2 Pedro 1:3 - Dios Iwene

³ Chömöledö, Duluwo̧ma Diosdaobetjö̧, okobe jwiinö juluwo̧, ¿jö̧tö? Jau chömöledö, okobe jwiinö juluwo̧ duluwo̧ma, ja̧danö, ju'wibi, iteda ujulu ökwödönö iyobe, jo̧ba ujulunö Dios ösödi̧danö ja̧bö dö̧jobö. Jau chömöledö, Duluwo̧ma ökwödönö jwöinobe, iteda dejatinö ujulu ökwödöbi dujuna̧lobö, ja̧danö iteda inesö otiwi̧ ökwödöbi dujuna̧lobö. Ja̧danö chömöledö, jo̧banö waisadö dö̧jobetjö̧, iteda ujulu ökwödönö iyobe, jo̧kwajabetjö̧ ina böjȩnö dö̧jayi, okobe jwiinö juna̧ladösa, böjȩnö ina dö̧jayi Dios ösödi̧danö ja̧bö dö̧jakobetjö̧.

2 Pedro 1:3 Referans Kwoze

1 Pedro 5:10

Isabenö babe usula kwemawaduwobö jo̧be chömöledö, ikenama ja'yubenö lekwajabetjö jejenö usula emawajadönö, Diosma ökwödö usula kwemawaduwaja̧tjö kwö̧bibajaduwinö otidö loakobe chömöledö. Jau chömöledö, Diosda, mikwa jwiinö otiwanö iyo̧da ökwödönö jwöinöbe, Cristokwö dötewanö ja̧nö, jo̧ba ba̧kwȩlö̧jatebö salöinö idejatobe ökwödö kwö̧jaduwobö, ja̧danö isabenö jo̧bakwö kwö̧jaduwakwedöja chömöledö. Ja̧danö chömöledö, ina böjȩnö kwö̧jaduwayi, Diosda 'diinö kwö̧jaduwobö pjaatakwo̧, ja̧danö pjolachibökönö kwö̧jaduwobö ujunakwo̧, ja̧danö kwujuluwaduwachibanö pjaatakwo̧ chömöledö.

2 Timoteo 1:9

Jau Timoteo, Diosda ökwödönö dö̧jibinö pjabatinama, jo̧bada iteda ömöledö badibobö jwöbinama, jo̧kwajabetjö̧ usula emawö jwaikwöda otiwa jawa wene yöbawö kwö̧jo iteda ujulunö. Ja̧ Dios ökwödönö pjaatinama, otiwanö ja̧bö dö̧jiökwema pjaatinokobe, itedada la'akatjöda jejenö omukwatö ujuninobetjö̧ jejenö pjaatinobe. La'akatjöda Diosma omukwatö ujuninobe, Cristo Jesúsnötjö otiwa jawa mikwa jwiinö ökwödönö iyobö.

Romanos 8:32

Jau chömöledö, Diosbi, ökwödönö suli̧ waedö̧kö̧ chömöledö, pjabatöma otiwanö pjabato̧. Jo̧bama, a̧'dȩlökönö iteda itji̧nö iyinobe, dö̧jibobö, ¿jö̧tö? Ja̧danö, ökwödönö ile nibebö, iteda itji̧nö iyinobema, jemi tupakwö, ¿okobe jwiinö otiwa jawa iyökenaji̧ chömöledö? Iyena chömöledö, ökwödönö ile niebobetjö̧.

2 Corintios 12:9

Jo̧kwaijayonö baikwö atadinobe chömöledö: —Jo̧kwada, ja̧tjö kwö̧jibinö pjatatökö Pablo, jo̧kwaijayonö ja̧ nii̧tjö bajalekwönönö mikwa jwiinö lȩlö̧jinö pjatatakwö, ökwö kwujulu jwienama, ötjöda chujulu öwaetjöda öwawobetjö̧— jö̧ba̧lö atadinobe Duluwo̧ma. Ja̧danö, ötjö chujulu jwiena Duluwo̧ ujuluda öwawobetjö̧, ötjöma isabenö cho̧'wo̧ ösöwanö yöta̧lobe, chujulu jwii̧ma otiwa, jö̧ba̧lö, ötjönötjö Cristoma iteda ujulunö otidakobetjö̧.

