1 Timoteo 5:10 - Dios Iwene

¹⁰ ja̧danö, wobekwinadötjö tjite'ada̧lakwawö̧ma sule jojodö, Bidöma otiwanö ja̧bö ji̧nadö, jö̧ba̧lö tjöwaisawö̧nöda. Ja̧ otiwanö ja̧bö tjuju̧kwina jawama baikwö yötawa: Otiwanö tji̧tji̧munö bötjatö, jelobetjö ichajadönö tjejunö tebatö, ju'wedö Jesúsnö ösödadö tjömöayujudanöbujusa jö̧ba̧lö pjabatö, usula emawadönö pjabatö, ja̧danö jwaikwöda okobe jwiinö otiwanö ja̧awa ja̧bö. Jejenö ja̧bö ji̧nadö ya̧dö tji̧lȩkwa̧munö wobekwinadönöda kwujuno, Jesúsnö ösödadö tjite'ada̧lawö̧, jö̧ba̧lö

1 Timoteo 5:10 Referans Kwoze

1 Timoteo 6:18

Ja̧danö, balada luwedönö otiwanö ja̧tjobö yöbawidönö, baikwö wanedö yötawa: Otiwanö ja̧awa luwedö baibanö tjuju̧kwobö yöbawidönö, a̧'dȩlökönö ju'wedönö pjabatö.

Tito 3:8

Jau Tito, biya̧ yötawaja̧ma, jweinö yötawajabe. Tito, biya̧ ökwönö yötawaja̧ma, Jesúsnö ösödadönö yökawobö chösöda. Ja̧danö, otiwanö tja̧ja̧kwobö webidönö, jobadö Diosnö ösödadöma jwaikwöda otiwanö ja̧awa ja̧badö batjibanö tjuju̧kwakobetjö̧. Jejenö ja̧bö ja̧kwawama otiwa, ja̧danö jojodönö pjaatakwawa ji̧.

Hechos 9:36

Jobetjö Lidanö jejenö baledonö jelobe, Jope mikwobe, jobe jujuma, Tabita mikwujuma ö'wöchaju ö'wö babibijotö. Ja̧danö, jobujuma Jesúsnö ösöduju. Jobujuma, griego tjiwenenö Dorcas mikwuju. Jobujuma ina 'yajayi otiwanö pjabatö ji̧abijotö. Kabatökönö pjabatiabijotö usula jojodönö. Ja̧danö ö'wö baibajajunö ju'wedöma dichijadötö jobujunöma, wobajadönö dichajitjadanö. Dichajadöma mösȩko̧nö lödijadötö, Jojodö edö tjichakobe, jö̧ba̧lö.

Tito 3:1

Tito, belö yödawina tjomukwatibobö yöbawi Cretanö ju̧kwadö Jesúsnö ösödadönö, la'aka tjuluwedö wetji̧bi, ju'wedö tjuluwedö wetji̧bi ja̧bö tjö̧jobö. Jau Tito, öpöjödabökönö tjo̧'wo̧ ösöwanö tjuluwedö wetji̧ ja̧bö tjö̧jobö jo̧be. Ja̧danö, okobe jwiinö otiwanö ja̧awa ja̧bö dö̧jo jö̧ba̧ladö batjibanö tjö̧jobö,

Tito 2:7

Jau Tito, ökwöbi okobe jwiinö ökwö ja̧bö kwö̧ji̧ma, otiwanö ja̧bö ja̧kwawa i̧sebö kwö̧jo, ju'wedö edö tjöwaisakobetjö̧ otiwanö ja̧bö ja̧kwawama. Ja̧danö, jojodönö yöbawö kwö̧ji̧ma, bakwainö otiwanö omukwatö, obökönö yökawo,

2 Timoteo 3:17

Jau Timoteo, Dios iwene jejenö tjöba̧ja̧dobö jo̧be, Dios ömöayedöma isabenö otiwanö otikwa waisachibö, okobe jwiinö Dios jobadönö wei̧ otiwanö waisanö tjotidakobetjö̧.

