1 Juan 3:1 - Dios Iwene

¹ Chö̧ja̧wo̧dö, Dabe'do Dios ökwödönö jwiinö ile niebi̧ma domukwataduwo. Yelösöda jwiinö ile niebobe ökwödönö. Ja̧danö, jwiinö ile niebobetjö̧ ökwödönö öabobe, Chi̧tji̧mu, jö̧ba̧lö. Isabenö chö̧ja̧wo̧dö, ökwödöma Dios i̧tji̧musa. Jejenöijayonö böjȩ jawa ösödadöma ökwödönö edö omukwatöködö, Idöma Dios i̧tji̧mu, jö̧ba̧lö. Dios i̧tji̧mu döji̧ma wajwitjobe. Jobadöma Diosnöbi wajwitjobetjö̧ ökwödönö, Idöma Dios i̧tji̧mu, jö̧ba̧lö, tjomukwatokobe.

1 Juan 3:1 Referans Kwoze

Juan 1:12

Jo̧kwaijayonö jojodötjö ju'wedöma jo̧banö ösödö do̧batö tjeminobe, Biteda, jö̧ba̧lö. Ösödö do̧batö tjemobetjö̧, Bidöma Dios i̧tji̧mu, jö̧ba̧lö, yöawinobe dewinö jo̧ma.

Gálatas 3:26

Jau chömöledö, Cristo Jesúskwö bakobe dötewinö ja̧nö, okobe deinö Dios i̧tji̧mubedöja, Jesúsnö kwösödaduwobetjö̧.

2 Corintios 6:18

ja̧danö ökwödö kwabe'doduwi chö̧jakwo̧sa, ja̧danö chi̧tji̧mu ömadöbi, chi̧tji̧mu ya̧döbi kwö̧jaduwakwedöja, jö̧ba̧lö laebobe Dios iwene, okobe jwiinö juluwo̧ Duluwo̧ yöbawö ujunina wenema.

Juan 17:25

Jweinöda Omukwato̧ Chabe'do, sule bö̧jȩda jojodöma ökwönö wajwibadö. Jo̧kwaijayonö ötjöma chöwaisa ökwönöma. Ja̧danö, böjȩ jojodöma wajwitjijayonö, bidö, chöba̧ja̧di̧ waisachadöma tjöwaisobe, Diosma Jesúsnö weinobe, jö̧ba̧lö.

Juan 3:16

Diosma okobe deinö böjȩnö ju̧kwadönö jwiinö ile niebobetjö̧ itji̧nö iteakwo̧nöda weinobe böjȩkwö. Ja̧danö, itji̧ iteakwo̧nö weinobe, jo̧banö ösödadöma, Bitema dö̧jibinö pjabato̧, jö̧ba̧lö, ba̧kwȩlö̧jatebö tjuju̧kwobö Dioskwö. Ja̧danö, jobadönö Dios lȩebi̧tjö baledökönö ba̧kwȩlö̧jatebö tjuju̧kwakwedö Dioskwö.

Apocalipsis 21:7

Ja̧danö, sulabetjö juluwinadö, chö̧jobekwö ichibadönö jwiinö otiwi̧ jawa iyabo̧sa. Ja̧danö, ötjödasa, sulabetjö juluwinadö tjo̧'wo̧ tjöwana̧lökwe Diosma. Jobadönöma, Chi̧tji̧mu, jö̧ba̧lö, öbabo̧sa.

Romanos 5:8

Jo̧kwaijayonö, jojodödanömabö̧kö̧ Diosma chömöledö. Jo̧bama sule otiwanö ja̧badönöda pjaatoböma ja̧inokobe. Ja̧danö, Diosma wajuwanö i̧sebobe iteda ökwödönö ile niebi̧ma chömöledö. Ina sulabenö ja̧bö dö̧jayi, Cristoma midawö woinobe, ökwödö dö̧jibobö.

Gálatas 3:29

Ja̧danö Cristobedö kwö̧jaduwitjö̧ma, Abraham i̧tji̧mu tupadanö jojodöbedöja, ja̧danö Dios chiyocha jö̧a̧linama kwemaduwakwedöja.