1 Pedro 2:21

Jau chömöledö, kwöwaisaduwa, Diosma jejenö kwo̧'wo̧ 'dibachibö usula kwemawaduwobö ösödo̧, jejenö otiwanö ja̧bajadö usula kwemawaduwo jö̧ba̧lö Diosma ökwödönö jwöinobetjö̧. Jau chömöledö, Cristobi ökwödönö pjabatö usula emawinobe, ja̧danö Duluwo̧ jejenö usula emawinobetjö̧, ökwödö jo̧ba ömöayedöbi usula emawö kwö̧jaduwobö jo̧be. Jau chömöledö, Cristoma sulabenö ja̧bökönö usula emawinobe, ja̧danö otiwanö ja̧köbaduwakwa̧ i̧sebinobe, jo̧ba ja̧inadanö ökwödöbi ja̧bö kwö̧jaduwakobetjö̧.

2 Tesalonicenses 2:14

Jau chömöledö, ökwödö otiwa jawa wene yödawinanötjö Diosma ökwödönö jwöinobe kwö̧jibaduwobö, Duluwo̧ Jesucristo dejatinö ujulu ökwödöbi kwujuna̧laduwakobetjö̧.

1 Pedro 2:9

Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.

1 Tesalonicenses 2:12

Jau chömöledö, Diosma ökwödönö jwöinobe salöobe iteda webö ö̧jobe ökwödöbi kwö̧jaduwobö, ¿jö̧tö? Jo̧kwajabetjö̧, kabatökönö bakwo̧nökwena ökwödönö yödawijatö, ja̧danö kwujuluwachibaduwanö yödawijatö, ja̧danö ökwödönö wedijatö Dios ömöledö ja̧tjo jö̧tja̧li̧danö ja̧bö kwö̧jaduwo jö̧ba̧lö.

1 Tesalonicenses 4:7

Diosma ökwödönö jwöinokobe kwi̧lȩkwa̧muböködökwö ja̧köbaduwoböma chömöledö, sulabe jwiinö kwö̧jaduwo jö̧ba̧lö jwöinobe.

1 Pedro 1:15

Jau chömöledö, ökwödönö jwöbina Diosma sulabe jwibo̧, ¿jö̧tö? Jo̧kwajabetjö̧, ökwödöbi okobe jwiinö ja̧bö kwö̧ja̧duwi̧ sulabenö ja̧bökönö kwö̧jaduwo chömöledö.

Efesios 4:1

Jo̧kwaobetjö̧ chömöledö, Diosma ökwödönö otiwanö pjaatobetjö̧ budekwö lȩtebaduwakwö, Otiwanö Dios ösödi̧ jawada ja̧bö ju̧kwaduwi, jö̧ba̧lö. Ötjöma Duluwo̧ weina yötawobetjö̧ ka̧lena ba̧kwaweju okwama bo̧sa. Bena ba̧nö budekwö lȩtebaduwakwö, baikwö: Diosma ökwödönö jwöinobe iteda ömöledö bakibaduwobö. Jo̧kwaobetjö̧, iteda ömöledö bakibinaduwobetjö̧ otiwanö ja̧bö ju̧kwaduwi, iteda ösödi̧ jawada ja̧bö, chömöledö.

1 Corintios 1:9

Jau chömöledö, Diosma ba̧kwȩlö̧jatebö jö̧a̧li̧danö ja̧bo̧. Ja̧danö, Diosda ökwödönö jwöinobe jo̧ba itji̧kwö Duluwo̧ Jesucristokwö bakibaduwobö.

