2 Corintios 5:15 - Dios Iwene

¹⁵ Jau chömöledö, Cristoma okobe deinö pjabatö midawö woinobe, ökwödö jo̧banö ösödadöma, jo̧ba ösödi̧danö ja̧bö dö̧jakobetjö̧. Jau chömöledö, ökwödöda dösödi̧danö ja̧bö dö̧joböma jwiobe, sule dö̧jibobö pjabatö midawö wobina ösödi̧da, midawö wobajo̧ tjebachajina ösödi̧da ja̧bö dö̧jobö jo̧be. Jau chömöledö, jo̧bada ökwödönö ja̧kwawa iyinobetjö̧, jo̧ba ösödi̧da ja̧bö dö̧jaduwo.

2 Corintios 5:15 Referans Kwoze

Colosenses 3:1

Chömöledö, Cristokwö 'yakibajinaduwobe, jo̧kwajabetjö̧ mölejȩ jawa kwisakwaduwo. Jau chömöledö, Cristoma mölejȩbe Dios öwaisobekwöchobe bo̧, jo̧kwajabetjö̧ jo̧ba ö̧jobe jawada isakwö kwö̧jaduwo.

Colosenses 3:17

Jau chömöledö, okobe jwiinö yöka̧laduwi̧ma, Duluwo̧ Jesús jawa i̧sebö yöka̧laduwo, ja̧danö okobe jwiinö ja̧köbaduwi̧ma, Duluwo̧ Jesús jawa i̧sebö ja̧köbaduwo. Ja̧danö, Jesús pjaatinobetjö̧, ba̧kwȩlö̧jatebö Dabe'do Diosnö kwösödaduwo, Otiwanö pjabato̧ja, jö̧ba̧lö.

1 Juan 4:9

Ja̧danö chö̧ja̧wo̧dö, Diosma ¿dakwö i̧sebinada jojodönö jwiinö ile niebi̧ma? Bejenö i̧sebinobe: Iteda itji̧nö, iteakwo̧nöda weinobe böjȩkwö ichö ö'wö baibobö. Ja̧danö, Dios Itji̧ma ökwödö dusula dumusidi̧ midawö ö'wö baibinobe ökwödö do̧'wo̧ luwo̧ okwa ö'wö babiböködö, ba̧kwȩlö̧jatebö ja̧dö badibobö.

Tito 2:14

Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

Gálatas 5:25

Dios O̧'wo̧ Luwo̧ma ökwödönö ja̧kwawa iyinobe, ¿jö̧tö? Jo̧kwajabetjö̧ ju'wibi jo̧ba öibi̧danö ja̧dobö jo̧be chömöledö.

Romanos 12:1

Chömöledö, Diosma ökwödönö lȩlö̧jinö edinobetjö̧, yötawaduwakwö, Diosnö kwiyawaduwo, Diosnö iyawadö, ina 'yaba̧ladö iyawadö bakibaduwanö. Jejenö kwiyawaduwobö chösöda chömöledö. Ja̧danö, Diosnö iyawadö kwö̧jaduwobema, jo̧ba wei̧da jwaikwöda ja̧bö kwö̧jaduwo chömöledö, Dios ösödi̧danö. Jejenö Diosnö kwösödaduwobö otiwa chömöledö.

1 Pedro 4:6

Jau chömöledö, Diosma okobe deinö jojodönö yöawakwo̧ ja̧tjina otiwojobö sulojobö jö̧ba̧lö, ida̧ökö wobinadönöbi, ina yaba̧ladönöbi. Ja̧danö, jejenö yöawakwo̧obetjö̧, jojodö otiwa jawa wene tja̧ja̧kwobö ösödo̧, ja̧ wene a̧ja̧kwö ösödö tjö̧jibobö. Jo̧kwajabetjö̧ wobinadöbi damötjö otiwa jawa wene yötjawi̧ tja̧ja̧kwinobe chömöledö, jobadöbi ja̧ wene ösödö, tjiteba'otjö okobe deinö böjȩ jojodö Dios lȩebi̧tjö wotji̧danö wotjijayonö, tjo̧'wo̧ luwo̧nöda Dios ö̧ji̧danö tjö̧jakobetjö̧. Jau chömöledö, Diosda ja̧bö dö̧ji̧ otiwojobö sulojobö jö̧ba̧lö yöbawo̧ma, jo̧kwajabetjö̧ jo̧ba ösödi̧danöda ja̧bö dö̧jobö jo̧be.

1 Tesalonicenses 5:10

Jo̧ba Jesucristoma dö̧jibobö midawö woinobe, woditjö̧böbi, 'yada̧litjö̧böbi jo̧bakwö dö̧jakobetjö̧.

Romanos 6:6

Tupakwö yötawaduwakwö chömöledö: Ökwödö do̧'wo̧ luwo̧ ajayi luwo̧ma woinobe, bakobe Cristokwö towisa'onö ja̧nö. Ja̧danö, ajayi luwo̧ do̧'wo̧ luwo̧ma woinobe, jemi tupakwö sulabe dujuna̧li̧ ökwödönö juluwökönö.

