1 Juan 5:18 - Dios Iwene

¹⁸ Chö̧ja̧wo̧dö döwaisa. Dios i̧tji̧mu babibinadöma suli̧ jawa ja̧bö 'yö̧ködö. Ja̧danö, Dios Itji̧ Jesúsma jobadö Dios i̧tji̧mu babibinadönö Awetjatjö tjöbeba̧lö te'ada̧lo̧, Awetjama jobadönö jelobekwö tjomukwatobö öibökönö.

1 Juan 5:18 Referans Kwoze

1 Juan 3:9

Chö̧ja̧wo̧dö, Dios Itji̧ babibo̧nöma Dios 'yayi̧ ja̧kwawa iyinökwe. Jo̧bama o̧'wo̧ luwo̧nö balekwo̧, 'yabayo̧da ö̧jökwe, omajade okwanö Dios omukwati̧danö omukwatinö. Ja̧danö, Dioskwö dötewinö 'ya̧nö jo̧ba 'yabayo̧ ö̧ji̧danö jo̧ma suli̧ jawa ja̧okobe.

1 Juan 5:4

Ja̧danö chö̧ja̧wo̧dö döwaisa, böjȩnö ju̧kwadö sulabedö, Diosnö öpöjödadöma tjuju̧kwobe ökwödönö jelobekwö domukwatobö ötjibotö jö̧ba̧lö. Jo̧kwaijayonö ökwödöma jweinö jö̧ba̧ladösa, Jesúsnö ösödadösa, Jesúsma Dios Itji̧, jö̧ba̧lö. Jo̧kwaobetjö̧ ökwödö Dios i̧tji̧mu babibinadöma Dios ujulunö böjȩnö sulabedönö juluwadösa, jobadö wetji̧ a̧ja̧kwökönö. Jau chö̧ja̧wo̧dö, böjȩnö sulabedönö juluwadö ju̧kwadösa, Dios wei̧da a̧ja̧kwö ja̧nö.

Judas 1:21

Dabe'do Diosma isabenö otiwanö ile niebobe ökwödönö chömöledö, ¿jö̧tö? Ba̧kwȩlö̧jatebö ja̧ Dios ökwödönö ile niebi̧ wene omukwatö kwö̧jaduwo. Ja̧danö, ju'wibi te'ada̧lö kwö̧jaduwo, Duluwo̧ Jesucristoma isabenö lȩlö̧jinö edö ba̧kwȩlö̧jatebö ja̧kwawa iyakwo̧ jö̧ba̧lö.

1 Juan 5:1

Chö̧ja̧wo̧dö, Jesúsnö ösödadöma, Jesúsma Dios weinökwe dö̧jibinö pjabato̧, jö̧ba̧lö, Dios i̧tji̧mu babibinadö. Diosma jobadönö tjo̧'wo̧ luwo̧nö 'yayi̧ ja̧kwawa iyawö̧. Ja̧danö, Dios i̧tji̧muma Diosnö ile nibebö ju̧kwadö. Ja̧danö, Diosnö isabenö ile nibebö tjuju̧kwobetjö̧ Dios ju'wedö tji̧tji̧mu̧nöbi ile nibebö tjö̧jobe.

Judas 1:24

Okobe deinö Diosnö dösödaduwo chömöledö, jo̧bada meköbaduwapji jö̧ba̧lö pjabato̧ma, ja̧danö jo̧bada iteda inesö dewinö salöinö öba a'o wene jwiinö kwö̧jaduwobö pjabato̧ma, kwo̧'wo̧duwi jwiinö ösödachibanö.

1 Juan 3:3

Ja̧danö, jejenö omukwatö te'ada̧lö jo̧ma, Isabenö ötjöma Jesucristodanö ichejekwo̧ chö̧jakwo̧sa, jö̧ba̧lö, babe böjȩnö ö̧jayi otiwanö ja̧bö 'yo̧, suli̧tjö dichö loinökwedanö. Isabenö chö̧ja̧wo̧dö, Jesúsnö omukwatö te'ada̧lö jo̧ma böjȩnö ö̧jayi sulabenö ja̧bökönö ja̧kwawa isakwo̧, Jesús böjȩnö ö̧jinadanö.

