2 Corintios 1:4 - Dios Iwene

⁴ Jau chömöledö, okobe jwiinö wene döbaledi̧ma, ökwödönö do̧'wo̧ tjo̧bekwö dö̧jajelö do̧'wo̧ ösöwachibanö pjabato̧ Dabe'do Diosma, chömöledö. Ja̧danö, jejenö ökwödönö pjaatenama, ökwödönöda omukwatöma pjaatokobe, ju'wedönöbi omukwatö pjaatobe ökwödönö chömöledö, ökwödönö pjaati̧danö, tupakwö ju'wedö tjo̧'wo̧ tjo̧bekwajadönö ökwödöbi pjadato jö̧ba̧lö. Jau chömöledö, ju'wedö tjo̧'wo̧ tjo̧bekwö tjö̧jenama, Dios ökwödönö pjaatinobetjö̧, jobadönö pjadatobö jo̧be, Dios ökwödönö pjaatinadanö.

2 Corintios 1:4 Referans Kwoze

1 Tesalonicenses 5:11

Ja̧danö, jejenö jo̧betjö̧, ida̧ökö ja̧bö kwö̧jaduwi̧danö, tupakwö pjabatakwawö yöka̧lakwawaduwo, ja̧danö kwujuluwachibaduwanö yökawakwawaduwo.

Isaías 51:12

Adebökwe, baikwö atadö yöba̧lo̧ Isabenö Jo̧ma: Chömöledö, kwo̧'wo tjo̧bekwö kwö̧jaduwelö, ötjödasa kwo̧'woduwi ösöwachibanö pjabato̧ma. Ja̧danö ötjöda ökwödönö pjatatobetjö̧, tajawedö bö̧jȩ jojodönö yekabiduwobö? Jobadöma meje'ye, juluwanö kököbachibö, debi baiba'yedanö ichejekwadö, juluwanö debö 'ya̧dö bö̧jȩ jojodöma, tajawedö jobadönö yekabiduwobeda?

Isaías 40:1

Baikwö yöawobe dösödökwe Diosma: Otiwanö tjujuluwachibanö yökawo chömöledönö, o̧'wo tjobekwö tjö̧ji ösöwachibanö.

Hebreos 12:12

Jo̧kwaobetjö̧ chömöledö, Dios yöbawö kwabö lȩebi̧ma ökwödö kwöda̧peachaduwinö pjaatobetjö̧, kakatibaduwoko, ¡Ayö! Chime'dawachiba, katatiba, jö̧ba̧lö. Chömöledö ja̧ kwime'dawachibaduwitjö̧ juluwachibö kabatibökönö kwi̧'yaduwo kwo̧'wo̧ luwo̧duwinö.

Juan 14:18

Ina yöawinobe: —Ökwödönö chile'dedokobe jo̧dawa'ye ba̧kwȩlö̧jatebö kwö̧jaduwoböma. Yemidanöbi chichakwo̧sa.

Juan 14:16

Ja̧danö, ökwödö ötjönö ösödadönöma, Chabe'donö atebocha jelo̧ Pjabato̧nö weobö, ötjö chȩwa̧jabe okobe balekwo̧nö. Jo̧ba pjabato̧ma ökwödökwö ba̧kwȩlö̧jatebö ö̧jakwo̧.

Isaías 12:1

Ja̧danö, ja̧ möle Dios jwiinö otiwanö pjaatiawö̧, baikwö yöka̧laduwakwedöja: —Duluwo̧ Isabenö Jo̧, otiwanö pjabato̧ja jö̧ba̧lö yöda̧lakwö. Jau Duluwo̧, ajayinö ökwödönö kwödameakwijatö, jo̧kwaijayonö ajayinö kwödameakwinajayonö, kwödameakwi̧ma kakatibajabe, ja̧danö do̧'wo ösöwachibanö pjakatajabe.

Juan 14:26

Ja̧danö, chȩwa̧jabe okobema Dabe'do Dios, ötjö Chabe'doma ökwödönö weakobe jelo̧nö, ötjönö balekwo̧nö, Pjabato̧nöma. Jo̧bama Dios O̧'wo̧ Luwo̧. Ökwödönö okobe jwiinö öba̧ja̧da̧lakwo̧. Jo̧bama ötjö chöba̧ja̧dinabi kwomukwataduwobö pjaatakwo̧— yöawinobe Jesúsma—.