2 Pedro 1:2

Böjatjö jamatö, wȩyudö yötawaduwakwö chömöledö, tupakwönönö Diosnöbi, Duluwo̧ Jesúsnöbi kwöwaisachibaduwonö, Dios ajayitjö bajalekwönönö ökwödönö lȩlö̧jinö iyobö chösöda. Ja̧danö ajayitjö bajalekwönönö ökwödönö pjaatobö chösöda, kwo̧'wo̧ luwo̧ ösöwachibanö kwö̧jaduwobö.

2 Pedro 1:5

Ja̧danö jejenö dujuna̧lakobetjö̧, baikwö wetaduwakwö, ja̧bö kwö̧jaduwo jö̧ba̧lö: Ökwödöma Dios yöawi̧ ösödadöja, jo̧kwajabetjö̧ jemi tupakwö otiwanö ja̧bö kwö̧jaduwobö kwisakwaduwo. Ja̧danö jemi tupakwö kwöwaisachibaduwobö kwisakwaduwo.

1 Pedro 3:9

Ju'wedö ökwödönö sulabenö ja̧tjenama, balekwa mikwa sulabenöma ja̧köbaduwoko, ja̧danö ökwödönö sulabenö yötja̧lenama, balekwa mikwa jobadönö sulabenöma kwatadaduwoko. Jau chömöledö, jobadönö balekwa mikwa sulabenöma ja̧bökönö, Diosnö akebaduwo, jobadönö pjaatobö. Jau chömöledö, Diosma ökwödönö jwöinobe, okwödönö dösölö̧jinö pjaatobö, ja̧danö Dios ökwödönö jejenö pjaatobetjö̧, ja̧ omukwatö ju'wedönö pjabatö Diosnö akebaduwobö jo̧be.

Colosenses 1:16

Diosma jo̧banötjö okobe jwiinöbi okobe deinöbi otidinobetjö̧. Jau chömöledö, Cristonötjö Diosma okobe jwiinöbi okobe deinöbi otidinobe, mölejȩnö ji̧bi, böjȩnö ji̧bi, jojodö tjedi̧ jawabi, tjedökö jawabi. Cristonötjö Diosma okobe deinö luwedönö ujuninobe, böjȩ luwedönöbi, mölejȩ luwedönöbi. Jau chömöledö, Cristonötjö okobe jwiinöbi okobe deinöbi otidinobe Diosma, Cristo ösödi̧danö tjö̧jo jö̧ba̧lö.

1 Timoteo 4:8

Wanedö yötawa: Ju'wedö juluwadö batjibobö isakwadöma, kabatökönö ö'öba̧libadö, ja̧danö ju'wibi ja̧badö, tupakwö juluwadö batjibobö. Ja̧ ja̧tji̧ma ja'yubeda pjaatijayonö, nöinö pjaatokobe, sule böjȩnö ja̧nö tjiteba'o jawada tjujuluwachibobö pjaatobetjö̧. Jo̧kwaijayonö, Dios ösödi̧danö ja̧dobö isawama, ja̧danö Dios ösödi̧danö ja̧bö ja̧kwawama inesö pjaati̧ do̧'wo̧ luwo̧nö dujuluwachibanö. Ja̧danö, böjȩnö ja̧nöbi, mölejȩnö Dioskwö ja̧nöbi pjaatobetjö̧, do̧'wo̧ luwo̧ ösöwachibanö dö̧jakobe.

Efesios 4:4

Chömöledö, ökwödöma bakwaso jojodödasa do̧'wo̧ luwo̧ma. Bakwa'odanö babibinadösa, Jesúsda iteba'obedösa. Ja̧danö, bakwo̧da Dios O̧'wo̧ Luwo̧da tebachibö öjamatinawö̧sa. Ja̧danö, ökwödöma Dios bakwainö jwöinawö̧sa, iteda iyakwa̧ dite'ada̧lobö, iteda yöbawö ujunina, Otiwa jawa chiyocha, jö̧ba̧lö, yöbawö ujuninama. Chömöledö, dite'ada̧lakwa̧ma, bakwöta jawada, Dios iyakwa̧da bakwainö te'ada̧ladösa.