Santiago 1:27

Ja̧danö, Dios, ökwödö Dabe'do Diosma ¿dakwö yöawobeda, Biya̧ ötjönö inesö kwösödaduwi̧ kwi̧sekwaduwi̧ma, jö̧ba̧lö? Biya̧ chö̧ja̧wo̧dö, Diosnö jwiinö inesö dösödi̧ma: Usulasedönö, tjabe'do tjojo'do debadönöbi, tjilekwe wotjinawö̧nöbi pjadatobö jo̧be, usula tjemawena. Ju'wi jawabi chö̧ja̧wo̧dö, biya̧: Böjȩnö ju̧kwadö sulabenö ja̧tji̧tjö 'da̧bachibö dö̧jobö jo̧be, ja̧ suli̧kwö pjabacha̧lökönö. Jejenö kwö̧jaduwo chö̧ja̧wo̧dö, Dios kwö̧jaduwobö ösödi̧danö, jo̧ba iwene ösödinö a̧ja̧kwö.

1 Pedro 1:23

bakwo̧da i̧tji̧muköbaduwobetjö̧. Jau chömöledö, Dios iwenema yaba̧lö ji̧, ja̧danö 'dö̧ibajökö ji̧, ja̧danö ja̧ wene ösödö, 'yayinö kwöbötjachinaduwobe chömöledö. Ja̧danö chömöledö, 'yayinö kwöbötjachinaduwenama, woba jojodö tji̧tji̧mu baibanöma kwöbötjachinaduwokobe, wobö̧kö̧ jo̧ Dios i̧tji̧muda bötjachinadöja.

1 Juan 2:29

Chö̧ja̧wo̧dö kwöwaisaduwa, Cristoma jweinöda omukwato̧, jö̧ba̧lö. Jo̧kwaobetjö̧ Cristo jweinö omukwati̧danö jweinö omukwatö ja̧döma tji̧sekwobe, Ökwödöma Dios i̧tji̧musa, jö̧ba̧lö. Jau chö̧ja̧wo̧dö, Dios i̧tji̧muma Cristo jweinö omukwati̧danö jweinö omukwatö ja̧dö. Jo̧kwaobetjö̧ jejenö kwö̧jaduwo chö̧ja̧wo̧dö, Dios i̧tji̧mu tjö̧jobö ji̧ma, jweinö omukwatö, ja̧danö Cristokwö dötewinö 'ya̧nö. Jejenö kwö̧jaduwobetjö̧ taba jwiinö kwedaduwakwedöja Cristonö, yemidanö ichenama.

Juan 15:9

Ina yöawinobe: —Chömöledö, jwiinö ile nitebobe ökwödönö. Chabe'do ötjönö jwiinö ile niebi̧danö ökwödönö ile nibebo̧sa. Ja̧danö chömöledö, ötjökwö dötewinö ja̧nö, ötjö ile niteba'wo okwada ja̧duwi.

Apocalipsis 2:13

Jo̧bama baikwö yöawobe ökwödö Pérgamo jojodönö, jo̧banö ösödadönöma: Ötjöma chöwaisa, jobe kwiteboduwima Awetja ba̧nö wei̧danö jo̧be. Jo̧kwaijayonö chedemi ökwödöma jweinö omukwatö, otiwanö kwö̧jaduwobe, Jesúsnöda ösödadösa, jö̧ba̧lö. Ja̧danö, bakwo̧, ötjönö ba̧kwȩlö̧jatebö yöbawo̧, Antipas mikwo̧nö, kwabö lotjenabi ökwödöma kwo̧'wo̧duwi 'dibachibö kakatibinaduwokobe ötjönöma.

1 Juan 5:21

Chösödawö̧, chi̧tji̧mu ötabiwö̧, yötawaduwakwö, Bakwo̧da, jö̧ba̧lö. Diosnö ösödöda kwuju̧kwaduwo. O̧'wo̧ jawa, tjo̧'wo̧ tjöwana̧li̧ tjotidinama kwösödaduwoko. Diosnöda ösödö kwuju̧kwaduwo chö̧ja̧wo̧dö. Tjo̧wi̧, biya̧da yöbawö chiwȩyuda.

1 Juan 4:6

Jo̧kwaijayonö ökwödö Jesús webawedö yödawi̧ma tjöpöjödobe, böjȩ jawa yödawokobetjö̧. Ökwödöma Dios i̧tji̧mubedösa, ja̧danö, Dios jawada yöbawadösa. Jo̧kwaobetjö̧ Diosnö waisadöma ökwödö yödawi̧ tjösödobe. Isabenö yötawa chö̧ja̧wo̧dö, Diosnö öpöjödadöma böjȩ jawa yötjawi̧ ösödadö. Ja̧danö, Diosnö ösödadöma ökwödö yödawi̧ ösödadö, yödawi̧ma Dios O̧'wo̧ Luwo̧tjö ichobetjö̧. Chö̧ja̧wo̧dö jejenö öwawobe ti o̧'wo̧ luwo̧ öibawö̧ tjö̧jojobö, jö̧ba̧lö. Yödawi̧ tjösöditjö̧ma Dios O̧'wo̧ Luwo̧ öibawö̧. Jo̧kwaijayonö yödawi̧ tjöpöjöditjö̧ma jelo̧ o̧'wo̧ luwo̧ öibawö̧, Cristo öpöjojo o̧'wo̧ luwo̧da.

