1 Reyes 8:9 - Dios Iwene

⁹ Dios iteapjo okwa, sule Dios wei̧ wȩyukwa öbiya döbölatajada okwa a̧ji̧nobe, damötjö Sinai mösa'otjö Moises anina öwiyama. Jau, Egipto nijitjö labebajadö, jobe Sinai mösa'otjö ko̧ko̧kwö tjö̧jenama, Isabenö Jo̧ma jobadönö iteda wei̧ weinobe, jadanö a̧ja̧kwajadö, —Jau, isabenö da̧ja̧kwakwedösa, —jö̧ba̧lö tjatadinobe. Ja̧ Sinaitjö Dios weina wȩyukwa öbiya döbölatajada Dios iteapjo okwa a̧ji̧nobe.

1 Reyes 8:9 Referans Kwoze

Éxodo 25:21

Ja̧danö, ökwönö chiyocha inabiya döbölataja, domulataja jawa weawa weti̧ wȩyukwa öbiyama. Ja̧ öbiyama isapjonö kwano. Kwanaja̧ ikena isapjo muchekwapi, Dios jojodö tjusuli̧ tjumuchebemi wanekwachapima kwumuchebo.

Hebreos 9:4

Ja̧danö isapjo ji̧nobe, Diosnö iyawemima. Japjo wamenö söinö nöekwi̧ jawa juwiatjinobe, okwasȩko̧tjö Diosnö iyö. Japjoma, towi ötebiatjö tjotidinapjo. Ja̧danö, japjoma orosapitjö pötjebinapjo okwakwöchobenöbi, wamekwöchobenöbi. Ja̧danö okwasȩko̧, jwiinö inesösȩko̧nö jelepjo ji̧nobe. Japjobi orosapitjö pötjebinapjo, okwakwöchobenöbi, o̧pekwöchobenöbi. Japjoma Dios jojodönö ajayinö yöbawö ujunina wanekwachinapjo. Japjo okwa orotjö otikwa'do̧ a̧jinobe, Dios Israel jojodönö iyina kwakwawa maná mikwi̧ a̧ja'do̧ma. Ja̧danö, Aarón kwebachö otokwawina'obi, pokwa'o a̧jinobe ja̧pjo okwa. Ja̧danö inabiyabi, Dios jojodönö ajayinö yöbawö junö iwȩyudina öbiyama japjo okwa a̧jinobe.

Éxodo 40:20

Ja̧danö öbiya döbölataja öbiya, Isabenö Jo̧ domulataja jawa weina wȩyukwa öbiya isapjonö anijadötö. Ja̧danö, ö̧'i̧a̧bi yubebijadötö ja̧pjo o̧ki̧ju̧nö, japjo tje'ewakobetjö̧. Ja̧danö, muchekwapi̧bi muchebijadötö.

Deuteronomio 4:13

Jejenö ökwödönö yöawenama, iteda ökwödönö wei̧ jawa yöawinobe: Bi̧ya weti̧ a̧ja̧kwö kwö̧jaduwitjö̧ma, isabenö ökwödönö pjatatakwo̧sa jö̧ba̧lö. Jau chömöledö, ja̧ möle iteda wei̧ domulataja jawa weawama ökwödönö yöawinobe, ja̧danö ju'wibi inaba döbalatajanö i̧wȩyudinobe.

Apocalipsis 15:8

Ikenama, Dios eju okwama imiyu'woda lo̧be chedijatö, Dios ö̧ji̧bi, Dios ujulubi i̧sebö. Ja̧danö, jeju okwa teachakwawama jwiobe, ángelesdöma jojodönö inia tjötjinö ja̧bö katjatenanö baibanö.

1 Reyes 8:21

ja̧danö jejunö Dios iteapjo junawemi chotidajabe. Jau chömöledö, kwöwaisaduwa, damötjö̧ Isabenö Jo̧ma da'dödönö Egipto nijitjö laebinobe, ja̧danö labebajo̧, jobadönö weinobe. Ja̧, jobadönö wei̧ wȩyukwa öbiya döbölataja a̧ja̧pjo junawemi chotidajabe, Dios eju 'yayejutjö, Dios chabe'do Davidnö yöbawö ujunina jawa badekwachinö, —jö̧ba̧lö yöa̧linobe Salomonma, israel jojodönö.

Deuteronomio 31:26

—Bi'ye Dios wei̧ wȩyukwa'ye emö, kwuluwo̧duwi Isabenö Jo̧ Dios wei̧ wȩyukwa öbiya döbölataja a̧ja̧pjo ö'öbö kwujunaduwo. Ja̧danö, jobe ja̧nö, bi'yema ba̧kwelöjatebö i̧sȩkwadanö ja̧kobe, –Isabenö israel jojodöma Dios wei̧ tja̧ja̧kwobö jo̧be, –jö̧ba̧lö.

Éxodo 16:33

Ikenama webijetö Aarónnö: —Anawayu̧ emaji kwano dos litros jenanö ja̧ kwakwawa mana̧ mikwi̧tjö. Ikenama jayu̧ kwujuno Isabenö Jo̧ öbajale a'o, okobe deinö ökwödötjö tupadanö jojodö ba̧kwȩlö̧jatebö tjedakobetjö̧— webijetö.

Éxodo 16:10

Weökwe jwöawö̧ ichijadötö okobe deinö Israel jojodöma. Aarónma jobadönö yöa̧lonö tupakwö jojodö deobekwö tjedemi ¡ayö! Isabenö Jo̧ salöinö idejatobe edijadötö ojwiyo'wotjö, jobadönö öbibö 'ya̧'wotjöma.

Éxodo 14:24

Ja̧danö, ina yȩa'o̧ayi Isabenö Jo̧ma ojwiyo'wo ökwöladanö uba'wotjö edö webijetö Egipto jojodönöma jwiinö yebaibö 'dötjibajobö ja̧tjinö baibanö.

Éxodo 13:21

Isabenö Jo̧ma jobadökwö 'yi̧jetö. Mölema ojwiyo'wo ja'da'daa'wonö 'yi̧jetö jobadönö i̧sebö. Ja̧danö, yö̧tema ökwöla nöola ubi̧danö jobadönö dejatö 'yi̧jetö, yö̧te tji̧'yobö. Jejenö 'yi̧jetö Isabenö Jo̧ma Israel jojodökwö, mölebi yö̧tebi otiwanö tji̧'yobö öbibö.

Éxodo 25:16

Ja̧danö Moisés, japjo isapjo okwa kwanakobe ökwönö chiyakwa̧ öbiya döbölataja, domulataja weawa jawa weti̧ wȩyukwa öbiyama— webijetö Isabenö Jo̧ma Moisésnöma.