Apocalipsis 1:18

Ja̧danö, ötjödasa ba̧kwȩlö̧jatebö jo̧ma. Wotinajayonö edi, 'yaba̧lo̧sa. Ötjöma wobajaletjö tjetachajinobetjö̧ ba̧kwȩlö̧jatebö 'yaba̧lo̧sa. Yemidanöma wobö̧kö̧sa. Wanedö yötawa: Ötjöma wobajale uluwo̧danö webo̧sa, wobajaletjö o̧penönö juluwo̧chobetjö̧. Ja̧danö, wobajale uluwo̧danö chö̧jobetjö̧ ötjödasa wobinadö tjö̧bajemi yawepi̧ juna̧lo̧ma. Ja̧danö, wobinadö jobetjö latjebobö po̧beböbi po̧bebo̧sa. Ja̧danö, latjebokobö yö̧beböbi yö̧bebo̧sa— jejenö wanedö yöawijatö ötjönöma, Ötjödasa wobajale webo̧ma, jö̧ba̧lö.

2 Corintios 5:16

Jo̧kwajabetjö̧ chömöledö, jojodönö domukwatenama, böjȩ jojodö wame jawa tjomukwati̧danöma domukwatokobe babema. Jau chömöledö, isabenö ajayinöma jojodö tjomukwati̧danö, wame jawada domukwatijatö, ja̧danö ajayinö Jesúsnö dedenama, wame jawada omukwatö dedijatö, böjȩ jojo jö̧ba̧lö. Jo̧kwaijayonö babema sule wame jawadama omukwatöködösa.

1 Corintios 10:33

Jau chömöledö, ötjö ja̧bö chö̧ji̧danö ja̧bö kwö̧jaduwo. Ötjöma okobe jwiinö ja̧bö chö̧ji̧ma, okobe deinö jojodö tjösödo jö̧ba̧lö, ja̧bö chö̧jobe chömöledö. Ja̧danö, ötjöda otiwanö chö̧jakwa̧ chomukwatökö chömöledö, ju'wedö otiwanö tjö̧jakwa̧ chomukwatobe, jobadöbi tjö̧jibo jö̧ba̧lö.

Colosenses 3:23

Okobe jwiinö kwotidaduwi̧ma, otiwanö jwaikwöda kwotidaduwo, Biya̧ chotidi̧ma jojodö wetji̧maökö, Duluwo̧ wei̧da ja̧bö jo̧sa, jö̧ba̧lö.

Colosenses 2:12

Jau chömöledö, Diosma ökwödönö ubu̧datinobedanö ichejekwa, Cristokwö i̧lȩdo̧ okwa ökwödönöbi tjo̧tjinö ja̧bö. Ja̧danö, Diosma isabenö juluwo̧ jö̧ba̧lö kwösödaduwiökwe, Cristonö woawatjö tjeachajinö ja̧binama ökwödönöbi Cristokwö tjekachajaduwinö ja̧inobe.

Romanos 8:6

Jau chömöledö, suli̧ ömöayedödanö ju̧kwadöma, wotjakwedö. Jo̧kwaijayonö, Dios O̧'wo̧ Luwo̧ ömöayedödanö ju̧kwadöma, wene jwiinö ba̧kwȩlö̧jatebö tjuju̧kwakwedö Dioskwö.

Romanos 8:2

Jau chömöledö, Jesúskwö a̧jö dö̧jobetjö̧, O̧'wo̧ Luwo̧ Dios ujulunöda dö̧jibinobe. Dios O̧'wo̧ Luwo̧ ujulunöda, sulabe dujuna̧li̧tjöbi, woawatjöbi dö̧jibinobe chömöledö. Ja̧danö, jejenö dö̧jibinobetjö̧, ba̧kwȩlö̧jatebö ja̧kwawa dujuna̧lobe babema Cristo Jesúskwö chömöledö.

Juan 6:57

Dabe'do Dios, ötjönö webinama, ba̧kwȩlö̧jatebö ja̧kwawa iyo̧. Ja̧danö jo̧bama, ba̧kwȩlö̧jatebö ja̧kwawa iyo̧obetjö̧ ötjöbi ba̧kwȩlö̧jatebö ja̧kwawa iyo̧sa. Ja̧danö, ötjö chiteba'o kwadöbi ba̧kwȩlö̧jatebö ja̧kwawa juna̧ladö batjibakwedö, jobadönö ba̧kwȩlö̧jatebö ja̧kwawama chiyobetjö̧.

Efesios 4:17

Jo̧kwaobetjö̧ chömöledö, Duluwo̧ma ötjönö weinadanö yötawaduwakwö. Diosnö wajwibadö sulabenö omukwatö tjuju̧kwi̧danöma omukwatö kwuju̧kwaduwa. Jobadöma Diosnö wajwitjobetjö̧ mikwa jwii̧ jawada omukwatö ja̧bö ju̧kwadö.