Juan 15:7

Ina yöawinobe: —Ötjökwö dötewinö ja̧duwi. Jejenö ötjökwö dötewinö ja̧nö, ötjö yötawi̧ kwo̧'wo̧ luwo̧duwinö omukwatö kwö̧jaduwitjö̧ma Chabe'donö akebaduwi̧ma okobe jwiinö a̧ja̧kwö pjabato̧.

Juan 1:13

Dios i̧tji̧mu, jö̧ba̧löma, tjojo'do jobadönö jemi̧danömaökö. Dios i̧tji̧mu batjibi̧ma, tjabe'do, tjojo'do tjöbötjati̧danömaökö. Ja̧danö, tji̧lȩkwa̧mukwö tjö̧ji̧tjö baibanömaökö, Dios i̧tji̧mu batjibi̧ma. Wainö bötjachadö, Dios i̧tji̧muma. Jobadöma, Dios ajayinö omukwati̧danö iteda i̧tji̧mu babibö bötjachadö, Dios iteda omukwati̧tjöda.

Proverbios 4:23

Ja̧danö, ju'wibi yötawakwö chitji̧: Kwomajadenö kwomukwati̧ma ö'wiyawakwawönö kwite'ada̧lakwawo sulabenö kwomukwatapji jö̧ba̧lö. Chitji̧, kwomajadenö otiwanö kwomukwatitjö̧ma otiwanö kwö̧jakwo̧ja. Jo̧kwaijayonö kwomajadenö sulabenö kwomukwatitjö̧ma sulabenö omukwatö kwö̧jakwo̧ja. Isabenö chitji̧, kwomajadenö kwomukwataja̧ma kwite'ada̧lobö jo̧be, otiwanö jweinö kwomukwatakobetjö̧.

1 Juan 3:12

Damötjö ji̧na Caín iteda öjawo̧nö o̧'wo̧ sulinö edinadanö kwedaduwoko chö̧ja̧wo̧dö. Jo̧ba öjawo̧nö kwabö lobinama Awetjakwö dötewinö 'yi̧na. Ja̧danö, abebö cha̧ja̧kwaduwakwö. ¿Tajawedö kwabö loinada Caínma öjawo̧nöma? Biya̧ chö̧ja̧wo̧dö: Caínma sulabenö ja̧bö ö̧jinobe, Dios wei̧ma a̧ja̧kwökönö. Ja̧danö, Caín öjawo̧ma otiwanö, Dios wei̧ a̧ja̧kwö ö̧jiökwe o̧'wo̧ sulinö edö kwabö loinobe Caínma öjawo̧nöma.

Hechos 11:23

Ja̧danö, jo̧ba Bernabéma otiwanö omukwatö, Diosnö jwiinö ösödö ji̧abijetö. Dios O̧'wo̧ Luwo̧ iteda o̧'wo̧ luwo̧ okwanö öba̧ja̧di̧ ösödö ji̧abijetö jo̧ba, Bernabéma. Ja̧danö, jo̧bama Antioquíabe wetjajökwe 'ya̧jo̧ edö ösödijetö. Bidö judío jojodöböködönöma Diosma lȩlö̧jino edö pjaatinobe, jö̧ba̧lö, ösödijetö. Ikenama Bernabéma Jesúsnö ösödadönö tjo̧'wo̧ ösöwachibanö tjomukwatobö yöba̧lijetö, Jesúsnö kabatibökönö kwo̧'wo̧ kwöwana̧laduwo, jö̧ba̧lö. Ja̧danö, Bernabéma Antioquíanö ja̧nö Jesús ö̧jina yöawiawö̧ ba̧jekwadö ju'wedö Antioquíanö ju̧kwadöbi, Jesúsma dö̧jibinö pjabato̧, jö̧ba̧lö, ösödijadötö Jesúsnöma.