Romanos 12:13

Kwömöledöduwi Cristonö ösödadö jwibö tjö̧jenama, pjakataduwo, ja̧danö jelobetjö ichajadö tjichibenama, öpöjödabökönö te'ada̧lö pjakataduwo.

Lucas 7:44

Ja̧danö jojosuju jö̧bobekwö jalachibö, Jesúsma Simónnö yöa̧linobe: —Bisu jojosujunö edi. Kweju okwa tetachenama, ojwiyo kwiyökötö, chömasapiya chidichawobö, jo̧kwaijayonö bisuma jubudesobunö chömasapiya jidichajabe, ja̧danö dichaju, jöwö'yenö 'do̧bö chömasapiya jököködajabe.

Mateo 5:16

Ökwödöbi ja̧danö chömöledö. Ökwödö böjȩ jojodö tjö'da̧de ja̧nö, otiwanö ja̧bö ja̧nö kwidejataduwo, okobe deinö otiwanö ja̧bö kwö̧jaduwi̧ tjedakobetjö̧, ja̧danö jejenö edö, okobe deinö mölejȩbe jo̧ kwabe'doduwinö tjösödakobetjö̧— jö̧ba̧lö yöawinobe Jesúsma.

1 Pedro 2:12

Jau chömöledö, ökwödöma Diosnö ösödöködö tjö'da̧de ja̧nö, otiwanö ja̧bö kwö̧jaduwo, otiwanö ja̧bö kwö̧ja̧duwi̧ tjedakobetjö̧. Ajayinöma isabenö ökwödönö wanedö sulabenö ja̧badö jö̧ba̧lö yötja̧lena chömöledö, jo̧kwaijayonö jwaikwöda otiwanö ja̧bö kwö̧jaduwitjö̧ma, otiwanö ja̧bö kwö̧jaduwi̧ edö tjöwaisachibena, Aaa, Jesúsnö ösödadöma isabenö otiwanö ja̧bö ju̧kwadö, jö̧ba̧lö. Ja̧danö chömöledö, jejenö tjöwaisachibobetjö̧, 'dö̧ibaji̧ möle Dios ichakwa̧ möle badekwachenama, jo̧banö tjösödena, Otiwo̧ja, jö̧ba̧lö.

Hebreos 13:2

Ja̧danö, jelobetjö ichadönöma otiwanö te'ada̧lö tekataduwo, tjukwa iyö, tjabemibi webö. Ja̧danö damötjö ji̧nadötjö ju'wedöma, Jojodönöda pjabatö tedata, jö̧ba̧lö, tjomukwatijayonö ángelesdönöda tjetjatinobe. Jo̧kwaobetjö̧ chömöledö, Bidö jelobetjö ichadönö pjadatawö̧ma ángelesdöena, jö̧ba̧lö, otiwanö pjabatö kwite'ada̧laduwo.

Hebreos 10:24

Ja̧danö chö̧ja̧wo̧dö, ökwödöma dömöledökwö ja̧nö domajadenö budekwabinö yödawakwawobö jo̧be, Dömöledönö ösödabikwawö dö̧jaduwo, bakwelajatebö pjabatö, jö̧ba̧lö.

Tito 3:14

Jau Tito, ökwödö dömöledö jobe Cretanö ju̧kwadö Jesúsnö ösödadöma tjöwaisachibobö jo̧be, otiwanö ja̧bö tjö̧jobö. Ja̧danö, inesö pjatjato jö̧tja̧li̧ma otiwanö pjatjatena, mikwa jwii̧ jawada ja̧bö tjö̧japji jö̧ba̧lö.

Tito 2:14

Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

Lucas 7:38

ja̧danö Jesús oma'apekwöchobe bȩbachibö jubudekwinobe. Budekwö, jubudesobunö Jesús ömasapiya jidichinobe, ja̧danö jöwö'yenöbi 'do̧jinobe Jesús ömasapiyama, ja̧danö Jesús ömasapiya du̧batö, omewi̧ jawa Jesús ömasapiyanö tobebö dujebinobe.