Filipenses 4:8

Bajaleapo yötawi̧ma baikwö yötawaduwakwö, otiwi̧ jawada, jojodö biya̧ma otiwa jö̧ba̧lö tjomukwato jö̧tja̧li̧ jawada kwomukwataduwo jö̧ba̧lö. Jau chömöledö, isabenö ji̧ jawada, ja̧danö otiwanö tjomukwati̧ jawada, ja̧danö jwei̧ jawada, ja̧danö bakwainö wene jwii̧ jawada, ja̧danö tjo̧'wo̧ ösöwi̧ jawada, ja̧danö jojodö tja̧ja̧kwobö otiwi̧ jawada omukwatö kwö̧jaduwo.

Mateo 28:18

Ikenama Jesúsma jobadö tjö̧jobekwö ichö yöawinobe: —Mölejȩtjöbi, böjȩtjöbi okobe deinö la'aka tjuluwo̧ batibanö ja̧ajabe Diosma,

1 Pedro 1:5

Jau chömöledö, Dios yöawi̧ kwösödaduwiökwe, Diosma ökwödönö tjöbeba̧lönö ite'ada̧lobe, ja̧danö jejenö ite'ada̧lakwo̧, 'dö̧ibaji̧ möle kwö̧jibinaduwa wene i̧sebenanö kabatö. Jau chömöledö, ja̧ möle baibenama, ökwödö iteda i̧tji̧munö otiwa jawa iyakobe, ja̧danö jejenö iyö, kwö̧jibinaduwa wene öwaetjöda i̧sebakobe.

Romanos 9:24

Jau chömöledö, iteda ujulu i̧sebobö jö̧a̧linobe ökwödönöma, iteda ömöledö badibobö jwöinawö̧nöma. Ja̧danö, sule judío jojodönödama jwöinokobe chömöledö, judío jojodönöbi, judío jojodöböködönöbi jwöinobe.

Proverbios 12:4

Ja̧danö, ju'wibi yötawa: Bakwuju, otiwanö omukwatö jujuma jilekwenö pjabatuju. Ja̧danö, jobekwö jilekwenö pjabatö jö̧jobetjö̧ ju'wedöma jilekwenö otiwanö tjedobe, jwiinö luwo̧, jö̧ba̧lö. Jo̧bekwö pjajatokobe jeluju, jilekwenö, taba̧löjinö jujuma. Jobujuma taba̧lö̧jinöda jö̧jobetjö̧ jilekwema, ayö chilekwoda kwabö lojökwesa, jö̧ba̧lö. Jo̧bama, ilekwo jawatjöda tjiwe'iju pjolowachi̧danö usula emawo̧.

Proverbios 31:29

Ja̧danö, jilekwema jobujunö yöa̧lobe: —Chilekwo, isabenö ju'wedö ya̧döma jwiinö otiwanö omukwatö, waisanö otidö tju̧ju̧kwijayonö ökwöma jobadö otiwanö tjö̧ji̧tjö̧ o̧pekwönönö otiwanö omukwatö, waisanö otidö kwö̧jobe— jobekwö yöa̧lobe jobuju jilekwema jobujunöma. Jobekwö yöjawinobe Lemuel ojo'doma jo̧banöma. Ja̧danö, ju'wibi yöjawinobe:

Proverbios 31:10

Bemi tupakwö laebakwa̧ma jilekwenö juna̧luju jö̧jina jawa laebobe, jilekwenö juna̧luju ¿dakwö omukwatö jö̧jobeda? jö̧ba̧lö: Iso̧ma ilekwo̧nö, otiwanö omukwatujunö, ja̧danö ju'wi jawabi ju'wi jawa jotidobö waisujunöma öbadekwajobö waiyobe. Isabenö, jobekwö omukwatö waisanö jujuma jwiinö mikwawuju, inawiya nöinö mikwawi̧ öwiya mikwawi̧tjö̧ bajalekwönönö mikwawuju.

