2 Corintios 6:10 - Dios Iwene

¹⁰ ja̧danö do̧'wo̧ tjo̧achijayonö, do̧'wo̧ luwo̧ ösöwachibanö ja̧dösa. Jau chömöledö, böjȩ jawatjö usulasedösa, jo̧kwaijayonö ju'wedönö nöinö juna̧ladö batjibanö tjo̧'wo̧ luwo̧ jawa iyadösa, ja̧danö jwibadödanö dichejekwijayonö, isabenö mikwawi̧ jawa okobe jwiinö juna̧ladösa. Jau chömöledö, ju'wedö ökwödönö Dios ömöayedöböködö jö̧ba̧lö yötja̧lijayonö, ja̧bö dö̧ji̧ma öwaetjöda i̧sebobe Dios ömöayedö dö̧ji̧ma.

2 Corintios 6:10 Referans Kwoze

Juan 16:22

Jejenö ja̧döja ökwödöma. Babema kwo̧'wo̧duwi tjo̧bekwö kwö̧jaduwobe. Jo̧kwaijayonö yemidanö ötjönö kwedaduwenama kwo̧'wo̧duwi̧ tjo̧bekwökönö, kwo̧'wo̧duwi̧ ösöwanö kwö̧jaduwakobe, ötjönö ösödö. Ja̧danö, bakwo̧bi deobe kwo̧'wo̧duwi̧ ösöwökönö baibanö webo̧ma.

2 Corintios 8:9

Isabenö pjabatö kwiyaduwobö otiwa chömöledö, baikwö yötawa: Kwöwaisaduwa chömöledö, Duluwo̧ Jesucristo mikwa jwiinö otiwanö iyina wenema, ¿jö̧tö? Jau chömöledö, jo̧bama nöinö ujuna̧linajayonö, ujuna̧li̧ junibö, jwibo̧danö usulaso̧ baibinobe, ökwödönö pjabatö. Jejenö baibinobe, ökwödöma jo̧ba usulaso̧ ö̧jinatjö nöinö juna̧ladö bakibaduwakobetjö̧.

Apocalipsis 2:9

Jo̧bama baikwö yöawobe ökwödö Esmirna jojodönö, jo̧banö ösödadönöma: Ökwödö, Esmirna jojodönö inia tjököbaduwinö baledi̧ma chöwaisa. Yelösöda, jwibadöja, usulasedö babibinadöja, chöwaisa. Jo̧kwaijayonö, ökwödöma kwo̧'wo̧ luwo̧duwinö okobe jwiinö juna̧ladödanö kwö̧jaduwobe, böjȩ jawa jwiköbaduwijayonö. Chöwaisa, judío jojodötjö ju'wedöma omöna yötja̧lobe ökwödönöma, Sulabenö ja̧badö, jö̧ba̧lö. Jobadöma, Ökwödödasa Dios ömöledö, jö̧ba̧lö, yötja̧lijayonö, tjo̧'wo̧ luwo̧nö Dios ömöledö babibinöködö. Jobadöma Awetjanöda ösödadö.

Santiago 2:5

Chö̧ja̧wo̧dö chösödawö̧, a̧ja̧kwaduwitjö. Böjȩnö ju̧kwadöma usulasedönö edö, Bidöma mikwawöködö, jö̧ba̧lö, tjomukwatobe. Jo̧kwaijayonö Diosma jobadönö edö, Jwiinö mikwawadö, jö̧ba̧lö, edobe. Diosma jobadö jwibadönö omudawö ujuninobe jwiinö juna̧ladöda batjibobö, tjo̧'wo̧ luwo̧ jawa, Jesucristonö tjo̧'wo̧ tjöwana̧lobetjö̧. Ja̧danö, Diosma jobadönö omudawö ujuninobe ju'wi möle jo̧bakwö webö tjö̧jobö, iteda La'aka Luwo̧ webö ö̧jobe ja̧nö. Jau chö̧ja̧wo̧dö, usulasedönöbi jejenö tjö̧jobö omudawö ujuninobe Diosma okobe deinö jo̧banö ösödadö tjö̧jakwa̧ma.