Génesis 18:4

Ja'yubeda ojwiyo weto tjichejebobö kwömasapaduwi kwidichawaduwobö. Ja̧danö, dichawö kabatöma towi la'aka ba̧nö kwö'wachaduwo, tiyuwena.

3 Juan 1:12

Ja̧danö, jelo̧ dömöledöso̧ Demetrionö yötawa. Jojodöma ba̧jekwadö jo̧banö otiwanö yötja̧lobe, Demetrioma otiwi̧ jawa ja̧bö jo̧, Dios isabenö ji̧ yöawi̧ a̧ja̧kwo̧, jö̧ba̧lö. Ötjöbi jejenö yöta̧la jo̧banöma, Otiwi̧ jawa ja̧bö jo̧ Demetrioma, jö̧ba̧lö. Ja̧danö, kwöwaisa ötjö yöta̧li̧ma jweinöda yöta̧lobe.

1 Pedro 4:9

Ja̧danö, öpöjödökönö, kwo̧'wo̧ ösöwanö kwejuduwinö tebatö kwite'ada̧laduwodönö kwömöledöduwinöma.

2 Timoteo 3:15

ja̧danö ju'wibi Dios iwene kwöwaisa, ina tjemu kwö̧jayi ökwönö tjöba̧ja̧dinobetjö̧. Ja̧danö, jejenö kwöwaisobetjö̧ 'diinö do̧ba̧lö kwösödobö jo̧be, chösödi̧ wenema isabenö wene jö̧ba̧lö. Jau Timoteo, ökwönö tjöba̧ja̧dina jawa Dios iwene jawama, waisanö kwomukwatobö ba̧ja̧dakwawa jawa tjöba̧ja̧dinobe, ¿jö̧tö? Ja̧danö, waisanö kwomukwatobö tjöba̧ja̧dinama, otiwa jawa wene waisanö kwomukwatobö pjaatinobe, Cristo Jesúsnö ösödö kwö̧jibobö, ¿jö̧tö? Jau Timoteo, jejenö waisanö kwomukwatobö pjaatinobe tjöba̧ja̧dinama, jo̧kwajabetjö̧ ja̧ laebi̧ kwöwaisachibinobetjö̧ isabenö wene 'diinö do̧ba̧lö kwö̧jobö jo̧be.

2 Timoteo 2:21

Jejenö jo̧be Timoteo, ja̧danö baikwö yötawakwö: Bakwo̧ suli̧tjö 'da̧bachibö ja̧nö idichawitjö̧ma, Dios ömöayo̧ otiwo̧ ö̧jena, dȩja̧pa̧ nöinö mikwawapa̧danö. Ja̧danö, suli̧tjö 'da̧bachibö ö̧jobetjö̧, Duluwo̧ jo̧banö otiwanö weobö ja̧kobe, isabenö okobe jwiinö otiwi̧ otikwa otidobö.

2 Timoteo 1:5

Timoteo, ökwönö omukwatö isabenö Dios yöawi̧ kwösödi̧ wene chomukwatiba. Jau, ajayinöma ökwö kwa'do̧ Loida mikwujuma, isabenö Dios yöawi̧ ösöduju jö̧jinobe, ja̧danö kwojo'do Eunicebi isabenö Dios yöawi̧ ösöduju jö̧jinobe. Ja̧danö chedemi ökwöbi jobadö tjösödi̧danö isabenö ösödo̧ja Timoteo.

1 Timoteo 5:25

Jojodö otiwanö ja̧tji̧bi ja̧danö. Ju'wedökwena otiwanö ja̧tjenama, juluwanö öwawobe, okobe deinö edö tjöwaisobö, otiwanö ja̧tjinobe jö̧ba̧lö. Ja̧danö ju'wedökwena otiwanö ja̧tjenama, juluwanö öwawokobe otiwanö ja̧tji̧ma, jo̧kwaijayonö juluwanö öwawököjayonö, tupakwö öwawakobe otiwanö ja̧tjinobe jö̧ba̧lö.