Filipenses 3:8

Jau chömöledö, ja̧ jawabi, okobe jwiinö ju'wi jawabi mikwawökö ji̧ jö̧ba̧lö, inesö mikwawi̧da chisakwobe chömöledö, jwaikwöda Chuluwo̧ Cristo Jesúsnö chöwaisobö chisakwobe babema chömöledö, ja̧da inesö mikwawi̧ jö̧ba̧lö. Wanedö yötawa: Sula'wo tjikwi̧danö ikwö lotinobedanö ichejekwa, mikwawökö ji̧ jö̧ba̧lö, Cristonöda chemo jö̧ba̧lö,

2 Pedro 1:6

Ja̧danö jemi tupakwö sulabenö kwösödaduwi̧ ja̧bökönö kwö̧jaduwobö kwisakwaduwo. Ja̧danö jemi tupakwö kwo̧'wo̧ 'dibachibö kwö̧jaduwobö kwisakwaduwo. Ja̧danö jemi tupakwö jwaikwöda Dios ösödi̧da ja̧bö kwö̧jaduwobö kwisakwaduwo.

2 Pedro 1:8

Jejenö ja̧bö ja̧kwawama inesö mikwawi̧ chömöledö, ja̧danö jejenö ja̧bö kwö̧jaduwitjö̧ma, ja̧danö wanedö yötawa, jejenö ja̧bö ja̧kwawa ökwödönötjö nöachitjö̧ma, kwö̧jaduwi̧ma isabenö waekwökena, ja̧danö Duluwo̧ Jesucristonö isabenö otiwanö kwöwaisachibaduwena chömöledö.

2 Pedro 1:10

Jau chömöledö, ajayitjö o̧penönö jwaikwöda isakwö kwö̧jaduwo, yötawaja̧danö otiwanö ja̧bö kwöjaduwobö, Dios ömöledö kwö̧jaduwi̧ öwaetjöda kwi̧sebaduwakobetjö̧. Jau chömöledö, Diosma ökwödönö jwöinobe, ja̧danö ökwödönö omudawö ujuninobe, ¿jö̧tö? Ja̧danö yötawaja̧danö otiwanö ja̧bö kwö̧jaduwitjö̧ma, Dios ömöledö kwö̧jaduwi̧ öwaetjöda kwi̧sebaduwena. Jau chömöledö, jejenö ja̧bö kwö̧jaduwitjö̧ma, Jesúsnö ösödö kwö̧jaduwi̧ma la'akatjöda waekwökakobe.

2 Pedro 2:20

Ja̧danö chömöledö, ju'wibi yötawaduwakwö, Isabenö Dios jobadönö lȩebobö jo̧be, jö̧ba̧lö. Jau chömöledö, jobadöma Duluwo̧ dö̧jibinö pjabato̧ Jesucristonö waisachibö, böjȩ jawa suli̧ waedakwawa ji̧tjö tjö̧jibinobe ichejekwa, jo̧kwaijayonö öpöjödö tjebachajö ajayinö sulabenö ja̧tjina ja̧tjobe, ja̧danö sulabenö tjösödi̧ma jobadönö juluwobe. Ja̧danö chömöledö, ajayinö sulabenö ja̧bö tjö̧jitjö o̧penönö sulabenö ja̧badö batjibobe.

2 Pedro 3:18

Jau chömöledö, jobadö sulabenö yötjawi̧ ösödökönö, ökwödö Jesúsnö ösödadöma jo̧ba mikwa jwiinö iyi̧tjö kwöda̧peachaduwobö jo̧be, ja̧danö tupakwönönö Duluwo̧ dö̧jibinö pjabato̧ Jesucristonö döwaisachibobö jo̧be. Jo̧banöda otiwo̧ja jö̧ba̧lö dösödobö jo̧be chömöledö, babebi, ja̧danö ba̧kwȩlö̧jateböbi dösödobö jo̧be, jejenö otiwa. Biya̧da ötjö Simón Pedroma ökwödönö pjabatö wȩyudö wetaduwakwö chömöledö. Biya̧data.