Hebreos 10:34

Ja̧danö, ju'wibi chömöledö. Kwömöledötjö ju'wedö, Jesúsnö ösödadönö ka̧lena ba̧kwaweju okwa tjödinobe. Ja̧danö, ka̧lena ba̧kwaweju okwa tjödiawö̧ kwo̧'wo̧duwi tjo̧bekwö kwö̧jinaduwobe, Ökwödöma jobadö tjö̧bi̧danö bakwainö ba̧dösa, jö̧ba̧lö. Isabenö, jobadö usula tjemawi̧ omukwatö kwo̧'wo̧duwi tjo̧bekwö kwö̧jinaduwobe. Ja̧danö chömöledö, ja̧ ajayinö möle, Jesúsnö kwösödinaduwobetjö̧ Jesúsnö öpöjödadötjö la'aka luwedöma kwiteaduwima tjeminobe. Jo̧kwaijayonö, ökwödöma me'dawachibökönö kwo̧'wo̧ luwo̧duwi ösöwanö kwö̧jinaduwobe, Ja̧ma wame jawa, jö̧ba̧lö. Dios ökwödönö iyi̧ma ja̧ wame jawatjö o̧penönö mikwawi̧, ba̧kwȩlö̧jatebö ji̧ jawa, jö̧ba̧lö, me'dawachibökönö kwö̧jinaduwobe. Isabenö chömöledö ökwödönö pjabatö yötawaduwakwö. Omukwataduwi ja̧ möle, ökwödö kwo̧'wo̧ luwo̧duwinö ösöwö kwö̧jinaduwama usula kwemawaduwijayonö.

1 Timoteo 4:8

Wanedö yötawa: Ju'wedö juluwadö batjibobö isakwadöma, kabatökönö ö'öba̧libadö, ja̧danö ju'wibi ja̧badö, tupakwö juluwadö batjibobö. Ja̧ ja̧tji̧ma ja'yubeda pjaatijayonö, nöinö pjaatokobe, sule böjȩnö ja̧nö tjiteba'o jawada tjujuluwachibobö pjaatobetjö̧. Jo̧kwaijayonö, Dios ösödi̧danö ja̧dobö isawama, ja̧danö Dios ösödi̧danö ja̧bö ja̧kwawama inesö pjaati̧ do̧'wo̧ luwo̧nö dujuluwachibanö. Ja̧danö, böjȩnö ja̧nöbi, mölejȩnö Dioskwö ja̧nöbi pjaatobetjö̧, do̧'wo̧ luwo̧ ösöwachibanö dö̧jakobe.

Filipenses 4:4

Chömöledö, Duluwo̧nö omukwatö, kwo̧'wo̧ ösöwanö kwö̧jaduwo. Yötawaja̧danö yemidanö inesö mikwawi̧ jawa yötawaduwakwö, ba̧kwȩlö̧jatebö kwo̧'wo̧ ösöwanö kwö̧jaduwo jö̧ba̧lö.

1 Tesalonicenses 1:6

Ja̧danö, ökwödö ja̧bö di̧sebi̧danö ja̧bö, ökwödödanö ichejekwadö bakibinaduwobe chömöledö, ja̧danö Duluwo̧danö ichejekwadö bakibinaduwobe. Jau chömöledö, usula kwemawaduwijayonö, Dios O̧'wo̧ Luwo̧ pjaatawö̧, kwo̧'wo̧ luwo̧duwi ösöwachibanö kwösödinaduwobe otiwa jawa wenema.

Colosenses 3:16

Chömöledö, Cristo jawa wene kwomajadeduwinö omukwatö kwö̧jaduwo, jo̧kwajabetjö̧ waisanö yökawakwawaduwo, ja̧danö waisanö kwöba̧ja̧dakwawaduwo kwömöledöduwikwö. Ja̧danö otiwanö pjabato̧ja jö̧ba̧lö, Diosnö ösödö lo̧köbaduwo, Salmos jawa lo̧awabi, Jesús jawa lo̧awabi, Dios O̧'wo̧ Luwo̧tjö öba̧ja̧di̧ lo̧awabi.

Filipenses 2:17

Jau chömöledö, jwiinö cho̧'wo̧ ösöwanö chö̧jobe ökwödö kwö̧jaduwi̧ omukwatö. Ja̧danö, wanedö yötawa chömöledö: Dios yöawi̧ kwösödaduwi̧ma, Diosnö iyawadanö jo̧be, ja̧danö ökwödönö pjatatemi ö'wö batibitjö̧ma, ja̧ iyawa wame ötjö chökwösobu ebawobedanö ichejekwena. Jo̧kwaijayonö, ö'wö batibitjö̧böbi, Dios yöawi̧ kwösödaduwobetjö̧ chösödena, ja̧danö ökwödökwö cho̧'wo̧ ösöwanö chö̧jena.