2 Corintios 3:6

Jo̧bada ökwödönö ujuninobe, iteda yöbawö ujunina wene 'yayi̧ wene otidadö badibanö, ja̧danö jo̧bada pjaatobetjö̧, otiwanö yöbawadösa, ökwödöbi, ju'wedöbi isabenö ja̧kwawa kwujuna̧laduwobö. Ja̧danö, yödawi̧ wene, Dios yöbawö ujunina wene 'yayi̧ wenema, Moisés iwȩyudina Dios weina jawamaökö chömöledö, Dios O̧'wo̧ Luwo̧ jawada. Jau chömöledö, Moisés iwȩyudina laebi̧danö jojodö ja̧bö tjö̧jokobetjö̧, lȩekwa jo̧be jobadönö, jo̧kwajabetjö̧ Moisés iwȩyudinama sule wobaleda iyobe, ¿jö̧tö? Jo̧kwaijayonö Dios O̧'wo̧ Luwo̧ma, ja̧kwawa iyo̧.

Efesios 5:14

Jejenö omukwatö bakwo̧ma damötjö wȩyudijetö biya̧, damötjö lo̧awadanö: Wilubaduwi ökwödö aba̧ladödanö ju̧kwadöma. Yemidanö 'yabibajaduwi ökwödö wobinadödanö ju̧kwadöma. Cristoma ökwödö kwo̧'wo̧ luwo̧duwi okwanö dewinö idejatakobe kwöwaisachibaduwobö. Jejenö wȩyudijetö damötjö.

Romanos 8:10

Jau, ökwödö a̧tji̧yedö kwiteba'oduwima isabenö woakobe chömöledö. Ökwödö böjȩ jojodö sulabe dujuna̧lobetjö̧, diteba'oma isabenö woakobe. Ja̧danö, diteba'oma ida̧ökö woinobedanö jo̧be. Jau chömöledö, diteba'oma woinobedanö jo̧be, jo̧kwaijayonö, Cristoma ökwödö kwo̧'wo̧ luwo̧duwinö ö̧jitjö̧ma, kwo̧'wo̧ luwo̧duwima woökena, Diosma ökwödönö ja̧inobetjö̧, suli̧ jwibadö bakibaduwanö.

Juan 5:24

Ina yöawinobe Jesúsma judío la'aka luwedönö: —Isabenö yötawa, ötjö yötawi̧ a̧ja̧kwadö, ötjönö webinanö ösödadöma, ba̧kwȩlö̧jatebö ja̧kwawa tjujuna̧lakwedö. Jobadöma lȩtebökakwawö̧. Wobajaletjö tjö̧jibanö babibö, ba̧kwȩlö̧jatebö tjuju̧kwakwedö— yöawinobe—.

Romanos 6:2

Jejenömaökö chömöledö. Ina sulabedö dö̧jayi, sulabe dujuna̧li̧ juluwinobe ökwödönöma ichejekwa, jwaikwöda sulabenö ja̧dobö, ¿jö̧tö? Jo̧kwaijayonö ökwödö Jesúsnö ösödadöma, sulabedöböködösa ökwödöma babema. Ja̧danö, ju'wibi, ökwödö Jesúsnö ösödadöma, Jesús woenama, ökwödöbi wodinobe chömöledö, sulabe dujuna̧li̧ juluwökönö ökwödönöma. Jejenö wodinobetjö̧ ¿tajawedö ina sulabenö ja̧bö dö̧jobö chömöledö?

2 Reyes 5:17

Yöa̧liökwe, Naamanma aebinobe: —Ja̧ kwemobö kwöpöjöditjö̧ma, jo̧kwada. Jo̧kwaijayonö, ju'wibi atebakwö chuluwo̧, ja'yubenö niji ötjönö kwiyobö atebakwö, du̧ju̧taja kabayudö tje'ewobö jö̧tja̧li̧ niji kwiyobö atebakwö. Jobekwö sobö chemobö weköbakwa̧ji̧? Jau Eliseo, bemi tupakwö jwiinö ubinö iyawabi, ju'wi iyawabi, la'akatjöda ju'wedö diosbedö jö̧ba̧lö tjösödawö̧nö chiyökakwo̧sa, sule Isabenö Jo̧ Diosnöda chiyakwo̧sa, jo̧kwajabetjö jo̧ba itebo israel nijitjö ja'yubenö niji chemobö chösöda, ja̧ chödaja̧ niji wameda Diosnö chiyakobetjö̧.

Romanos 4:25

Jau chömöledö, Diosma Cristonö weinobe, ökwödö sulabe dujuna̧li̧ midawö woobö. Ja̧danö, jo̧banö woawatjö tjeachajinö ja̧inobe, ökwödö sulabe jwibadö badibanö ja̧bö.

2 Corintios 12:10

Jo̧kwajabetjö̧, chujulu jwienabi, ja̧danö ötjönö sulabenö yötja̧lenabi, ja̧danö usula chemawenabi, ja̧danö ju'wedö usula chemawobö ja̧tjenabi, ja̧danö wene chöbaledenabi, cho̧'wo̧ ösöwanö chö̧jobe chömöledö, Cristonö chösödobetjö̧ biya̧ baledo̧sa jö̧ba̧lö. Jau chömöledö, ja̧ jawa cho̧'wo̧ ösöwanö chöbaledobe, jejenö ötjöda chujulu jwienama, isabenö ujulu chujuna̧lobetjö̧.