'dewö loakobe bemi inesö otiwemi ökwödönö iyinemi kwiteboduwitjö, —jö̧ba̧lö yöawinobe Josuema, israel jojodönö.

Éxodo 20:2

—Ötjöma Isabenö Jo̧sa, Kwösödaduwökwe Diossa. Ötjödasa Egiptotjö lakebaduwinö pjabatinama, Egipto jojodö wetjawö̧ otidö kwö̧jaduwitjö. Baikwö wetaduwakwö:

2 Reyes 16:2

Juda la'aka luwo̧ baibenama, veinte o̧biya ujuna̧linobe Acazma, ja̧danö dieciseis o̧biya baledibanö Jerusalen comunidadnö ja̧nö webö ö̧jinobe. Iteda a'dö David otiwanö ösödökwe Isabenö Jo̧ Dios öba a'o ja̧bö ö̧jinadanöma ja̧bö ö̧jinokobe Acazma.

1 Reyes 15:3

Abias ö̧jinama, abe'do Roboan sulabenö ja̧inadanö sulabenö jainobe. A'dö David jwaikwöda ösödökwe Isabenö Jo̧ Diosnö ösödö ö̧jinadanöma ja̧bö ö̧jinokobe Abiasma.

1 Reyes 11:4

Salomon pöe ö̧jenama, ilekwamuma jo̧ba ösödi̧ ötjibinobe, Diosnöda ösödi̧ kabatibö, jobadö tjösödawö̧nöbi ösödobö, sulabenö. Abe'do David jwaikwöda uluwo̧ Isabenö Jo̧ Diosnö ösödö ö̧jinadanöma ö̧jinokobe Salomonma, ju'wedö tjösödawö̧nöbi ösödinobe.

Jueces 6:10

Ja̧danö, ökwödönö kwiteboduwi baibanö chiyenama, ökwödönö wetijatö, Ötjöma kwuluwo̧duwi Isabenö Jo̧ Diossa, ötjönöda kwösödaduwo. Amoritas jojodö tjiteboinemi nijinö kwö̧jaduwijayonö, jobadö tjösödawö̧ diosbedö jö̧tja̧lawö̧nö ja'yubebi kwösödaduwoko, jö̧ba̧lö wetijatö. Jo̧kwaijayonö, jejenö jweinö wetinajayonö, ökwödöma wetina a̧ja̧kwöködöja, jo̧kwajabetjö̧ ökwödönö pjatatoböma jwiobe –jö̧ba̧lö yöawobe Isabenö Jo̧ma, —jö̧balö yöawinobe Isabenö Jo̧ yöawi̧ yöbawo̧ma israel jojodönö.

Deuteronomio 31:29

Jobekwö yötawobe ökwödönö chömöledö, isabenö ö'wö batibaja̧ okobe sulabenö ja̧köbaduwakwa̧ chöwaisobetjö̧. Jau chömöledö, ökwödönö chöwaisa, –Ö'wö batibaja̧ okobe isabenö sulabenö ja̧köbaduwakwedöja, jweinö ja̧bö kwö̧jaduwobö yöbawö wetijayonö, jalachibö wainö ja̧köbaduwakwedöja, –jöba̧lö chöwaisa. Ja̧danö ju'wibi chöwaisa, jejenö Isabenö Jo̧ öpöjödi̧ jawa sulabenö ja̧köbaduwiökwe, ökwödönö ödameakwakwo̧ Diosma, ja̧danö ökwödönö ödameakwobetjö̧ nöinö wene kwöbaledaduwakwedöja, —jö̧ba̧lö yöawinobe Moisesma, israel jojodönö.

1 Crónicas 5:25

Jo̧kwaijayonö, tja'dödö tjösödinökwe Diosnö tjösödo jö̧tja̧linajayonö, Rubensaso jojodöbi, Gadsaso jojodöbi, Manasessaso ja'ö jojodöbi tjösödinokobe Diosnö otiwanöma. Diosnö ösödökönö, ju'wedö tjösödawö̧, ajayinö Dios söbebö loinawö̧ tjitebokwena jojodö tjösödawö̧nöda sulabenö tjösödinobe.

Isaías 57:5

Ökwödöma Diosnöda kwösödaduwo jö̧ka̧laduwijayonö, encina towibiya jȩnabi, okobe jwiinö ju'wi towibiya teebebi, jwaikwöda o̧'wo jawa ösödadöja. Ja̧danö o̧'wo jawa ösödö, wabekotjöbi, inawa ötölatjöbi, kwitji̧muduwinö kwabö iyadöja.