Romanos 11:12

Chömöledö, Israel jojodöma sulabenö tjöpöjödinobe otiwa jawa wenema, ¿jö̧tö? Ja̧danö, jejenö tjöpöjödi̧ma, otiwa jawa baibinobe ökwödö Israel jojodöböködönöma, ¿jö̧tö? Jau chömöledö, tjöpöjödi̧ma ökwödönö otiwa jawa baibinobe. Ja̧danö baikwö yötawaduwakwö: Israel jojodö sulabenö ja̧tji̧ma ökwödönö otiwa jawa baibinatjö̧ma, otiwanö ja̧tji̧ma ja̧tjö o̧penönö isabenö otiwa jawa baibakobe ökwödönö. Jau chömöledö, Israel jojodöbi otiwa jawa wene tjösödenama ja̧tjö bajalekwönönö isabenö jwiinö otiwa jawa baibakobe ökwödö Israel jojodöböködönöma.

Proverbios 16:16

Ja̧danö, ju'wibi yötawa: Chömöledö döwaisa, oroma nöinö mikwawi̧ jawa ¿jö̧tö̧? Isabenö yötawa: Oro mikwawi̧tjö bajalekwönönö mikwawobe jweinö omukwatö kwö̧jaduwi̧ma. Ja̧danö, döwaisa, platabi nöinö mikwawi̧ jawa ¿jö̧tö̧? Isabenö yötawa: Kwöwaisaduwi̧ma di̧ya sulojobö jö̧ba̧lö, di̧ya otiwojobö jö̧ba̧lö jwiinö mikwawobe, plata mikwawi̧tjö̧ bajalekwönönö.

1 Pedro 4:13

Jau chömöledö, kwo̧'wo̧ tjo̧bekwökönö, kwo̧'wo̧ luwo̧ ösöwachibanö kwö̧jaduwobö jo̧be, Cristokwö bakobe usula emawadösa, jö̧ba̧lö. Jau chömöledö, jo̧bakwö bakobe usula emawadöja babema, tupakwö iteda ujulu öwawachibenama, kwo̧'wo̧ ösöwaduwachibanö kwö̧jaduwakobetjö̧.

2 Corintios 4:7

Chömöledö, ökwödöma ja̧ inesö mikwawi̧ wene yöbawadösa, jo̧kwaijayonö juluwöködösa chömöledö, sule letiatjö Dios dadö otidinawö̧sa, ¿jö̧tö? Ja̧danö, ökwödöma juluwöködö dö̧jijayonö, inesö mikwawi̧ Jesús jawa wene yöbawadösa chömöledö. Jau chömöledö, jojodö tjomukwatena, sule juluwadöda mikwawi̧ wene yötjawobö jo̧be jö̧ba̧lö, jo̧kwaijayonö jojodö tjomukwati̧danöma omukwatö̧kö̧ Diosma chömöledö, juluwadönöma webö̧kö̧. Jau chömöledö Diosma ökwödö juluwöködönöda yödawobö ujuninobe, juluwöködöda yötjawitjö̧ma, ötjöda inesö chujulu öwawakobe jö̧ba̧lö.

2 Corintios 2:4

Jau chömöledö, chöwaisa, ökwödönö chiwȩyudinama isabenö kwo̧'wo̧ tjo̧achinö ja̧inobe jö̧ba̧lö. Ötjöbi ja̧danö chömöledö, ökwödönö chiwȩyudenama, usula emawö, cho̧'wo̧ tjo̧bekwö, budekwabinö chiwȩyudijatö. Jau chömöledö, chöwaisa, chiwȩyudina edinö, kwo̧'wo̧ tjo̧achinobe jö̧ba̧lö, jo̧kwaijayonö ökwödönö öpöjödöma chiwȩyudinokobe chömöledö. Isabenö ökwödönö pjatatobö chösödobetjö̧ jejenö chiwȩyudijatö chömöledö, ja̧danö inesö ökwödönö chösödi̧ chi̧sebotö jö̧ba̧lö jejenö chiwȩyudijatö. Jau chömöledö, ökwödönö chösödökötjö̧ma, ökwödönö jwetebobö chomukwatökena, jo̧kwaijayonö isabenö ökwödönö chösödobetjö̧ ökwödönö jwetebobö chiwȩyudijatö. Ja̧danö chömöledö, ida̧ökö kwialusöjanö jwetebobetjö̧, ja̧danö ida̧ökö ja̧ edinö jwekekwinaduwobetjö̧, yemidanö dediakwawena jwiinö do̧'wo̧ ösödachibanö dediakwawobö ja̧kobe.