Romanos 8:32

Jau chömöledö, Diosbi, ökwödönö suli̧ waedö̧kö̧ chömöledö, pjabatöma otiwanö pjabato̧. Jo̧bama, a̧'dȩlökönö iteda itji̧nö iyinobe, dö̧jibobö, ¿jö̧tö? Ja̧danö, ökwödönö ile nibebö, iteda itji̧nö iyinobema, jemi tupakwö, ¿okobe jwiinö otiwa jawa iyökenaji̧ chömöledö? Iyena chömöledö, ökwödönö ile niebobetjö̧.

Juan 16:3

Jobadöma Dabe'do Diosnöbi, ötjönöbi wajwitjobetjö̧ jejenö inia tjököbaduwinö ja̧tjakobe.

Colosenses 3:3

böjȩtjö ida̧ökö woköbinaduwobetjö̧. Jau chömöledö, isabenö ja̧kwawa kwujuna̧laduwi̧ma, mölejȩ jawa ja̧kwawada, ja̧danö ja̧ ja̧kwawa kwujuna̧laduwi̧ma ina öwawokobe chömöledö. Wanedö yötawa: Ja̧ ja̧kwawa kwujuna̧laduwi̧ma, Cristoma Dioskwö ja̧nö tojö ujunobedanö ichejekwa, mölejȩbe kwichibaduwenanö kabatö.

2 Samuel 7:19

Jo̧kwaijayonö, ida̧ökö nöinö pjakatajayonö, –Ja'yubeda pjatatajabe, –jö̧ba̧lö, tupakwö nöinö pjakatakwa̧ wene yökawajabe. Jau Chuluwo̧ Isabenö Jo̧ Dios, ötjönö pjakataja̧tjö̧ bajalekwönönö, ina tupakwö lekwe möle ötjö kwömöayo̧ chi̧tji̧mu tupadanö jojodönöbi pjakatakwa̧ wene yökawajabe Chuluwo̧. Isabenö otiwanö pjabato̧ja chuluwo̧, bi̧ya̧ pjakati̧ wene a̧ja̧kwö, ökwödö bö̧jȩ jojodö döwaisachibobö jo̧be, Duluwo̧ Isabenö Jo̧ma isabenö jwiinö otiwanö pjabato̧ jö̧ba̧lö.

Romanos 8:21

Ja̧danö chömöledö, ja̧ möle badekwachenama, böjȩbi ka̧lenatjö laebakobe ichejekwa. Jau chömöledö, okobe jwiinö böjȩ jawama, suli̧ jwöachobe babema. Ja̧ suli̧ jwöachi̧ma, ka̧lena bo̧bedanö ichejekwa. Jo̧kwaijayonö, ja̧ möle badekwachenama, ka̧lena bo̧betjö laebakobe böjȩma ichejekwa, ja̧danö Diosma okobe jwiinö otiwachibanö ja̧akwo̧, ja̧ mölema.

Deuteronomio 14:1

Tupakwö yöawinobe Moisesma, israel jojodönö: —Chömöledö, ökwödö israel jojodöma kwuluwo̧duwi Isabenö Jo̧ Dios itji̧mubedöja. Ja̧danö, jo̧ba itji̧muköbaduwobetjö̧, o̧'wo tjo̧achö 'wikekwaduwoböma jwiobe, ja̧danö kwöwö'yeduwi kwöbasa'ye jwobö loköbaduwobö jwiobe, kwömöledö debö 'yi̧nadönö kwo̧'woduwi tjo̧achi̧ i̧sȩböma.

Juan 11:52

Caifás jejenö yöawi̧ma judío jojodönödama yöawinokobe, jojodö okobe deinö Jesús tjö̧jibinö ö'wöchakwa̧ yöawinobe, wajwiijayonö. Okobe deinö jelobebi jelobe ju̧kwadönöbi yöawinobe. Jesús ö'wöchakwa̧ma okobe deinö jojodö tjö̧jibinö ö'wöchakwo̧, jojodö Dios i̧tji̧mu batjibanö. Ja̧danö, jojodö jelobebi jelobe ju̧kwadöma bakwaibedödanö batjibanö Jesúsma jojodö tjö̧jibinö ö'wöchakobe.