Colosenses 1:10

Duluwo̧ ömöledö tjö̧jo jö̧tja̧li̧danö kwö̧jaduwo jö̧ba̧lö. Jau chömöledö, Duluwo̧ ösödi̧danö ja̧bö kwö̧jaduwobö dösöda, ja̧danö okobe jwiinö otiwanö ja̧awa jwaikwöda ja̧bö kwö̧jaduwobö dösöda, ja̧danö tupakwö Diosnö kwöwaisaduwobö dösöda.

Efesios 2:10

Chömöledö, Diosma ökwödönö otiwanö pjabatijetö yemidanö do̧'wo̧ luwo̧nö 'yabibajadö badibanö. Ja̧danö, otiwanö pjabatijetö, Cristo Jesúskwö bakobe dötewadö badibanöma. Diosma jejenö pjabatijetö ökwödönöma, otiwanö ja̧bö dö̧jobö. Ajayitjöda omukwatijetö ökwödönöma, do̧'wo̧ luwo̧nö 'yabibajadö, Cristo Jesúskwö dötewadö otiwanö ja̧bö dö̧jakwa̧ma.

Hechos 22:12

Jobema, bakwo̧, Ananías mikwo̧ma, Dios wei̧ ja̧bö jo̧ma ö̧jijatö. Okobe deinö jobe ju̧kwadöma, judío jojodöma, Ananiásnö tjösödökwe, Otiwanö ja̧bö jo̧, jö̧ba̧lö.

Hechos 10:22

Jejenö abebö a̧ja̧kwiawö̧ atadijadötö: —Duluwo̧ Cornelioma, ciennö guardia jojodö tjuluwo̧ma weatö ökwödönöma ökwönö öbibö di̧'yobö. Jo̧ba Duluwo̧ma otiwanö omukwatö jo̧. Diosnö otiwanö yebabinö omukwato̧. Okobe deinö judío jojodöma tjösödökwe Duluwo̧nöma. Dios weajökwe ángelma öwawachajo̧ webijetö Duluwo̧nöma ökwönö weobö, iteda ejube kwi̧'yobö, ökwö yökawi̧ a̧ja̧kwobö— yöbawijadötö.

Hechos 9:39

Jejenö wetjajawö̧ 'ya̧nö Pedronö yötjawiökwe juluwanö 'yi̧jetö Jopebe. Ichibajo̧nö ö'wö babibajaju jömöledöma öbibö nöchijadötö mösȩko̧nö, tjödajȩko̧nö. Ja̧danö, jȩko̧nö tji̧lȩkwa̧munö wobekwinadö budekwabinö ji̧jadötö. Jobadöma Pedronö edö 'ya̧wibö i̧sebijadötö Dorcas iyö pjabatiajinado̧ jobadönöma, ina 'yajayi 'dö̧jinado̧.

Hechos 6:3

Jo̧kwaobetjö̧, chömöledö, ökwödötjö emö junaduwi jelemutjö du̧ju̧tajanö ömadönö, pjaatakwawa jojodönö, ja̧ iyawa webadö batjibinö. Jobadö emö kwujunaduwakwawö̧ma, Otiwanö omukwatö ju̧kwadö, jö̧ba̧lö, jojodö yötja̧lawö̧nöda emö kwujunaduwo. Ja̧danö, jobadö emö kwujunaduwakwawö̧ma waisanö omukwatadönöda kwujunaduwo. Ja̧danö, Dios O̧'wo̧ Luwo̧ öba̧ja̧dawö̧nöda emö kwujunaduwo. Emö kwujunaduwawö̧nö wedakobe jobadöda iyawa wetjobö.

Isaías 1:17

Otiwa jawa ja̧bö ja̧kwawa kwöwaisachibaduwo, ja̧danö jweinö lȩekwa weköbaduwo. Ju'wedö sulabenö ja̧tja̧wö̧nö pjabatö, tjo̧'wo ösöwachibanö pjakataduwo. Löyödöbi, tjilekwamunö wobekwinadöbi lȩekwa luwedö tjöba a'o tjö̧jenama, tjöbeba̧löjönö pjakataduwo, jobadönö suli̧ tjöwaedapji jö̧ba̧lö, yöawobe Diosma.