Romanos 15:13

Chömöledö, Diosma ökwödönö pjabato̧, Aaa, isabenö Dios jö̧a̧linadanö otiwanö ja̧akwo̧, jö̧ba̧lö domukwatobö. Jo̧banö ateba, kwo̧'wo̧ luwo̧duwi ösöwachibanö kwö̧jaduwobö, wene jwiinö kwö̧jaduwobö. Ja̧danö, jo̧banö kwösödaduwobetjö̧, jejenö kwö̧jaduwobö pjaatakwo̧ ökwödönöma chömöledö. Ja̧danö Dios O̧'wo̧ Luwo̧ ökwödönö pjaatobetjö̧, tupakwö kwo̧'wo̧ kwöwana̧laduwakwedöja, isabenö Dios jö̧a̧linadanö ja̧akwo̧ jö̧ba̧lö.

Romanos 12:15

Ja̧danö ju'wedö tjo̧'wo̧ ösöwanö tjö̧jenama, jobadökwö kwo̧'wo̧ ösöwanö ösödö kwö̧jaduwo, ja̧danö ju'wedö o̧'wo̧ tjo̧achö tjubudekwenama, jobadökwö kwubudekwaduwo.

Hechos 5:41

Ikenama Jesús webawedöma la'aka luwedö tjöba̧ja̧dobetjö labebijadötö. Ja̧danö, jobadöma tjo̧'wo̧ yelösöda ösöwanö jweinö omukwatijadötö, Ökwödöma Jesúsnö yödawobetjö̧ inia tjödajabe, jö̧ba̧lö.

Lucas 6:21

Ökwödötjö a̧wi̧chi̧ lö̧jawö̧ma isabenö tjo̧'wo̧ ösöwanö tjö̧jakwedö, tjomeawachibanö tjujuna̧lakobetjö̧. Ökwödötjö o̧'wo̧ tjo̧achö budekwadöma isabenö tjo̧'wo̧ ösöwanö tjö̧jakwedö, isabenö tupakwö jwiinö tjo̧'wo̧ ösöwachibanö tjö̧jakobetjö̧.

Mateo 5:4

Tjo̧'wo̧ tjo̧achö budekwadöma isabenö tjo̧'wo̧ ösöwanö tjö̧jakwedö, tjo̧'wo̧ tjo̧achajabetjö tjo̧'wo̧ ösöwachibanö tjö̧jakobetjö̧.

1 Timoteo 6:18

Ja̧danö, balada luwedönö otiwanö ja̧tjobö yöbawidönö, baikwö wanedö yötawa: Otiwanö ja̧awa luwedö baibanö tjuju̧kwobö yöbawidönö, a̧'dȩlökönö ju'wedönö pjabatö.

1 Tesalonicenses 5:16

Ba̧kwȩlö̧jatebö kwo̧'wo̧ luwo̧duwi ösöwanö kwö̧jaduwo,

Hechos 3:6

Jo̧kwaijayonö Pedroma jö̧ba̧lijetö jo̧banöma: —Ötjöma orobi, platabi jwibo̧sa. Jo̧kwaijayonö, chujuna̧li̧tjö pjatatokwö. Jesucristo Nazaretnö da̧peachina ujulunö wetakwö: ¡A̧laibö 'ya̧wi!— jö̧ba̧lijetö.

Colosenses 1:24

Chömöledö, ökwödönö pjabatö usula chemawobe, ja̧danö jejenö ökwödönö pjabatö usula chemawobetjö̧, cho̧'wo̧ ösöwanö chö̧jobe. Jau chömöledö, ökwödö Cristo iteba'obedö usula demawobö jo̧be, ja̧danö Cristo iteba'obedö usula tjemawo jö̧tja̧li̧ma, ötjöma pjabatö usula emawö chö̧jobe.