Juan 15:4

Chömöledö, ubasa'ba opjiya dötewi̧danö ötjöma ökwödökwö dötewinö jo̧sa. Ja̧danö, wetaduwakwö. Ötjökwö dötewinö ja̧duwi. Ötjökwö dötewinö ja̧döma ubasa'ba otiwanö wa̧ja'ba wa̧ji̧danö otiwanö da̧peachö tji̧'yakwedö. Ja̧danö, ubasa'ba sopja wa̧jokopja, 'döbebö loawopjama ¿dakwö wa̧jobö? Wa̧jökö. Kököbachöda kököachopja. Jejenö kwi̧'yaduwobe ökwödöma, ötjökwö dötewinö. Ötjökwö dötewinö kwi̧'yaduwökötjö̧ma ¿dakwö da̧peachö kwi̧'yaduwobö? Ötjökwö dötewinö kwö̧jaduwobö jo̧be chömöledö.

Juan 14:30

Tjo̧wi̧, babema yötawökö nöinöma. Ida̧ökö böjȩ la'aka luwo̧ Awetja weajawö̧ ötjönö do̧batö tjicha. Jo̧kwaijayonö jo̧ba Awetjama ötjönöma juluwö̧kö̧.

Santiago 1:18

Jau chö̧ja̧wo̧dö, Diosma otiwanöda iyo̧. Ja̧danö, jo̧ba otiwanöda iyo̧ma ökwödönö otiwanö pjabatö weinobe iteda iwene, isabenö ji̧ wenema. Ja̧ iwenema ökwödö dö̧jibinö pjaati̧ wene, chö̧ja̧wo̧dö. Ja̧danö, ja̧ wene a̧ja̧kwö dösödinobetjö̧ yemidanö döbötjachijatö do̧'wo̧ luwo̧nö, iteda i̧tji̧mu, jwiinö mikwawadö babibö. Jejenö ösödinobe Diosma, iteda isabenö iwene a̧ja̧kwö dösödobö, iteda i̧tji̧mu babibö. Yelösöda Diosma otiwanö pjaatinobe ökwödönö, jo̧ba otidinatjö o̧penönö mikwawadö badibinö. Ja̧danö, Diosma iteda okobe jwiinö otidinatjö ökwödönö edö yöa̧lobe, Bidö chi̧tji̧muma jwiinö mikwawadö, jö̧ba̧lö. Isabenö chö̧ja̧wo̧dö, okobe jwiinö Diostjö ichi̧ma otiwobe.

Mateo 5:37

Jau chömöledö, ju'wi jaye wanedö yöbawökönö, jweinö ja̧köbaduwakwa̧da yökawaduwo. Jau, ja̧takwo̧sa jö̧ba̧lö yökawitjö̧ma, yökawaja̧danö ja̧bi, ja̧danö ja̧tökakwo̧sa jö̧ba̧lö yökawitjö̧ma, ja̧bökönuwi. Jau chömöledö, ju'wi jaye wanedö yöbawö junawama, Diostjöma ichökö ji̧. Awetjatjö ichi̧— jö̧ba̧lö yöawinobe Jesúsma.

Mateo 6:13

Ja̧danö, sulabenö ja̧dakwojobö jö̧ba̧lö ja̧i̧ jawa döbaledenama, dujuluwachibanö pjabati, sulabenö ja̧dapji jö̧ba̧lö. Ja̧danö inesö sulabo̧ ujulutjö dö̧jibinö pjabati, Dabe'do jö̧ba̧lö akebaduwo Kwabe'doduwi Diosnöma— jö̧ba̧lö yöawinobe Jesúsma.

1 Juan 5:19

Ja̧danö chö̧ja̧wo̧dö döwaisa, Ökwödöma Dios i̧tji̧mu babibinadösa, jö̧ba̧lö. Ja̧danö, böjȩnö ju̧kwadö Jesúsnö öpöjödadöma Dios i̧tji̧muböködö. Jobadöma sulabo̧ Awetja sulabenö ja̧tjobö öibawö̧, jo̧ba i̧tji̧mubedö.

1 Juan 5:20

Ja̧danö chö̧ja̧wo̧dö, ju'wi jawabi döwaisa, biya̧: Dios Itji̧ Jesucristoma böjȩnö ichinobe Isabenö Jo̧ Diosnö döwaisachibanö yöbawö. Ja̧danö, babema Dioskwöbi Itji̧ Jesucristokwöbi bakobe dötewinö 'ya̧dösa. Chö̧ja̧wo̧dö, Jesucristoma isabenö jo̧ Diosda. Ja̧danö, jo̧ba Jesucristoma ökwödönö pjaatinobe, do̧'wo̧ luwo̧nö ba̧kwȩlö̧jatebö dö̧jobö.