Génesis 24:32

Jejenö jö̧a̧lökwe Labanma Abraham ömöayo̧nö öbibö ȩwa̧jijetö ejube. Ichibö Labánma kabebö lödijetö ka̧mȩyu̧dö tjoma'anö tje'ewaja̧ma. Kabebö lödö kabatö isa'ye kameyudö tjabakwa̧'ye tjabakwemi lödijetö. Ja̧danö, isa'ye tjukwakwa̧'ye iyijetö ka̧mȩyu̧dönö. Ja̧danö, Abraham ömöayo̧nöbi, jo̧bakwö ichajadönöbi ojwiyo iyijetö tjömasapiya tjidichawobö.

Génesis 19:2

Ja̧danö jö̧ba̧lijetö jobadönö: —Chuluwedö. Ökwödö kwömöayo̧duwisa ötjöma. Cheju okwa tebachajaduwi kwömasapaduwi kwidichawaduwo. Dichawö kabatöma kwabaduwo, dewachö wiluibö labebö kwi̧'yaduwo— jö̧ba̧lijetö. Jejenö jö̧alijayonö jobadöma jö̧ba̧lijadötö: —Kwejunöma dabökö. Ökwödöma apetube daboda—jö̧ba̧lijadötö.

1 Timoteo 5:16

Ja̧danö jilekwe wobekwinuju jömöledötjö bakwuju Jesúsnö ösöduju jö̧jitjö̧ma, jobuju Jesúsnö ösödujuda jömöledösuju wobekwinujunö jite'ada̧lobö jo̧be, ju'wedö Jesúsnö ösödadö jobujunö tjite'ada̧lapji jö̧ba̧lö. Ja̧danö, jejenö pjajatobetjö̧, Jesúsnö ösödadöma ju'wedönö pjatjatobö tjujuna̧lakwedö, isabenö tjömöledö debadönöda.

1 Timoteo 3:7

Ja̧danö, te'ada̧lakwawa luwo̧ baibanö otidakwo̧ma, ju'wedö Dios ömöledöböködöbi otiwanö tjomukwatökweda, jojodö sulabenö yötja̧liökwe Awetja ja̧ina 'daliwanö ö̧libapji jö̧ba̧lö.

Génesis 43:24

Ikenama José ömöayo̧ma José eju okwa tebatijetö José ömöledönöma. Tebachajadönö ojwiyo iyijetö tjömasapiya tjidichawobö. Ja̧danö, tja̧jwi̧mu bu̧lu̧dönöbi iyijetö tjukwobö.

1 Timoteo 3:2

Ja̧danö, te'ada̧lakwawa luwedö jawa yötawa. Te'ada̧lakwawa luwo̧ baibanö otidakwo̧ma, otiwanö ja̧bö jo̧. Ja̧danö, otiwanö ja̧bö ö̧jobetjö̧, jojodö sulabenö yötja̧loböma jwibo̧. Ja̧danö, ilekwo bakwujunöda junalo̧, ja̧danö jobujukwöda jo̧. Ja̧danö, ja̧bö ö̧ji̧ma, bakweminö omukwatö jo̧. Ja̧danö, Aaa, biya̧ma otiwanö ja̧awa, jö̧ba̧lö öwaisi̧danö ja̧bö jo̧. Ja̧danö jojodö, Aaa, bitema otiwanö ja̧bö jo̧, jö̧ba̧lö tjöwaisökweda. Ja̧danö, jelobetjö ichajadö tjichenama, ejutjö dösölö̧jinö tebatö pjabato̧, ja̧danö, Dios iwene ba̧ja̧dakwawa waiso̧.

Mateo 25:17

Dos mil iyajökwebi ja̧danö, dos mil ujuna̧linatjö, waisanö otidobetjö̧ cuatro mil baibanö otidinobe.