Efesios 3:16

Jo̧bama jwiinö juluwo̧obetjö̧ ökwödönö pjaatobö atebobe jo̧banö, Dabe'do Diosnöma. Iteda O̧'wo̧ Luwo̧ma ökwödö kwo̧'wo̧ luwo̧duwi juluwachibanö pjaatobö, ja̧danö, tupakwö kwi̧'yaduwobö atebobe chömöledö.

Efesios 3:8

Chömöledö, ötjöma ju'wedö Dios ömöledö babibinadötjö baikwönönöda jo̧sa. Jejenöijayonö Diosma ötjönö lȩlö̧jino edö 'da̧batö ujuninobe, judío jojodöböködönö yötawobö, Cristoma jwiinö pjabato̧, jwiinö otiwo̧, jwiinö juluwo̧, jö̧ba̧lö. Ja̧ jawa, Cristo pjaati̧, otiwi̧, ujuluwi̧ jawa kaatiboböma jwibo̧, jö̧ba̧lö, yötawobö 'da̧batö ujuninökwesa.

2 Corintios 4:15

Jejenö omukwatö, usula demawijayonö kabatibökönö jwaikwöda yöbawö dö̧jobe chömöledö. Jau chömöledö, okobe jwiinö usula demawi̧ma, ökwödönö pjadatotö jö̧ba̧lö usula demawobe, tupakwönönö ba̧jekwadö jojodönö Dios mikwa jwiinö otiwanö iyenama, otiwanö iyo̧ja jö̧ba̧lö ba̧jekwadö Diosnö tjösödakobetjö̧, ja̧danö okobe deinö Diosnö otiwanö tjomukwatakobetjö̧.

1 Corintios 1:5

Diosma isabenö öwaetjöda ökwödö kwö'da̧deduwitjö i̧sebinobe, Cristo jawa wenema, isabenö wene jö̧ba̧lö chömöledö. Cristokwö dötewinö kwuju̧kwaduwobetjö̧, Diosma isabenö okobe jwiinö otiwa jawa iyinobe ökwödönöma, okobe jwiinö yöawakwawabi yökawaduwobö, ja̧danö okobe jwiinö waisakwawabi kwöwaisaduwobö.

Romanos 8:32

Jau chömöledö, Diosbi, ökwödönö suli̧ waedö̧kö̧ chömöledö, pjabatöma otiwanö pjabato̧. Jo̧bama, a̧'dȩlökönö iteda itji̧nö iyinobe, dö̧jibobö, ¿jö̧tö? Ja̧danö, ökwödönö ile nibebö, iteda itji̧nö iyinobema, jemi tupakwö, ¿okobe jwiinö otiwa jawa iyökenaji̧ chömöledö? Iyena chömöledö, ökwödönö ile niebobetjö̧.

Hechos 16:25

Ikenama, yö̧te ja'ö baibena Pablo, Silas Diosnö abeböbi abebijadötö, ja̧danö, lo̧böbi lo̧bijadötö Diosnö ösödö. Ju'wedö ka̧lena ba̧kwaweju okwa ba̧jadöma Pablo, Silas Diosnö atjebobe, lo̧tjobe a̧ja̧kwijadötö.

Apocalipsis 21:7

Ja̧danö, sulabetjö juluwinadö, chö̧jobekwö ichibadönö jwiinö otiwi̧ jawa iyabo̧sa. Ja̧danö, ötjödasa, sulabetjö juluwinadö tjo̧'wo̧ tjöwana̧lökwe Diosma. Jobadönöma, Chi̧tji̧mu, jö̧ba̧lö, öbabo̧sa.

Proverbios 13:7

Ja̧danö, ju'wibi yötawa: Ju'wikwenama jojodöma balada tju̧juna̧lakö̧, jwiakö̧ wajuwanö yöbawöködö. Omönada yöbawadö. Wanedö yötawa: Bakwo̧ balada jwibo̧da ö̧jijayonö ötjöma juna̧lo̧sa jö̧ba̧lö omöna yöbawo̧. Ja̧danö, jelo̧ balada nöinö juna̧lo̧ ö̧jijayonö ötjöma jwibo̧sa jö̧ba̧lö omöna yöbawo̧. Ömönada yöbawadö.