Isaías 52:9

Jerusalen comunidad pjolö loinemibi o̧'wo ösöwachibanö lo̧obö jo̧be, Isabenö Jo̧ma iteda ömöledönö tjo̧'wo ösöwachibanö pjaatajobetjö̧, ja̧danö itebo comunidad Jerusalen tjöpöjojodötjö ji̧binö pjaatajabe.

1 Tesalonicenses 4:18

Jejenö ja̧kobe chömöledö, jo̧kwajabetjö̧ biya̧ wene yöba̧lakwawö pjakatakwawaduwo kwo̧'wo̧ luwo̧duwi ösöwachibanö.

2 Corintios 7:13

Ja̧danö, jejenö öwawobetjö̧, do̧'wo̧ luwo̧ ujuluwachibanö ju̧kwadösa chömöledö. Jau chömöledö, ja̧ wene a̧ja̧kwö do̧'wo̧ luwo̧ ösöwachibanö da̧ja̧kwijatö, ja̧danö ju'wibi chömöledö. Titonö o̧'wo̧ ösöwachibanö pjakatinaduwobe edö, ja̧bi bajalekwönönö do̧'wo̧ ösöwachibanö pjaatinobe chömöledö.

Isaías 51:3

Ja̧danö baikwö yötawaduwakwö chömöledö, jo̧ba itji̧mu tupadanö jojodö o̧bukwedöda tjö̧jijayonö, tja'döminenö pjatatinadanö yemidanö pjatatocha, Jerusalen jojodönö. Ja̧danö jobekwö pjatatenama, tjitebo nijima jwiinö otiwachibakobe. Jojodö deobe kö̧kö̧emima, inesö otiwayu Eden batjodanö baibanö, o̧bubiya otiwanö bo̧akobe. Ja̧ jojodö deobema, Isabenö Jo̧ itea batjo, jö̧ba̧lö ötjabayudanö baibakobe. Ja̧danö jobe ju̧kwadöma jwiinö tjo̧'wo ösöwachibanö tjö̧jakwedö, ja̧danö ötjönö ösödö lo̧tjakwedö, —Isabenö Jo̧ma otiwanö pjabato̧, —jö̧ba̧lö.

Isaías 49:10

Ja̧danö a̧wi̧chi̧bi, ojwiyo o̧ti̧bi tjötjökakwedö, ja̧danö jawo̧ma labinö tubinö idejatökakobe jobadönö. Jau, ötjö jobadönö lȩlö̧inö edo̧ma otiwanö tji̧'yakwa̧ jwetebakwo̧sa, ja̧danö otiwanö ötibakwo̧sa, ojwese'dobe ichibö tjowakobetjö̧.

Filipenses 1:14

Ja̧danö ju'wibi, ötjöma ka̧lena chö̧bobetjö̧, ba̧jekwadö Jesúsnö ösödadöma tjujuluwachibobedanö ichejekwa Jesúsnö tjösödi̧ma, ja̧danö ajayitjö bajalekwönönö yebabökönö Dios iwene yöbawö tjö̧jobe.

2 Corintios 7:4

Jau chömöledö, sulabenö öpöjödadö jö̧ba̧lö chomukwatökö ökwödönö, isabenö ötjönö ösödadöja jö̧ba̧lö chöwaisobe, ja̧danö jejenö ökwödönö chöwaisobetjö̧ yebabökönö jweinö yötawobe ökwödönö, Corintio jojodöma otiwanö tja̧ja̧kwakwedö jö̧ba̧lö. Jau chömöledö, ökwödönö chösöda, yötawi̧ otiwanö a̧ja̧kwadöja jö̧ba̧lö, ja̧danö jejenö chöwaisi̧ma chujuluwachibanö pjaatobe, cho̧'wo̧ ösöwachibanö chö̧jobö. Jau chömöledö, nöinö wene döbaledijayonö, ökwödönö omukwatö, chömöledö Corintio jojodöma isabenö otiwanö a̧ja̧kwadö jö̧ba̧lö cho̧'wo̧ ösöwachibanö jo̧sa.