Juan 15:21

Jau, ökwödöma ötjö chömöledököbaduwobetjö̧ ötjönö öpöjödadöma inia tjököbaduwinö ja̧tjakwedö ökwödönöma. Ja̧danö, jobadöma, ötjönö webinanö wajwitjobetjö̧ inia tjököbaduwinö ja̧tjakwedö— Jesúsma yöawinobe öba̧ja̧di̧ waisachadönöma.

Romanos 8:19

Jau chömöledö, ju'winö Diosma ökwödönö kabebö i̧sebakobe, Bidöma ötjöda chi̧tji̧mu, jö̧ba̧lö. Jejenö i̧sebenama, jwiinö otiwakobe chömöledö. Ja̧danö, okobe jwiinö Dios otidina jawama, böjȩbi, böjȩ jawabi ösödinö omukwatö te'ada̧lobe ichejekwa, ja̧ möle badekwachobö.

1 Juan 3:2

Chö̧ja̧wo̧dö chösödawö̧, yötawaduwakwö. Isabenö, ökwödöma Dios i̧tji̧musa. Jo̧kwaijayonö Diosma ökwödönö ina öwawinö i̧sebokobe mölejȩbe ichibö balewachibö dö̧jakwa̧ma. Ina waiya. Wajwidobe ¿dakwö dichejekwakwa̧jö, jö̧ba̧lö? Ja̧danö, domajadenö ¿dakwö omukwatö dö̧jakwa̧jö? jö̧ba̧lö, ina waiya. Jo̧kwaijayonö ja'yubeda döwaisa, biya̧: Cristo yemidanö ichena ökwödöma jo̧badanö babibö dö̧jakwedösa. Ja̧ mölema Cristoma ökwödönö wajuwanö öwawachobetjö̧ jo̧badanö ichejekwadö dö̧jakwedösa.

1 Juan 3:10

Jejenö ja̧nö, öwawinö i̧sekwobe, Ötjöma Dios öibökwesa, Dioskwö dötewinö chi̧'yinö, jö̧ba̧lö. Jo̧kwaijayonö suli̧ jawa ja̧bö 'yo̧ma ju'wi i̧sekwobe, Ötjöma Awetja öibökwesa, jö̧ba̧lö. Ja̧danö chö̧ja̧wo̧dö, yötawaduwakwö. Cristotjö ö̧ja̧wo̧dönö ösödökönö jo̧ma i̧sekwobe, Ötjöma Awetjakwö dötewinö chi̧'yinö öibökwesa, jö̧ba̧lö. Jo̧ba ö̧ja̧wo̧dönö öpöjödo̧ma Diosma öibökökwe. Chö̧ja̧wo̧dö isabenö, bakwo̧ ö̧ji̧ma i̧sekwobe, Dios öibökwesakö̧, Awetja öibökwesakö̧, jö̧ba̧lö.

1 Juan 4:17

Ja̧danö, chö̧ja̧wo̧dö ökwödöma Dioskwö bakobe dötewinö 'ya̧dösa. Ja̧danö, Diosma ökwödökwö dötewinö 'yo̧. Jejenö 'ya̧nö Diosma ökwödö do̧'wo̧ luwo̧ okwanö öibobe dö̧ja̧wo̧dönö ile nibebö dö̧jobö, jo̧ba ökwödönö ile niebi̧danö. Chö̧ja̧wo̧dö, jejenö dö̧jenama Dios ökwödö dö̧jobö ösödi̧danö dö̧jobe, jo̧ba ile niebi̧ma i̧sebö. Ja̧danö, jejenö dö̧jobetjö̧, Dioskwö dötewinö 'ya̧nö, ja̧danö dö̧ja̧wo̧dökwö ösödabikwawö ju'wi möle, jojodönö lȩekwa yöawakwa̧ möle omukwatö yebaböködösa. Chö̧ja̧wo̧dö, ökwödöma Jesús Dioskwö dötewinö ö̧ji̧danö böjȩnö ja̧nö Dioskwö dötewinö di̧'yobetjö̧ ja̧ lȩekwa yöawakwa̧ möle omukwatö yebaböködösa, Isabenö Dios öba a'o otiwanö dichibakwedösa, jö̧ba̧lö.